[قمح]

فيرجينيا وولف كانت بتسمع أصوات .. ما فهمتش إيه المشكلة يعني لما تسمع أصوات .. لكن أول ما بدأت اكتب فهمت .. وما بقتش أشيل حاجات تقيلة في جيوبي ..

حاسة إني تلاجة .. مقفولة .. ومخزنة الحاجات جواها .. وبتفتح حتة صغيرة أوي .. تديك حاجات باردة ومالهاش طعم .. وكل اللي بتاخده بتبرده وتشيله .

عارفة إن ت . س . إليوت كان في مصحة عقلية ؟

ساعات بابقى نفسي أدوس بنزين على الآخر وأسيب الدركسيون وأغمض عينيا
ودلوقتي من الساعات دي ؟
ها ها ها .. لأ .. أنا عندي اجتماع مهم بكره عاوزة أكون موجودة فيه بشحمي و لحمي .
( كتابة علاجية ؟ هأو أو أو .. شي الله يا علاجية ! )

حلمت إني جيت أروح الشغل الصبح ، نزلت لقيت عربيتي اتسرقت ، قعدت أعيط أعيط أعيط و محدش في الشارع شايف إني بعيط .. وصحيت لقيت عينيا منفخة ..

( لأ لأ .. حاسة زي ما أكون حتة خشبة ناشفة .. عندها استعداد تام للاشتعال في أي لحظة ) .
سامع الصوت ده ؟
صوت إيه ؟
صوتي .. وأنا بتفتت .. حتت صغيرة .. صغيرة ..