لماذا مع أخوية وليس ضد ؟

[يمو_عاللمبة]

yass ..............طيب شلون عبتقلي فكرتك واصلة من زمان و قبل عبتقول حاولت تفهم وما مشي الحال ؟! هاد تناقض ولا لأ ؟؟ ............... وبعدين الحكي بين مثقف و بين جاهل بيفرق من السما للأرض يا معلم . وهون مربط الفرس ... المثقف ويلي فهمان بيعرف إش عبيحكي ... مو متل الجاهل بيحكي حكي خبط عشواء ... وعلى الله تلزء بالحيط شلون ما أجت تجي ! ............................... وببغاء بنقل الأفكار ... هو كل شخص بيتطلع على الرد يلي قبله وبيكتب رد بناء عليه ... وما عندو رأي خاص فيه ولا حتى فكر ... ولا حتى بيسترضي يشغل مخه شوي ويكتب من نفسه ........ هاد هو الببغاء ... و هدول شي منو كتير ... و ما رح أرجع أقلك يمكن ما وصلت فكرتي لأنو التناقض واضح ببداية كلامك بين واصلة وما عم تفهم عليي . .... بالمناسبة كل عام وانت بخير اليوم عيد ميلادك قالو ....

[Sarita]

تقلك ليه
العضو لمن بدو يشارك باخوية
بيكون مقتنع مية مية بانو هالمنتدى حلو والا ماكان سجل فيه
مشان هيك طبيعي يعارض حجب منتداه اللي حبو وصرلو مدة عم يشارك فيه
ولعلمك اغلبية الاعضاء المشجلين بيقعدو ع الاخوية اكتر من قعدتون ببيتون ومع عيلتون وانا شخصيا من هيدول الناس واخوية بيتي وكل شي بالنسبة الي
فيك تسميه ادمان فيك تسميه الي بدك ياه
بس اني اؤيد حجبو لاء
مادامت حرية التعبير هيي الاساس والمنطلق لكل الحملات ..وو...الخ
ليش ما خلوه ؟؟؟

وشكرا

[yass]

كاتب النص الأصلي : يمو_عاللمبة

yass ..............طيب شلون عبتقلي فكرتك واصلة من زمان و قبل عبتقول حاولت تفهم وما مشي الحال ؟! هاد تناقض ولا لأ ؟؟ ............... وبعدين الحكي بين مثقف و بين جاهل بيفرق من السما للأرض يا معلم . وهون مربط الفرس ... المثقف ويلي فهمان بيعرف إش عبيحكي ... مو متل الجاهل بيحكي حكي خبط عشواء ... وعلى الله تلزء بالحيط شلون ما أجت تجي ! ............................... وببغاء بنقل الأفكار ... هو كل شخص بيتطلع على الرد يلي قبله وبيكتب رد بناء عليه ... وما عندو رأي خاص فيه ولا حتى فكر ... ولا حتى بيسترضي يشغل مخه شوي ويكتب من نفسه ....... هاد هو الببغاء ... و هدول شي منو كتير ... و ما رح أرجع أقلك يمكن ما وصلت فكرتي لأنو التناقض واضح ببداية كلامك بين واصلة وما عم تفهم عليي . .... بالمناسبة كل عام وانت بخير اليوم عيد ميلادك قالو .... و دخلك كمان مين حذف توقيعي ؟؟؟؟؟؟؟؟؟

يا زلمة خيلة!!

عم قلك عم حاول أفهم طريقة تفكيرك أو المغزى أو لوين بدك توصل.. أو بالأحرى كيف زابطة معك هالفكرة و معتبرها منطقية.. حكيك فهمانو أول بأول.. و ماشي معك...

