[Government]

the light معلم حسان .. اول مادخلت ع الاخوية صار سوء تفاهم بيني وبينو هيك شوي صار شوية حكي طالع نازل .. طبعا انا ماكنت بعرفو ع حقيقتو واللي مابيعرفك بيجهلك .. بس طبعا اكتشفت حالي غلطان وبصراحة قدمتلو اعتزاري ع الخاص ع اللي عملتو معو .. طبعا شخصية بتستحق الاحترام عايش بفرنسا البلد اللي كتير بحبو .. ثقافة عالية .. وبصراحة رجعتو ع الاخوية وحركاتو رجعت شوي من روح الاخوية هو وكم عضو .. عنجد من الاعضاء المثقفين كتير واللي بصنفن من الاعضاء الاكابر كتير كتير وطبقة المخملية تبع الاخوية ..
سرسورة سارة على ما اظن .. كمان مافي كتير احتكاك بيني وبينا ولا مرة حكينا مع بعض بالمرة .. بس انو من الحكي اللي بجيني عنا وحكولي عنا انو عنجد شي اكابر كتير وفاخر ومافي منا عنجد وبمدحوا منا كتير ..مع انو بالفترة الاخيرة كان الي موضوع بالسقيفة بس لاسف حزفتلي ياه .. بس شرحتلي القصة وهيك ع الخاص .. وفهمتني الموضوع وبصراحة ماكان مني الا اخد الموضوع عادي واتقبلا بسبب لطفا بالحكي وشرحا الموضوع مع انو هي مامطرة اكيد مابنكراني زعلت ع الموضوع بس مامشكلة كلام مزبوط كان .. طبعا طلع عليها كم ملاحظةبالفترة الاخير انو مسكت السقيفة بقبضة من حديد نوعا ما وصارت تعمل شوية ديكتاتورية بالسقيفة مع انو السقيفة كلا ع بعضا قسم مابيستاهل هالشي .. وهادا الشي سبب خنقا شوي للاعضاء اللي برتادو السقيفة ولالي كمان نوعا ما .. بس انو اكيد بضل سارة من اكابرية الاعضاء بالاخوية والكل مدح فيا .. وحبوبة من الكل .. ومن الشخصيات اللي منتمنى انو تصير معرفة بينا
محمد ابراهيم باختصار اخوي الكبير .. مع انو هو ببلد واانا ببلد تانية .. وصعب نلتقى كتير .. بس انو يعني قريب كتير كتير الي ومن اقرب الاعضاء ومن اول الاعضاء اللي تعرفت عليهن باخوية صلنا فترة منعرف بعض وعنجد حمادة الو معزة خاصة بقلبي .. وبتمنى التقي فيه لهالشب شي نهار .. واحلى مصري بمصر كلا
GOVERMENT .. دخيل عينو هالزلمة .. سكرة الله يحرسو لاهلو .. وبصراحة هالشب انا بحبو كتير كتير كتير وعاشرتو صلي زمان عنجد شب مافي منو اخلاق وعلم ادب وزوق وشخصية راكزة والو هيبة .. وبصراحة انا من هون ومن هالمنبر .. بنصح كل صبية باخوية .. جديدة ولا قديمة .. انو عنجد تتعرف عليه لانو شخصية مافي منا .. وانو ماتستحي بالمرة .. وتبتعلو رسالة خاصة رأسا رأسا وتقلو انا معجبة في لانو صدقوني شب مابيتوض ونص الصبايا بحلمو في .. مشان هيك بنصح كل صبية انو ماتروحوا من ايدا وتتعرف عليه هلأ هلأ .. و ع الخاص رأسا ماتخجل منو لهالشب العظيم ,,
صياد الطيور معلم مازن .. الوسوفي الكبير والمدريدي الرهيب .. كتير الو ردود بحبا ومتفقين ع كتير شغلات والو اهتمامات رياضية ومن وبالدوري السوري كمان وبصراحة انا بحب هالنوع من الناس .. وكتير منتفق انا ويا بافكار مشان هيك بحترموا وبعزو كتير مع انو ماكتير حاكيين مع عض .. ومختفي عنا هالكم يوم ..
