سوريا... دولة الشرف الوحيدة في العالم العربي

[krimbow]

..
جورج غالوي هو مؤيد للحقوق العربية للشعب العراقي والفلسطيني وكافة الدول الي بتعاديها الولايات المتحدة

وبصراحة هالإنسان عندو مواقف شغلة

والسياسة الخارجية مالنا عليها حكي بنوب

طيب عال، هي اتفقنا ع شغلة و حطيناها ع الرف
مع انو لمعلوماتك، مش قصدي ابدا انو حدا يقتنع بحكيي

- سبحان مغير الأحوال صرنا داخليا شي فل اوبشن

لا ما صرنا فول اوبشن، و لا صرنا متل سويسرا و بعدنا من دول العالم التالت، يعني دولة نامية، و كلمة نامية هي بتجي تلطيفا لكلمة "دولة متخلفة"
يللي حكيتو انو الرئيس ما عم يقصر

من ايام حافظ الأسد وقت كانت حتزبط شغلة السلام ما كانو جايبين سيرة اللاجيئن الفلسطينيين ، كانو مختلفيين على منصات الإنذار وكم متر هون وكم متر هنيك . وتقسيم المياه بالبحيرة والفلسطيين عالأكتر كانو رح ياخدو تعويضات او يروح على غزة وريحو

هاد كلام مرفوض، مبدئيا يعني بمؤتمر مدريد اتفقوا انو حق العودة بيطالب فيه السلطة الفلسطينية، يعني منظمة التحرير يعني ياسر عرفات، عموما هاد حكي بيعني حافظ الاسد و ما بيعني بشار الاسد، و مع ذلك، حافظ كان رافض فكرة توطين الفلسطينيين، بينقلوهم ع كندا، بينقلوهم ع غزو و ريحو هي مو شغلتو، هي شغلة الوفد الفلسطيني المهم ما يبقوا بسوريا، هي فكرة حافظ الاسد

الرئيس بشار الاسد وافق على مبادرة السلام العربية.. و شغلة حق عودة اللاجئين الفلسطينيين هي صارت من اختصاص الناس يللي عم تشتغل بمبادرة السلام العربية مش شغلة الرئيس بشار الاسد

( الرئيس بإيدو شغلات كتيرة يعملها بالسبع السنين ) اولها هالقضاء وبتعرفو الكمالة ......

الكمالة يللي بعرفها انو قلع 80 قاضي مرتشي بجرة قلم من حوالي السنة
الكمالة يللي بعرفها انو خصص سيارات للقضاة
الكمالة يللي بعرفها انو رواتب القضاة صارت شغلة ما بيحلم فيها موظفين القطاع الخاص

السؤال هو التالي: ازا قاضي معاشو خيالي عندو سيارة تحت خدمتو عم يرتشى، رغم انو شاف زملاؤو شلون تقلعوا... هاد منوين بتجبلو اخلاق و ضمير؟
بشرفك دلني و دل سيادة الرئيس منوين بيشتروا اخلاق و ضمير للناس.. و تأكد انو كمان ما بيقصر و بيشتريلهم لهالقضاة اخلاق و ضمير و بيدفع بخشيش فوقهم

مشروع ب 2.7 مليار تقريبا للحريري - وشركة بن لادن وكم مستثمر سعودي وإماراتي كانت بدها توفر حوالي 70 الف فرصة عمل والمشروع سياحي بحت رح يصير احلى المنتجعات والبلاوي السياحية والمشروع في نجمة لخمسين نجمة حسب قدرة المواطن او سائح جاي من الهاي فاي ( جيبتو معباية ) !
ومشروع ليش توقف حتى سيريانيوز ما عرفت السبب ( هاد الي بيقلك بدهم بطيخ مبسمر والمسؤول الفلاني بدو شي . برج )

شو بدهم بالحكي هرب الملياردير الإمارتي

اي هوي احلى شي انو سعد الحريري نازل سب ليل نهار ع النظام و نازل وعيد و تهديد، يجوا يقولولو تفضل استثمر اموالك بسوريا

بعدين بيروح مستثمر في 100
و البوابة التامنة شغالة
و مشروع اعمار شغال
و بطرطوس الانترادوس عم يشتغلوا فيه
و باللادقية في كزا مشروع و من يومين شركة روسية اخدت مشروع مهم قدام الشاطئ الازرق
و مش ناوي بصراحة اعمل الموضوع قائمة بالمشاريع الكبيرة الموجودة بسوريا

ولما غرفة التجارة اجتمعو مع كوشة تجار خليجيين طلبو تعديل قانون ( التأميم ) لأنو ايمتى ما بدهم حلقووو

ومستثمر سعودي غير الأمير طلال مافات على هالبلد وطالب سياتو بتعديل القانون بس لا حياة لمن تنادي

شكلك ما سمعت عن قانون الاستثمار الجديد، كل رؤوس الاموال يللي رح تفوت ع سوريا مضمونة انو ترجع تطلع، و يللي بيأممولو مشروعو بيدفعولو بعملة عالمية (يورو او دولار) قيمتو السوقية، و بامكانهم يطالعوا ارباحهم برات سوريا بالعملة يللي بدهم ياها (طبعا بعد ما يدفعوا الضريبة)

يعني باختصار: ما في داعي تنادي لأنو الحياة دابة و عين الله عليها

بالنسبة للجامعات والمصارف موجودة بالأردن من 1900 والمصارف بمحافظة صغيرة متل إربد كل حارة في بنك ( متل بياعيين الفول )

اي خيو، مبدئيا يعني هاد مو غلط الرئيس، يعني ببساطة هو ما كان ولدان بالـ 1900
و بلدنا بلد اشتراكي عم ينقل ع نظام السوق، غير بلاد اشتراكية قلبت ع نظام السوق عم تصدر الشراميط للعالم كلو، نحنا عنا عم يقلبوا بوعي

بعدين يا زلمة ما لقيت غير الاردن تشبهنا فيها؟

- رامي مخلوف بلش شغلو بالأمارات ما بقى في شي محرز بالبلد ......