بدك توصل لأنو أخوية جنت على نفسها الحجب و تستاهلو... مو هيك؟ أي لأ ما حزرت... مسؤولية الحجب تقع على العقلية المتخلفة اللي ما تعرف غير تلغي اللي ما عاجبها.. مو عاللي يحكي.. شو ما كان حكيو, منطق الحجب كلو على بعضو غلط و غلط كبير.. مو صح عند ناس و غلط عند ناس.. كلو ع بعضو غلط

و تقسيمك تبع المثقف و الجاهل فايت بالحيط يعني عدم المؤاخذة... لأنو مين بيحقلو يقرر مين بيعرف عن شو عم يحكي و مين لأ؟ يعني القرار لمين؟ و بناءا على شو بالضبط؟ و بصفتو شو راح يعمل محاكمة النيات اللي راح يقرر انو هاد مثقف و هاد لأ؟؟ يعني مو منطقي الحكي بنوب

و يجي تقسيمك التاني.. شو القدرات الخارقة لتعرف مين "ببغاء" و مين لأ؟ ليش عم يخطر ببالي انك عم تحكي عن حرية التعبير و عم تحكي عن الكبت الافتراضي و عن منع دعم الحجب بأخوية.. و بنفس الوقت عم تتهم بالببغائية الأغلبية بهالمنتدى؟ يجوز لأنو مو جايين ع فكرك؟؟

و مشان تشوف انك تتهم طالع نازل.. و يجوز بدون ما تنتبه على حالك.. توقيعك يا معلم ما حدا حذفو.. لسهولة التحميل بكل صفحة اذا عضو رد أكتر من مرة بيطلع توقيعو بس بأول رد... هاي التفسير يعني.. عرفت شلون؟

في شغلات ما عم توضحها.. خلص ما مشكلة.. على كل... لمن يهمه الأمر... أخوية هيك, و راح تبقى هيك....لو مين ما حجبنا و كيف ما حجبنا.. و فخورين بنفسنا انو هيك

[Sarita]

أخوية هيك, و راح تبقى هيك....لو مين ما حجبنا و كيف ما حجبنا.. و فخورين بنفسنا انو هيك

وهو كزلك
الله محيي معدنك ياس

[يمو_عاللمبة]

Sarita ..... عليكي نوووووور .... و أنا أحد المقتنعين تماماً ولو ما كنت هيك ما كنت بالأساس لا سجلت ولا دخلت ... بس عندي اعتراض على حرية الرأي المنفرد إنو ليش دوماً نحن ( معن معن ) و ( عليهن عليهن ) ... يعني ما حدا بيتبنى فكرة طالعة من راسو ولا حتى بيسترضي يفتح فيها نقاش ... انا عم بدور على هاد السبب ... شكراً لمشاركتك الرايقة .....................yass ............ ليش مين قلك إنو أنا مع الحجب "بالمطلق" ؟! وأنا ما بدي أوصل لمحل .. وعلى فكرة يا معلم التأويل على لسان الغير ما حلو ! ........... ويمكن بالنسبة إلك حكيي مو منطقي بس بيكفي انو بالنسبة إلي منطقي و بصدق بحترم رأيك . وبعدين تنويه أنا ما عبتهم حدا بالمنتدى و إنما قلتلك ( هدول شي منو كتير ) وحتى ما حددت أي منتدى ... فليش عبتحدد بكلامك ؟ ............ وبالمناسبة شغلة التوقيع ما كنت بعرفا و أنا عدلت ردي بسرعة فيا ترى انت ليش رجعت للمحذوف ؟ وغريب إنو في متابعة عالدعسة .. بالله مو غريب ؟

[yass]

ليش مين قلك إنو أنا مع الحجب "بالمطلق" ؟!

و أنا ايمتى حكيت انو مع شو انت؟ عم احكي وجهة نظر موجودة.. خير ممنوع شي؟

مانك مع الحجب بالمطلق.. بس انو في حالات بتوافق فيها عالحجب.. و يمكن .. بالعودة الى سياق الموضوع, يكون حجب أخوية وحدة من هالحالات (ركزلي على "يمكن"ها.. مشان ما تقول تأويل و ما تأويل) كون انت ما عاجبك انو "ماهب و دب" يحكي هون ع كيفو.. انت شايفو غلط (هاد حكيك.. هون مافي داعي نقول "يمكن").. طيب.. لهون تمام.. ليش لتستهجن انو الكل ضد هالشي؟ ما كل موضوعك من أساسو هو عن هالشي.. انو ليش الكل ضد الحجب؟ أو ليش مافي حدا مع الحجب ,و بدل ما تفكر بلامنطقية دعم حجب منتدى من قبل عضو فيه طلع معك انو اللي مع الحجب ما بيحكي لأنو نحنا مخرسينو, و انو في نسبة كبيرة من مناهضي الحجب ببغاوات و يردو بناءا على الردود التانية.. هاد حكيك..