اسير التشرد اسير التشرد ع زمان الروم بزمانا علقت انا ويا لسبب مابتزكر شو هو بس كل اللي بتزكروا انو صار يحكي بطريقة ماكتير حلوة وماكتير بستصيغا معي .. بالحكي معي واانا رديت عليه وصار حكي شوي طالع نازل بيني وبينو .. ومن هداك اليوم مافي كتير حكي او بالاحرى قليل كتير وهو بالاصل مافي معرفة .. بس انا مع هيك بحترمو كتير كتير .. لانو شخص ثقافتو عالية اولا .. تانية ردودو بتعجبني وفيا شي حلو والا طعم خاص .. مابعرفو شو صايرو مشاكل بالفترة الاخيرة مع الادراة بس مع كل هيك بحترموا لثقافتو العالية وردودة الحلوة اللي الا طعم خاص
phoenixbird طارق .. او كنان .. كتير بحبو لطارق مع انو وعدني مرتين بزياة ع قطر ع اساس بس مابعرف شو طلعتلو ظروف وماصحلو انو يجي .. شخص اثار علامات استفهام كتير كبيرة عند كتير من الاعضاء وكتير اعضاء بتحب تتعرف عليه اكتر واكتر لتشيل هالعلامات الاستفهام عنو .. بس من خلال حكيو معو انا شخص طيب وودود .. ومحترم .. بس بتمنى انو يحاول يشيل هالصورة المجهولة عن حالو نوعا ما ويعرفنا ع حالو اكتير وبمعلومات دقيقة مشان تنشال هالعلامات الاستفهام عنو .. واحلى اب طريق
the morrning يعني هون مابعرف شو بدي احكي .. فيني اختصر هالاسم هادا بكلمتين .. اختي الكبيرة .. وبس يعني من اوائل اللي تعرفت عليهن باخوية هي كانت ام الشوش .. منحكي دائما .. يعني بحسا قريبة مني كتير كتير .. بحكيلا كتير شغلات عني مابحكيا لحدا تاني الا ولرؤى يعني انو بحسا متل اختي وعانا عبحكي معا بما انو انا ماعندي خوات عنجد ام الشوش شخصية رائعة كتير وفنانة عظيمة وبرسماتا وبحبا للرسم والمسرح وهالشي .. ومتل ماقلت مافيني قول غير اختي الكبيرة ..
COSTA معلم نبيل مالي كمان كتير احتكاك معو وعلاقتي فيو محدودة جدا .. بس من خلال الاخوية هو شخصية محترمة كتير .. بس احيانا الو شوية انفاعلات زايدة بتأثر عليه .. والو مواقف غير مألوفة نوعا ما .. يعني هالشي كلو بخليك ماتحطلو شخية وحدة لهالشب يعني الو عدة تقلبات بردودو وبحكيو من خلال الاخوية ومواقف غير مألوفة .. بس بشكل عام مثقف كبير كبير وبقدر في هالشي ..
handsome وسيم على ما اظن .. ماكتير بعرفو ومالي محتك في بالمرة .. بس انو من خلال ردودو فهمان كتير ومثقف لدرجة كبيرة .. وردودو كلياتا منطقية وواعية .. وصرلو فترة غايب عنا
abosleman ابو سليمان الغالي هادا بقى قصة كبيرة .. الشي القريب مني اكتر الشي واللي بميزوا عن الكل انو معي بقطر .. والتقينا كزا مرة وطلعنا مع بعض .. ومنحكي ع التلفون بين فترة وفترة .. اب سليمان عنجد بحبو كتير شخصية كتير راقية كتير .. ولطيف لدرجة بعيدة حتى صوتو ممكن ماتسمعو ع كتر مو لطيف عنجد هالزلمة مو ناقصو شي وشي اكابر كتير ولما بحشش وبشتغل معو عرق التحشيش بصير حشاش من الدرجة الاولى .. ووبعتبرو احلى حمصي شفتو بقطر كلياتا
LiOnHeArT (سابقا) حبيبنا الحمصي .. مابعرف ليش غير اسمو مع انو كان حلو كتير كتير بس غيرو .. مابعرف كتير عنو ولا مرة حكينا بس من خلال الاخوية شب رايق وبسلي وبتمنى انو نتعرف اكتر بالمستقبل ..
