شوية مسائل عالسريع

[adel]

هيي سهلة بس مشكلتا بدنا نكيل ونعبي كتير
أول شي منعبي برميل السبعة كيلو من العشرة بيصير معنا ببرميل العشرة تلاتة
وبعدها منعبي من السبعة على برميل التلاتة ومنضيفون لبرميل العشرة بيصير معنا فيه ستة
وكمان مرة منعبي من برميل السبعة تلاتة ومنضيفون لبرميل العشرة بيصير معنا تسعة كيلو
والكيلو الباقي ببرميل السبعة مننقلو لبرميل التلاتة ومننقل من التسعة كيلو يلي ببرميل العشرة
على برميل السبعة كيلو بيبقى فيه تنين كيلو وبهالحالة منكمل برميل التلاتة من السبعة ومنضيفو للكيليين يلي ببرميل العشرة
شرحا أصعب من حلا

[hanny dagher]

لك يا عمي شو هالعدولة هاد

يلا المسألة السادسة (كمان سهلة)

واحد فات على فندق معا سبيكة دهب سالو للموظف قديش اجرة الليلة عندكن قلو سنتيمتر من الدهب فكر هالزلمي قلو طيب عندك مقص قلو اي بس مشكلتو انو بيقص مرتين بس
قلو الزلمي معلش عطيني يا بيمشي حالو وقص السبيكة ونام يبع ليالي بالفندق

فكيف قص السبيكة؟

هاي المسألة اسهل من اللي قبلا

[Willi]

مع اني ما فهمت السؤال كتير
وخصوصي

ونام يبع ليالي بالفندق

؟؟؟

يا سيدي اول شي قص السبيكة شقفتين
بعدين حط الشقفتين فوق بعض وقصهون سوا

صار عندو اربع قطع
وهيك نام اربع ليالي
اذا كان قصدك انو نام اربع ليالي

[hanny dagher]

اعتذر عن الخطأ المطبعي

نام سبع ليالي مو اربع

يلا حاولو عن جديد

[Willi]

هيك بصير بدها تفكير كتير

ما بعرف

[adel]

معلم ليش السبيكة كم سانتم ما فهمت

[hanny dagher]

سبعة سنتمتر طول السبيكة

[adel]

كاتب النص الأصلي : hanny dagher

سبعة سنتمتر طول السبيكة

كان مو ضروري يقصها

[hanny dagher]

انا معك بس المشكلة الفندق بدو كل يوم بيومو

[Willi]

لقيت الحل



منطوي الصفيحة اربع طويات
بحيث يكون بكل طوية في 2 سانتي
2 سانتي بالاولى
2 سانتي بالتاني
2سانتي بالتالتة
1 بالاخيرة
ومنقصهون على سوية الواحد سانتي
هيك منكون صار عنا شقفة وحدة طولها 1 سانتي مقصوصة لحالها
والباقي تلات شقفات 2 سانتي متر
يعني كل 2سانتي متر لحال
منحطهون فوق بعضهون ومنقصهون قصة وحدة بالنص

بكون صار عنا 7 شقفات
كل وحدة 1 سانتي متر


ما بعرف اذا فهمت عليي
بس شرحها صعب

[hanny dagher]

يا سيدي انا مستعد اتحداك اذا فيك تطوي سبيكة الدهب

بقلك انو حلك صح

يلا حاولو بطريقة تانية

انا بكرا بحط الحل ومسألة جديدة

[adel]

أنا كنت مبارح عم فكر كيف بدي قص السبيكة سبع شقف بقصتين وما زبطت
بس اليوم كنت عم أشتري غراض ب375ليرة فقلي معك 25 لأعطيك 150 ليرة وتذكرت الحزيرة
الحقيقة أنا ماكنت متوقع أنو الشغلة صرافة مع أنها بسيطة كتير
والحل أنو بيقص من السبيكة أول قصة سنتيمتر واحد وبيعطي للموظف وبينام ليلة
وتاني يوم بيقص من السبيكة 2 سنتمتر تاني قصة والاخيرة وبيعطيون للموظف وبيقلو رجعلي 1 سنتمتر .
وبالليلة التالتة بيعطي السنتيمتر يلي رجعلو يا وبالليلة الرابعة بيعطي بقية السبيكة الي هيي
4 سنتيمتر شقفة وحدة وبيقلو رجعلي 3 سنتيمتر الي معك وبالليلة الخامسة بيعطي 1 سنتيمتر
طبعا من الي رجعلو ياهون وبيبقى معو 2سنتيمتر شقفة وحدة بيعطي ياهون بالليلة السادسة
وبيقلو رجعلي 1 سنتيمتر مشان أدفعو بكرة

[hanny dagher]

حيو

اي ها هادا الزكا

برافو لصاحب المحل اللي عطاك الجواب

منكفي ولا منرتاح شوي





يلا منكفي

المسألة السابعة

زلمي تايه بهالصحرا معو خشبتين كل وحدة منن بدا حتى تحترق من طرفا الاول للطرف التاني
ساعة كاملة اجا هالزلمي بدو يعير تلت رباع الساعة باستخدام هالخشبتين بس
ما معو غيرن هني والقداحة فشو بيعمل ؟


يلا فكر فيا

واللي عندو مسائل من هالنوع يحطن اوكي؟

[adel]

أي بسيطة بيشعل أول خشبة من الطرفين
والتانية من طرف واحد طبعا مع بعض
وبس تحترق الأولى كلها بيكون مضى نصف ساعة
والتانية بتكون احترقت لنصها فبيشعلها من الطرف التاني
شو رأيك بهالحل

[مايا]

عن جد ذكي رح دق على الخشب مشان ما احسدك

[adel]

كاتب النص الأصلي : مايا

عن جد ذكي رح دق على الخشب مشان ما احسدك

شكرا كتير مايا خجلتيني
هي أول مرّة بشوف مشاركة ألك
أهلا وسهلا فيكي ومية فلّة

[hanny dagher]

يعدمني ياك رحمني شوي

رح خلص المسائل اللي عندي

جواب صح

اسا بحط مسألة ما في دقيقة بيكون حاللا طول بالك علينا


لاء عم امزح ماشاء الله عليك على هالمخ

يلا اللي عندو مسائل يحطن لبين ما يجهزو المسائل اللي عم حضرن

[Willi]

يا سيدي انا مستعد اتحداك اذا فيك تطوي سبيكة الدهب

بقلك انو حلك صح

اي انا بقدر اطويها




انو يعدمني ياك عادل
شو هاد

رح تجلطني