و طلبت منك تجيبلي اسم عضو واحد تقلّع من المنتدى لأنو كان مع الحجب و ما جبتلي... و لا انهيت هالفكرة.. و عم تروح من شبه فكرة لشبه فكرة بدون ما نوصل لمغزى من الحكي


و رجعت تتهم بحذف توقيعك (اللي حاط فيه دعاية لمنتدى تاني.. و واحد خبيث عم يقلي عالبرايفت انو عم تعمل بلبلة مشان تعمل دعاية لهداك المنتدى و ما عم صدقو و ماشي معك) و هلأ عم تتهمني بترجيع كلام انت حذفتو... و و و ... اخي ارسي على فكرة.. و فصفصها منيح مشان اعرف رد عليك.. اذا بدك رد عليك.. كون يبدو كمان زاعجك انو ينرد عليك

وأنا ما بدي أوصل لمحل .. وعلى فكرة يا معلم التأويل على لسان الغير ما حلو !

و مين عمل تأويل هون؟ عفوا يعني و بعدين كيف طالع معك تقول عن شي حلو أو ما حلو.. ازا نازل تقسيم بالناس بين مثقف و جاهل, و ببغاء و مو ببغاء..

........... ويمكن بالنسبة إلك حكيي مو منطقي بس بيكفي انو بالنسبة إلي منطقي و بصدق بحترم رأيك .

ليش أنا وين قللت احترام معك؟؟ بعدين لما تكون عم تناقش ما بيكفي انو تحكي كلام انت و فقط انت تعتبرو منطقي.. (كون لهلأ ما حدا مشاركك رأيك بمنطقية الكلام) .. لأنو ساعتها مانو نقاش انما حوار طرشان!

وبعدين تنويه أنا ما عبتهم حدا بالمنتدى و إنما قلتلك ( هدول شي منو كتير ) وحتى ما حددت أي منتدى ... فليش عبتحدد بكلامك ؟

شلون؟؟ يا زلمة من العنوان عم نحكي عن أخوية.. شو بدي بغير منتديات أنا؟ وين حكينا عن غير منتديات بكل هالموضوع؟ بالله هاد حكي؟ أخي ارسي على حكي حاسك عم تناور كتير مشان شي ما

............ وبالمناسبة شغلة التوقيع ما كنت بعرفا و أنا عدلت ردي بسرعة فيا ترى انت ليش رجعت للمحذوف ؟ وغريب إنو في متابعة عالدعسة .. بالله مو غريب ؟

و يرجع يتهم .. و يرجع و يرجع .. مين رجّع المحذوف؟ تعا هلأ طالعلي وين رجع المحذوف؟ ردود المنبر توصلني عالايميل .. و ردك نزل مع الاتهام بحذف توقيعك و لذلك رديت عليه مع اقتباس ردك كما نزل... يعني مو أنا اللي رجّعت شي

بعدين شو بدك انت ازا في متابعة و للا مافي؟ هيك يعني تطيير حكي؟ كمان زاعجك انو ينرد عليك يعني؟؟


و قبل ما تطالع قصة جديدة اشرح هالحكي.. ضروري كتير

بس عندي اعتراض على حرية الرأي المنفرد إنو ليش دوماً نحن ( معن معن ) و ( عليهن عليهن ) ... يعني ما حدا بيتبنى فكرة طالعة من راسو ولا حتى بيسترضي يفتح فيها نقاش ... انا عم بدور على هاد السبب

[phoenixbird]

معلم فيك تعطيني موضوع بياكد كلامك
شوف معلم
وقت بيكون في موضوع او رد في اي نخبيص بيخالف نصوص اخوية المحطوطة بكل قسم تحت اسم الاحكام الاعراف والمخالفات وخدني جيتك
في هالحالة المشرفين ما عم يقصروا بيحذفوا وبيعدلو وينبهوا وبيخالفوا
وغير هيك من حق اي عضو انو يقول رايه ومو من حق اي شخص اخر انو يمنعه بغض النظر عن الشي اللي عم يقوله ( بقصد بكلامي انو ما فيك تحدد والله هاد جاهل وهاد مثقف وهاد ببغاء )

برجع بطالبك بموضوع وحيد على الاقل تستشهد فيه بكلامك

[boy freind]