betty_palestine بيتي يا بيتي .. كانت ماشية تمام ومافي منا .. بس مابعرف شو صار بالفترة الاخيرة ولحدا مادخلت بالمعتقل مابعرف بالزبط ع شو صار الخلاف او ماكتير تابتعو مشان هيك مافيني احكم بالزبط .. بس بيتي بحكولي عنا كتير محبوبة ورايقة وظريفة وحبوبة .. مع اني مابعرفا ولا حكينا ابدا وبتمنى اني اتعرلف عليها بالمستقبل بس بتمنى انو تروق شوي وتاخد الامور باريحية اكتر .. لانو انتي عضوة مع انك جديدة تقريبا بس محبوبة من بين الاعضاء وخاصة الجداد واحلى بيتي
yamen_h مابعرف هالزلمة ماكتير بينهضم بالمرة .. يعني عندو حقد اعمى وع الحلبية بالزات .. حاولت انتي اتفاهم معو او انو اعرف سبب كرهو بس للاسف هو شخص صعب انك تتفاهم معو ومن جهتي ماكتير بهضمو وبعتبرو من الاعضاء اللي ماكتير مناح واللي ماكتير بقدر اتفاهم معن بالاخوية .. وبس بينطبق عليه المثل قاعد بحضنا وعبينتف بدقنا
BL@CK عبدو ياعيدو .. طبعا هالسنة تعرفت عليه لما نزلت ع حلب .. وطلعنا انا وياه كزا مرة .. كتير بحبو صراحة مع اني كتير بختلف معو .. بس عنجد عابد كتير بتالف عليه وشقد ماعمل مشكلتي بضل بحبو .. منتخانق احيانا ومنختلف مشان شغلات كتير بس مابقدر زعلو لعابد البطة ليش مابعرف .. وعابد طبعا ثقافتو عالية كتير كتير وعندو كم من الثقافة عالي كتير بصراحة مابتوفر لاي حدا .. وطبعا عابد معلمني كزا شغلة ومفهمني كزا شغلة مابنسالو ياهن بحياتي لاني عرفن بسببوا ومشان هيك بحبو وامبقدر زعلو حتى لو اختلفنا
MadMax اب سمرا السكرة .. ملك طرطوس والساحل وماجاوراها .. زلمة مافي منو سكرة كمان معرفتي في قديمة نوعا ما صلي بعرفو شي سنة وشوي ... زلمة صاحب كييييييف كتير كتير ورواق .. كيف ع العرق والسهر .. اب سمرا كمان شب فهمان وواعي وبيحكي بالعقل .. وبصراحة كتير كتير بنبسط بالحكي معو وباخد راحتي كتير وومكن نختلف ع كتير شغلات بس بضل اب سمرا غالي .. وبصراحة متل اخوي الكبير بعتبروا مع اني مالي شايفة ولا مرة بس عنجد بحسو متل اخوي الكبير
وائل76 وائل ياوائل هادا اول واحد تعرفت عليه يمكن بالاخوية كلا .. يعني شخص عظيم كتير وكاتب رائع وخاصة بالفترة الاخيرة .. يعني انا ووائل صحبة من زمان حاكيييييين كتير مافي شي الا ماحكينا في بحبو لوائل كتير وبقدروا جدا جدا .. وبحترم رأيو كتير عنجد وكمان بحسو متل اخوية الكبير عنجد يعني ضخص طيب طيب طيب لابعد الحدود بحياتي ماشفت منو شغلة غلط من اول ماعرفتو لهلأ .. وهادا شي موغريب عن الشعب الفلسطيني كلو والله يفك الحصار عنو بغزة وريجع الوضع طبيعي
مسطول ع طول حسامو الملك .. سخص رائع ومقفلاتي كبير درجة اولى يعني ردودو رائعة ومواضيعو اروع وخاصة بالمنبر .. يعني بيعرف كيف يرد وبطريقة صح ومزبوطة .. وفي ينقد الشخص او يسبوا حتى بس بطريقة ادبية جدا .. يعني بيقدر يشلح الواحد ع الساكت متل مابقولو بحلب .. وشخض ثقافتو كبيرة كتير كتير وكلو واضح من المنبر ومع انو مشاركاتو قليلة كتير بس انو بيعرف كيف يرد وباسلوب حلو كتير وممتع ومضحك بكتير من الاحيان وبحب ردودو كتير انا وبتابعا ..
