[butterfly]

كاتب النص الأصلي : Nirvana

من لما نزلت مرسيل موضوع ضلو الخطر .. ضلو المطر .. ضلو شعرا ..(اللي بنذكر فيو كريم وبنودي الو تحية وين ما كان) ونزّلَت فيو اغنية اني اخترتك يا وطني .. وانا عم فكر .. في جواتي صراع داخلي بين الوطن وأنا ..

ما بعرف ..
تمام وقت نزلتا ... كان هالصراع جواتي
حسيتا كتير بتعبر عن كريم ..

بس عني انا ؟
انا ما بعرف .. ما بقدر اختار الوطن ... على حساب دموع أمي ..
على حساب كرامتي كأنسان وحريتي ...
ما بقدر اختار الوطن .. والبطوليات .. الدنكشوتية .. ما عاد كتير ثقتي بالتغيير كبيرة ..
يعني ما بآمن انو هدول الأشخاص الشباب .. رح يعملو تغيير ...
مهما حاولت أني جمل الحقيقة ... بس ما بعتقد أنن جسر للحرية ..
وشعور العجز اللي خلقوه هالأشخاص فينا ... ما حسيتو " ألي شخصيا ً " بناني وحفزني ..
بل على العكس أحبطني .. وأحبطني كتير ..
شعور أنك بدك تسأل عن هالأشخاص .. بس بنبرة خايفة وخجولة ..
عم صليلن أي والله كتر خيري ...
بس اليوم بنبض الطاقة .. اللي فيني .. والمعرفة والثقة اللي عندي بمحبة كريم وهالأشخاص لسوريا ...
كان المفروض .. كون عم صرررررررررخ ... مو عم صلي ...
بس بطريقة او اخرى خايفين .. ومنهزمين

بصراحة اكتر ... بخاف من الوطن
على الناس اللي بحبن ... على رفقاتي .. عالأشخاص المميزين بحياتي ... حتى على ولادي .. " لأني حاببتن يربو هون بسوريا "
الوطنية بس اجتمعت مع شوية ثقافة .. صار اكتر شي خطير .. هون ...

ما رح اترك البلد وروح ... بس هية شوي شوي عم تتركني ...