يا عيب الشووم على "أخوان" الأخوية

[me2]

أكتر شي بيحزن لهل اليوم العظيم , أنو ما نشوف أي حدا من الأخوية {ولا من الشارع السوري } متفاعل مع التغيير الذي ابتدأ في المنطقة ...

يعني كل السوريين مجمعين على الرغبة بالتغيير الديموقرطي ..ز ولكن يبدو "برأيي" أنو السوريين مجمعين على "الحكي" بالتغيير الديموقراطي .. والمهم بالنسبة للسوريين بس الحكي .. وحتى الحكي ..يبدو أنو ما عاد يهم .. المهم اليوم صار "العلاك " و يبدو أنو الأخوية في منحى متشدد أكتر من العلاك و هو التنطنيش ...

يعني الأخوية اللي فيها تعمل قصائد عن اتفه شي ممكن .والتي فيها من كل مشرب كاسة .. يعني فيها الحزبي البعثي وفيها القومي السوري والأخونجي و الشيوعي و المستقل واللي مو عرفان ربو وين حاطو وفيها المتعاطف مع أي ممن سبق .. طنشت فوز حماس بالانتخابات التشريعية الفلسطينية وما يمكن أن يتلو ذلك من تداعيات وما يعني ذلك من مؤشرات .


يعني والادارة "ادارة الاخوية" أبدت هدوء مريب و معتاد من عدم التدخل بالسي اللي لازم يتدخلو فيه .

بغض النظر : أرجو من الشباب والصبايا ابداء الرأي و تصور تأثير الفوز على المنطقة .

[حسون]

خيو الأخويي فيا سوريين و فلسطينيين و لبنانيين و مصريين و سعوديين
و هاي قضية حماس بتخص الفلسطينيين
و بعدين إنتا ليش مأهور من انتصار حماس ما زال الشعب الفلسطيني بدو إياهون و أنا مع أنو الحكومي تكون منتخبي من الشعب بغض النظر عن مين في بهالحكومي
و بعدين شو دخل هالشغلي بسوريا
و لمعلوماتك أكتر موقع عم ينحكى فيه عن السياسي السوريي هوي الأخويي

[me2]

رأيي :

سوريا معنية بالنصر "الحماساوي وليس الحمساوي" أكتر من أي حدا ... يعني من كم يوم أعلن في دمشق عن حلف ايران دمشق حماس حزب الله ...

يعني حزب الله هو الوحيد اليوم اللي مانو مستلم السلطة الشرعية اللي بيفضل العالم التعامل معها .. فهل يعطي فوز حماس دفع ودعم لحزب الله ؟؟ وما موقف أكثرية 14 اذار ذات التوجه السلمي الغربي {اذا اردنا تلطيف عبارة الاستسلامي الخائن}.

دمشق راهنت على خيار حماس واحتضنت قادتها و ثبت بالطريقة الديموقراطية أن الخيار السوري هو الصحيح {على الساحة الفلسطينية فقط } فهل تزداد سوريا "تطرفا" و"عزلة" بالمفهوم الغربي ؟

طهران : أكدت دعمها لحماس و اسرائيل أكدت أن طهران تمول حماس والجهاد . فهل يزداد التدخل الايراني في المنطقة ؟ وهل تسكت السعودية والكويت عن هذا الدور المتنامي "الفارسي" ؟؟

والعرب الخليجيين ؟ اللي جمعو تبرعات وبنو بيوت في غزة والقطاع هل رح يسمحو لسوريا وايران أن تحصد ثمار فوز حماس بالطريقة اللي تعجب دمشق وطهران فقط ؟ مع العلم أنو قطر الأقرب لأمريكا خليجيا , سارعت للتبريك والتعبير عن السعادة من فوز حماس .


برأيي :

سوريا على مفترق طريق : الذهاب والغوص في حلف طهران المتوسط له متطلبات أولها ديموقراطية .. ليش ؟ لأنو حزب الله وايران وحماس {فلسطين} هي أنظمة ديموقراطية ولا يمكن أن تكون ضمن حلف دون أن تكون ديموقراطي مثله .