شامي من طوكيو مارح احكي كتير .. لانو ماكتير هو بحب يورجي شخصيتو او يحكي عنا او يظهرا .. بس فيني قول واختصر من خلال معرفتي فيه الشخصية انو شخص رائع كتير كتير ومافي منو وعنجد شخصية حلوة وكتير طريقتو واسلوبو بشبه مسطول ع طول حسام وانا بصراحة ماكنت فرق بين
أمرأة من ورق مالي حاكي معو ولا مرة .. ولا في اي معرفة .. بس من خلال الاخوية .. شخصية رائعة كتير واكابر بدرجة كبيرة وكتير طيبة القلب وبحياتا مازعلت حدا منا .. شخصية نوعا ما مجهولة .. بس عنجد كتير بحترما انا لطيبة قلبا واكابريتا
Roaa ام الرور .. شغبة كبيرة يعني هي لو بدي احكي عنا بدي صفحتين يمكن وما اخلص عنجد .. بس مافيني غير قول انو هي اعز اعز رفيقة عندي .. تقريبا صلي بعرفا سنتين بس بتزكر اول مادخلت ع الاخوية شفت اسما والله عجبني عرفت انو حلبية قلت خليني اشوفا وبعتلا هالبرايفت وسحبت معنا بس عنجد ام الرور شخصية عظيمة وكتير بتعز علي والا مكانة خاصة بقلبي بحكم رفقتنا .. يعني وبتعرفي كلشي كلشي عني تقريبا وحاكيلي كلشي انا وكتير برتاح لما بحكي معا .. وتقريبا ازل مو كل يومين حكيتا ع التلفون بحس في شي ناقص ازا ماطمنت عليها او سمعت صوتا .. يعني متل ماقلت بدا وصف لبكرة .. بس عنجد ام الرور الا مكانة خاصة وخاصة جدا .. ومع اني ماشفتا لهلأ شخصي واحلى ام الرور الغالية ..
مايا* مايا بصراحة اول الشي ماكنت ميز بينا وبين ليندا بمالرة كنت فكرن واحد بس بعدين صرت اميز .. مايا حكيا كتير حلو وبتجنن واحلى حمصية بالمانيا كلا حاكي معا كزا مرة كتير ظيفة وحبابة وطيوبة .. وعتبان عليها ليش ماعبتبني بالاخوية ليندا ليندا .. كتير طيبة ورائعة هالمرا .. كتير بحبا وبحترما .. وراقية لابعد الحدود وحكياتا حلوين كتير منحكي كتير ع الماسنجر .. ومنتفق بكتير شغلات ونادرا مانختلف .. واحلى ليندا بدبي كلا
fofo besset syria فوفو يافوفو .. بصراحة فوفو بتدخل ع القلب بسرعة ليش مابعرف انو غريب من ردودا هيك بتحبا بهالبنت وبتدخل ع القلب يعني كتير طيبة وعفوية واكتر الشي بحبا فيو عوفيتا يعني ماعندا ا نوع من التصنع هيك عايشة عفوية كتير وما بتأذي حدا ولا بترجح حدا .. مع اني مو حاكي معا ولا مرة بس كلو هادا بظهر من خلال مشاراكات بالاخوية وعنجد اكتير شي بحبو فيا عفويتا وطيبة قلبا .. وبتمنى تصير بيناتنا معرفة اكتر بالمستقبل ازا الله راد وبكفي انا رفيقة ام الريم ..
Abu Guzef اب زوزيف الحبيب .. اول مادخل ع الاخوي بصراحة ماكنت حبو كتير .. يعني كنت احسو معلاق مطجن ودمو تقيل ومواضيعو بايخة بس انو ماكنت بعرفو .. بس لما تعرفت عليه عن قرب اكتر وضافني ع الماسنجر .. عنجد دخل ع قلبي .. واكتشفت انو قلبو طيب كتير كتير لابعد الحدود ومابحقد ع حدا بالمرة وبكلمتين برضا وعفوي كمان لابعد الحدود وطيبة قلبو زايدة حتى ممكن عبتسسبلو شوية مشاكل .. بس عنجد اما اب زويزف غالي علي وبحب قلبو الطيب وعفويتو .. واحلى اب جوزيف الغالي
الموسيقار ماكتير بعرفو لموسيقارنا .. بس كمان انو اول مادخل ع الاخوية كنت احسبو ع قامئة المعاليق المطجنيني والغلاظ بس بعد ماحكولي عنو بلشت تتبدل شوي هالفكرة وطلعت غلطان انا مابعرفو كتير ومالي حاكي معو بس ع وصف العالم شخصية حلوة كتير ومافي منو ومحبوب عند اغلب الاعضاء .. وبتمنى اني اتعرف عليه اكتير بالمستقبل على هالشخصية الحلوة .. واحلى موسيكــار .. كــ
