منع زواج القُصّر في سوريا

[Abu ToNi]

الأرقام اللي طلعت للاسف بتزعج

انه 19 واحد مع انه يمنع الزواج تحت ال 18
وشخص واحد مع الزواج

الشي اللي بيزعج انه رقم غير منطقي بالنسبة للشارع السوري اللي بيتعامل مع الامور بنسب مقلوبة وبعكس الاستفتاء النسب اللي طلعت معنا وبالتالي منقدر نعرف انه اغلبية الشعب السوري ما يفوت على النت وبالتالي ما بيستخدم الانترنت ( ما عبقول اذا فات على النت ضروري يكون بالأخوية )

بس على الاقل منقدر نعرف انه ما حدا من الشعب الجاهل بيستعمل الأنترنت وبالتالي كافة حملات التوعية اللي بتصير عن طريق النت بسوريا ما عبتصل للعالم اللي لازم تصلهم وبالتالي الأنترنت صعب يصير وسيلة توعية وهيك خسرنا نحن كسوريين اهم وسائل التوعية العالمية .



( ابو ريتا الموضوع فعلا بيستاهل التثبيت )

[Reemi]

( ابو ريتا الموضوع فعلا بيستاهل التثبيت )

ثبتو من اول ما نزل

[Abu ToNi]

لك انت مافي منك

بس شوها سمايلي هاد

طيري لقول لك عند رؤى حتى اطق حنكي معك

[zerocold hacker]

انا مع هاد الموضوع تماما لانو نص العالم بتجوز بناتها على بكير بعدين بعد ما تحبل وتولد البنت بيطلقها جوزها لانو عقلها صغير وبياخد الولد منها وبتصير البنت معقدة وما بعرف شو غير طبعا الولد شو صار بنفسيتو

وطبعا من النادر انها ترجع تتزوج مرة تانية اما لانها تعقدت من الجواز او لانو المجتمع ما بيحبذ المطلقات

وكل هالنتائج بسبب الزواج المبكر

انا لو فيي صوت اكتر من مرة ما كنت قصرت انا مع هاد القانون وياريت يكون اكتر من سن 18 كمان

[زوربا]

ليش بال 18 بيصير الواحد عاقل...
لا خيو أنا ضد فكرة المنع...لأنو مو بال 18 سنة بيتحدد إذا الواحد خرج يتجوز ولا لأ...

[Abu ToNi]

كاتب النص الأصلي : زوربا

ليش بال 18 بيصير الواحد عاقل...
لا خيو أنا ضد فكرة المنع...لأنو مو بال 18 سنة بيتحدد إذا الواحد خرج يتجوز ولا لأ...

بساطة بكون الانسان بعده بمرحلة ( المراهقة ) وما فيه يختار قرار مصيري بانه يحدد شريك العمر اللي بده يقضي معه حياته او الباقي من حياته الا اذا كان فكرة الطلاق مشروع كتير عادي بالنسبة الك واوكي مافي مشكلة يتزوجوا هلق وبعدين يتطلقوا ويصير عندهم خبرة فهاد حديث تاني .

[Reemi]

غير انو بكون بعمر المراهقه وما فيه ياخد قرار وعقلو لسا ما اكتمل ونظرة للامور والحياة والدنيا لسا ما اكتملت .. بس هل هوي - هي جسمهن قادر فسيولوجيا للزواج لانو تحت ال18 ما بتوقع بيكونو لسا اكتملو وبيكونو ففاهميين حالون منيح !!

وهل هني فيهن يتحملو مسؤووليات بيت واسره واطفال وعيله !!

[Abu ToNi]

كاتب النص الأصلي : Reemi

غير انو بكون بعمر المراهقه وما فيه ياخد قرار وعقلو لسا ما اكتمل ونظرة للامور والحياة والدنيا لسا ما اكتملت .. بس هل هوي - هي جسمهن قادر فسيولوجيا للزواج لانو تحت ال18 ما بتوقع بيكونو لسا اكتملو وبيكونو ففاهميين حالون منيح !!

وهل هني فيهن يتحملو مسؤووليات بيت واسره واطفال وعيله !!

لهيك بتشوفي حملات التوعية طارشة الدنيا مشان يتخلصوا من مشاكل العلاقات في مرجلة المراهقة يعني عنا بينصحوا بالزواح بعد ال 18 بينما برا بينصحوا باستخدام موانع الحمل قبل ال 18 بيختلف المنظور لكن الفكرة واحدة واللي هي عدم استيعاب ابعاد العلاقة ومسؤولياتها


معك 100 بالمية يا ريمي بس ما عبيعجبني السمايلي اللي حاطتيه

[achelious]

