[بـحــر]

بعتقد حكينا عن الموضوع من فترة..

أوكي خلينا نفرّق شي عن شي...

في عرب سوريين؟ أي في

في سوريين مانهون عرب؟ طبعا في

سوريا هي دولة.. و دولة فيك تقول متعددة القوميات (فيها الكردي و الآشوري و السرياني و و و ... العربي) . فكلمة انو سوريا دولة عربية هي اهانة للحقيقة.. انو بسوريا في عرب بس كمان في غير عرب لذلك ما بيطلع لأبو أبو عبد الناصر يجي يقولهون مانكون سوريين..

لكن اللي صار انو حكامنا من بداية القرن العشرين ركبو موجة الحركة القومية لأنو شافو انو الفكر القومي دارج بأوربا و جابوه لهون و اخترعو شي اسمو قومية عربية, و هالاختراع هو اختراع لبناني بامتياز... ظلو الأدباء الموارنة متل حنا عبود و غيرو يحكو بالقومية (لأنو سمعو فيها من أوربا) طيلة سنين و ما حدا راد عليهون..

بالحرب العالمية التانية اجا الشريف حسين (الله يرحمو... لأنو ما بيجوز عالمهابيل الا الرحمة) و قال عمل مفاوضات مع الانكليز و الانكليز ضحكو عليه قالولو تعا ثور عالعثمانيين و نحنا نساعدك و تصير ملك ع دولة كبيرة.. اجا الفهمان صدّق انو الانكليز راح يساعدوه بتحرير أكثر من 3 مليون كيلومتر مكعب كرمال عيونو الحلوين .. لكن ظل عندو مشكلة ايديولوجية.. كيف بدو يتحالف مع "كفار" مشان يحارب مسلمين مثلو.. و مو بس مسلمين انما دولة الخلافة كمان... فاجو حكولو انو بلبنان من شي 40 سنة كان في شلة موارنة بيقولو قومية عربية و ما بعرف شو.. قام اجا الشريف حسين لقاها حجة و فتاها انو خيو بدنا نثور لأننا عرب .. و عمل علم و صدّق ع حالو هو ولادو (كمان الله يرحمهم.. ما بيجوز عالطرمبات الا الرحمة) و ثارو.. الانكليز ساعدوهون أولا فخوزقوهون ثانيا... و صار اللي كلنا بنعرفو

ظلت قصة العروبة طافية على السطح لبين ما التقطها عبد الناصر و عمل منها ايديولوجيا ركيكة جدا و تم لأجلها تزوير تاريخ و ثقافة و تراث جميع الشعوب العربية لأجلها

أي و بالنسبة الي لامعنى لكون هلأ حاطين اسم البلد "الجمهورية العربية السورية" .. طبيعي لأنو محكومين من قبل نظام قومي عربي (اسميا و ايديولوجيا) و هاي من الشغلات اللي لازم تتغير لأنو عم تعمل اقصاء كبير.. عم تفرض انو مشان تكون سوري لازم تكون عربي.. ومو صحيح هالكلام... جزء كبير من تراثنا و ثقافتنا جاية من العربي (أمر طبيعي) لكن في شي اسمو طابع سوري.. و بالمقابل ما في شي عربي هيك تقول انو القومية قائمة من خلالو..

اللغة؟؟ ليكها أكتر من نص افريقيا بتحكي فرنسي و مانهون فرنسيين

التاريخ؟؟؟ أنو تاريخ منهون؟ الحقيقي لما المزوّر؟ الحقيقي انو في تاريخ اسلامي مافي شي اسمو تاريخ عربي و دولة عربية.. مافي..

التكامل الاقتصادي؟ (هاد اختراع رهيب) .. أي كمان فينا نعمل تكامل اقتصادي مع ايران و تركيا و جزر الفوكلاند و مانهون عرب

وحدة المشاعر و التطلعات و المصير؟ .. اي شفناه. مافي داعي نحكي عن هالنقطة..


أكيد مافينان ننفي وجود اطار ثقافي لغوي عربي.. لكن فقط اطار... مالازم نعطيه ثقل أكبر لأنو نكون عم نضحك ع حالنا و ع غيرنا.. و عم نقصي كمية كبيرة من الناس

حكيك مقنع و منطقي جداً ...