متل شو؟
يعني كرمال الله حدا يخبرني انا كتير سمعت عن مشاريع رامي مخلوف الخرافية بدبي، بس عن جد، شي حدا يحكيني عن مشروع واحد عملو هنيك.. عن جد يعني

[chefadi]

كاتب النص الأصلي : krimbow

معلمي .. خدني ع قد عقلي، نحنا مشكلتنا فساد و تخلف و فقر، و الرئيس ما معو "عصاية سحرية" يقول للشي كن فيكون...
من سبع سنين لليوم زادت الرواتب 100%، و انفتحت جامعات و مصارف خاصة و انعمل قانون استثمار جديد مرتب ما في متلو بكل الشرق الاوسط... يعني باختصار ما ترك وسيلة للقضاء على البطالة إلا و عم ينفذوها، و الرئيس اول مين صرخ و اعلن انو عنا فساد، و فعلا من سنة لليوم ما بيمر شهر إلا و منسمع عن حدا من اعضاء العصابات عم يحجزوا اموالو، بس الفساد يلي عنا كتير مستشري، و سبع سنين ما بتكفي للقضاء عليه نهائيا

صديقي كريمبو :
قريت ردك و حسيت انك عم تحكي عن بلد غير البلد اللي انا عايش فيه
أكيد الرئيس مامعو عصاية سحرية و غالبا هو حابب يشتغل و يعمل شي للبلد بس برأيك :
1- زيادة الرواتب هي فعلا زيادة ولا هيي زيادة ضرايب و ارتفاع أسعار و الأمثلة كتيرة
2- قانون استثمار جديد هو أقل سوءا من القانون رقم 10 و ليس قانون مثالي و التسهيلات عم تنعطى لناس و ناس (طبعا حسب شروكاؤهم السوريين)
3- إذا انحطت أموال كم مدير ادارة من كم وزارة تحت الحجز رح يصير ياكل العسكري أكتر من بيضة و نص رغيف باليوم
4- بخصوص القضاء : احتاج الموضوع فقط كم ساعة لتغيير قضاة انور البني قبل 3 أيام من صدور الحكم لأسباب لاتخفى على حدا

[Nirvana]

كاتب النص الأصلي : krimbow

بتصور انو الدعم يللي بيوليه الرئيس للثقافة بسوريا ما في متلو بكل العالم العربي، من معارض الكتب، للمهرجانات الثقافية، لتعيين نائب رئيس خاص بالشؤون الثقافية، لتشجيع حركة الترجمة، و عرض اكتر من 35 مسلسل سوري برمضان الماضي، مع وجود اكتر من 60 عمل فني ما تم عرضو لأنو ما في وقت، بالمقابل وجود ما يقل عن 10 اعمال فنية مصرية و خليجية و لبنانية و مغربية معا، دليل مهم على حركة الثقافة القوية بسوريا

ويا ريت لو بصير قد نصها بس في دولنا ..

وعن نفسي بتمنى لو في متل هالدعم عنا في الاردن.

[The morning]

كاتب النص الأصلي : krimbow

بس شو بيساويلنا الرئيس ازا نحنا شعب متخلف

شعب مو بس متخلف .. و بليد و نقاق ..
و بدو دائما شغله يعلق عليها فشلو و بلادتو ..

كاتب النص الأصلي : شامي من طوكيو

..
مشروع ب 2.7 مليار تقريبا للحريري - وشركة بن لادن وكم مستثمر سعودي وإماراتي كانت بدها توفر حوالي 70 الف فرصة عمل والمشروع سياحي بحت رح يصير احلى المنتجعات والبلاوي السياحية والمشروع في نجمة لخمسين نجمة حسب قدرة المواطن او سائح جاي من الهاي فاي ( جيبتو معباية ) !
ومشروع ليش توقف حتى سيريانيوز ما عرفت السبب ( هاد الي بيقلك بدهم بطيخ مبسمر والمسؤول الفلاني بدو شي . برج )

مممم ..
طيب مين قال انو الشعب بيرضى ..
يعني المفروض اذا الحكومه وافقت الشعب ما يوافق ..
شخصيا ما برضى بـ انو واحد من هالاسماء -للي ذكرتها- يكون عم يستثمر ببلدي ..

[MadMax]

كاتب النص الأصلي : The morning

شعب مو بس متخلف .. و بليد و نقاق ..

و بدو دائما شغله يعلق عليها فشلو و بلادتو ..

