أول شي بدي وجه تحياتي لوفوكوياما ..و أهديه أغنية وائل كفوري ( كذابة عرفتك كذابة )
تاني شي بدي أشكر ياس لأنو عم يحكي ع موضوع لازم ينحكي فيه يعني ..أقل منها أنو نحكي بموضوع انهيار النظام الرأسمالي بأمركيا !!! و بشكل عام يعني
هلأ بدون شك و بوضوح و بدون تحليلات يعني ..الشباب فرطوا ..اي و الله ..و أكلين هوا بالمعلقة ..و اللايف ستايل الغربية كلياتها واقفة على شفير الهاوية ..أو شفير الوزان .ما بعرف بدقة يعني , و واقعين بحيرة محتارين كتير يعني ..و فايتين بالحيط , ما عرفانين شو يعملوا , أنو ياخدو مصاري من الشعب المسكين يعطوها لاصحاب البنوك الدلافين و يمشوا الحال , ولا يتركوا اصحاب البنوك الدلافين يغرقوا و يغرقوا معن الشعب المسكين !!!!
انو حلين لا ثالث لهما يعني ..و التنين عوفاً للتعبير ..أخرا من بعض !!!
هلأ هاي بخصوص الأزمة ...بس شو صار لحتى صارت هالأزمة ؟؟ ولا شي والله , سلامتكن يعني الجماعة كانو عاملين سوق حر ...حرية ع كيف كيفكن ..اسواق و اسهم و سندات و بيع و اشتري و دين هاد و اتدين من هداك و اشتري و قسط و بفوائد رمزية ..شغلة 8% شهرياً يعني !!! و صناعة و تجارة و تكنولوجيا و بورصات و سياحة و نقل جوي و نقل بحري و نفط و دهب و غاز و الله و ملايكة !! يعني كلو عادي , مافي شي غريب ...الغريب هو انو كيف كانو هيك عاملين , و لشو ليعملوا هيك من اساسو . انو لعنوا ابو ابسط قوانين السوق !!, العرض و الطلب مثلاً ..مين فيكن ما سمعان بالعرض و الطلب ؟ ...هاي اسهل شي مثلاً ..انو فري عرض كتير و طلب قليل انخفضت الاسعار , العرض قليل الطلب كتير ارتفع الاسعار ..كتير سهلة ..و كتير صحيحة كانت ...رأسمالياً يعني ...اي هاي لغوها ..ما عاد وفت معن ...أنو شو يعني اذافي عرض كتير بترخص الاسعار !! ..لاء بدها تضل تطلع الأسعار ....حتى لو اضطروا انو يزيدو القوة الشرائية للمستهلك بدون أساس ...بدك تشتري بالدين و بالتقسيط و بدك تشتري حتى بدون تقسيط لانو بيلتعن ربك اذا ما اشتريت ...انو معقولة فينك تعيش بدون ايبود !!!! أو بدون لابتوب مثلاً ...مثلاً و ما كتير تدققوا
انو النفط يا عمي ....اذا في عرض قد ما بدك ..و اذا بتنتج النفط الاحتياطي كلو بيوم واحد ..بدو يغلا ..و ليش غير ربك ما بيعرف !!
أنو مثلاً المتر المربع للأرض حقوا هديك الحسبة ..ما هاي ..التانية الكبيرة ..شفتها ؟ ..اي هديك الحسبة حقو !!! يا أخي ليك قديش في أراضي !!..لك أصلاً ما حدا بدو يشتري !!...والله هيك حقو..و بدك تشتري !!!!
اذا بدك تفوت لعند دكتور و ما معك تأمين بتكون عم تكفر ..مشان يشتغل التأمين الله وكيلك ..و اذا فتت معك تأمين بدك تطلع عم تكفر ..مشان يربحوا جماعة التأمين ..كمان الله وكيلك !
منخترع مبيدات مشان نبيعها و نربح فيها , و بعدين منروج للمنتجات العضوية و منربح فيها !!
منشار لازم تكون ..ما بأثر انو الي تحتك من دم و لحم ..بدك تكون منشار ..و هاي سنة الحياة ...بالاخر نحنا عم نرفع مستوى الحياة ...صحي اللي ما عندن بيوت صارو اكتر من اول بكتير ...بس نحنا عم نعمل تكنولوجيا ..حتى وقت بتوصل ع البيت بتكبس زر بيفتح باب الباركنج ...ما في داعي تحرك طيزك منوب ....كاستك الشي منجيبها لعندك..ما نحنا طبعاً ..الخدامة الاسيوية ..كأنو الاسيوين خلقوا ليكونو خدامين مثلاً يعني !!
