" تطــــــــوع "
أنا بهالفترة صاير نشاطي عشرين ضعف ، فتحملوني شوي ..
في فكرة براسي " ما متبلورة تماما " ، فساعدوني ببلورتها وتزبيطها
المشروع : موقع انترنتي ، يضم الجمعيات ، والمؤسسات والمشاريع وإي خطوة تطوعية شبابية بسورية
الهدف : بدنا الشباب السوري يتطوع " يعمل شي ، يعني نحنا بأخوية جماعة عنا هدف مو ؟ " إي عنا ، يمكن أوقات ما مننتبهلو ، اوقات في ناس حاملتو اكتر من ناس .. وناس لسى ما وعيتلو ، بس بالنهاية عنا هدف "
ومدام هدفنا بنائي لهالشباب السوري ، فبدنا ياه يعمل شي ، يا فرحتي هالشباب السوري عم ينبنى بالنهاية ما عم يعمل شي عالأرض ، يمكن لأنو ما في جمعيات عم تخاطبو ، يمكن ما عم يعرف يوصلها ، يمكن .. يمكن .. يمكن ، بالنهاية ما بيهم السبب
بالنتيجة في غياب للعمل التطوعي ..
نحنا اللي علينا منعملو ، وانا شايفة انو اللي علينا نقدم للشخص اللي حابب يتطوع بإي مدينة بسوريا ، الفرصة أنو يعرف ويوصل ويختار .. ونقدم لهالأعمال دعم معنوي ولو صغير بأنو ننوه ألها ونبشر فيها وندعو العالم ألها
وظيفتنا نلغي الحجة عند اللي عم يقول أنو الشباب السوري .. ما طالع بإيدو يعمل شي ، ما في جمعيات وما في وما في ..
وظيفتنا .. نحنا نعمل جسر .. بلكي هالبنوتة اللي قاعدة عم تحضر عاصي وبعدو الحب المستحيل وبعدو مسلسل تركي بايخ ما بعرف اسمو .. بالدعايات إذا لقطت الموقع ، تقرر أنو يعني تشارك بشي عمل مفيد
بلكي هالشب اللي ما عرفان يلاقي جماعة ينتميلا .. وقضية بتعنيه جوجل يسوق رجلو لهالموقع ؟
هلق اللي بدي تساعدوني فيه :
- رأيكن بالفكرة ؟
- مدى قدرتكن على العمل بواحد من فروع تنفيذ الفكرة ، ( اللي رح اكتبن تحت )
- اقتراحات تطويرات .. إلخ إلخ
|