[معتر ليش ما بعرف]

مع تطور وسائل النقل والاتصال وتبادل المعلومات والبيانات قدر الانسان انو يصنع ويخترع اجهزة تعطي معلومات دقيقة لحد كبير لكل شي بصير من حوليه
ومن هالشغلات المتطورة والهامة بهالمجال شي اسمو الصندوق الاسود واكيد الكل او الاغلب سمع عنو وعلاقتو بتحطم الطائرات واول شغله كانو يحكو عنا لما بنسمع بسقوط طائرة لسبب مجهول هوي الصندوق الاسود .
خلونا نتعرف شوي على هالاختراع الهام ونعرف عنو دواعي اختراعو وظروفا ومن شو مكون

شو هوي الصندوق الاسود الموجود بالطائرة :
يعتبر الصندوق الاسود الشاهد العدل والصادق بعد الله سبحانه وتعالى على تحطم الطائرات والاسباب الي بتوقف ورا تحطمها وهوي لا يقبل الغش والتدنيس والرشوة الا ازا كان وراها ايادي بشرية بتغير مجرى الحقائق متل ما صار بالطائرة المصرية وطائرة طيران الخليج في البحرين والي لحد هلا ما انعرف شو سبب سقوطون وتحطمون

تاريخ اختراع الصندوق الاسود :

عحسب رواية الاستراليين بقولو انون هنن اول مين اخترع هيك جهاز سنه 1958 على ايد عالم الطيران الاسترالي الجنسية المدعو (ديفيد وارن ) والي قام باختراع مسجلة لتسجيل تفاصيل الرحلات الجوية وقام بتقديم اختراعو لسلطات الطيران الاسترالية يلي رفضت منو هيك اختراع وقالت انه عديم الفائدة في مجال الطيران المدني بعدين نقل الدكتور وارن اختراعو لبريطانيا يلي رحبت فيه بحماس . وبعد ما بثت اذاعة بي بي سي تقرير عن الجهاز تقدمت الشركات بعروض لتطويرو وتحديثو وما كان من شركة الطيران الامريكية ( لوكهيد ) Lockheed الا انها تصنع اول مسجلة معلومات نظرية للطيران وكانت مقاومة للتحطم اسمها ( F.D.R فلايت داتا ريكوردر ) وبعدين انتجت شركة تانيه مسجلة اصوات قمرة القيادة وهي ( C.V.R ) وكانت هالاجهزة قادرة على تسجيل ما لا يقل عن 17 نوع من المعلومات وبعد تطور المسجلات النظرية والرقمية صارت قادرة عتسجيل اكتر من 100 نوع من المعلومات بوقت واحد عن طريق تلقي المعلومات من اجهزة تحسس للمعلومات من سرعة الريح والارتفاع والاتجاه والساعة الزمنية ودرجة الحرارة خارج الطائرة ووضع الطائرة في الجو وكل هالشي مرتبط بابرة تسجيل تقوم بتسجيل كل التغيرات الواقعة والطارئة وهيي على شكل ابرة رسم تخطيط القلب ولهيك سموها الاخ الكبير لانها بتجسس عكل شي بالطائرة

من شو بيتألف الصندوق الاسود :

طبعا قبل ما نحكي من شو بيتألف الصندوق الاسود المعلومة الي لازم نعرفا عنو هوي سبب تسميتو بهالاسم . وطبعا اسم الصندوق الاسود مو لانو لونو اسود . هوي عبارة عن صندوق لونو برتقالي او احمر وسموه بالاسود لانو متعلق بالمصائب والاحداث السودة والسيئة الي بتصيب الطائرات ( الله يبعد عنكون كل شر اسود ولا ابيض ولا اخضر ولا شو ما كان يكون )

بيتألف الصندوق الاسود من مسجلتين وحده منون بنسميها نظرية والتانية رقمية ( ديجيتال ) وتنيناتون متشابهين بالشكل الخارجي بس بيختلفو بالتركيب الداخلي

الصندوق الاول وظيفتو تسجيل وحفظ البيانات الرقمية والقيم الفيزيائية متل ( الوقت .. السرعة ... الاتجاه .....)
اما الصندوق التاني فوظيفتو تسجيل الاصوات الي بتصير بقمرة الطيار او بين الركاب متل (مشاحنات وخناقات عائلية , استنجاد و استغاثة , او حوارات بين الطاقم والركاب .....)
ومتل ما ملاحظين بالصورة تحت انو في صندوقين بالطيارة مو واحد بس ... صندوق بمقدمة الطائرة وصندوق بالمؤخرة عند ذيل الطائرة

مواصفات الصندوق الاسود :

بنشوف بالصندوق الاسود تقدم علمي وتقني اشبه ما يكون بالخيال فهو الدليل الوحيد يلي بزود المحققين بالمعلومات المطلوبة بعد نحطم الطائرة والي لازم تكون موجودة بعد الحادث لمعرفة اسباب وقوعو وهوي اغلى قطعة بالطائرة من حيث الاهمية ويبلغ كلفته من 10 الاف _ 3 الف دولار
مقاييس الصندوق لطول 20 بوصه والعرض 5 بوصة
والارتفاع 7 بوصة ويكون في ذبل الطائرة لزيادة الحماية

مواصفات الصندوق الاسود الفيزيائية :

1- لون الصندوق برتقالي او احمر حتى يسهل كشفو وتمييزو
2- يقاوم درجة حرارة تصل الى 1100 درجة مئوية صادرة عن لهب مغذى بالوقود لمدة 30 ثانية

3- الصناديق مصنوعة من معدن التيتانيوم الصلب وبالتالي قادرة على مقاومة اختراق قضيب من الفولاذ وزنه ربع طن يسقط من ارتفاع 3 امتار

4- قدرة عالية على تحمل ضغط المحيطات وذلك عند تطبيق ضغط يوازي الضغط الحاصل في المحيط على عمق 200000 الف قدم تحت البحر أي ما يعادل حوالي 6000 بار