رسالة من مواطن سوري إلى السيد الرئيس بشار الأسد

[fady juventus]

بتوقع إنك متفاجىء ليش عم حطلك هالرسالة هون
لأنو متل مانك شايف انت بتسافر كتير و من سوريا عالخليج على ايران و الهند ... بقى ما عم اقدر شوفك
و تلفونك عطول برات التغطية ... مشغل ميزة Super Clip ما هيك
و إذا بدي ابعتلك رسالة ما رح تقراها لأنو ما عندك وقت
قلت يا ولد مالك غير الأخوية .. إنت ما فيك تنقطع عنها بعرف إنك بتضل تطلطل

اللي بدي قلك اياه يا سيادة الرئيس هوي التالي :
أنا و كتيرين متلي من الشعب السوري دعموك لما استلمت الحكم و من كل قلبنا حبيناك و توقعنا انو التغيير جايي معك
و بالبداية كان هالشي عم يصير .. و بدأت مشروع مكافحة الفساد و رفع الأجور و إطلاق المعتقلين و فتح أبواب الرأي الآخر ولو لحدود معينة .. بس كبداية كانت كتير مشجعة و الكل تفاءل خير و حتى العالم كلو سمى هالفترة "ربيع سوريا"
بدي اسألك شو اللي صار بعدها ؟؟!! ليش تحول هالوضع لخريف وسخ و يمكن شتاء مظلم ؟؟
ما تقلي الضغوطات الخارجية و اسرائيل وووو ... هدول ملينا منهم و ما في شي جديد
طول عمرنا عايشين مع هالضغوطات و هالأوضاع و ما بحياتو كان الوضع بهالسوء
كل الدول بالعالم عم تتقدم و نحنا عم نتراجع !!! ليش ؟

رفعتو الدعم جزئياً عن البنزين و الغاز و المازوت و غطيتوها برفع أجور أقل من شكلي و أقل بكتير من "غير نافع"
منعرف انو البترول صارت أسعارو خيالية .. بس كنت بتمنى منك تطلع عالتلفزيون و تشرح للشعب الضغوط الإقتصادية من ورا هالإرتفاع الجنوني .. عادية ما فيها شي .. و ما بتنتقص من مكانتك .. بالعكس بتقربك أكتر من شعبك و ممكن تخفف شوي من الإحتقان !!! بس ما فيي إعتب عليك إزا وزير الإقتصاد ما طلع عالإعلام و شرح هالشي !!! للأسف فشل .. فشل كبييير كتير .

انا مع إنو دخلي ممتاز ما عم اقدر اتحمل ارتفاع الأسعار .. تخيل شو عم يصير بمواطن دخلو بيجوز ما يتجاوز 10000 ليرة ؟! إرتفاع الأسعار طال كلشي بالبلد و أكتر شي الأكل اللي مالنا غنى عنو "ولا هاد كمان رح يصير رفاهية؟! " هديك المرة بياع مناقيش عم قلو ليش الوحدة ب (15) ليرة ؟ قام قلي "سآل الرئيس!!"
هاد شي خطير كتير .. في إحتقان كبير عند الشعب لازم يتعالج

بدي اسألك وين ثروات البلد عم تروح ؟ غلي البترول لازم البلد ينتعش لأنو آخر مرة قريت كتاب الجغرافية تبع الثانوي شطت ريالتي عالبترول و الغاز و الفوسفات و المعادن و القطن و القمح وووووووو
وينن هدول ؟ ليش ما بيدعموا المواطن ؟
إذا للجيش بدي إسأل إيمتا آخر صفقة أسلحة وصلتلنا و قديش كلفت ؟
الجيش نفسو أنا خدمت فيه و شفت النهب اللي عم يصير فيه ... الرز و الخبز و المازوت و كلشي الشعب بيحلم فيه عم ينكب و ينسرق بالجيش ... بتعرف هالشي ؟

بعدين شركات الخليوي .. برا تعتبر مناجم دهب .. عنا بالرغم من الدخل المنخفض أسعار المكالمات خيالية و خدمات بتخري لأبعد الحدود ... بقى ليش الدولة ما عم تستفيد من هالمناجم ؟ و إذا عم تستفيد الدولة ليش ما بتنعكس عالمواطن المعتر ؟

لازم يكون في آلية حضارية لدعم الفئات الفقيرة .. لازم لازم و هاد مو مستحيل ... عنا اقتصاديين شاب شعرن بهيك مواضيع و بيقدروا يعملوا هالآلية بحيث توصل للمواطن الصحيح .. بس لازم تتوفر الإرادة لهالفكرة بالأول.