الطريق الأخر امريكي : ولايبدو أن السوريين يفضلوه .. خاصة أن الرأسمالية السورية استفادت من أيام البعث الاشتراكي أكثر من أي وقت مضى.

برأيي : القوي والديوقراطي جدير بالاحترام .. و الاحترام الدولي يؤخذ ولا يعطى .

[me2]

كاتب النص الأصلي : حسون

خيو الأخويي فيا سوريين و فلسطينيين و لبنانيين و مصريين و سعوديين
و هاي قضية حماس بتخص الفلسطينيين
و بعدين إنتا ليش مأهور من انتصار حماس ما زال الشعب الفلسطيني بدو إياهون و أنا مع أنو الحكومي تكون منتخبي من الشعب بغض النظر عن مين في بهالحكومي
و بعدين شو دخل هالشغلي بسوريا
و لمعلوماتك أكتر موقع عم ينحكى فيه عن السياسي السوريي هوي الأخويي

أنا أسف اذا حكيي انفهم غير ما بدي .. أنا مبسوط ومن زمان ما شعرت بفخر متل مبارح ..

أما رايك بأنو الموضوع فلسطيني .. فهدا رأيك وأنا بحترمو ..وعلى راسي الثورة البلشفية وشعاراتها .

[حسون]

سوريا على مفترق طريق : الذهاب والغوص في حلف طهران المتوسط له متطلبات أولها ديموقراطية .. ليش ؟ لأنو حزب الله وايران وحماس {فلسطين} هي أنظمة ديموقراطية ولا يمكن أن تكون ضمن حلف دون أن تكون ديموقراطي مثله .

هلأ أنا ما كتير بعرف بالنظام الإيراني
بس بعريف أنو حزب الله و حماس هني أحزاب مانون أنظمي
و عكل حال هادا التحالف لمواجهة أميركا و إسرائيل ما للديموقراطيي و لا للديكتاتوريي

إضافي لأني بشوف أنو سوريا لازم تصير دولي ديموقراطيي لأنو هادا مطلب الشعب السوري ما لأنو هادا مطلب النظام الإيراني و لا لأنو هادا مطلب النظام الأميركي

[me2]

كاتب النص الأصلي : حسون

هلأ أنا ما كتير بعرف بالنظام الإيراني
بس بعريف أنو حزب الله و حماس هني أحزاب مانون أنظمي

ما هدا اللي عم نحكي فيه .. أو حماس صارت هي النظام بينما حزب الله هو جزء من النظام ..

و عكل حال هادا التحالف لمواجهة أميركا و إسرائيل ما للديموقراطيي و لا للديكتاتوريي

وهدا كمان اللي عم نحكي فيه .. لا يمكن مواجهة أي حدا بدون قوة و القوة ألها مصدر وحيد وهو الديوقراطية والحرية ... طبعا هدا رأيي .

إضافي لأني بشوف أنو سوريا لازم تصير دولي ديموقراطيي لأنو هادا مطلب الشعب السوري ما لأنو هادا مطلب النظام الإيراني و لا لأنو هادا مطلب النظام الأميركي

البوم العالم عايش على التحالفات ..متل الاتحاد الأوربي وغيره .. والدول اللي سجلها الديموقراطي سيء متلنا . لابد من مساعدة وتأثير خارجي . بس يكون نظيف مو أمريكي ... يعني مو أنتو تبع الأممية ؟؟؟

[Hus]

اود التنويه اولا ان "أخوية" كإدارة لا تتدخل بأي صيغة كانت بمسير النقاشات والمواضيع المطروحةـ ولا تسعى سواء بالطرق المباشرة او غيرها اطلاقا لتأطير الأحداث و إسقاط ايديولوجيات مسبقة الصنع على الأعضاء او المواضيع،
بمعنى،
تكتفي اخوية إدارة ومشرفين بالمحافظة على جو سليم (واشدد على كلمة سليم (معافى)) من الحوار يسمح لجميع الأطياف بالتخاطب والتعبيرـ وتكون الغلبة للحجة والمنطق، ويكون القارئ (عضو كان او زائر) هو الحكم -

اما فريق العمل والإدارة فتتعدد مشاربهم الفكرية كما تتعدد منطلقاتهم الأيديولوجية ، يتفقون ويختلفون لكن في خطوط الموقع العريضة حتما متفقين .


