اقتباس:
كاتب النص الأصلي : maged-syrian
لازم يكون لكل طرف قانون أحوال مدنية مستمد من الشريعة الخاصة بالدين الخاص فيه
مو معقول مسلم يطبق عليه قانون أحوال مستمد من الديانة المسيحية .. أو مسيحي بيطبق عليه قانون أحوال مستمد من الشريعة الاسلامية !! بتصير فوضى ...
|
الغريب ان الحكي عم يصير على انه لا يا معلم كيف عم تقول القانون الجديد ما فيه ايجابيات وما عم يحقق العدالة .. ليكه مخصص اجزاء كاملة للمسيحيين ولليهود .
بصراحة ما عم افهم كيف ممكن اعتبار هلنقطة ايجابية .. على علمي اننا علطالعة وعلنازلة مندعس ومنهزّء التجربة اللبنانية لأنها مبنية على توزيع طائفي .. على هلحال وضعنا مخجل أكتر ومهين لإلنا بشكل أكبر لأن هنيك في توزيع حقوقي على اساس طائفية مو بس تعامل على اسس طائفية متل ما صاير عنا هون .
من عندي بقلك انا ضد انه يكون في شي اسمه قانون خاص بالمسيحي ، على عيني حرية اعتقاد وحرية شخصية واختلاف المقاييس بين الاديان
بس المسيحي على راسه ريشة مثلا ليمشي على قانون خاص فيه ؟ طالما هوي عايش بسوريا لازم يمشي على القانون السوري متله متل البقية
بس بظل عدم امكانية تجميل بعض المقاطع وخلافها مع العقيدة المسيحية صار في قسم خاص بالمسيحيين
على هلحالة كل 200 زلمة بيعملوا طايفة جديدة بطالبوا بقانون خاص فين !!! لا بل يعتبر مطلبن هاد " حق " وواجب على الدولة تحقيقه من باب العدالة !!
لهيك ما رح فوت معك بقصص وضع تشريع خاص بالمسيحيين وعلى اي اساس تم وضعه وهل هوي فعلا مبني على اسس مسيحية ولا كيف
لأني ما بشوفله داعي بالأساس وبعتقد موقفي واضح بموضع قبل هاد وقت تم تخصيص الحكي عن الجزء الخاص بالمسيحية .. فما بدنا نحكي بأشياء حيكنا فيها مسبقا .
انا اللي بعرفه بأن الدول اللي بتحترم شعوبها ما بتعمل على التفرقة وعلى وضع احكام منفصلة لكل واحد
بتحط قانون لمواطنينها بكافة أطيافن ما بيحمل ايا تفضيل للواحد عن التاني وما بيعمل أيا نعرات طائفية وايا تفريق
وبنفس الوقت بتضمن حد أدنى من القيم والأعراف بيمنع على المواطنين النزول تحتا
يا أخي خلينا ما نلبس تياب جاهزة ونستورد تجارب العلمنة الأوروبية خلينا نجي نفصل على قياسنا ..
فئة كبيرة من الشعب متدينة وبدها اتطبق الشرع الخاص بدينها .. حلو شي كتير عظيم
اتطبقه بما يتعلق بأحوالها الشخصية فقط .. انه يا أخي بده المسلم يتزوج 4 يتزوج ما حدا بيجبره على منع هلشي
بس وقت بده يتزوج من طائفة تانية لازم يمشي على أعراف الزواج المعممة على الكل بعيد عن ايا تفضيل لدين عن التاني
وهاد اعتراضي الشخصي على الموضوع
يا أخي نحن هيك ما منقدر نهمش الجانب الديني للمواطن السوري والجانب الديني كتير كتير ضروري ( مع انه شي مخجل جدا انه تم الاشارة بأحد الأجزاء إلي اني مسيحي ويفترض كون على اضطلاع بقوانين الدول الغربية !! وكأن اللي بهويته مسيحي أجنبي عن هلأرض وأقرب للغرب منه للوطن اللي حامل همه ليل نهار )
يكون في أقسام خاصة بكل طائفة بناء على المعتقد الخاص فيها
بس وقت منصير بالجانب المشترك .. بالجانب اللي بيربط أبناء الطوايف المختلفين ببعض لازم يكون القانون حيادي وعادل ، لأن ما بتصير العلاقة أغلبية وأقلية
بتصير العلاقة مواطن مع مواطن وعلى القانون تحقيق المساواة بين المواطنين دون تحيز ودون وضع افضلية لواحد على التاني وهلشي موجود وبوضوح كتير كبير بقانون الأحوال الشخصية اللي بين أيدينا ... بتمنى كون وصلت فكرتي .
