[SABE]

هلأ هاد الموضوع بيشغل إهتمام كتير عالم .. و لحد هلأ (( على حسب معرفتي مو مبين إذا شغلة هرمونات أو مجتمع أو مساكل نفسية أو شو مانكان ))
بالصدفة أنا صارت معي قصة من جمعتين عن هالموضوع وحابب إحكيلكون ياها ...
مرة رحنا أنا و أربع أشخاص على بار بعد ما خلصصنا شغل إنو منشان نرتاح شوي و نروق بعد الشغل .. أنا ما كنت عرفان شو هاد البار وبعد ماوصلنا قلي واحد من اللي رايحين معو إنو هاد البار لكلشي ممنوع بالعلن .. أنا ما فهمت علي أول شي .. بعدين طلع هاد البار للشواذ جنسياً من الجنسين (( مع العلم أنه لم يكن ولا شخص مننا نحن الأربعة شاذ جنسياً ))
وقتها أنا سألتو .. إنو ليش جبتنا لهون ؟ فكان جوابو إنو هون المكان الوحيد اللي مكن يحس فيه الشخص براحة كبيرة ... إنو ما في حدا ممكن يكذب على حدا .. إنو إذا في شب شاذ جنسيا بيقول بكل صراحة انا هيك .. وباصبايا كمان بيقولو ..
هلأ أنا اللي صار معي أول ما دخلت إني كنت كتير مستغرب من الوضع وفي خوف بسيط جواتي لأنو متعودين من حكي المجتمع و حكي الكل بسوريا إنو الشاذين جنسياً هني أشخاص بيخوفو .. بقا كان معنا كمان وحدة رفيقتنا (( وهي كمان قالتلي كان شعورها نفس الشي )) بقا أنا و هي مسكنا إيدين بعض و قلنا لبعض إنو نحنا هلأ رفقات .. مشان العالم ما تفكر إنو نحنا مثلاً شواذ ..
هلأ المهم مع الوقت بلشنا نتعود شوي عالوقت وخصوصي إنو العالم اللي بيجو بيحكو معنا كتير كتير لطيفين .. سألتون كمان كتير أسئلة أنا ما كنت متخيل إنو إقدر إسألها لشخص ما ..

المهم .. إجا صاحب البار سلم علينا وبلشنا نحكي سوا ... وهيك من حديث لحديث سألني إذا أنا شاذ جنسياً .. جاوبته بالنفي .. بعدين سألني : أنت لاحظت الجو هون شلون ما حدا بيكذب .. ولا حدا بيستحي من حالو .. بقا عنجد انت هيك ؟ جاوبت عنجد لا ... و ما في داعي كذب عليك .. وبعدها قلي إنو بس هيك سأل بإلحاح مشان نحس حالنا كتير مرتاحين هونيك .. و كمان سأل صديقتي كمان نفس السؤال ..
وبعدها بلش يخبرنا عن حالو .. إنو صرلو 18 سنة مع رفيقو ومانو عمبيفكر يخونو بحياتو .. بعدين أنا سألتو (( بعرف أنا آخر شي ديقتلو خلاقو بالأسئلة .. بس هو لاحظ إنو أنا كانت أول مرة بحياتي بتحدث مع هيك شخص )) إنو هو ممكن يكون besexual ؟؟ قال بكل صدق و نفي لا .. أنا بعرف شو أنا ..
وبعدين سألت .. هالشغلة كيف بلشت معك .. و إنو برأيك هرومونات أو من البيئة اللي ساكن فيها ..
كان جوابو إنو من أول ما وعي عالحياة وهو هيك .. مع إنو ما حكا ولا كلمة عن الموضوع لحتى صار عمرو 13 سنة .. (( برأيي إنو 13 سنة عمر كمان صغير لحتى الواحد يكتشف هيك شغلات .. إنو برأيي بيكون عقل طفل إسا ))

على فكرة .. أنا كتير إنبسطت بالتجربة اللي عشتها و بالصدق عند هدول الأشخاص وضلينا أنا ورفقاتي نحكي فترة طويلة عن هالروحة هاي ..

هلأ إذا إكتشفت إنو شخص بيعنيلي (( شاذ جنسيا )) أكيد ما رح تتغير نظرتي إلو .. لأنو هاي الشغلة هو بيقررها و هو أدرى بحالو أكتر مني .. و أنا بكون كويس مع هالشخص و أكتر كل ما هو كويس معي و مع حالو ..

أما بشأن الأديان فبرأيي إنو إذا كان الشخص متعلق لحد اليوم بديانة ما وعمبيطبق تعاليمها بحرفيتها بيكون ما في حاجة يفكر بالشذوذ الجنسي ... لأنو بيكون ملتهي بهالديانة هاي و كتير كتير شغلات منحرم منها كرمال ديانتو (( رأي شخصي )) و بهالحالة بيكون مستحيل يفكر بالأمور الجنسية العادية بقا كمان الغير عادية بيكون غير قادر يفكر فيها ..