[قرصان الأدرياتيك]

ayhamm بس النقطة المثيرة للانتباه من بعض التعليقات هي حملة التخوين الفظيعة ضد الاكراد, يعني كل كردي هو خائن وعم يطالب بالاستقلال عن سوريا حتى تثبت برائتو و هالبراءة ما بتثبت الا اذا كان موالي للنظام و عم يردد امة عربية واحدة

أهلا...
إذا كان كلامك موجّه لمشاركتي، كوني ذاكر "التخوين" فبتمنّى عليك (مرة تانية) قبل ما تعلّق تقرا المشاركة منيح وما تطفّ عليها... يعني أنا حطيت بين قوسين معقوفين أنّو كلامي موجّه لكل من يحكي بهيك أسلوب (متل ما جاء بالخبر). وما بعرف أنّو تخريب منشآت وحرق علم البلد، ورفع علم قوميّة أخرى لسّاتها مانها دولة، شو بيعني بنظرك؟ وطنيّة مثلاً؟! بكل الأحوال أنا ابن هديك المنطقة وربيان طول عمري هنيك وعنّا إذا بدّك المدن والقرى الشماليّة في غالبيّتها العظمى كرديّة، وبنعرف تماماً كيف بيعيشوا وكيف بيفكروا... فبقى مو ناقصنا دروس تنظيريّة، بتكفّينا الدروس العمليّة الآخدينها هونيك! والقضيّة مانها نظام وموالاة وأمّة بطيخيّة... إلخ!
المسألة أنت سوري ولا لأ؟ بيقلك كردي وبلدي كردستان... طيّب ليش أنت عايش هون؟ لأن هي قطعة من دولتنا الكبيرة، ويوم من الأيام رح ترجعلنا متل ما كانت بالتاريخ (طبعاً التاريخ ما بيقول هيك).
هاد أوّل باشتان...

بتمنى من اللي عم يلقي التهم هيك وهيك يشفلنا كم حزب كردي من الاحزاب الموجودة برا سوريا عم يدعي للانفصال عن سوريا؟؟ معلش نبهونا اذا كنا غافلين.........

طيّب أنا رح خبرك وبلكي تتنبّه، ورح أحكيك عن أحزاب الجزيرة (يللي جوات البلد مو براتها)، في عنّا أكثر من 17 حزب كردي بيناتهن أكتر من 17 بيدعو للانفصال!!! ولو أنّو في حزبين منهن بيحاولوا يلطفوا الأجواء عبر الدعاية والإعلام، بس إذا بتفوت بين الأعضاء بتشوف أنّو وييييييييييييييين حكين ووييييييييين مطالبهم وأهدافهم الحقيقيّة.
وكرمال ما تقول هيك ولا هيك رح أعطيك مثال... أنا بزماناتي زرت العراق مرّة وحدة ودرت من الشمال وحتى بغداد... الشمال دولة مستقلّة وإذا بدك تدخل على أراضيه لازم تتفتّش وينشاف بسبورتك ومن هالحكي، المهم بعد ما تدخل للشمال الشمال رح تشوف لافتات الطريق بالكرديّة والحكي بالكرديّة والمدارس والأسواق بالكرديّة... إلخ! وأنا شخصيّاً ما بدّي يصير هالشي بمنطقتي... أنا ولدت عم أحكي عربي (مع أنو قوميتي مو عربية) وبدي حافظ على لغتي هي وبلدي هاد واللي مو عاجبو لــ حفض القرد! (طبعاً هون الكلام موجّه لكل من يطالب بانفصال منطقتنا عن جسد الوطن الأم).
هاد تاني باشتان...

الا اذا كانت المطالبة بحقوقن متل تعلم لغتن الخاصة فين و غيرو تعتبر مطالب بالانفصال.

يا رجل أنت مصدق هالحكي؟! والله العظيم زعلان ومن كل قلبي أنو السوريين مو عارفين شو عم يصير عنّا وكأنّو نحن من كوكب آخر... وأقسم بذات العزّة أنّو نحن محافظة من سورية...
تعا خال لودّيك بإيدي لعند شي 5 أساتذة لتعليم اللغة الكرديّة في المناطق حيث الأقليّة كرديّة. لأن حيث الأغلبيّة ما في حاجة لتدور على أستاذ... لغة البلد كلها هيك بتكون...
وأنا، وأعوذ بالله من كلمة أنا، أخدت كام درس على إيد أستاذ كردي وبكتاب يعلم اللغة الكرديّة بالعربيّة يُباع بمكتبات القامشلي...
فأنو مطالبة وأنو حقوق... هن بدن مدارسن وكل شي عندن بالكرديّة، ليش يا أخي بالكرديّة؟! ليش وين عايشين نحن بطوالستان؟! لغة دولتنا الرسمية هي العربيّة وبدّا تضل هيك حتى يقترحولنا لغة بديلة، وحتى ذلك اليوم المعهود... إي حتى ذلك اليوم... بلاها!
هاد كان الباشتان التالت.

من جهة تانية الغريب بالموضوع انو كل كردي سوري بيتم ربطوا بطريقة عشوائية باكراد العراق

سمعان شي مرّة بالـــ"بَشْمَرْجَة" (الجيم مصريّة)؟!
إذا مو سمعان فيها حوّل زيارة لعندي هونيك، ومن عيوني بتاكل وتشرب وتنام ببيتي (أمان لا خوف عليك)، لفرجيك عناصر البشمرجة التابعة لأكراد العراق!!!
وعلى فكرة هونيك صاير مافيات... وإذا ما عرفت بمين تحتمي بتروح عليك!
فالموضوع لا ربط عشوائي ولا منظم... واضح متل عين الشمس، وإذا دولتنا ما عم تعرف كيف تتصرف بهداك البلد التاني (قصدي محافظتنا) فلا تترجّى كتير في المستقبل... شنّو بتكون راحت عليها.
ولمزيد من المعلومات عن محافظة العجائب: يُمنع فتح أي نادي خاصّ بقرار من شعبة الأمن السياسي وما أدراك ما شعبة الأمن السياسي!
ويُمنع بيع وشراء أي عقار إلا بموافقة خطيّة من العاصمة الدمشقيّة.
كما يُمنع ويُمنع... بتعرف ليش؟!!!
بسبب الأكراد. (آخر باشتان).

والسلام عليكم ورحمة الله وبركاته .