أنا من مؤيدي هالراي
بالرغم من كل شي عم يعملوه الحكام ... بتضل المصيبة الكبيرة فينا كشعب
متل ما بقول زياد الرحباني : المواطن بضل ينق على انتهاك حقوقو
بس لما بيوصل عالكرسي رح يرتكب بالدقيقة الوحدة مية انتهاك
*
هيدا ما عاد اسمو انتهاك ..هيدا انت هيك

[krimbow]

مرحبا فادي

قريت ردك و حسيت انك عم تحكي عن بلد غير البلد اللي انا عايش فيه

لأ عم بحكي عن سوريا، تبع الطرقات المحفرة و بياعين البسطات و يللي عم يزيد فيها الدعارة و الفقر و يللي لليوم فيها ناس ما بتعرف تفك الخط

و لا اعتبر نفسي بموقع الدفاع عن النظام، انا مجرد مواطن عم قول رأيي

1- زيادة الرواتب هي فعلا زيادة ولا هيي زيادة ضرايب و ارتفاع أسعار و الأمثلة كتيرة

معلم، زيادة الرواتب هيي زيادة الرواتب، ضرايب ع هالرواتب ما زادت، يعني النسب بقيت متل ما هيي، بس ازا في حدا كان معاشو 5000 كان يدفع ضريبة 700 ليرة و صار معاشو 20 الف و صار يدفع ضريبة اكتر من 700 ليرة، فهالشي بتصور طبيعي، يعني الضريبة هيي عبارة عن نسبة مئوية بتزيد مع زيادة الراتب

نحنا كسوريين عنا مشكلة حقيقية بموضوع الوعي الضريبي، الكل بدو يتهرب من الضريبة، و هالشي فيو خربان بيت مو بس لسوريا، بل لكل العالم، يعني وين ما رحت بتلاقي انو اخطر الجرايم هيي التهرب الضريبي، و نحنا .. كل شعبنا عم يتهرب من الضرايب، الضرايب بزاتا ما زاد شي من نسبتها، يللي صار انو انحطت قوانين صارمة اكتر مشان التهرب الضريبي، هلأ ازا كان في حدا عم يتهرب من كل الضرايب، شددوا عليه و صاروا يحصلوا منو نص الضرايب المفروضة عليه، اي هوي دفع ضريبة اكتر، بس بعدو مقصر، و هالشي بينطبق ع التجار و رجال الاعمال مش ع الموظفين

2- قانون استثمار جديد هو أقل سوءا من القانون رقم 10 و ليس قانون مثالي و التسهيلات عم تنعطى لناس و ناس (طبعا حسب شروكاؤهم السوريين)

معلم، القانون بعدو كتير جديد، لسا ما شفنا خيرو من شرو، اما عن انو قانون مثالي، فما في قانون مثالي، و لما بدنا نجدبها و ندور ع قوانين مثالية و نضحك ع حالنا و نقول انها بتطبق .. اي منرجع للشريعة الاسلامية و منخفف شوية وجع راس ... أليسه؟

- إذا انحطت أموال كم مدير ادارة من كم وزارة تحت الحجز رح يصير ياكل العسكري أكتر من بيضة و نص رغيف باليوم

فادي، يا حبيبي، الشعب كلو بيعاني من مشكلة الفساد، و سيريا نيوز على سبيل المثال ما بيمرق اسبوع ما بتفضح قصة فساد جديدة، يعني الجماعة عم يشتغلوا ع مكافحة الفساد، لما يكون كل اسبوع في قصة فساد، معناها في مكافحة فساد

4- بخصوص القضاء : احتاج الموضوع فقط كم ساعة لتغيير قضاة انور البني قبل 3 أيام من صدور الحكم لأسباب لاتخفى على حدا

يا عيني عليك، اصلا ردي كلو يللي فوق بلا طعمة كتبتو مشان ما حدا يتهمني اني عم اتهرب من شي فقرة هون و اللا هنيك، يللي بيعنيني هوي هي النقطة بالذات، بس رح اتركها لرد تاني

[fady juventus]

كاتب النص الأصلي : krimbow

عن جد؟
يعني عن جد؟

انو كاردينال و قبل اسمو كلمة مار قدها و دلقها و بطريرك لطايفة عندها من الحقوق ما تحسدها جميع الطوايف و بالآخر بتعملو ملحد؟
لو كان ملحد كان اشرف بني الانسان طرا
لما يصير ملحد رح يملك من الشرف ما لا يضاهيه شرف

عن جد يعني هزلت

خدني بحلمك معلم
لساتنا عم نحكي إنو نحنا شعب ما بيلبقلو ديمقراطية
أنا هاد رأيي بالزلمة...بس بقولو بتجرد عن منصبو الديني...
لأنو كون هالإنسان عم يسعى للإنتقام من وطني بمساعدة حلفاؤو ... فالمفروض فكر بوطني قبل مذهبي
أنا ما بيهمني كومة الألقاب اللي بتسبق إسمو , ولا الصلبان اللي بيعلقها برقبتو...
بيهمني كيف عم يتصرف وشو أفكارو ؟
لما بيسامح مجرم متل جعجع على جريمة تفجير كنيسة/كنيسة هه/ و بيتبناه مع أتباعو بلا حدود ...شي طبيعي إنو قول عنو ملحد , حتى لو كان بطرك طايفتي
و ما تنسى إنو كان ومازال من أشد معارضي العمالة السورية في لبنان(ما تقلي لأنو مشان البطالة بين اللبنانيين لأنو لو بدو اللبناني يأدي الأعمال اللي عم يعملها السوري ما راح يلاقي حدا يشغلو بسبب ارتفاع الأجر اللي بيطلبو ... يعني القصة حقد على الشعب السوري)

و إنت قبل ما تقول هزلت وما بعرف شو !!! أقنعني بإنو شخص جدير بثقتك و ثقتي بدال ما تعددلي ألقابو!!!

