5- هل صحيح إنو الواحد بس يصير مشرف بيصير بجو تاني منفصل عن الجو القديم تبعو ؟ يعني بيصير زميلو المشرف أهم أصدقؤه ؟ إنت تغيرت صداقاتك بعد الإشراف ؟ و شو ردك على إتهام بعض الأعضاء للمشرفين بإنن كلن بيمسحوا جوخ لبعضن مع إنو في حساسيات بيناتن؟
هلق ممكن يكون هاد الحكي صحيح أحياناً، يعني المشرف اللي بيصير مشغول كتير، يعني عليه ضغط وهو مو كتير منظم, متل جنابي يعني، بيصير ما كتير عندو وقت يشارك كعضو فبتخف علاقتو الشخصية بباقي الأعضاء.. بالذات لأني مو كتير اجتماعي.. وبحكم احتكاكنا ببعض على نطاق ضيق بالأقسام تبع المشرفين (اللي أنتو ما بتشوفوها بس على ما يبدو عرفانين شو عم بيصير
) منعرف بعض أكتر ولهيك بتلاقي أغلب المشرفين رفقات ورافعين الكلفة يعني.
أما متل ماني شايف الشباب في كتار وضعون تمام مع الأعضاء اللي مو مشرفين وصداقاتهون تمام... وهدول هنن الأغلبية بين المشرفين وطبعاً عندن علاقات منيحة مع بعض...
أنا إي متل ما وضحت فوق تغيرت شوي علاقاتي وتعرفت على شباب كتير مناح وفهمانين.
أنو بيمسحوا جوخ لبعض فهاد مو صحيح، أكيد في اختلافات ونادراً بتتحول لهلافات.. بس هاد مو يعني أنو في حساسيات وحتى لو كانت موجودة فما حدا بيمسح جوخ للتاني كون على ثقة..
6- إنت ومشرفة تانية ... عليكن نفس الملاحظة ، بتتدخلوا كتير بالمواضيع و بتبينولنا "أشكرة" إنو حطيتو لمساتكن السحرية بالموضوع ... هل هيي ديكتاتورية ؟ أو حب لإظهار السلطة تبعكن ؟ أو لخدمة الموضوع فقط ؟
هلق شريك لما كتبت هاد السؤال شو كنت متوقع أنو جاوبك؟ أكيد لخدمة الموضوع حصراً.. وبالمناسبة أنو ادخل واكتب تنبيه إلو علاقة بالموضوع هو أقل تدخلاً من أنو خالف حدا..
7- في كتير ناس بيقولو إنو من إيام كريم "الله يرجعو بالسلامة" لهلأ ... خف كتير هامش الحرية بالمنبر ... شو ردك و بتجرد ؟
إي أكيد خف هامش الحرية مع اختلاف الوقت والظروف وعدد ونوعية الأعضاء.. أكيد بتمنى أنو كون قادر أعمل المنبر مو بحاجة لمشرف بس الموضوع أصعب بكتير من ما منتخيل والمنبر بحاجة لقوانين وحدود واضحة ليضل مسار النقاش والمواضيع بمكانو الصحيح
8- شو هوي الشي اللي مانك رضيان عنو بأخوية و بتتمنى تكون إلك سلطة تغيرو ؟
المنتديات الدينية. بتمنى شيلها من المنتدى كلو
9- لو كان عندك سلطة حجب العضوية تماماً ... مين هني الأعضاء اللي فوراً بتتخذ هالإجراء بحقن ؟
ما في حدا معين.. بس يعني الطائفيين.. بتمنى بس كمان ضروري أنن يشوفو المنتدى ويتعلمو إذا كان ممكن من الأعضاء العلمانيين احترام بعض بغض النظر عن الدين
10- لو صحتلك فرصة للهجرة بتسافر ؟ و شو البلد المفضل ؟
إي بس مو على عماها.. يعني في مشروغ علق وبركي بيمشي الحال لأنو مفيد كتير إلى مهنياً
11- شو ممكن تأيد من الأمور التالية لو فرضنا جدلاً إنها كلها قابلة للتحقيق:
وحدة عربية كاملة - وحدة لبلاد الشام - وحدة سوريا و لبنان - وحدة سوريا و العراق - وحدة سوريا و مصر- التضامن العربي - الحلف السوري الإيراني - حلف يضم الهلال الشيعي - المحور السوري المصري السعودي- انضمام سوريا للإتحاد الأوروبي(و طز بالعروبة ) - الشراكة الأوروبية المتوسطية - السلام الشامل مع اسرائيل (شامل يعني من دون قيود ، متل نحنا و تركيا) - صلح تام مع أميريكا مع زيادة نفوذها في سوريا على حساب إيران أو روسيا و الصين .
يعني هاد السؤال صعب.. لأني ما متعود فكر بالسياسة بعي الطريفة، بس بكل الأحوال ما عندي أي مشكلة بانضمام سوريا للاتحاد الأوروبي متل البلدان العادية بينما الشراكة ما بعرف يعني صعب تكون شروطها مناسبة لسوريا وللأوروبيين كمان
12- إذا في شي سؤال زعجك ... شو هوي ؟ و ليش ؟
ولا واحد زعجني ولا واحد من تبعولك قصدي
تحياتي
لك أهلين حبيبنا وشكراً إلك