وهي شوية امثلة على التساوي بين الطوايف بالأمور اللي بنتمي المعنيين فيها لأكتر من طايفة
اقتباس:
|
"تجوز شهادة الذمي إذا كانت الزّوجة كتابية، حين الضرورة ولكن لا يثبت الزواج إذا جحده الزوج المسلم، ويثبت إذا جحدته الكتابية"
|
اذا حدا بين معه فين بقيت قيمة المواطنة بعد ما نزلت لبين الرجلين .. خلي يدلني عليها
اقتباس:
|
"يحرم المرتد عن الإسلام أو المرتدّة من الزواج، حتى "ولو كان الطرف الآخر غير مسلم "
|
وكأن العقيدة الدينية والانتماء الديني هوي اللي بيسمح للإنسان تاسسيس أسرة من عدمه
يا أخي انا بآمن بسعدو شو اله حدا عندي حتى يمنعني اتزوج !!
والمهزلة الفعلية بهل مقطع هاد :
اقتباس:
|
"الأم الحاضنة غير المسلمة أماً كانت، أو غيرها، تستحق حضانة ولد المسلم، حتى يعقل الولد معنى الأديان، أو يخشى أن يألف غير الإسلام وإن لم يعقل الأديان، لأنهن أحرص على حضانته على أن لا يتجاوز عمره أربع سنوات "
|
انا واحد من العالم اللي بيفخروا بسوريتن وانه هويتي الشخصية مافيها خانة " الديانة " وبيفخروا ان الدستور السوري فيه مواد وفقرات بتقول
اقتباس:
|
"المواطنون متساوون أمام القانون في الحقوق والواجبات"
|
اقتباس:
|
" جميع المواطنين السوريين متساوون أمام القانون من دون تفرقة بين دين أو جنس أو عرق"
|
لهيك بشوف مشروع اللي بين أيدينا وصمة عار رح تبقى بجبيننا .
بس بتمنى حدا يجاوبني انه كيف بدنا نقدر نوصل لمفهوم مواطنة المبني على الانتماء للوطن دون وجود اعتبارات أخرى .. ومبني على احترام الشريك الآخر بالوطن والنظر إله على انه " آخر " اذا القانون ما قادر يعمل هلمساواة !!
اقتباس:
عالهامش : عندي فضول كبير أعرف شو قانون الاحوال المدنية الخاص بتسيير أمور الملحدين اللي مابيعترفو بأي شريعة سماوية
يعني بالمشرمحي شلون بدهم يزبطو أمورهم الحياتية ؟!
|
مفهوم الانسانية والمساواة والمواطنة كفيل لتحقيق العدالة بين كل الأطياف ويضمن حق الكل .
وقدامك دول كاملة قائمة على العلمانية مستواها الفكري والنسيج الاجتماعي والتعامل القضائي دليل دامغ وكفيل على قدرة الانسان شن قوانين حياتية راقية ولا تواخذني بهلكلمة ببعض الاحيان أرقى من القوانين الدينية بحكم انها قوانين معاشة مش مستمدة من كتب أحدث واحد فيها بيرجع تاريخه لقرن ونصف من الزمن .
ووثقة حقوق الانسان غير المبنية على أيا توجه ديني تعتبر أسهل فكرة ممكن وصلك ياها .