أخوية - عرض مشاركة واحدة

yamen_h · 26/02/2006

مرحبا أخواتي ...

أنا بدي قول بعض لافكار و الآراء الخاصة ...
بس قبل هالشي بدي اشكر كل واحد رد قبلي ..لأنو فعلا كل الأخوة اللي ردو خير وبركة ..
وهاني انا بتشكرك كتير كتير ومن كل قلبي (لا حدا يفكر تمسيح جوخ

) لأنو انا بقول للأعور أعور بعينك ...ويمكن هاي صايرة عيب او غلط بهالأيام ...

المهم ...:
1- مشان موضوع البيئة القديمة والجديدة ...أنا بتمنى انو ترجع البيئة القديمة مضموناً مو شكلاً .. كيف يعني ؟؟؟ يعني أنو ترجع المواضيع اللي عليها القيمة والأعضاء اللي عليهن القيمة ..(مع احترامي للشباب والصبايا المشتركين جديد والفهمانين ) ...

2- أنا صارلي تقريبا شي عشر شهور أو أكتر شوي ...يعني لنيسان بيكون صارلي سنة مشترك ...والله وكيلكن كل يوم عم فوت و لمدة ساعتين او تلات ساعات كمعدل وسطي .....اي المهم ..أنو انا اول ما اشتركت كنت فوت على كل قسم وما اترك ولا واحد ...وكنت استفيد من كل الأقسام ...وفعلا تغيرت طبيعتي وطريقة تعاملي مع الناس بالحياة العادية ...
بس ما بعرف اذا انتبهو الاعضاء القديمين على شغلة مهمة انو من شهر حزيران الماضي صارت هجمة كتير كتير كبيرة عالموقع ...يعني اجت دفعة مشتركين جدد كتير كبيرة ..وكانت الأغلبية من أهل الخليج والسعودية تحديدا ..(أنا مابدي ارجع انكش المشكلة مع السعوديين ) بس انا عم قول شو لاحظت ....
اي ومن بعد هالهجمة ..تغيرت الأخوية تغيير جذري ...
يعني أنا كنت فوت عالطاير مثلا ...مشان اضحك وروق واستفيد بنفس الوقت ..أما هلق وللأسف اذا بدي ادخل رح انجلط ورح ينهز بدني من السخافة ..واذا بقللكون يمكن ما تسدقوا ..أنا صارلي تقريبا شي اربع شهور ماني فايت على قسم عالطاير ....ما صارلي غير اسبوع او اكتر بشوي رجعت فوت مشان موضوع اللي حطو اسامة واللي هوي (تضربو انتو والجواز ) واللي كمان كان من البيئة القديمة ..يعني انا مافتت مشان شي جديد ابدا ...
ولقيت أنو أنا بعد عن هالقسم وبقية الاقسام اللي ما عاجبتني ...احسن من اني اعمل مشاكل ..وتوجيه ملاحظات لأنو راسي صار يوجعني من هالشغلة ...

وما بعرف اذا انتبهتوال ..انو انا رح يصيرلي تقريبا سنة بس لسا عدد مشاركاتي قليل وهاد أبدا مو كسل مني ابدا ابدا ...ليش انا شو خسران اذا كبست عالرد الصاروخي وكتبت هالكلمتين : الله يعطيك العافية معلم ملعوبة ...او حطيتلي سمايلي ابو وردة وبدون اي تعليق او شي ..
اي لو بدي اعمل هالشغلة كان صار عندي مليون مشاركة بس مشكلتي ما بحب جامل ......
مو متل كتير عالم ..يعني ماصارلون يومين بتلاقيهن صاروا مستشارين ومدري شو ..

بعرف اني طولت عليكن كتير كتير وأني كررت بعض الأفكار اللي حكوها اخواتي بردود سابقة
بس سامحوني

على فكرة أنا كمان ماني مطول هون ...يعني بدي اترككن فترة ورح ارجع ...وبتمنى ارجع وشوف اخوية اللي كنت بعرفها من زمااااااااان ...

اسف على الإطالة ....