sona78
يسعد صباحك شوش ( هيك الكل بينادوكي فقلدناهون
)
اي فيكي تناديلي شوش 
كم سؤال خفاف نضاف
عليهم 
شوش مين هيي باتوسة اسطر؟
شوش .. بنوته سوريـّة للعـظم 
20 سنـه مع كمشـه مبادئ و قصص .. عم ادرس هندسه عماره حاليا ً .. بحب الفن بكل اشكاله ( رسم تصوير مسرح ميوزك آداب .. الخ )) و بهالمناسبه فخليني قول انو عم نجهـّز لمعرض بأيلول حاليا ً و الجميع معزومين .. بكره الكذب و الخيانه و ما بسامح عليهم بنوب بنوب بنوب بنوب كل شي تاني ممكن ينبلع معي الا هالشغلتين .. مزاجيه نوعا ً ما ..
هيك فيكي تعتبري انو صار عندك خلفية عن اهم الأشيا بشوش ..
خبرينا شو بيعنيك التصوير؟؟؟ وهوي هواية وبس ولا بتحبي تخليها مهنة ؟
التصوير شـــغلة كبيرة .. التصوير العادي اليومي يعني بدون ما يكون فني هو ايضا شغله كبيره ..هو تثبيت للزمن .. للذكرى .. للوقت .. هو الآله اللي بترجعنا بالزمن لورا ..
لولا الصور ما كنا عرفنا كتير اشيا تاريخيه او سياسيه او كتير غيرها يعني بعتقد اله التصوير من أهم الاختراعات اللي حصلت بتاريخ البشريه .. قبل التصوير كانت الناس تدفع للرسامين مشان يرسموهم و يقدرو يحتفظو بصورهم و يمرقوها لاولادهم و احفادهم و هالشي كان ياخد اوقات كتيره كماكانو يستأجرو رسامين ليرسمو الأحداث المهمه ( انتخاب ملك مثلا ً أو انقلاب شعبي ) هيك أحداث هلأ بنوثقها بصوره و نرمزلها برسوم لكن بوقتها كانت الرسمه هيّ كل شي .. بعد اختراع اول اله تصوير بدأت كتير مقايس فنيه تختلف .. يمكن التصوير الفني من أجمل الفنون .. انك تقدري تلتقطي احساس تلقطي .. تلقطي جوع فقر .. فرح ابتسامه .. زاويه ..
بالنسبه للشق التاني من السؤال فأنا كنت آخده هوايه و عالخفيف كمان و لكن حاليا ً بجامعتي صار في نوع من العصلجه ببعض الامور بالنسبه لبعض الموا د و توزيعها و بذلك قد يتأخر تخرجي فتره و اقدر ادرس شي تاني بنفس الوقت .. كنت سابقا ً بلشت اعمل مسرح و لكن قد ما يمشي الحال كتير بالمسرح كمـّل نظرا ً لجدول اوقاتي و المسرح يستهلك وقت كبير جدّا ً لذلك الخيار التالي هو رسم و تصوير كتخصص يعني
كونك بالغربة .. شو قدمت هالتجربة الك ؟؟ سواء شخصية بحتة او بنطاق عام
الغربة .. قدمتلي كتير .. يمكن صعب اقدر عد شو قدمتلي بواحد تنين تلاته هيك لكن يعني عالم مختلف عادات تقاليد مختلفه .. يعني جزء من تقبل الآخر و التعايش معه و اذا بدك الانصـهار فيه كمان مع المحافظه على الهويه الأصليه و المبادئ الاساسيه .. أنا طلعت من سوريا بمرحله عمريه حرجه ( متل ما بقولو ) يعني فتره مراهقه و تكوين شخصيه و تسالي .. فالغربه او خليني حدد أميركا تحديدا ً لعبت دور بتوجيه شخصيتي .. المبادئ و الجزور الفكريه ذاتها تقريبا ً لكن اكتملت بالغربه ..
كتير اشيا .. متل ما قلت صعب عددهم و اذكرهم كلهم لانو ما بقدر افصلهم كتير عن شخصيتي قبل و بعد و هيك
اكتر شغلة ايجابية بغربتك شو هيي
فيكي تقولي انو متل ما ذكرت سابقا ً نمتلي و وجهتلي شخصيتي و مبادئي و علمتني اعتمد على حالي و حالي فقط فقط .. و انو الحقوق هو شي بتاخد ما بينعطى ..
واكتر سلبية كمان ؟
سلبيات الغربه تقريبا ً معروفه لكن انا ما كتير بحب اطلع عالسلبيات بالأمور لانها ما رح تعمل شي غير انها تضارب عالايجابيات لذلك بلاها
عندك احساس فعلا انو ممكن تكبري بالغربة ؟؟ ( اقتباس من موضوع الك على ما اظن
)
همممم .. حطيتي ايدك عالمنطقه الحساسه هلأ .. اي كنت من فتره عملت موضوع بهالخصوص ..
أنا اليوم عمري 20 سنـه رايحه باتجاه الـ 21 .. طلعت من سوريا كان عمري حوالي 15 سنه او شي هيك .. برجع زياره شهر بالسنه او السنتين .. فمابعرف اذا فعلا ً فيّ ارجع بسهوله .. بدي لخلص جامعتي هون كمان شي سنتين تلاته يعني بوقتها بكون صرلي بين 8-10 سنين برا البلد .. أنا رغبتي الشخصيه اني ارجع لكن هالأمر بتعلق بأكتر من عامل :
أولهم هو قدرتي على اعاده التأقلم ..
2. يعني هوّ عاده الناس بترتبط ببعضها و هيك 
و بيعملو عيله فقرار اني ارجع عسوريا او لاء او يعني اني اكبر بالغربه و عمـّر فيها او لاء هو قرار مافيّ قرره لحالي اذا كان في مشروع ارتباط رسمي من هون لوقت خلص درس ( حاليا ً مافي مشان الاشاعات يعني ) .. لكن وقتها بتكون صارت القرارات مشتركه و البقاء للخيار الافضل للمجموعه و ليس الفرد ..
3. بنتركها للظروف و ما تحمله من مفاجآت ..
واخيرا
شو درجة حرارة الزيت يلي عم تنقلي فيه ؟
هممم .. حاليا ً لسـّا عم يشعل .. فلساته عالخفيف ..
وبتفضليه زيتون ولا مزولا؟
زيـــتوووون
وسلامات
سلامه