من هو الله؟؟

[zerocold hacker]

كاتب النص الأصلي : The morning

انتبهي هـون انتي عم تغلـطي بانك عم تطلبي منو ما يـصرّح بسـؤال بدور بباله ..
الله يـحب الاسئله ما بيرفضها .. لهـيك اوجد الاجوبه
بعدين الله لا يجيب زعل ليش لنزعل من بعض ..

لا انا ما عم قلو انو ما يصرح بالعكس اذا ما صرح يمكن ما يلاقي الجواب بس انا عم وضح الفكرة مو اكتر

وعنجد انا بعتذر اذا حدا انزعج من حكيي اللي قلتو

ومية وردة .........

[hanny dagher]

تسجيل متابعة الى يوم الاربعاء مساء او الخميس صباحا

لنا عودة مطولة (طبعا معظمكن بيعرف انو روح قلبي احكي بهالموضوع هاد ههههههههههه) انشالله ما يكون الموضوع شاطح جدا جزيلا ونلحق نقرا كل الردود

[VivaSyria]

كاتب النص الأصلي : The morning

عفكره الله ما بـخوّف بس الناس عنا كتير بتخاف من كل شي عندو قدره لذلك حوّلت قدره الاله لـشي مرعب بيتناسب مع طريقه فهمها للامور و طلب تنفيذها ..

هو يلي هدد بالويل و الثبور و عظائم الأمور مو أنا..

يعني هنن بيشوفو انو لو ما بخافو المدير يطب عليهم بنص الدوام ما بيمشو الشغل
لذلك ترجمو انو لو ما بخافو الله يعاقبهم بالاخر كانو ما صلو و لا اقامو شعائر العباده

لأنو هو مابيهمو شو مابيصير بالبشرية.. المه ينعبد و هاد الشي الوحيد يلي بيحاسب عليه

يعني كـنوع من الترغيب اللي بيسـتخدموه الناس بسـوق الحميديه - مثلا - لبيـع بـضاعه معينه انو بـيقلك البـياع لو بتفتل البلد كلها ما بتلاقي متل هالقطعه بجودتها و مهاره صناعتها و الخ الخ من حكي التجار اللي بخليك تشتريها و حتى وقت تمشي بالسوق و تشوف نفس القطعه معلقه على واجهات المحلات الاخرى تقول انو انا معي احسن قطعه بالشام كلها .. ( كان عطول يصير معي هيك عفكره )

شكراً انك وضحتيلنا انو الدين سلعة و بجاجة إلى تسويق

هلئ بالله لو مأرسللنا دين واحد عشو كنا بدنا نختلف ؟؟ يعني تخيّل انو بكرى تفيق الصبح تلاقي كل شي صار لون واحد و كل الناس صارت تحكي لغه وحده و كل السيارات و البنايات و الناس كلها شكل واحد ..
اي ما بعود للحياه طعمه .. بتصير مملّه و متل القهوه بلا مي ..

صحيح هيك أحسن مدابح و مجازر بإسم الدين,, على قولة ميدو تسالي

لو كان الله بدو يتدخل بكـل مشـاكل الحـياه لكـان عقل الانـسان صار عاطل عن العمل

بس ياريت أعرف بشو عم يتدخل و إيمتى

عن سـؤالك من هو الله ..
نـحنا , البشر اقصد , محاوله منا بحمايه الله شـوهنا صـورته .. أ ُدخل بعقولنا ان الله دائما غاضب و صارت كلمه الله مرتبطه ارتباط وثيق بالعقاب و الجنه و النار .. و انو اذا لقينا برتقاله غريبه الشكل فهي معجزه او مثلا شي سمـكه صاير معها برص بنقول انو هي قدره الله على جعل السمكه تنطق بالحق .. و استـخدام وسائل ترويع دلائل على العقوبات اللي انزلها الله بالبشر و بحقيقه الامر بتكون هالمناظر هي عباره عن اعمال فنيّه و منحوتات .. أ ُدخلت هالقصص و هالصور براسنا بطرق جدا ذكيه و غير مخطط لها لدرجه انو صار الموضوع غير قابل للنقاش او التفـكير و صار التفكير فيه مرتبط بالخوف .. لكـــــن الله هـو عـكس هالـصور هي الّا انو فـشل الانـسان بنـعلقه على الله و نـجاح الانـسان بنـرجعه للـعقل .. متـناسين انو العقل هو جزء من ادراك الله ..