----------
انا فيني اعطيك رأيي الشخصي (وبتحفظ على اعتبار اني اداري)

انا سعيد لفوز حماس بالإنتخابات ، وحقيقة الأمر كنت قبل ايام من الإنتخابات بنقاش وسجال مع مجوعة من الأصحاب وابديت رغبتي الشديدة بوصول حماس للسلطة ووصول الإخوان للسسلطة والحكم في معظم الدول العربية المجاورة ،

بالنهاية _وكل هذا بتقديري_ هذا هو الحل الأمثل،

الباب الأول:
من حيث (اي حزب بالسلطة يحترق _قاعدة عامة_) بالتالي حتما وحصرا اليساريين الإسلاميين ستقل شعبيتهم بمجرد وصولهم للسلطة,
من حيث (الأديان مطلقة والسياسات نسبية آنية) سيضطر الإسلامي للتخلي عن بعض مبادئه الإسلامية ومخالفة بعضها الأخر في حين ودد العمل السياسيي الحقيقي ، ومنه ستظهر تيارات اكثر تشددا تكفر التيار الإسلامي الي بالسلطة (وهون بتنتقل ساحة المعركة من عامة الشعب الى داخل التيارات المتشددة ) ..

الباب الثاني:
التجربة الثيوقراطية (الحكم الديني او الحكم بموجب الحق الإلاهي) تجربة ليست بالجديدة ، ويحضر على بالي اكثر التجارب الثيوقراطية وضوحا الا وهي التجربة البابوية بالقرون الوسطى ...
كان من افرازات ونتائج حكم المسيحيين (الباباوات) بالقرون الوسطة وفترة الحروب الصليبة ، ان ابتعد الشارع الغربي (الأوربي تحديدا بحكم التأثر المباشر) عن الدين تماما ـ،.. وهذا شيئ واضح وجلي اليوم .. ومن منطلقي ايضا هذا احد اهم عوامل نجاح الحضارة الغربية وتقدمها ...

ومنه، اعادة التجربة الدينية الثيوقراطية الإسلامية اليوم ستودي على المدى المتوسط والبعيد لشئ وحيد فقط، هو ابتعاد المسلمين عن الدين الإسلامي !
(بالظبط كحال مسيحيي اوربا كردة فعل على حكم الباباوات ...)

ولهيك اعتقد هذه الحقبة التاريخية (حقبة الحكم السياسي الإسلامي في البلدان العربية لا بد ان تعاش اليوم) كي تستمر حلقة التطور .. وحان الوقت لذلك .. منتمنى تمرق هال المرحلة بأقل خسائر _من حيث ان الخسائر مؤكدة لكن ..

ـ لا نسألك رد القدر وانما اللطف فيه _

[me2]

شكرا د Hus

[yass]

أنا صراحة متحفظ جدا على نتيجة الانتخابات الفلسطينية (متحفظ لا يعني أنني اعارضها بطبيعة الحال ... العكس تماما , أنا سعيد جدا للتجربة الديمقراطية الفلسطينية) لكنني لست من أنصار حماس و لا أحب بعض أساليبهم و ممارساتهم , أعتقد أن حماس سوف تكون رهينة من على يمينها (أقصد الجناح المتشدد منها و جماعة الجهاد الاسلامي) ...... لكن , من يعرف, على كل أتمنى كل الخير و السعادة للشعب الفلسطيني الشقيق , و أتمنى أن يأتي قريبا اليوم الذي ننسى فيه منظر الكلاشينكوف بجانب العلم الفلسطيني , و لنستبدله بغرسة زيتون .....