.. الزواج مؤسسة اجنماعية لازم ماننسى هالشي.. والقانون دوره هو دور العراب في الحقيقة..
والمسؤولية بتقع على عاتق الأهل.. لأنو القانون بالحالة اللي ذكرتوها بيشطرط موافقة الأهل لإتمام المعاملة قانونيا.. بقى مافي كتير مساحة للقانون بهيك حالة.. لأنو اللي يرتكبوها فيون يستنوا كم سنة لتزويج من يشاؤن ممن يشاؤون.. واللعب هون بدو يكون عالوتر الاجتماعي.. بدو شغل عوعي الناس..
يعني هيك قصة الصحافة بتلعب دور فيها أكبر وأكتر تأثير من القانون نفسه.. لأنو بالنهاية المسألة راجعة للأهل أصحاب القرار في تلك الكنتونات.
والسلام

[msalehh]

اكيد انا مع هالقانون

[ابو ريتا]

الي اختار انو يكون الزواج تحت 18 يعطينا رأيو

[Government]

ضد ضد .. وبرجع بزكر الاسباب

[بنفسجة]

خطوة كتير مهمة
ورائعة اذا بتطبق جد
هيك بتلغي سيطرة الاب وبتمنعو من التحكم بمصير بنتو تحت حماية القانون

[Juliet]

مع تعديل القانون وضروري جدا ...
لان متل ماذكرو الاخوة فوق الشب او البنت ماتهيئ لانفسيا ولاجسديا لهالشي ....
وبعدين طبيعه الحياة تغيرت عن القديم .... قديما كان الشب يتزوج ويجب هالمرا على بيت اهله ويسكن ويشتغل مع والده وهيك بكل بساطه

اما هلأ بدو يامن بيت وشغلو لبين مايتخرج ويزبط وضعو بدو عشر سنين وين رايح بالعجئه ..... والبنت نفس الشي بنات باعمار الزهور عم ترتمي على بيت زوجها وهي مافهمانه شي ...

وطبعا نحن عم نحكي على نسبة الاغلبيه بالمجتمع .

يعطيك العافيه على الموضوع والاستفتاء

[يمان Rooooonaldo]

مرحبا جميعا ..

ثانكس ابو ريتا عالموضوع ..

هلا .. انا بصراحة ماني عاطي موقف .. 100 % انو مع هيك قرار .. بس برايي في نسبة صغيرة .. بتضل برانية .. لل ضد .. يعني ما دائما .. كل الحالات بتكون .. بتقبل ..

في بنات هلا ... وخصوصي هلا بهيك وقت .. عم يكونو ما شا الله حولن .. البنات عرفانين حالن .. من ال 16 او ال17 ..

بس .. انو بضل في شي اسمو .. حالات خاصة يعني .. صعب انك تطبقا على .. الكل ..

بس النقطة .. اللي جد بتخليك تعطي .. نعم لهيك جماعات .. انو تطالب بهيك شي .. هية انو البنت من حقا انو تتعلم .. وتكمل دراستا .. وما من حق حدا .. انو يختارلا .. هلا قبل ال 18 ممكن تضل سيطرة وتاثير الاب على البنت .. كبير لدرجة .. انو بتقبل من تم ساكت .. بتوقع ... من بعد ال 18 .. بتكون ولو قدرت تفكر .. وتاخد فكرة كاملة عن حياتا .. وشو بدا تساوي ..

** انا صوتت ببالغلط على لا .. نقصولهم واحد

[Sarita]

مع مع مع مع مع وكتييييييييييير
لانو دخلكون الي تحت ال18 شو بيفهم لسا من هالدني؟

حبيبتي هلق صبي عمرو 12 سنة بيعلمك وبيعلمني وبيعلم الكل عن الحياة

بس اكييد وقطعا وابسولوتلي نوت
لا اؤيد زواج القصر

يا زلمة خلي البنات يعيشو حياتون لسا الدني باولها
وبعدين يكملو تعليمون بالاول ويعدين يفكرو بالزواج لانو هيدا التاني مسؤولية كبيرة ولا زملها تروي باتخاد القرارات مو خبط لزء وبعدين منلاقي الرجال متزوج ع مرتو مرة تاني

[Government]