يعني طبيعي انت ؟

منتدى صرلي سنة فيه و بموت عليه و بدي أيد الحجب

هلأ انا في كم قسم ما كنت حاببهن و التغو و عنن تبع الاديان

و هلأ ليش لحتى أيد الحجب

اسهل ما ايد الحجب لأ ببطل فوت و خلصت

[يمو_عاللمبة]

yass لك يا حبيب بدنا نضل هيك على صد و رد بجاوبك من الشرق بترد من الغرب منضل لخمس تيام وما منخلص .. وبما إنك قلت نقاش طرشان فبعتقد مافي داعي نكمل .. لهون وبس .هلق بتقول انسحب وما انسحب ومن هالكلام .. اعتبره يلي بدك ياه .. أي شي بيخطر عبالك أنا بأيدك إنه صح .. و أكيد ما بدك أكتر من هيك شهادة .و بالنسبة للي عم يقلك عالبرايفت بلبلة و دعايات فبإمكانك تقلو إنو صار بتوقيعي في أربع منتديات مو بس واحد .. ما بعرف إذا بيظهرو هون أو بدي اعمل موضوع جديد حتى يظهر ....وقلو فسر ع كيفك ... من حقك التفسير .. و إذا حط المواقع او المنتديات بالتوقيع كان بخالف أكيد بإمكانك تحذفهن وانا مع الحذف ...ملاحظة : اقتباسك الأخير هو زبدة الكلام .....................phoenixbird ........أخي الكريم كلامك حلو كتير وأنا مالي معارض على شي ... و كمان ما حددت بكلامي أي حدا ! ...بدي أفهم وين التحديد بكلامي ؟؟؟ ... وفكرة موضوعي هاد أجت من خلال مشاركتي بعدة منتديات + مفاجأتي بحجب أخوية ... لذلك أنا ما بقصد لا مواضيع ولا أعضاء أخوية و إنما كلامي بشكل عام .. وعلى كل حال تكرم عينك لما بصادف أول موضوع بإمكاني أخبرك عليه بس رح يكون عالخاص تجنباً للمشاكل مع أي عضو لأنو الشباب مبين بيتقبلو النقد برحابة صدر .بس ما عطيتني رأيك بفكرتي حول الموضوع ؟؟؟؟ بشكرك .......................boy freind ............ايه طبيعي و فريش كمان ... و كلامك حلو كتير .. انت في كان قسم مالك حاببه ومعارض ... انت كتبت فكرتك عن عدم حبك لهاد القسم ومعارضتك عليه ؟ ولا ضليت ساكت وما حكيت شي ؟ لحتى التغى ؟ ... مالنا فيه ... بس قياساً عليه .. هاد هو قصدي بخصوص الحجب ... يعني لما انحجب .. ما كنت بتفكر انو ممكن يكون في سبب للحجب ( غير انو بسبب الحرية المفرطة بكل شي ) يعني كرأي انت تكونت عندك هيك فكرة ولا لأ ولو مجرد تفكير ؟وأنا مشارك من الـ 2006 و حصلت معي أمور وسافرت ... لما رجعت تفاجأت بحجب الموقع .. فخطر عبالي هالموضوع . شكراً إلك .

[fernanda bachchan kfoury]

انا مابعتقد انو عضو من اعضاء الاخوية يقبل انو الاخوية ينحجب
مافينا نستغني عالاخوية ياقوم
فهموا بقا

[VivaSyria]

يرحم أبوك بس جاوبني على سؤال صار 100 مره مكرر... كيف عضو بمنتدى وبيناسبه انو يتسكر؟؟ يعني عضو بمنتدى تاني ممكن يقلك ياريت المنتدى هاد يتسكر... ناس مو مناسبتهن أفكار أخوية ومن برات أخوية ممكن يقولولك صح يتسكرر...بس انت عم تسأل ليش مافي حدا من أخوية مع الحجب.. فهمني بس دخيلك لأني والله دخت.. يا أفكارك مو مترابطه يا أما نحن ماعم نفهم...

بتخيل فكرتي واضحة.. كيف بطالب شخص عم يمارس نشاطه بمكان انو يكرهو؟؟؟ يا عمي لو مو عاجبه ما كان فات...


برجع بسألك عضو "من أخوية" شو الأسباب يلي بتخليه بدو أخوية تنحجب؟ غير انفصام الشخصية طبعاً

صغتلك السؤال بكذا طريقة على أمل توصلك فكرتي.