[krimbow]

- بخصوص القضاء : احتاج الموضوع فقط كم ساعة لتغيير قضاة انور البني قبل 3 أيام من صدور الحكم لأسباب لاتخفى على حدا

خلونا نحكي عن كل المعتقلين قشة لفة (باستثناء الاصوليين يللي الهم وضعهم الخاص)
شباب الاخوية
نزار نيوف
كمال لبواني
انور البني
نبيل فياض
ميشيل كيلو
ربيع دمشق

بس قبل ما احكي عنهم، لازم وضح نقطتين لعن الله الثلاثة:
النقطة الاولى: انو نحنا، و على مر التاريخ، ما منعرف شي اسمو ديمقراطية، لا ببلادنا و لا بالبلاد المجاورة، و كل العلاك يللي بينحكا عن الديمقراطية هوي عبارة عن تنظير لا اكتر و لا اقل، و السلطة بهالمنطقة من العالم، من بداية التاريخ تنتقل بطريقتين لعن الله الثلاثة: إما الوراثة او الاستيلاء

النقطة التانية بقا:
قال هارون الرشيد مخاطبا ابنه المأمون: إنه الملك يا بني، والله لو نازعتني فيه لأخذت الذي فيه عيناك
و الذي فيه عينا المأمون هوي رأسه للتوضيح
يعني اب عم يقول لابنه الحبيب و البار انو ازا بتفكر تاخد الكرسي تبعي بدي اقطع راسك... كمان للتوضيح

نحنا عم نحكي عن السلطة و الكرسي، محك الرجال و ملهم الآمال، اعظم المتع و اكبر البدع، مفسدة الارض الذي من اجله مات المليارات و سيموت المليارات، جريمة الانبياء و قاتلهم

مشكلتنا بالشرق انو مثقفينا اول ما يقروا كم كتاب و يحضروا كام مسرحية و يسمعوا كام سيمفونية بيفكروا حالن انو صاروا اهل للكرسي
بصراحة ... ما فيي قول انو هاد خطأ
يعني يصطفل يللي بيحب يجرب ياخد الكرسي يجرب، بس بدو يتحمل العواقب ازا فشل، و يبقى السؤال الجدلي، هل يستحق الكرسي كل التضحيات التي تصل للتضحية بالنفس و المال و الولد؟ انا ما بعرف الجواب
و انا مالي؟
هاد صراع ما رح يجيني منو كمتواطن اي نتيجة، يعني سواء ضل النظام و اللا تغير، يللي بيعنيني انو هالنظام يكون قادر يحميني، و يأمن الاستقرار، و و ... الخ من المطالب يعني، ساعتها مين ما تجوز خالتي رح قلو عمي
و انا شخصيا كمتواطن، شايف هالنظام احسن الموجود ع الساحة، يعني بينو و بين باقي الانظمة العربية او الانظمة الاميركية يللي طبقوها بالعراق الديمقراطي الجديد.. اي هاد الاحسن بلا منافسة

ما عدا ميشيل كيلو و ربيع دمشق، جميع المذكورين الهم صلات بالخارج، صلات مع ناس عم يطالبوا بتغيير النظام علنا جهارا ليلا نهارا، و من سنة 1949 قالها حسني الزعيم: لا يجتمع في سوريا زعيمان
و الرئيس بشار الاسد هوي وريث هالوضع و هالعقلية يللي بتحكم البلد
يعني الشباب كبروا راس و فوق هيك طلعوا و تفاخروا بتكبير راسهم بالاعلام و تباوسوا هنن و بوش و بلير و الغادري .. شو بدك يعني انو يرجعوا ع البلد و يسرحوا و يمرحوا فيها؟ يعني انا شخصيا ازا حدا سبني اكيد ما رح اسمحلو يجي لعندي ع البيت و يشرب فنجان قهوة و يعمل زيارة كأنو رفيقي، علما انو انا ساكن مع اهلي، يعني ما عم احكي عن بيتي، عم احكي عن بيت اهلي

اما ربيع دمشق فالرئيس اول مين مد ايدو الهم، بس الجماعة يعني بلشوا يطالبوه بكل جدبة انو يتنازل عن الكرسي و هالشي ببدايات عهدو، و فوق هيك بلشوا يحكوا حكي طالع نازل عن والدو و عن نظام والدو، يعني بصراحة عيب.. انو كانوا يتفالحوا ع ايام حافظ مثلا

اما عن ميشيل كيلو، فوضحت موقفي منو بموضوع اعتقالو و المقالة يللي تم اعتقالو على اثرها

[krimbow]

كاتب النص الأصلي : fady juventus

خدني بحلمك معلم

و إنت قبل ما تقول هزلت وما بعرف شو !!! أقنعني بإنو شخص جدير بثقتك و ثقتي بدال ما تعددلي ألقابو!!!

