يمان Rooooonaldo
مطرحك بالغرفة المظلمة ... ليش ؟
لا مو الغرفة المظلمة.. هي الغرفة السودا بالعربي وهي الغرفة اللي بيصير فيها تحميض الأفلام وطباعة الصور
بتحب الظلمة ؟
يعني لا ما كتير، بالذات أنو بتعزبك كتير بالتصوير، يعني عالضو بيصير فينك ما تفكر كتير بالأمور التقنية وتصير تشتغل عالصورة كفكرة وتشكيل.. إلخ
صورتك الرمزية .. كلا ظلمة .. وطالع منا شعاع الخط الابيض .. الي وقت بفوت الموشور .. بيتحلل لالوان الطيف ال 7
خيو هاد غلاف ألبوم كتير عزيز عليي وعلى كل اللي بيحبوا Pink Floyd وموسيقى الروك بشكل عام.. الألبوم هو the dark side of the moon واللي بيحكي عن فلسفة حياة كاملة... شي عظيم يا شيخ.. لازم تسمعوه كلكن
بدي اسالك ... شو اكتر شي ظلمك بهي الحياة ..
هاد السؤال بدك تسمحلي ما جاوب عليه
بتعتبر حالك من العالم اللي شايفة حالا؟
يعني حسب.. بحب حالي بس ما كتير شايف حالي
اقرب عضو + عضوة الك من المنتدى
عضو في ياس و زا لايت
عضوة ريمي ونيرفانا..
كلهن أسماءهون بالأجنباوي
بحياتك العامة .. حابب؟متجوز ؟ عزابي؟
حابب وطابس وعشقان
عرف الخيانة ...
جاوبت عليه
بالله ممكن تفهم جاد بس .. انو ليش المماس بكون عمودي على نصف القطر جوا الدائرة 
لأنو نصف القطر عمودي على المماس.. بس لما بتكون عم تحكي هندسة فراغية بيبطل هاد الحكي صحيح دائماًَ
انت من وين من سوريا ..
أنا ساكن بالشام
رأيك بهالكام شغلة :
الحياة
حلوة للي بيحبها وبيفهمها
الحب
هو الحياة والعلاقة متعدية
العلم
المستقبل.. كل ما بعدنا بالعلم عن إنسانيتنا كل ما بطل علم
الاختراعات
انقرضت
الديمقراطية
اللي عايش فيها مو حاسس بقيمتها.. واللي خايف منها عندو مشكلة
كرة القدم
يعني ماشي حالها بس الرغبي أحلى
حمص
دار السلام.. حيث الوقية 250 غ... شو بدك تتوقع؟
المسبحة
تبع التسبيح ولا تبع الأكل؟
رايح شي عالجامع الاموي ؟
شي 1000 مرة
لو خيروك تزور بلد ما بالعالم وين بتروح ؟
الأرجنتين ونيويورك والتيبت
لو معك مسمحلك انك تقابل انسان + انسانة .. ما بتتوقع كنت انك تقابلهم مين بتطلب مقابلة مين ؟
nick mason, the drumer of pink floyd
شو بدك تقلهم
بقلو بس بالانكليزي لأنو هو ما بيعرف عربي
thanks for getting me to be so interested in music and in druming
شغلتك بالحياة شو ؟
مصور فوتوغراف
بتعتبر حالك انجزت شي بالحياة اما لا؟
إي.. شرحت عن هاد الموضوع
احب اسماء ولاد وبنات عندك
كمان جاوبت
شو رايك بالبيت التالي:
ان الحياة حبتك كل كنورزها فلا تبخلن على الحياة ببعض ما
يعني فيه فكرة كتير واضحة بس مو حلو
بتعتبر حالك مثقف ؟
خسب شو المثقف
او من نظرة اخرى بتقرا كتير؟
إي.. كنت اقرا أكتر بس لهلق بقرا
الادب الروسي .. شو رايك فيو .؟ ايجابيات / سلبيات
هو أدب غني ومهم فكرياً ولغوياً بالذات انو انعطى حقو بالترجمة الجيدة
بس بحسو كتير مسيس زيادة عن اللزوم (بشكل عام عم بحكي عن اللي أنا قاريه بس)
وين مسافر بالعالم ورايح بلدان ؟
فرنسا ولبنان وحمص
حافظ النشيد العربي السوري ؟
إي.. بصم
وقت بتسمعو ... بتحس بشي جواك متل قشعريرة .. او عادي كانك عم تسمع ايا شي طالع؟ يعني بتحس بقيمة النشيد تبعنا اما لا؟
حسب.. أحيانا مع أني ما كتير بحب كلماتو لأنها موجهة للجيش ولا لحنو لأنو متل الأناشيد المدرسية
بس بحبو كتير لأنو نشيد بلدي وبفتخر فيه