كل فترة بيطلع مراقب بيصرح بوسيلة أعلام : أنو البنزين غلي بس المازوت خط أحمر
وبعد بفترة بيطلع بيصرح : أنو المازوت غلي بس الخبز خط أحمر
وبمرة تالتة : أنو الغلاء موجود بس لقمة المواطن خط أحمر
أنو شو يعني خط أحمر !!!؟
وليش الخط الاحمر عم ينتقل ويتغير كل فترة وفترة
مابعرف ليش بيذكرني هالخط الاحمر . بالخط الأزرق بجنوب لبنان
يلي بينحمل وبينحط متل ماكل واحد شايفو
من جهة هو موجود والكل معترف بوجود خط
ومن جهة تانية بينخرق الخط بدافع أنو ترسيمو غير صحيح
بأختصار الخط موجود بس مو موجود
أو ليكون الخط شفاف مو أحمر ... أنت شايفو أحمر بس هو شفاف . غير واضح . ومتغير
أنا حابب ناقش الخط الأحمر بطريقة تانية
بما أني بعرف . ومدرك , ومتأكد بحكم فراستي ( على فكرة كتير قوية ) . أنو نيتك سليمة
بس ماعم تقدر تعبر . وعم يخونك المصطلح . والواقع . وحتى الخط الأحمر
مشان هيك بدي ساعدك وأقترح عليك ... يا أخي أقتراح صغير . نوصل فيه لنتيجة مع هالخط
شو رأيك ننقلو أول شي . من خط أحمر جزئي . بيحمل شيء معين أني
لخط أحمر اشمل . بيسع بيقلبو كتير من الخطوط الحمر المذكورة
شو رأيك نساوي خط أحمر للفقر . أو لدخل الفرد . وهيك منكون عملنا خط بيسع كل الخطوط المذكورة
أو نساوي مثلا مثلا . خط لنسبة البطالة . وهيك منكون وفرنا شوي تفكير بالخط . طالما في شغل , وفي أنتاج . وفي دخل
وبما أنو الخط عم يخونا . على شوي مو واضح . وشوي شو سقفو . وشو خطو النهائي لهل الخط
رح نحددوا
منعمل مثلا خط للفقر بيتحدد بيقمة معينة للدخل . يجب أن لايقل عنها
وهيك منكون عم نشتغل على خط . ورقم . ونسبة واضحة
والخط الأحمر بيصير رقم واضح يجب العمل عليه
متل إذا عملنا خط أحمر لنسبة البطالة . بيطلع عنا رقم واضح ممنوع أجتيازو
وهيك من كون تحولنا من جدلية الخط الأحمر . لخط أحمر واضح برقم واضح
( يعني هيك منكون عملنا الخط رقمي ديجيتال . وبهي الطريقة منكون ضمنا أنو شغلنا وخطنا صح )
هي فكرة صغيرة . بتساعد بتوضيح جدلية الخط الأحمر
وهيك بيصير الخط واضح . وضوح خط سيرتيل
بما أنو معي خطين حمر . واحد سيرتيل والتاني سيرتيل
ودمتم