اخدتك بحناني و عطفي و حلمي و لطفي و روني و فيليب و ممدوح

انا ما عم دافع عن هالشخص، طز فيه

انا عم دافع عن الملحدين يللي حضرتك عامل اكتر من القاعدة و ساويتهم خونة و كلاب و سفلة
انا قلت لو هالزلمة ملحد فكان هالشي شرف لألو
بس هالزلمة مو ملحد
يعني يلي شفتها انها هزلت، انو مو ناقص غير تقلي اسامة بن لادن ملحد
و كل ما تشوف حدا مو طايقو حضرة جنابك تعملو ملحد

انا يللي زعجني انك عم تستعمل كلمة ملحد كأنها مرادفة لكلمة كلب

عرفت عليي كيف؟

[krimbow]

نسيت احكي شغلة

من هذا المنبر و رغم يللي قلتو، إلا أني اناشد السلطات السورية باطلاق سراح جميع معتقلي الرأي بسوريا
و منهم اصدقائي طارق غوراني و دياب سرية و الشاعر حسام ملحم

[fady juventus]

ييي
أخي و الله نسينا
بعتذر من كل الملحدين/لأنو نص رفقاتي من المشبعين إلحادا ً /
بس التعبير ما كان للإهانة ... كان بهدف نقض أهلية الشخص للمنصب(إن صح التعبير)
يعني عكس الصفة اللي مفروض يتصف فيها

[krimbow]

كاتب النص الأصلي : fady juventus

ييي
أخي و الله نسينا
بعتذر من كل الملحدين/لأنو نص رفقاتي من المشبعين إلحادا ً /
بس التعبير ما كان للإهانة ... كان بهدف نقض أهلية الشخص للمنصب(إن صح التعبير)
يعني عكس الصفة اللي مفروض يتصف فيها

بسيطة و انا بعتذر كمان حاكيتك بظلف و قسوة و يا مية ويلكم باك

[مسطول على طول]

هاد كلام مرفوض، مبدئيا يعني بمؤتمر مدريد اتفقوا انو حق العودة بيطالب فيه السلطة الفلسطينية، يعني منظمة التحرير يعني ياسر عرفات، عموما هاد حكي بيعني حافظ الاسد و ما بيعني بشار الاسد، و مع ذلك، حافظ كان رافض فكرة توطين الفلسطينيين، بينقلوهم ع كندا، بينقلوهم ع غزو و ريحو هي مو شغلتو، هي شغلة الوفد الفلسطيني المهم ما يبقوا بسوريا، هي فكرة حافظ الاسد

الرئيس بشار الاسد وافق على مبادرة السلام العربية.. و شغلة حق عودة اللاجئين الفلسطينيين هي صارت من اختصاص الناس يللي عم تشتغل بمبادرة السلام العربية مش شغلة الرئيس بشار الاسد

السلطه الفلسطينيه منظمة التحرير عرفات شو طلع معهم ياترى ؟؟ باراك شو قدم لعرفات بالحل النهائي ؟؟

ويلي وصلو حافظ الاسد عم يطالب فيه الرئيس بشار الاسد واسرائيل عم تقول احط يعني فضحنااااا الدنيه بوديعة رابيين اذا اسرائيل بترجع بتقبل بوديعة رابيين عملية السلام بتبلش اسرائيل بتقلك احط احطنا وقبلنا بمفاوضات من غير شروط اسرائيل حطت شروط مالحنا دوله بندعم الارهاب ... خدني جيتك ...

رفض فكرة التوطين كانت ومازالت ولكن هناك فقط لم شمل العائلات ومن ثم هوية السلطه ( هوية السلطه الان افضل من الهويه السوريه ان حصل عليها) اما الفلسطيني سيظل يتمتع بحق الاقامه بهوية السلطه ( ان اتفق الفلسطنيين مع الاسرائييلين ... مجرد حلم ) كما كندا حلم لكل مواطن سوري مو بس الفلسطيني

ومبادرة السلام العربيه قدمة تنازلات بالجمله لاسرائيل ياترى شو كان رد اسرائيل ؟ شو كان رد الجمهوريين او الديموقراطيين في البيت الابيض ؟؟

واذا كتير متأمل بالوفد الفلسطيني وابو مازن لح تصل لحل بجنن !

الكمالة يللي بعرفها انو قلع 80 قاضي مرتشي بجرة قلم من حوالي السنة
الكمالة يللي بعرفها انو خصص سيارات للقضاة
الكمالة يللي بعرفها انو رواتب القضاة صارت شغلة ما بيحلم فيها موظفين القطاع الخاص

قديمه صارت بــــ975 وبــــ979

مابيمشي الحال بجرة قلم وين المحاسبه يعني بأي دوله بيلعنو سلسفيل اهلو يعني كيف فاسديين وبس طارو ؟ وين الادله على فسادهم ؟ ليش ماادينوا ؟ ليش ماتشكلة لجنة تحقق باشرافهم ؟ صعبه مهيك لانو دول عالم تالت بس قادريين نفتح كل يوم فرع مخابرات بس صعبه انو نساوي لجنة تحقيق ... بلعكس هيك بدهم ؟!

لما يسمعو ويشوفوا المحاسبه وشي كم قاضي اعد ع الخازوق لكل لح يحسب حساب للخازوق .. بس مافي مين يحاسب

واحلى مصخره انك ترفع دعوه ضد قاضي ( مخاصمة القضاة)

وياريت ما عطاهم لانو مكانك راوح يانرى كيف تعينوا القضاة الجدد مين الي عينهم ؟؟ حكلي لحكلك

في منهم لسع عندو مكتب ومبتدء وتحت سن 30 سنه ؟

على ذمة صحيفة الثوره كانو بدعم مين يزودلهم الرواتب 300% بس غيرو رأيهم ؟ ليش ؟ والحمدلله انو مازودولهم

يعني عذبوا محامين شوي بتغيير المفاتيح وكركبوهم شوي بس طحان مابغبر على كلاس معك ارش بتسوى ارش

كان ومازل اي مجرم او قاتل بينفك من حبل المشنقه؟

ولكن حين يتدلى حبل المشنقه امامهم سترى من الندل العدل .. يبدوا ان التشدد فقط مع المواطن ؟