زاد عندك شوية انتاج ...ما عم ينباعوا معك ؟؟؟ كبن بالبحر ...شو يعني منرخص سعر الحليب لحتى ينباع !!! ..كيلو الحليب ما منبيعو تحت ال 5 دولار...منكبو ولا مننزل سعرو .و انشالله عمرينن ما يشربوا حليب بالكونغو ...شو خلفناهن و نسيناهن لحتى نشربن حليب ...يروحوا يدبروا راسن ...اي كل سنة بيشتروا سلاح من عند جارنا بكذا بمليار دولار ...ما ناقصن الجماعة !
xxxxxxxxxxxxxxxxxxxxxxxxxxxxxxxxxxxxxxxxxxxxxxxxxx xxxxxxxxxxxxxxxxxxxxxxxxxxxxxxxxxxxx
هي نظرة تهكمية بجوز..بس يعني بتضل نظرة لشو عم يعملوا الشباب ..هلأ بهاللحظة و متل ما قال ياس ..في منعطف تاريخي ..و الامور بعد اليوم رح تتغير ..بس كيف رح تتغير ما مبين ..انا بعتقد رح تتغير للاسوأ ..هيك احساسي , لسى بقناعتن بيقدروا يستغلوا الانسان اكتر ..لسى بينعصر اكتر من هيك ..!!!
هلأ منجي لليسار شوي ..و منسأل مين عندو خطة بديلة , شو عندو اليسار شي يقولو ..شلون بيقدر اليسار يصلح الوضع , و ليش عم تحكي باليسار , لبش ما تقول الاسلام هو الحل متل ما علقوا غالبية المشاركين برايهن ع البي بي سي ؟
أنا برايي الغبي بشوف انو اليسار ما لازم يتدخل من فوق ..لا بخطط سياسية و لا باصلاحات حكومية ..اليسار اذا بدو يتدخل , لازم يتدخل من تحت ...بالنقابات و الهيئات العمالية و الفلاحية , ما حدا بيخفى عليه أنو الفلاح مانو مستفيد من الاسعار الخيالية للمنتجات الغذائية , و لا عمال المصانع مريشين من ورا الاسعار الفلكية للموبايلات مثلاً....اكلين هوا و ساكتين ..و الرابح الاكبر هو الرأسمالي لاعب الشطرنج ع الحدين ...هو وحدو المستفيد , المشتهلك خسران و المنتج خسار ن , و غالبا المنتج هو نفسو الخسران ..و بتلاقيه كمان خسران ع الحدين !!!
و هلأ عم ينطلب من اللي بالع الموس ع الحدين انو يساعد اللي بالع الدنيا ع الحدين كمان مشان ما ينهار !!! أنو شوفو ما احلاها ..بربكن ما بتجنن قد ما حلوة !!!
اليسار ما خرجو يكون اداري ناجح ...بتحسو فوضوي نوعا ما ., ما بيعرف يزبط الامور و يرستق ...ما بينفع يقعد اليسار بالسلطة , بتصير الامور تماما متل كوريا الشمالية , و الاتحاد السيوفيتي , و باحسن الاحوال متل الصين , اليسار لازم يضل بين قواعدو ..لازم يضل ببيئتو ..و الا بيخرب ..و بينتزع ..و بتطلع ريحتو, ما كانت بتوصل الامور لهالدرجة من الخيبة و النحطاط بحال الناس و الاسواق لو كان اليسار عم ينظم المنتجين و المستهلكين , بالاضرابات و المقاطعات بتركع اكبر الشركات , و كتير اضرابات عطت نتائج بدون ما نسمع طنة و رنة بالاعلام , لانو الاخطبوطات ما الهن مصلحة انو تنسمع هيك اخبار كتير , وين التنظيمات النقابية الثورية ؟.ما عم قول ثورية انو يشيلو بواريد و يطلعوا يقوسوا و يدبحوا , الثورية بجوز تكون كلمة , بجوز تكون حركة بايد واحد واقف بساحة مصنع , بجوز تكون بانك تقول للشب اللي عم يشتغل ع المكنة اللي حدك ..انو بكرا اضراب !
هاد الدور هو احسن دور ممكن يلعبوا اليسار , انو يقدر يجمع المنتجين و المستهليكن ضمن روابط بتشتغل لتحمي مصالح المنتجين و المستهلكين , و ما ينترك هاد الدور لحكومات هي أصلاً ممثلة لمصاصين الدماء .
هاد الدور كان شبه معدوم بامريكا او اوروبا ..و هاد اذا دل ع شي بدل على نجاح و سائل الاعلام ( الرتفيهية ) بانو تضلل الناس و تبعدهن عن اكتر تيار ممكن يحميهن و يحمي كيانهن .
هاد الشي بدل انو الوعي كان معدوم , و انو العمال و الفلاحين و الطلبة قولة الشيخ امام كانو لاحقين الجزرة , و اللي هي مع العصا اهم ركائز النظام الرأسمالي الأمبريالي القائم على استغلال الانسان لأخيه الانسان !
هلأ كل هاللعي اللي لعيتو أنا بلخصوا جورج برناردشو بكلمتين حلوين رح حطن بالرد اللي بعدو لانو ما بساع هون
J.S: Death is the solution to all problems. No man = No problem.
|