[yass]

لك يا حبيب بدنا نضل هيك على صد و رد بجاوبك من الشرق بترد من الغرب منضل لخمس تيام وما منخلص .. وبما إنك قلت نقاش طرشان فبعتقد مافي داعي نكمل .. لهون وبس .هلق بتقول انسحب وما انسحب ومن هالكلام .. اعتبره يلي بدك ياه .. أي شي بيخطر عبالك أنا بأيدك إنه صح .. و أكيد ما بدك أكتر من هيك شهادة .و بالنسبة للي عم يقلك عالبرايفت بلبلة و دعايات فبإمكانك تقلو إنو صار بتوقيعي في أربع منتديات مو بس واحد .. ما بعرف إذا بيظهرو هون أو بدي اعمل موضوع جديد حتى يظهر ....وقلو فسر ع كيفك ... من حقك التفسير .. و إذا حط المواقع او المنتديات بالتوقيع كان بخالف أكيد بإمكانك تحذفهن وانا مع الحذف ...ملاحظة : اقتباسك الأخير هو زبدة الكلام .

تسالي لما حدا ياخدني على قد عقلي

خيو لا انسحبت و لا شي.. اصلا ما عد فيني فسر و اشرح كمان.. ما عد فيني... لذلك فيك تقول اتفقنا على انهاء الشو اسمو هون


و ع اعتبار الكلام المقتبس بالأخير "زبدة الحكي"... فيامعلم بدي قلك تعقيبي معناتا ع هالحكي:


(السمايلي يحمل تفسيرات عديدة.. انت خود التفسير اللي بيريحك)

[يمو_عاللمبة]

fernanda bachchan kfoury ..................بعتقد ما وصلتك فكرتي عالسوى ...............VivaSyria .....وانت روحي .. يرحم شنن بقبرو ... عضو بمنتدى بس أنا ما قلت يناسبه إنو يتسكر .... عضو بمنتدى ليش ما بعبر عن رأيه بتجرد و انفراد بالتفكير و حرية كمان مثلاً لو كان في جانب مظلم ليش لما يحكي عليه ؟ .. انحجب المنتدى الفلاني .. ليش الواحد ما يفكر لحدود أبعد من أسباب الحجب ( الظاهرية ) و ممكن تكون في بعض الجوانب المظلمة بهالمنتدى الفلاني ؟ ......... عبتمارس نشاطك بمكان ما ... تعرض هاد المكان لنوع من المدايقات أو التغيير ... انت ليش ما بكون عندك رأي خاص عن أسباب المدايقات أو التغيير يلي حصل ؟ غير الأسباب الظاهرة ويلي ممكن ما تكون واضحة . ... شكراً لردك ................... yass بتشكرك .

[BL@CK]

كاتب النص الأصلي : يمو_عاللمبة

مرحبا يا قوم لما انحجب أخوية ليش الكل عارضوا الحجب ومافي حدا أيده ؟ ولا في حدا أيد بس خايف يحكي مشان ما حدا من الإدارة يوقفله عضويته ؟؟؟؟؟المنتدى متل مجتمع شفنا المعارضين بس وين المؤيدين للحجب ؟!

كتير حلو إنك كسبت شويّة شعبيّة للموقع اللي بتوقيعك .. هازا شي بنحسبلك إنك أثرت ضجة مشان تكسب شوية زوار لموقع جربان و أنا أول زائر ..


هون يا عزيزي أللي موجودين .. كلوّون عاجبون المنتدى صحيح مع كتر المشاكل اللي بتصير بس الكل عاجبو الجو .. يعني المنتدى بخناقاتو بتناقضاتو بالزحمة اللي فيه .. بمواضيع الأكل هوا " للي متل هالموضوع" يعني في كتير إشيا بتعطيك عبق إنك بمجتمعك اللي عايش فيه ..


الأخوية يا عزيزي من أفضل و أرقى المجتمعات الإفتراضية .. الأأخوية صرح ثقافي فني علمي لك يعني من مجاميعو .. شو بدك العالم تقلك مؤيد أنا لحجب أكبر مكتبة إلكترونية أو أكبر مجموعة موسيقيّة أو لموقع صاحب أكبر هامش حرية ك منتدى ..