لسؤال هو التالي: ازا قاضي معاشو خيالي عندو سيارة تحت خدمتو عم يرتشى، رغم انو شاف زملاؤو شلون تقلعوا... هاد منوين بتجبلو اخلاق و ضمير؟
بشرفك دلني و دل سيادة الرئيس منوين بيشتروا اخلاق و ضمير للناس.. و تأكد انو كمان ما بيقصر و بيشتريلهم لهالقضاة اخلاق و ضمير و بيدفع بخشيش فوقهم

في لك حبيبي

بس بشرفك تقلي كيف بيتعيين القاضي وكيف بيتحاسب

ال مال داشر بيعلم ادمي السرقه ونشــــــــــــالله صحه للقضاة الجدد

اي هوي احلى شي انو سعد الحريري نازل سب ليل نهار ع النظام و نازل وعيد و تهديد، يجوا يقولولو تفضل استثمر اموالك بسوريا

مين سعدو وجنبلاط لعن الله الخمسه وين رحت ؟

مين جاب سيرت سعدو ؟؟ هي القصه من زمن الاب ( رفيق الحريري ) لو بالفعل صار بيناتهم شغل بظن كان الطرفيين كانوا صحبه لك عمي مصلحه وحتى سعدو لصغير ماكتن فكر او ندحشت بمخو انه سوريا والنظام ورى قتل ابوه لانو عندو مصالح وشغل بالمليارات

بعدين بيروح مستثمر في 100
و البوابة التامنة شغالة
و مشروع اعمار شغال
و بطرطوس الانترادوس عم يشتغلوا فيه
و باللادقية في كزا مشروع و من يومين شركة روسية اخدت مشروع مهم قدام الشاطئ الازرق
و مش ناوي بصراحة اعمل الموضوع قائمة بالمشاريع الكبيرة الموجودة بسوريا

في 100 شو عم تبيع كزبره بسوق الهال ؟ لك رأس المال الي بروح مابيتعوض اذا حسام عبود بروح مابيتعوض بسهوله

اما عن روسيا وأيران هدول شغاليين من زمان بدي شي جديد ع الاقل نقدر نرجع جزء من رؤس الاموال السوريه الي بالخارج ... رغم انو بدي ياباني واوربي و خليجي

شفلي هل مشروع وهاد عادي على فكره

(اكور) الفرنسية تبني ۵۰ فندقاً في تركيا

ذكرت مجموعة الفنادق الفرنسية (اكور) أمس الاثنين انها ستستثمر ۳۰۰ مليون يورو (۳۸۸ مليون دولار) في تركيا لبناء ۵۰ فندقاً بحلول عام ۲۰۱۵م.
وتعمل الشركة في ۱۴۰ دولة وتبلغ ايراداتها السنوية سبعة مليارات يورو وأعلنت في بيان انها ستوظف ۳۵۰۰ موظف في فنادقها في تركيا.
وقال كوراي اوزباي المتحدث باسم (اكور) تركيا: (يستكمل بناء ۱۲ من الفنادق الخمسين في عام ۲۰۰۹م ونعمل مع مجموعة اكفين التركية الكبرى كشريك استراتيجي).
وتابع: ان الفنادق ستكون بجوار المدن الكبرى على الساحل الغربي مثل اسطنبول وبورصا وازمير الى جانب مراكز صناعية ناشئة في داخل البلاد.
والسواحل التركية على بحري ايجه والمتوسط مناطق جذب سياحي وفي العام الماضي زار ۲۱ مليون سائح تركيا وتأمل الحكومة في زيادة ايرادات السياحة الى ۳۶ مليار دولار بحلول عام ۲۰۱۳م.
وبلغ متوسط معدل النمو الاقتصادي في تركيا حوالي ثمانية في المائة في السنوات الأربع الماضية بفضل قروض بمليارات الدولارات من صندوق النقد الدولي

هي الشركه تفاوضة معنا على كم مشروع بس هربت

اذا حدى بيقلي ليش بربحو 100دولار وكيس مصاص

شكلك ما سمعت عن قانون الاستثمار الجديد، كل رؤوس الاموال يللي رح تفوت ع سوريا مضمونة انو ترجع تطلع، و يللي بيأممولو مشروعو بيدفعولو بعملة عالمية (يورو او دولار) قيمتو السوقية، و بامكانهم يطالعوا ارباحهم برات سوريا بالعملة يللي بدهم ياها (طبعا بعد ما يدفعوا الضريبة)

سمعنا بس من جهتي انا لو معي 5 مليون دولار مالح غامر بهل بلد بصراحه رغم انها بلدي الا لشوف غيري شو بدو يصير فيه

والافضل يكون غيري اجنبي لانو اجنبي مدعوم ماحدى بيدعسلو على طرف اما اذا كان سوري كلشي متوقع

اي خيو، مبدئيا يعني هاد مو غلط الرئيس، يعني ببساطة هو ما كان ولدان بالـ 1900
و بلدنا بلد اشتراكي عم ينقل ع نظام السوق، غير بلاد اشتراكية قلبت ع نظام السوق عم تصدر الشراميط للعالم كلو، نحنا عنا عم يقلبوا بوعي

لك على عيني وعلى راسي بس مو كأنو ماشيين ببطىء شديد ؟

يعني هي الصنيين كانو بالثمانينيات يموت كل سنه 3 مليون بسبب سوء الرعايه الصحيه والتغذيه .. الحمدلله ماكان عنا حدى يموت جوعان رغم اذمة احصار وقتا