ما بتتخيلي بعد هاد الكلام قديش كبرتي بالنسبة إلي.. عنجد كلام معبر عن الواقع.. و بلكي بيحط حد للناس يلي بس بدك تتناقشي معهون بموضوع الله بتحسيهن جنو و فوراً حملو السيف و ركضو..
شكراً لمداخلتك ريمي

[The morning]

هو يلي هدد بالويل و الثبور و عظائم الأمور مو أنا..

هو ما هدد هو وضّح و الناس خافت و ترجمت الصـوره لتهديد كرمال تقدر هي تفهمها و صارت تخاف و تخوّف بهالصوره كل مين بيحاول يفكر بشكل مختلف عنهم ..

لأنو هو مابيهمو شو مابيصير بالبشرية.. المه ينعبد و هاد الشي الوحيد يلي بيحاسب عليه

برضو هو ما طلب من البشريه تترك كل شي و تعبده لكن طلب منهون وقت يقضي معهم و يقضو سوا لكن مرّه تانيه الناس فـسرت هالطلبات على شكل اوامر ..

شكراً انك وضحتيلنا انو الدين سلعة و بجاجة إلى تسويق

لا انا استـخدمت هالحكي كمـثال على شـي انا رافضـته .. مافي دين احسن من التـاني لكن قلت انو من اساليب الترغيب بدين عن التاني تشبه اساليب بيع السلع .. اي يعني هي ابتداع انساني مش رباني ..

بس ياريت أعرف بشو عم يتدخل و إيمتى

يمكن ما يكون عم يتدخل لانو لو بدو عكل شغله يتدخل ما كان خلقنا كان هو دبّر كل الامور من عندو

ما بتتخيلي بعد هاد الكلام قديش كبرتي بالنسبة إلي.. عنجد كلام معبر عن الواقع.. و بلكي بيحط حد للناس يلي بس بدك تتناقشي معهون بموضوع الله بتحسيهن جنو و فوراً حملو السيف و ركضو..
شكراً لمداخلتك ريمي

اهليـن بس انا مش ريمي - هو انا و ريمي واحد ها - بس انو واحد بتنين ..

[sona78]

واضح انك اخد الناحية الدينية الاسلامية كاساس للاسئلة بس اذا بتاخدها من الناحيةالعامة ففكرة الله موجودة قبل الديانات الاساسية كلها وبكل الحضارات متل اليوينانية والاغريقية والفينيقية وووو ..... بس الفكرة اساسا هي احساس البشر بالعجز من مواجهة الامور وبرأيي كان هذا افضل مبرر لخنوع الانسان. فكرة الله كانت دائما وسيلة بايد القوي من شان فرض سيطرتو على الضعيف يلي من شدة ضعفو ما عاد بيفكر وصار عندو مبرر دائم لضعفو برأيي الشخصي هي وظيفة الله لهيك كتير عادي انو تلاقيه بصفات غريبة عجيبة والا كيف رح تبقى رهبتو؟؟؟؟؟

[VivaSyria]

كاتب النص الأصلي : The morning

اهليـن بس انا مش ريمي - هو انا و ريمي واحد ها - بس انو واحد بتنين ..

بس هالنقطه إنو عن جد ما انتبهت فكرتك ريم.. معناه انتتي يلي كبرتي بعيني و ريم بعدا على وضعا كبيرة طبعاً

[Seth]

الله , هذه الشخصية هي اقدم كذبة في التاريخ تصدق حتى الآن , اخترعها اليهود للسيطرة على العالم و صدقها المسيحيون و اتى المسلمون لكتابة آخر فصل في هذه المسرحية الطويلة و المملة

[MadMax]

لكل يللي عم يدافعوا عن الله .... يا ريت يجاوبوني على كم تساؤل بسيط :
ليش الله خلق ناس فقرا ..و ناس أغنيا
ليش الله خلق ناس أذكيا ..و ناس أغبيا
ليش خلق ناس صحيحة و ناس أصحاب عاهات
ليش كذا مليار واحد بالعالم عم يعانوا من المجاعة ....و كم الف بني آدم عم يتحكموا بأرزاق البشر
ليش في شعوب درجة أولى و شعوب درجة عاشرة