طبعا انا قلت ضد هالقانون ورح قول ليش ضد ..
اول الشي .. هلأ اللي قالو مع قالو مشان عمر البنت وانو مابتكون بتفهم شي قبل الــ18 وجاهلة بكلشي ..
انا ضد هالرأيي .. بالعكس في بنات عمرن 14 او 15 سنة وبيفهموا وواعيات وعقلن اكبرن من بنات عمرن 20 مو 18 وقادرين يتحملو مسؤوليات وع قدر كبير من المسؤولية + انو بيعرفوا كل الامور اللي بتخص الزواج واموروا وبعلموني وبعلمو بنات عمرن 18 وفوق .. اكيد مو من باب الفكر المامنيح .. بالعكس هنن يعني ناضجين ومن سن ال14 حتى وعقلن كبير .. ويعني مناسبين تمام لتحمل المسؤولية .. وزواجن مو غلط بالمرة ..
حتى من ناحية الشكل وبنية الجسم .. يعني لما بتشوفن بتقول انو مابتصدق انو هدول بنات 14
يعني بتعطين اعمار 20 .. و25 وفوق ..
بينما في بنات عمرن 18 واكتر ومبين عليهن بنات 15 سنة من مناعية ولسه اصلا مابكون مكتملين لا جسديا ولا شي ..
وطبعا عنا بحلب هالشغلة كتير منتشرة .. وزيادة وانا بصراحة في بعيلتي وبالعيل القريبة من ومن الرفقة والناس القريبين تقريبا بنات كتير وكتير كتير .. متجوزين من عمر الــ14 او ال15 وحتى في وحدة بال13
وقريبين علي كتير ..
وطبعا كل هدول صلن سنين متجوزين وسنين طويلة وعايشين بصراحة حياة ولا اروع من هيك الله يهنين وصار عندن ولاد .. ورايحين يصيرو جدود .. وماشاء الله عليهن حياتن سمنة ع عسل ..
وبينما عمنشوف ناس متجوزين من عمر الــ18 وفوق .. وحتى فوق ال25 .. (ع اساس فهمانات ومتعلمات وهيك )
ومع هيك حياتن سيئة وماكتير متفاهمين مع جوازن وولادن وهيك ..
(واكيد مو للتعميم هالحكي دير بالك بس شرائح كبيرة من اللي عمنشوفا)
+ شغلة كمان .. يعني هلأ الوحدة لما بتتجوز وعمرا الــ14 وبتجيب ولد بعمر الــ15 سنة فرح يكون فرق بينا وبين ابنا 14 سنة مثلا .. فيعني هادا شي كتير كتير حلو .. وانو بعودو تقريبا متل الاخوة .. مو متل ام وابنا .. يعني انا بعرف ناس قريبين علي الفرق بينا وبين ابنا 14 سنة .. واللي بشوفن بفكرون اخوة مو ام وابن .. وشي حلو كتير هادا
(طبعا هالحكي مو للتعميم هي تقريبا شريحة كبيرة من اللي انا شايفو واكيد مافيني عمم وحط الف خط تحت مو الكل )
هلأ هي شغلة ..


شغلة تانية .. الشغلة اللي زكروة اللي قالو مع هالقانون انو الغصب ع الزواج من قبل الاباء وهالحكي هادا ..
فبقلن انا .. يا اخي هالحكي ماضل من شي .. هالحكي اللي عبتحكو كان من 40 .. 50 سنة او اكتر شوي ..
يعني ع زمن باب الحارة وهالحكي .. بس هلأ يا اخي هالحكي انقرض وانقرض بدرجة كبيرة وانا كتير واثق من هالحكي .. ماعاد حدا يجوز بنتو غصبالعنا متل اول .. اول الشي معظم الاباء عقولن تفتحت من التوعية وغيرو وحتى اللي باعلى درجات الجهل .. ماعاد عندن هيك شي .. والناس صار عندا توعية وماعاد الاب يجبر بنتو ويغصبا ع هيك شي متل الزواج .. لانو هالشغلة بالتحديد مابينغصب عليها .. كمان يا اخي بنات هالوقت انو ماعاد ينغصبوا ع شي .. يعني فلنفرض مثلا مثلا يعني انو ابوة غصبا .. يعني كمان مالن قصيرين حربة وماعبيرضوا بهالشي وباغلب الحالات ماعبصير هالزواج حتى لو الاب غصب البنت والبنت مابدا .. علمن انو هالشي انقرض وماعاد في اباء تغصب بناتا .. الا ما ندر

الشغلة التالتة .. يا اخي هي حرية شخصية .. اخي بركي بنت ال14 عاجبا واحد وبدا تتجوزا
اخي بركي البنت كسلانة ومو فالحة بدارستا ومابتحب الدراسة ومالا شي بالدراسة وبدا تتجوز يا اخي .. هي بارادتا .. مين بحقلو يمنعا .. وهالشي في منوووووووو كتير وكتير كمان بنات هنن بدن يتجوزوا من عمر ال14 بدون ماحاد يجبرن .. فهيك بنات ماحدا بحقلن ينمعن لا قانون ولا منظمات تشريعية ولا الحكومة زاتا .. هي حرية شخصية .. وخط احمر .. وكل واحد بيتحمل نتيجة حريتو .. وماحدا ابدا بحقلو يمنعو عنا ..
مشان هيك هالقانون غلط وغلط كتير كمان ..

وهي وجهة نظري انا بتفصيل ..

[yass]

لا تروحو عالحالات الخاصة... القانون لازم يحكي صورة عامة... اذا القانون يعتبر انو شخص تحت الـ 18 عام غير مؤهل للانتخاب مثلا, أو البيع و الشراء بممتلكات, و بدو ولي أمر لحتى يفتح حساب بنك... اذا القانون معتبرو غير مؤهل ليعمل كل هالقصص كيف راح يكون مؤهل لحتى يقرر شي مصيري بحياتو مثل الزواج؟؟