[krimbow]

الهدوء .. حالة تنبئ عادة بقدوم العاصفة

الهدوء (النسبي) بالمنبر ... حاجة تانية خالص

سياسة الادارة بخصوص المنبر انو يكون منتدى "نخبوي" اكتر مما هوي "شعبي"
يعني سياسة الادارة بتقوم على تشجيع نخبة الافكار و الاراء و افضلها بقلب المنبر، و محاولة شجب و انهاء وجود افكار غوغائية ...
يعني الادارة بتفضل انو ينكتب بالمنبر موضوعين بالاسبوع و ياخدوا هالموضوعين حقهم الكامل بالنقاش على انو ينكتب عشرين موضوع باليوم و ينمر عليهم مرور الكرام (هاد ازا لقا المتصفح وقت ليقراهم كلهم)

و قد اشرنا سابقا لهالمشكلة و سمينها مشكلة "الاغراق" ... و كان حلها هوي انشاء قسم "حصاد المواقع"

لكن هالشهرين الماضيين انقلبت الآية
يعني بالعادة كان زوار المنبر بين 0 - 9
بالشهرين الماضيين سجلنا حالات فوق الـ 109 بشكل وسطي
و هون ضربنا ايدنا ع قلبنا
ولي
9 نظامي
طيب و الـ 100 زيادة ؟؟؟
معقول يكونوا فارزين 100 عنصر لمتابعة المواضيع ؟؟؟؟
ولي ولي ولي

بعدين انتبهنا انو المشكلة تكمن بالصور المسيئة للرسول، حيث انو الاخوية هيي المنتدى العربي الوحيد يللي عرضت الصور

عموما عودة رواد المنبر لارقامهم الطبيعية الو مدلولين...
الاول:
انو الناس بتفضل تسمع اخبار و تشوف صور نانسي و غيرها عن انو تضيع وقتها بقراية شغلات بلا طعمة متل مواضيع المنبر، و بالتالي كل يللي تعرف ع المنبر بهالطفرة ما عجبو الوضع و بقيوا عم يفضلوا اما مواقع الخلاعة او مواقع الافتاء (و مين كان متأمل بغير هيك ؟)

التاني:
ازمة الصور (كأزمة فلسطين، او العراق، او المعتقلين، او اسكندرون، او او .. الخ) لم تكن سوى مجرد زوبعة في فنجان
او فقاعة و هي على وشك الانفجار السلمي
يعني على الرغم من محاولة بعض الفضائيات عدم قتل الموضوع، إلا انو الموضوع (استُهلك) شعبيا
و خلص صار لازم ينحط ع الرف
و صار لازم نتابع اخر كليبات نانسي و نيللي و دانة و هيفا
و آخر ما تفتق به عقل علماء الاسلام من فتاوي
و للبعض ... آخر ما جاد به مطبخ الشيخ رمزي من مأكولات هندية

بتسمحلي ضم هالموضوع لسلسلة مواضيع "النعيق" ؟؟؟
خوش انهز بدني رسمي