باختصار ليش هالازدواجية بالمعاملة
بس بنفس الوقت بيطلب منا نعامل بعضنا بمساواة و عدالة

[sona78]

كاتب النص الأصلي : Seth

الله , هذه الشخصية هي اقدم كذبة في التاريخ تصدق حتى الآن , اخترعها اليهود للسيطرة على العالم و صدقها المسيحيون و اتى المسلمون لكتابة آخر فصل في هذه المسرحية الطويلة و المملة

لا تخربط فكرة الله موجودة قبل اليهود بكتير الا اذا قلتلي انو اليهود اقدم من اليونان والاغريق وكل الحضارات القديمة
بس بوافقك براي انو الله في الديانةالمسيحية والاسلاميةماخوذ بشكل كتير كبير من عند اليهود يلي عطوه كل هالحظوة والخطورة

[Abu ToNi]

خيو الله وكل ما متعلق فيه اسطورة بداها الانسان ما بعرف ليش ما الي علاقة بعلم النفس ولا بدي حط لكم نظريات لكن اللي استنتجته ان الانسان بيشعر بالامان وقت بكون واحد راسم له طريقه والله بيعطي متل شعور بالأمان انه في مين عبيرعاك وفي مين عبينتبه عليك وبالتالي بيمتح معتنقيه او المؤمنين فيه نوع من الطمأنينة والانسان من وقت ما انوجد حاول يوجد هاد النوع من الطمانينة التفت للنار و للحجر عسى انه يخدمه ما مشي حاله التفت للقمر كمان ما ركب على عقله والشمس نفس الحكي حوّل للبقرة ما ركبت معه وما نزلت له على مراقه قدر بقدراته الخارقة يوصل لفكرة ان كل شي ملموس عبينهد وباثبت فشله فمن هون نطت بعقله انه الله كائن روحي وبدي بعدها الابداعات الشخصية عبر العصور فهاد لطش لك مفهوم من الزرادشتية لذقه بالله وهاد لطش لك شي من الوثنية لزقه بالله وهاد اللي التفت للاغريق ولطش لك كام فكرة من عنده ولزقها بالله .
وخلطة غريبة عجيبة طلع الله بمفهومه الحالي والناتج عن تقاطع المعتقدات القديمة مع المفاهيم الروحية وكل فترة والتانية بينعلم للمفهوم ( ابديت ) مشان يتماشى مع الواقع بس عاجلا ام آجلا حيسبح متله متل بقية الآلهة .

[boy freind]

كاتب النص الأصلي : Madmax

لكل يللي عم يدافعوا عن الله .... يا ريت يجاوبوني على كم تساؤل بسيط :
ليش الله خلق ناس فقرا ..و ناس أغنيا
ليش الله خلق ناس أذكيا ..و ناس أغبيا
ليش خلق ناس صحيحة و ناس أصحاب عاهات
ليش كذا مليار واحد بالعالم عم يعانوا من المجاعة ....و كم الف بني آدم عم يتحكموا بأرزاق البشر
ليش في شعوب درجة أولى و شعوب درجة عاشرة

باختصار ليش هالازدواجية بالمعاملة
بس بنفس الوقت بيطلب منا نعامل بعضنا بمساواة و عدالة

1 : مشان الاغنياء يعطو الفقراء و يكسبو اجر و الفقراء الله بيعوضهن بعدين بالآخرة

2 : مشان الاذكيا يطلعو دكاترة و الاغبياء يصيرو خضرية لأنو لو كل العالم دكاترة و علماء كانت خربت

3 : هي عجزت عليها

بس عندك وجهة نظر

[اللامنتمي]

مُنذُ عصور ٍ غابرة كانَ الإنسـان يُباع وَ يُشترى كـَ أي سُـلعة خام

كانَ البشر يُذبحون وَ يُبيدونَ بَعضهم بَعضا كـَ الحشَـرات أو كـَ حيواناتٍ مُضرة بـِ المُحيط

لقد اسـتعبدَ البشـر بَعضهم بعضاً بـِ إسـم ِ الدين وَ الله

إنهم يعبدونَ الله عَن طريق ِ قتل ِ الإنسـان داخل الإنسـان

هل تعرف ماهوَ الإنسان الذي بـِ داخلك ؟

إنهُ روحكَ وَ عقلك وَ شكوكك وَ آمالك التي لم تنظر إليها حَتى

إنهُ جُملة مِنْ المتناقضات !.

