تركيب القالب على المدونة
بعد ما عملت فتلة على مواقع القوالب المجانية ونقيت القالب المنشود وقررت انه هاد هوي اللي بدي اعمل صفحتي متله ، بالعادة المواقع اللي بتعطيك قوالب مجانية فيها محل بتقدر تعمل Download للقالب وبكون القالب عادة حجمه أقل من 30 كيلو ( يعني بينزل بسهولة معك من أيا خط ديال آب عادي ) وبصيغة XML ( اوقات بتكون الصيغة مضغوطة (Zip ) بتفك الضغط بتشوف اكتر من ملف اللي بهمنا نشتغل معه هوي الـ XML )
بعد ما يصير ملف القالب على جهازك بتفوت على مدونتك لـ :
1 - اللوحة الرئيسية للمدونة ( الصفحة اللي بتفتح فورا بعد تسجيل الدخول بموقع blogger )
2 - تخطيط= layout
3 - تحرير Html
دائما دائما دائما
قبل ما نغيير أيا سطر بالصفحة هي لازم نعمل نسخة عن القالب
ففي حال غيرنا شي وما زبط معنا بكل بساطة منرجع قالبنا الأصلي ويا دار ما دخلك شر
انسالي الموقع وروح على الملف اللي نزلته من الويندوز وعلى ملف القالب منعمل كليلك يمين ومنختار edit
بيفتح معنا القالب على المفكرة الجاية مع البرامج المساعدة للويندوز ( من أصل الويندوز يعني )
بتحدد النص وبتنسخه
(Ctrl + A )
( Ctrl + C )
بتروح على صفحة المدونة وبتنزل للمربع التحتاني بتعمل نفس الخطوات
(Ctrl + A )
( Ctrl + C )
وبتعمله حفظ ومبروك عليك القالب الجديد
بس في ملاحظة البعض بيتدايق منها ، انه وقت بعد ما بتطبق القالب الجديد بنبهك البلوغر انه في بوكسات انت منزلن بدن يقوم بحذفن حتى يقدر يطبق القالب
يعني بيقصد بده يطير كلشي محطوط بالقوائم الجانبية اللي انت عملتا على قالبك القديم ( صورة - نص - روابط - مدونات صديقة )
لهيك اذا كنت منزل شي بهي القوائم قبل ما تغير قالبك سحاب الشغلات اللي عاملها على جنب لتقدر ترجع تنزلن بسرعة على القالب الجديد
واذا كنت لسعتك جديد بالتدوين فأكيد ما رح تكون لسعتك ضايف قوائم على مدونتك لهيك لا تاكل هم وقوي قلبك وقله روح يا عم شايفلك حذوف البيت بيتك
مع نهاية هي الخطوة بكون القالب اللي اخترته صار مركب وخالص على مدونتك وبتشوف التغيير بشكل فوري بمجرد فتح صفحة المدونة الخاصة فيك
بس نحن ما خلصنا من القالب
رح بيبقى شوية قصص متل تشبيك صور القالب وتزبيط المحاذاة تبع النصوص منحكي فيها بشكل فردي لكل واحد ركب قالب جديد لقله شو التغييرات اللي لازم يعملها ليمشي الحال معه
لأنها بشكل عام بتفرق من قالب لتاني باعتبار انه مافي قاعدة ثابتة لكتابة القوالب ، فكل قالب بيختلف عن التاني من ناحية الكود لهيك بيختلف عن التاني عن المحل اللي بده يتعدل فيه الكود
ومبروك سلفاً علقالب الجديد