كونك عضو ب أخوية فا هازا بحد ذاتو شرف كبير لازم تفتخر فيه ..

و بس ..

[قرصان الأدرياتيك]

[QUOTE]
مرحبا يا قوم لما انحجب أخوية ليش الكل عارضوا الحجب ومافي حدا أيده ؟ ولا في حدا أيد بس خايف يحكي مشان ما حدا من الإدارة يوقفله عضويته ؟؟؟؟؟المنتدى متل مجتمع شفنا المعارضين بس وين المؤيدين للحجب ؟!
[/QUOTE]

مساءُ الخير...

كيفَ الحال يا عزيزي يمو عاللمبة؟!

أعجبني فيك صبرُك وعنادُك وأودّ أن أقولَ لك شيئاً أضيفه إلى ما كتبه الأصدقاءُ الأحبّة: أنت تتكلّم عن قضيّة الحجب مقارناً إيّاها بأيّة مسألة أخرى قد تتعرّض للتأييد من البعض والرّفض من البعض والحياد من البعض الآخر، وهذا غير صحيح، لأنَّ الصنفين يختلفان في جوهرهما.

بكلمات أخرى، أيّ موضوع أو مسألة تُطرح هنا ويتناقشُ الأصدقاءُ فيها بين مؤيّدٍ ومعارض ومحايد، كلّ هذا سيتمّ ضمن الحيّز الإلكتروني الذي تشغله الأخويّة، فأمّا مسألة الحجب التي طرحتَها للنقاش فهي تخرجنا جميعاً عن هذا الحيّز!!!

فإذا افترضتُ معك الموافقة على طرح المسألة على بساط البحث ولو بالتعبير والفكر، ولنمضِ قدماً في ذلك ونقول أيّدت الأغلبيّة حجب المنتدى، فحُجبت نهائياً. هل تعلم ماذا يعني هذا: انتهت الرّابطة! فكيف لعضوٍ يرغبُ في مكانٍ ثمَّ يؤيّد الرّأيَ القائل بإنهائه؟! هل هذا عقلانيّ؟!

وإذا قبلتُ معك أيضاً بأنَّ هناك مِن الأعضاء مَن يرغبون في الحجب، فعلى هؤلاء تبرير الأسباب. وأودُّ منك أن تعطيَني، كمثال، سبباً واحداً قد يعتمدُ عليه أحدهم ليبرّر حجب الأخويّة. أرجوك لا تغضّ الطرفَ عن هذا الطلب، لأنّه أساسيّ في إكمال الحوار إن رغبتَ فيه.

أخيراً: لك منّي التحيّة.

[maged-syrian]

هنالك مغزى بكلام يمو عاللمبة
الا وهو اظهار الاشخاص الذين يؤيدون الحجب لمعرفة سبب تأييدهم لهذا الحجب!! مو هيك
انا كأنسان ديمقراطي ضد سياسة الحجب بشكل كامل ... خصوصاً للمواقع المحترمة مثل موقع أخوية ... لكن بعض الحالات التي نراها من بعض الاعضاء المتمسكين بنهج مغاير للاغلبية والمتفاخرين به على الملأ ... يجعلونك تكره هذا المنتدى وتنبذه وتتمنى حجبه بشكل دائم .... وهذه هي المشكلة ... فالشر يعم والخير يخص ... بكل الاحوال انا مع هذا المنتدى بكل مااملك من قوة بسبب توفر اشياء لايمكن ان احلم بها بمنتديات اخرى ... مثل حرية الرأي السياسي وحرية النقاش بالامور السياسية والاقتصادية وماهنالك وحرية طرح الاراء ... وتلك العوامل لايمكن ان نحلم بها بأي منتدى سوري او عربي آخر لأنها خط أحمر
اقف مع اخوية لأنني على علم تام أن الحكومة السورية قد حجبت هذا الموقع لسبب سياسي بحت لا لسبب آخر كسبب ديني مثلاً! لذلك انا ارفض هذا الحجب رفضاً باتاً ...

[Sun Shine Art]

ليش بدي أيد حجب الاخويه ...وانا اجد نفسي بالاخويه ...بان اكون صريحه ....بعبر عن حالي وعن شخصيتي بعيدا عن الخوف ...وبحكي بكل المواضيع الي من غير الممكن ان نتلكم بها .في حياتنا لاسباب انت بتعرفها .......