ببداية التسعينيات بلشو بعد عشر سنين وين صارو ؟

ليش هيك صارو ؟

لانو شركات امريكيه ويابانيه واوربيه .. طبعاً موبخبرت الصينيين بس لانهم تعانوا مشان المواطن والوطن

مو بخبرات ايرانيه وروسيه

بعدين يا زلمة ما لقيت غير الاردن تشبهنا فيها؟

اذا ما صار تحول متل العالم بهل خمس سنين الجايه لاتستبعد ينضرب المثل بموزنبيق


=======================================

لحنا لما ننتقد شي سلبي حقنا ولازم ننشد الافضل ودوله لما بتقدم هاد واجبها والا ليش اسمها دوله؟

ولما المواطن ينتقد مو لانوا بدو يخرب لانو بدو الاحسن الافضل

بهيك وضع لح يضل المواطن ينتقد ويرفع صوتوا وكل مارفعوا اكتر بينسمع اكتر

وانا اهم شغله بعتبرها ايجابيه انوا سمحو انه ننتقد كل سياسات النظام من دون مايحاسبونا طبعاً الا رأس الهرم

ولما يسمحوا للصحافه تذكر اسماء المفسدين وبالادله تأكدوا ان الفساد يكافح مادمنا نذكر رؤس الاقلام ونتكلم بالعاميه لايوجدمكافحه للفساد


اما انت ياصديقي : تأكد أني استمع لكل رأي واحترمه وليس بالضرورة أن اقتنع به او اقنعك مجرد تلاقح الافكار ورأيي خطاء يحتمل الصواب والعكس صحيح

والدوله والمواطن عطاء ثم عطاء ثم عطاء ولكن من الطرفين وكذالك الاحترام وكذالك الدوله والوطن والمواطن


نهاية الملحمه مشان هيك في اخطاء مطبعية

كهرباااااااااااااااااا

[butterfly]

كاتب النص الأصلي : شامي من طوكيو

.. من روائع مكافحة الفســاد في سوريا صارنا بالمرتبة الرابعة عالميا تصورو والعراق بالمرتبة التانية دفشة صغيرة ومن جيبهم وبناخد الدوري وإذا ثابرنا اكتر رح نجيب الكاس بعزم ( على فكرة الكونغو الأولى )

والله إذا طنت منظمة الأمم المتحدة هية اللي عم تكتب الاحصائية مو بعيد نصير أول قريبا مع كامل احترامي لأهدافن النق اللي بينقوه اكتر من انجازاتن عالأرض صحي يبقى حدا يشرحلي كيف عملو الاستفتاء ( مع انو ممكن يكون نحنا الرابع عالميا بس ما عرفت انو كيف حسبوا )

في فساد ... وفي فقر وفي تخلف ... وفي شي كتير كتير كتير إيجابي عم ينعمل ..
يا أخي اللي بينزعجو من كلمة " سوريا الأسد " وبيحبو يستبدلوها " بسوريا لكل السوريين "
بداية خلينا نكون واعيين انو العمل كلو مانو عمل الشخص الواحد وانو قاعدة التغيير بتبدا من " كل السوريين " .

لحنا لما ننتقد شي سلبي حقنا ولازم ننشد الافضل ودوله لما بتقدم هاد واجبها والا ليش اسمها دوله؟

ولما المواطن ينتقد مو لانوا بدو يخرب لانو بدو الاحسن الافضل

بهيك وضع لح يضل المواطن ينتقد ويرفع صوتوا وكل مارفعوا اكتر بينسمع اكتر

وانا اهم شغله بعتبرها ايجابيه انوا سمحو انه ننتقد كل سياسات النظام من دون مايحاسبونا طبعاً الا رأس الهرم

ولما يسمحوا للصحافه تذكر اسماء المفسدين وبالادله تأكدوا ان الفساد يكافح مادمنا نذكر رؤس الاقلام ونتكلم بالعاميه لايوجدمكافحه للفساد

بس كمان نتعلم أنو نحب شي ونستحسنو .. انو هيك يعبي عينا شي .. لأنو كتر النق ما بينفع بيعيق الشغل
والنقد اللي بيكون كتير بيهدم ما بيبني
أما من ناح الصحافة ... بيحقلا الصحافة تذكر أسماء المفسدين إذا عندا أدلة موثقة

[chefadi]

كاتب النص الأصلي : krimbow

فادي، يا حبيبي، الشعب كلو بيعاني من مشكلة الفساد، و سيريا نيوز على سبيل المثال ما بيمرق اسبوع ما بتفضح قصة فساد جديدة، يعني الجماعة عم يشتغلوا ع مكافحة الفساد، لما يكون كل اسبوع في قصة فساد، معناها في مكافحة فساد