و بعز دين الأزمة المعيشية منسمع عن إعتقالات جديدة لأعضاء من إعلان دمشق !!!؟؟؟؟
يعني إزا ما كنت على علم بالموضوع مصيبة و إزا بتعرف المصيبة أكبر ... هلأ أسوأ وقت تتصعد فيه الأوضاع على هالجبهة
لأنو المفروض هلأ تصير المصالحة الوطنية لإستيعاب الضغوط و تقوية الصف الداخلي
ما بتخسر شي لو أطلقت المعتقلين و اتفقتوا على صيغة كل واحد بيتنازل شوي للتاني .. أنا متأكد إنو المعارضة رح تتجاوب لأبعد حد مع مبادرة من هالشكل ... الإعتقال مستحيل يحل الأزمة .. بالعكس بيصب الزيت عالنار

يا سيادة الرئيس .. صار في نقمة شعبية كبيرة .. تخطت حدود حقد أو عداء سني علوي قديم و معروف .. لاء صار الوضع أخطر من هيك ... الغليان عم يشمل كل الناس من دون مبالغة .

و هيك مشاكل بتوفر الظروف للجريمة و الفلتان الأمني و الأخلاقي .. الشعب رح ياكل بعضو من الجوع صدقني
و المشكلة الوضع كل مالو للأسوأ .

و كمان .. بيطلع قانون سير غريب عجيب مع أرقام خيالية للمخالفات و حجز و سجن على أبو جنب و نقاط و وووو
كلو هاد منيح و بيضبط السير .. بس لما يكون الشرطي هوي المسؤول عن التنفيذ ... صار في مليون اشارة استفهام .. لأنو الشرطي صار الو نسبة من المخالفات كمان ؟!!! و كأنو اللي حط القانون عايش بسويسرا مو بسوريا وما بيعرف لا الشرطي السوري ولا الضابط السوري اللي بيوقف عالإشارة و بيوقف معو قلب المواطن المسكين اللي بيصلي ل الله ينفد و ما يصفرولو ... لأنو بس وقف اكل مخالفة ب الله و بلا الله ... و بحب خبرك إنو المطاردات بحلب صايرة متل أفلام هوليوود لأنو الشوفيرية ما عم يوقفوا للشرطة و بيطيروا بسرعة جنونية مشان يهربوا و هاد كلو خطر عالمواطنين !!!
بالمختصر قانون فاشل جداً ببلد متخلف متل بلدنا .. الرشوة و حب التسلط عالغير معشعشة بقلب الناس .


آخر شي ...
بعد كل هالحكي بحب قلك أنا معك و لسه في ناس مراهنة عليك و بتمنى انك ما تخيب هالناس
بتمنى نشوف خطوات جدية لرفع مستوى المعيشة و تحقيق المصالحة الوطنية الضرورية بهالمرحلة إلك و لشعبك و لبلدك
و أنا عم احكي هالحكي من قلب محروق على الحال اللي وصلنالو قبل ما ينفجر البلد و يضيع الأمل .

[dajon1976]

مرحبا
1) أنا ما رح دافع عن حدا , ولاني بصف حدا , ولا بوق لحدا.
2)أنا قريتلك أكتر من موضوع و كتير بتعجبني افكارك حتى لو ما اتفقت معك بالرأي.
3) شخصنة المشكلة ليست الحقيقة ولا حتى جزء من الحقيقة.فمن المستبعد أن يكون هذا الرجل مسوؤلاً عن الارتفاع العالمي للنفط و عن رفع الدعم الجزئي : فيه عقل و فيه منطق; العقل شي و المنطق شي تاني.
4)

طول عمرنا عايشين مع هالضغوطات و هالأوضاع و ما بحياتو كان الوضع بهالسو ء

كان أسوأ بالتمانينات بكتير: صح ما كان فيه رشوة بس ما كان فيه أكل, صح ما كان فيه فساد بس ما فيه أمان, صح ما كان فيه غلا متل هلق بس كان عدد سكان سوريا قد عدد سكان الشام اليوم.
5)

إذا للجيش بدي إسأل إيمتا آخر صفقة أسلحة وصلتلنا و قديش كلفت ؟
الجيش نفسو أنا خدمت فيه و شفت النهب اللي عم يصير فيه ... الرز و الخبز و المازوت و كلشي الشعب بيحلم فيه عم ينكب و ينسرق بالجيش ... بتعرف هالشي ؟

مو معقول أبو الفود انو يعرف الشعب تفاصيل عسكرية ما هيك? أما بخصوص النهب فأنا معك 100% بس كمان هي مسوؤليته?

6) بشرفي الله يعينو لهالزلمة : شعب مخطط ملون , بيشد عليه بيقولو طاغية و مدري شو , بيفتح المجال بتنبق السلفية و القبيسيات و التشدد الديني و خدام و تبع البيانولا و البني و غيرو
7) لسا عندي حكي بس ما بتتخيل قديش الكتابة بالعربي صعبة بكيبورد ما فيه عربي , بكمبيوتر ما فيه عربي , ببلد مانو عربي , إلي رجعة قريبة
salam