يَقول نيتشه الشهيرة " إن الله قد مات "

وَ يَقول ديسـتوفسـكي

" إنَ الله إذا اختفى أصبحَ كُلُ شَـيءٍ جائزاً الخير وَ الشر , الفضيلة وَ الرذيلة "

وَ أعتقد أنَ " فكرة وجود الإله " فكرة مُهمة جداً

فهيَ تنظم الحَياة وَ تردع الإنسان أحياناً عَنْ الرذيلة

لكن أتساءل أيضاً ما هيَ الرذيلة هل هيَ وَجهٌ آخر للفضلية !.

فـَ " لكي نعرف الفضيلة يَجب أن نعرف الرذيلة أولاً عِندها نعرف الأبعاد الكاملة للإنسان "

" الله " أصبحَ حُجة سياسية هذهِ الأيام بل مُنذ ُ الخليقة !.

ـــــــــــــــــــــــــ ــــــــــــــــــــــ

الشَكُ الصادق إيمانٌ صادق

[BL@CK]

عملنا حملة تنضيف للموضوع بتشبه حملة يوم النظافة العالمي ..

الموضوع قلنا فيكون تناقشوه بالطريقة اللي بدكون ياها بدون ما تفوتو بقصة الأديان . بدون حملات تكفيّريّة ..

بدون تهديد و وعيد و بطريقة راقية ..

بتمنى الإلتزام بهالنواحي .. رح نرجع نفتح الموضوع على أمل يكون الحوار أرقى من قبل ..

[VivaSyria]

كاتب النص الأصلي : اللامنتمي

الشَكُ الصادق إيمانٌ صادق

الشك و الأسئلة خير من النسياق مع القطيع دون تفكير و لا تدقيق.. أليس هو الله؟؟ ألا يحق لنا أن نسأل عنه؟؟ أليس من واجبه أن يسأل عنا؟؟

[وشم الجمال]

نحنا اذا بدنا نحاول نفكر بالابدية ما رح نقدر نستوعب انو الله مو موجود وهاد لانو الكون بيحتاج لموجد والكون بكبرو وعظمتو ما ممكن يكون موجود من العدم بس هون بنرجع لفكرة تانية وهالفكرة بتحكي انو طيب الله مين خلقو ؟؟؟يعني هون رح نرجع للحلقة يللي دخلناها انو يعني الاساس وينو وكيف؟؟؟

انو انا رح ارجع للموضوع عالاكيد لناقش مين هو...بس بدي اذكر كمان شغلة الكون لازم يكون الو قوة عظمى عم تتحكم فيه لانو بلا هالقوة ما رح يكون بهالنظام
ولازم هالقوة تكون وحيدة لانو اذا ما كانت هيك رح يكون في خلاف والكون رح يتدمر

وراجعين

[VivaSyria]

انا رح ارجع للموضوع عالاكيد لناقش مين هو...بس بدي اذكر كمان شغلة الكون لازم يكون الو قوة عظمى عم تتحكم فيه لانو بلا هالقوة ما رح يكون بهالنظام

مافهمت بتقصدي انو في قوة بتتحكم بالله؟؟

[وشم الجمال]

كاتب النص الأصلي : VivaSyria

مافهمت بتقصدي انو في قوة بتتحكم بالله؟؟

لا يابا ما بقصد هي
بس بقصد انو مع اختلاف اتجاهاتنا الدينية انو اي حدا فينا لازم يكون على اقتناع انو في قوة عظمى بتتحكم بالكون وهالقوة ممكن انا سميها الله وحدا تاني مو مسميها يعني باختصار بتخيل فكرة الله متفق عليها

[VivaSyria]

كاتب النص الأصلي : وشم الجمال

لا يابا ما بقصد هي
بس بقصد انو مع اختلاف اتجاهاتنا الدينية انو اي حدا فينا لازم يكون على اقتناع انو في قوة عظمى بتتحكم بالكون وهالقوة ممكن انا سميها الله وحدا تاني مو مسميها يعني باختصار بتخيل فكرة الله متفق عليها

كفكرة وجود مسير لهالكون أنا معك.. و حتى متفق معك بالإسم.. بس المشكلة هي إنو شو مهماته بحياتنا و بحياة البشرية.. يعني بالمشرمحي شو بيشتغل؟