فاوست مابعرف بس انو بحسا بزودا شوي بالمعارضة .. يعن بصراحة بحس انو الاخوية انحجبت من الاخ فاوست او بعض الناس اللي بتحكي بنفس طريقتو .. يعني كلام تقيل كتير كتير ماحدا بيتحملو بطلع عن الحدود احيانا معارضة زايدة عن حدا فعلا ومافيا لاهدوء ولا تروي وكلا اكالة اتهامات وشتائم .. ومصورين الطرف التاني على انو جانب شوداوي بالمرة .. مع انو المعارضة مو هيك بالمرة .. انو بس لو يهدوا شوي القصة .. يعني شوية احترام صغير ومابدا الشغلة كل هالشي يعني .. بكفي الاخوية انحجبت بسبب هالحكي اخي وطبعا هادا لاينفي انو فاوست من اكتير الشخصيات اللي عندا ثقافة
ظل جيفارا هااد بقى هون .. انا بصراحة بعتبرو من الطبقة المخملية تبعت الاخوية .. او يعني من الاكابرية باخوية شخص اكابر كتير كتير النقاش معو بتحسو نقاش هادي وعقلاني وممتع لابعد الهدوء يعني حتى لو كنت مختلف معو وضدو بخليك تحب النقاش معو ع كتير ماحلو وهادي هيك فمابالك ازا كنت مايدو بالفكرة شخص مثقف جدا جدا .. وخلوق كتير واخلاقو عالية لابعد الحدود .. وقمة الاحترام والزوق ..وكان كتير الي الشرف بمعرفتو وبتمنى اني اتعرف عليه اكتر واكتر .. واحلى ظل جيفارا واحلى اكابرية
ملاك السعودية مابعرف علقت ع رب صفحة الحوادث تبتع سيريا نيوز وعملت مشاكل كتير مشان هالشي مع انو بعتلا وقلتلا بعدي عن هالصفحة بما انو شايفة الناس عبتتحسس منا بس هي مابعرف كيف تفكيرا .. الله يصلحا ويهديا ويجعلا جيجة بين الف ديك
محمد السعودي هالزلمة منتدى خليجي كامل واجا بالاخوية .. وانا مابقرف عيشتي غير من قرف المنتديات الخليجية
التقرير الجوال شخصية جديدة .. مابعرف اي شي عنا .. ولام رة حاكيين .. بس انو نوعا ما ومع انو جديد بس مبين من خلال ردودو انو عندو ثقافة عالية كتير كتير ومن الناس المثقفين والواعيين هيك .. ومبتمنى انو نتعرف اكتر بالمستقبل . ومنتشرف . وطبعا هو كان سبب زتتي بالمقلاي
secular سابقا شخص بحسو بيعرف بحاول كتير كتير .. وعندو قدرة رائعة ع الحوار بس الطائفية البغيضة تبعتو هي اللي مروحتلو هالشي .. للاسف
Nirvana ماكتير بعرفا ولا مرة حاكي معا بس شخصية محبوبة كتير عند اللكل .. وعندا ثقافة رهيبة عنجد .. وشي حلو كتير .. مع انو طلاتا قليلة
Marwa من الاعضاء الجداد نسبيا بس انو قدرت تثبت حالا وبهالمدة القليلة نسبيا وصارت معروفة عند اكرت الاعضاء بسبب ردودوا ونقاش الحلو .. شخصية بتستحق الاحترام .. تناقش بعقل وحكيا حلو مافيو شي منافي للعقل ..وكتير كمان ظريفة هي وبتحب مع اني ولا مرة حاكي معا .. واكيد بتمنى انو تصير معرفة بالمستقبل
يمان يموووووووووووون الغالي .. هالزلمة فيني اعتبرو اكتر من رفيق .. يعني اخ ممكن .. من اول الناس اللي عرفتن باخوية .. رفقة كتير نحن .. وكتير محكي مع بعض ومناخد ومنعطي .. محكي عن كلشي .. يمانو كتير بحبو عنجد ومابقدر اتخيل النت والماسنجر تبعي والاخوية كلا بلاه .. يعني هو ورؤى فيني اعتبرن اقرب تنين الي بحكم العمر وبيعرف كلشي عني .. ويمون مافي منو احلى شامي بالشام كلا .. ومقفلاتي كبير ومع اني لهلأ مو شايفو شخصي وعنجد مشتاق لشوفتو كتير .. واحلى يمانو والله

was616im وسيمو .. الحمصي الكبير .. وسيمو ماكنت بعرف عنو شي بس ضافني ع الماسنجر وصرنا نحكي وضربنا احلى صحبة ... عنجد وسيمو قلبو طيب كتير ومافي منو .. بجنن عنجد وبحبو كتير انا وبحترمو .. وكتير بتسلى بالحكي معو وباخد راحتي وعنجد متمني شوفو كتير لوسيم بس ننزل ان شاء الله وبكون خلص دراسة ببولندا ولهالبرد ورجع ع حومص ان شاء الله .. واحلى وسيمو ببولندا كلا

صار بدنا كيبورد جديد ..