[zen]

التجربة الثيوقراطية (الحكم الديني او الحكم بموجب الحق الإلاهي) تجربة ليست بالجديدة ، ويحضر على بالي اكثر التجارب الثيوقراطية وضوحا الا وهي التجربة البابوية بالقرون الوسطى ...
كان من افرازات ونتائج حكم المسيحيين (الباباوات) بالقرون الوسطة وفترة الحروب الصليبة ، ان ابتعد الشارع الغربي (الأوربي تحديدا بحكم التأثر المباشر) عن الدين تماما ـ،.. وهذا شيئ واضح وجلي اليوم .. ومن منطلقي ايضا هذا احد اهم عوامل نجاح الحضارة الغربية وتقدمها ...

ومن هالكلام الي حكيه الحكيم
بحس انو نحنا عم نمر بنفس التجربة الي مرت فيها اوربا
يععني بعد فترة بيجوز تكون طويلة منوصل لحكم متل الحكم باوربا والتاريخ بيكرر نفسو
ومشان حماس
انا مبسوط لانو الشعب الفلسطيني قال كلمتوا
ومبسوط لفوز حماس لانو التنازلات راح يكون الها حد مو متل فتح

[محمد الساهر]

[حسون]

حماس صارت هي النظام

حماس استلميت البرلمان
بينما فتح لهلأ مستلمين رئاسة الجمهوريي محمود عباس

مو أنتو تبع الأممية ؟؟؟

الأمميي لا تعني أبدا أخذ حق الشعوب في تقرير مصيرها و إعطائها للدول الكبرى
و الحريي لسوريا مطلب الشعب السوري لا مطلب أميركا و لا مطلب إيران
و بعدين إيران ما طالبتنا نصير دولي ديموقراطيي لنتحالف معها

[me2]

كاتب النص الأصلي : حسون

حماس استلميت البرلمان
بينما فتح لهلأ مستلمين رئاسة الجمهوريي محمود عباس

الأمميي لا تعني أبدا أخذ حق الشعوب في تقرير مصيرها و إعطائها للدول الكبرى
و الحريي لسوريا مطلب الشعب السوري لا مطلب أميركا و لا مطلب إيران
و بعدين إيران ما طالبتنا نصير دولي ديموقراطيي لنتحالف معها

أوكي ... مع أني ما شفت ترابط .. بس مو مشكلة كتير ... المهم اغناء النقاش أو ايقافه في حال أنو ما رح نوصل لشي مشترك .

شكرا على كل حال .

[ابو شيرين]

اتمنى الله يساعد حماس في هذه المحنة
اذ سيكون كل الشعب متضرر اذا اخطاوا اي خطا بسيط ليس كما في السابق
اتمنى من فتح ان يكونوا حكومة ظل تحاسب حماس
و النتيجو النهائية التيار سينحب عاجلا ام آجلا

وشكرا

[me2]

شكرا أبو شيرين ....

[حسون]

ايقافه في حال أنو ما رح نوصل لشي مشترك .

لأ بالعكس نحنا تنيناتنا مآمنين بالتغيير الديموقراطي و لو أنو كل واحيد بشوفو من منظور

[صياد الطيور]

كاتب النص الأصلي : Dr_HUS

الباب الأول:
من حيث (اي حزب بالسلطة يحترق _قاعدة عامة_) بالتالي حتما وحصرا اليساريين الإسلاميين ستقل شعبيتهم بمجرد وصولهم للسلطة,
من حيث (الأديان مطلقة والسياسات نسبية آنية) سيضطر الإسلامي للتخلي عن بعض مبادئه الإسلامية ومخالفة بعضها الأخر في حين ودد العمل السياسيي الحقيقي ، ومنه ستظهر تيارات اكثر تشددا تكفر التيار الإسلامي الي بالسلطة (وهون بتنتقل ساحة المعركة من عامة الشعب الى داخل التيارات المتشددة ) ..
ولهيك اعتقد هذه الحقبة التاريخية (حقبة الحكم السياسي الإسلامي في البلدان العربية لا بد ان تعاش اليوم) كي تستمر حلقة التطور .. وحان الوقت لذلك .. منتمنى تمرق هال المرحلة بأقل خسائر _من حيث ان الخسائر مؤكدة لكن ..

ـ لا نسألك رد القدر وانما اللطف فيه _

كلام بغاية الروعة ولا فيني زيد عليه كلمة وحدة

مشكور دكتورنا