بس انت ليش بدك الناس تعارض شي بتحبو ...ولا لان اتربينا هيك ؟؟؟؟؟؟؟؟؟

[ooopss]

كاتب النص الأصلي : يمو_عاللمبة

مايسترو , yass .......................عفواً يا شباب بس يعني من منطلق الحرية و حرية الرأي أنا ما لاحظت حدا وقف مع الحجب و كلو كان معارض ... و متل ما قلت المنتدى متل مجتمع مصغر و طبيعي نلاقي فيه مؤيدين و معارضين .... فيعني وين الغلط بكلامي ؟؟؟.......................................يا مايسترو ليش العضو مبسوط و مروق برأيك ؟ لأنو آخد راحته عالآخر بالمنيح و العاطل و مو سائل إذا كان يلي عم يقوله صح أو خطأ .. المهم هو عم يحكي و يفرغ شحنة كامنة جواته ( ضرب عشواء ) ... وهاد أكبر غلط بالنسبة لبناء حرية واعية و مثقفة ........................................yassوشي طبيعي نشوف كمان ناس مؤيدين الحجب و بيستحقو الإحترام لمجرد إنو عندهن رأي خاص بيحملوه ومالن متل الببغاوات .. معن معن عليهن عليهن .فأنا بعارضك بالرأي ...........................................

هلأ مشكلتك أنو هون بأخوية مسموح للكل يحكي شو مابدو ..!!
" اي هون الكل بيحكي شو مابدو طالما ما عم يغلط على حدا "
بحب قلك لما واحد بيحكي شو مابدو لو كان غلطان برأيو ولو كان مانو مثقف عحد تعبيرك
هي مو اسمها " ضرب عشواء"
هاد طريق ليصلح أفكارو اذا كانت غلط ..
أحسن من الكبت يعني ..
بس مالنا متعودين ..

كاتب النص الأصلي : يمو_عاللمبة

عفواً بعتقد ما وصلتكن فكرتي ومشان هيك بعتذر ........................وبقولو يلي ما بيجي معك رو معو ......................و أنا راي أرو معكن ....................البيت عايشين فيه حلو ... البيت فيه ساكنين أصحابه ... أصحاب البيت ما كلن على رأي واحد ... كل واحد عندو عقل و رأي خاص فيه .. و حتماً كل واحد بيحترم رأي التاني ... إنو ليش كل الشباب يلي بالبيت مؤيدين و كلن ( عالغميضة ) نحن مع ونحن مع و نحن مع ........ ومافي ولو واحد ينط يقول أنا ضد ؟؟؟ ... ولو إنه مجرد رأي فقط .... طيب ليش مافي حدا حتى عم يقول أنا ضد ؟ ليش ؟ ..... بخاف مثلاً ليتقلع برات البيت ؟ ولا لأنو رأيه معارض خلص نحن منحكم عليه سلفاً إنه رأيه غلط ؟ ( بغض النظر عن إذا كان رأيه صائب أو غير صائب ) ........................... أنا عايش بالبيت .. أجو ليهدو ... ليش أنا ما أكون مع الهد و مؤيد و لو "بالفكر" بس وليس بالمعنى ! و يكون عندي رأيي الخاص يلي بحترمه وبحاول أوصله للكل و هيك أفضل ما أكون مجرد ببغاء ناقل للآراء و الأفكار ... يعني حرية الرأي _المنفرد_

مثال فاشل جدا مع احترامي الك يعني
هون بأخوية مو الكل رأيهن واحد ولا الكل ببغاوات وأفكارهن وحدة
بس في شي اسمو انتماء
والناس يلي هون منتميين لأخوية لذلك بيدافعو عنها
رح عطيك أنا مثال
أنت سوري مثلا وفلان سوري وفلان سوري ..الخ
كلكن أفكاركن أكيد مو وحدة وبتختلفو كتير بوجهات النظر
بس رح تجتمعوا عفكرة وحدة وهي محبة سوريا والدفاع عنها

يمكن هالشي بيرد عتساؤلك واستغرابك كيف الكل ضد الحجب..
هي اذا حكينا بشكل خاص عن أخوية وما عممنا ..
يعني كيف ممكن لانسان يكون مع الحجب ..


تحية