مرحبا كريم
بدي رد بموضوع مكافحة الفساد لانو بوابة لكل المواضيع التانية ,,,,,
خلينا بالأول نتفق على كم شغلة تاريخية
* كانت سوريا بفترة الستينات و السبعينات تعج بالحراك السياسي و الاحزاب و المشارب الفكرية المتنوعة
(طبعا بغياب الديمقراطية و بوجود بعض من الحرية و الكثير من القمع )
* بعد السبعين أصبح هناك حزب حاكم واحد و مظاهر (وأقول مظاهر فقط ) تعددية سياسية و هذا ما أفرز ردّة دينية ظاهرة و انحسار الاحزاب العلمانية (التي لم تكن تملك اي هامش من الحرية على اي حال )
سقت هذه المقدمة (البلا طعمة ) للوصول الى نتيجة ان المواطن السوري ماعاد يهمو مين عم يحكم و كيف عم يحكم و ماعاد مهتم مين عم يموت بالسجون تحت التعذيب و مين و مين ....... همو الوحيد هو لقمة العيش و متل مابتعرف الجوعان ماممكن يفكر غير بالاكل
المهم بظل هاد الوضع الراهن من الطبيعي ان يقبل هذا الشارع بأي كسرة خبز او رشفة ماء قد تكون صغيرة جدا ولكنها بالمقارنة مع السابق فهي كتير منيحة .... وهون المصيبة
انت بتعرف و انا بعرف و الكل بيعرف انو ازا كانت بداية الطريق غلط فمن الصعب تكون النهاية صحيحة يعني :
مافي اصلاح بيبلش تحت قانون طوارئ (وطبعا برأيي الاصلاح لازم يبلش سياسي و من ثم اقتصادي )
مافي محاربة فساد بعد سبع سنين و لسا الرشوة و المحسوبية قائمة متل الاول و اكتر
تحياتي ,,,,,

** صحي انا ماني حاطط حالي بموقف المعارض , في شغلات بأيد النظام فيها , بس كمان هي نظرة مواطن حريص على بلدو .
** ألي عودة للتعليق على قصة المعارضين السوريين بس فرطت من النعس

[ليندا]

في فساد ... وفي فقر وفي تخلف ... وفي شي كتير كتير كتير إيجابي عم ينعمل

اي صحيح والقناعه كنز لايفنى وشي عظيم انو يكون الانسان قنوع
بس لاتنسوا انو النق من طبيعة البشر مافينا نغيرو ... بقى خلق الانسان جحودا..... لولا النق ماكانت الدوله هلاء عم تحاول تحسن من اوضاعها واوضاع المواطنين .....ماكان حصل اي تطور ولو بسيط .... شعبنا شعب متخلف مع الاسف والسبب الرئيسي لهالتخلف الفقر يلي مخللين فيه ، في 30 % من الشعب تحت خط الفقر هدول من وين بدن يشلحوا تياب التخلف ازا التفكير منحصر فقط بلقمة عيشن ... غالبية الشباب هلاء عم تحاول تهرب من هالوضع وعم تهاجر او عم تطلع تشتغل من الصبح وماترجع غير المسا الغالبيه من هالشباب مابيقدر يعمل شي بوظيفه وحده بتلاقيهن عم يشتغلوا بوظيفتن ليش ؟؟؟لانو مرتب واحد مابيغطي مصاريف الاكل والشرب والفواتير والمواصلات والاجار والضرايب وغيرو وغيرو ...
سوريا عم تحاول جاهده انو تحسن الاوضاع بشكل عام وهاد شي كتير حلو خاصة بهالفترة من اول ماستلم بشار الحكم والتقدم ساري بس الغلابه من المواطنين مابيعنيهن هالشي اد مابيعنيهن كيف يعيشوا .....

شعب مو بس متخلف .. و بليد و نقاق ..

و بدو دائما شغله يعلق عليها فشلو و بلادتو ..

لك هالمواطن المسكين لمين بدو يشكي هموا ..؟؟؟؟ ازا الدكتور بشار حاطط ايام عم يسمع فيها للشعب مابدكن حدا يشكي هون ؟؟
هالشباب الفقراء مابفكرو الا بلقمتهن وشلون بدن يكفو مصروف لاخر الشهر مابيفكرو الا بهالشي وبس ....مابيهمن التقدم يلي عم يصير بالبطيئ جدا لأنو ماعم يعمل اي تأثير ع معيشتهن طالما اننن ماعم يقدروا يكفو لقمتهن هون مكمن التخلف ومارح ينزاح هالتخلف الا ازا اتحسنت معيشتهن والله العليم كيف رح تتحسن هالمعيشة.......

[وائل 76]

كاتب النص الأصلي : butterfly

والله إذا طنت منظمة الأمم المتحدة هية اللي عم تكتب الاحصائية مو بعيد نصير أول قريبا مع كامل احترامي لأهدافن النق اللي بينقوه اكتر من انجازاتن عالأرض صحي يبقى حدا يشرحلي كيف عملو الاستفتاء ( مع انو ممكن يكون نحنا الرابع عالميا بس ما عرفت انو كيف حسبوا )

هاي طنت الامم المتحدة يلي حددت إسرائيل بأراضي ال 48 ما هيك ؟؟ ولا في طنط تانية غيرها للأمم المتحدة يلي عم نحكي عليها ؟؟؟

[Nirvana]

انا بأيد أنو سوريا لهلأ موقفها من قضايا الأمة مواقف مشرفة ..

أما بالنسبة للشؤون الداخلية فأنا اولا معلوماتي ضئيلة وهزيلة بهالموضوع وثانيا وعقول الفنانين شهادتي مجروحة بهالبلد.

الشي اللي بفهمو انو اذا مو عاجبك نظام البلد ما بتجيب حدا يصلحلك ياه ، انت يلي بتصلحه بايدك.
بتخيل صار واضح شو عم بيصير باللي حطو ايديهم بايد اللي ما يتسمو

بس بدي اقول نحنا عنا مشاكل لو بتحطها في اي دولة غير دولنا الشعب بقوم وما بيقعد ... ونحنا لا .. وعم فتش وين الخلل؟ فقدنا الاحساس بمعنى الحرية .. الكرامة .. الصواب والخطأ .. ولا تعودنا وبس ..