اقتباس:
كاتب النص الأصلي : almurtaja
والله انا ماني بالحكومة أو بالأمن لحتى جاوبك عن هيك أسئلة هلأ أنا ماني مع كلشي عمبيصير بالبلد أكيد وعندي كتير شغلات بنتقدا بالبلد و أولون رامي مخلوف بس رامي متلو متل التجار الكبار اللي كانو قبلو كان كلشي بايدون وهلأ الزلمة اجا وقتوا وعرف يستغل الوضع يعني متلو متل بقية هالتجار و أكيد استغل القربة من الرئيس بشكل خاص ويفيدوا
بالنسبة للمنطق أنا هادا المنطق اللي شايفوا صح وكل واحد والوا وجهة نظروا بالأمور يا حبيبي وأنا لاني عمبستهبل حدا ولاني عمبتضحك على حدا ببساطة هادا أنا وهي أفكاري واللي حبو أهلا وسهلا واللي ما حبو كمان أهلا وسهلا لأني أنا بحب كل واحد يعبر عن رأيوا ولو ماني هيك ماكنت بفوت على هالموقع الحلو
بس الظاهر الأمن عنا بالبلد عندو وجهة نظر تانية بالنسبة للموقع يمكن لأنو حسب ما عرفتانو بصير شتم وذم للرئيس وأنا برأيي الرئيس مالازم ينشتم بأي حال من الأحوال لأنو هي مااسمها ديمقراطية
|
المشكلة ليست برأيك من عدمو.. كل واحد على آرائو هاد أمر طبيعي (على الأقل نحنا نؤمن بهالشي...) لكن كمان بعتقد انو ما يصح الا الصح... و بعتقد انك عم تحاول تطالع تبريرات لأشياء لا مبرر لها و لا يمكن تبريرها.. و منها السجن السياسي ان كان لعارف دليلة و ان كان لكريم عربجي.. أي شخص انسجن بسبب التعبير عن رأيو..
و عم تفوت ببراغماتية.. يعني بتقول انو رامي مخلوف "عرف يستغل الوضع" .. انو هون بتزكرني بواحد صاحبي طبّق وحدة بشعة... انو يلعن سماها بشعة من وين ما تطلعت عليها بشعة.. و يجي يقلك شو رأيك فيها و ما بدك تزعلو... شو بك تحكيلو... اجي أنا شو بقلو؟ بقلو "مبين عليها ظريفة و حكياتا حلوين" .. اي انت عم تعمل هيك يا معلم.. الـ "عرف يستغل الوضع" هاي ما بدها ترجمة.. يعني سوريا صارت "ألدورادو" لحتى شب عمرو بالتلاتينات أبوه ضابط بالجيش جمّع هالمليارات؟ من وين يابي؟ انو شو مشان؟ و متلو كتار.. يعني فراس طلاس من وينلو؟ هداك ابن الشهابي صار ملياردير بأميركا كمان من وينلو؟ ولاد جميل الأسد عم يتخانقو مع مرتو ع 4 مليار دولار (هاد حكي مو من عندي... واصلين للمحاكم و في ثبوتيات) .. طيب من وينلو؟ و الحلو انو هدول موجودين بالبلد و عم يسرحو و يمرحو بالبلد و نحنا عاصبين عيوننا و بس نحكي عن خدام.. ما خدام حرامي من هالحرامية متلو متل السالف ذكرون.. فقط انو غباؤو خلاه ما يعرف يلزم حدو و راد يلهط أكتر.. فكحشوه
أما بخصوص الموقف الأمني من أخوية.. أخوية ما عملت شي غلط.. بس يبدو في ناس يكهربها وجود مساحة حرة.. يخافو أخي.. عن جد يخافو... تسألو ليش حاجب الموقع و يقعد يبيض عليك نظريات أمنية بتهوّي... و كلو يمشي بسياق "العلاك المصدّي" ...
لذلك لا تفكر انو عم قلك هالحكي مشان رأيك... انو رأيك عالعين و الراس.. و ما فارقة معي موالاة أو معارضة و للا بتشجع الكرامة و لا بتشجع الوحدة... الله وكيلك هالحكي كلو ما بيفرق.. و لو كلنا بنفكر عالسوا كان ملينا بهالمنتدى.. بس انو الله يخليك لا تطالع تبريرات لشي مستحيل يتبرر و مالو منطق... كونك تحب هالزلمة أو هالنظام لا يعني انو بدك تبرر كل شي... ما بخفي عليك انو في ناس قريبة علينا و حبايبنا بالسجون عم يتدمر شبابها و عم تروح حياتها.. و ع حكي.. ع رأي... فانو حرية رأي عالعين و الراس بس لازم تكون معي من حيث انو مستحيل نقدر نحكي عن حرية تعبير و رأي و بنفس الوقت عم نبرر شغلات لا يمكن تبريرها.. الغلط غلط.. مو صح؟