تخلف العرب ... لماذا .. إلى متى .. !؟

[THE_unforgiven]

العرب ...

كثيرا ما نسمع عن تاريخ العرب وانجازاتهم ...
والتي لم تترك مجالا من مجالات العلوم .. إلا وتركت بصمتها الواضحة والدائمة ..
وانشهر عدد كبير من العلماء أمثال : الخوارزمي - ابن الهيثم - ابن سينا .. والكثير الكثير غيرهم ..
لكن .. لم تدم نضارة الحضارة العربية كثيرا .. فبدأت تخبو شعلة العلماء ..
وبدأت العلوم العربية تضعف ..
مقابل نهضة الأمة الغربية .. وتقدمها في كافة المجالات ..
وتبدو آثار هذه النهضة ... من خلال المتغيرات الدولية الحالية ..
وبروز الدول التي كانت متطورة سابقا خلال النهضة غربية .. كدول عظمى .. اقتصاديا وسياسيا وعسكريا ..
كثيرا ما نسمع ..
أدت دراسة بريطانية أو أمريكية .. إلى اكتشاف دواء لمرض كذا ..
أجرى علماء ألمان بحوث على كذا .. أدت إلى ..
كثيرا ما نرى في المجلات ..
أجرى علماء تجميل فرنسيون .. تجارب .. وأكدو أن مستحضر كذا المصنوع في فرنسا .. يؤدي إلى إزالة التجاعيد ..
وكثيرا هي هذه الأمور ..
السؤال الآن ... أين العلماء والباحثون العرب ..
لماذا نثق بالتجارب والبحوث التي يجريها الغرب ..
لماذا نقبل بالواقع المتخلف .. ونبتسم .. (هيدا صناعة كذا .. هيدا أصلي .. شغلة كبيرة ..)
هل التطور التقني هو السبب ... لا ينقصنا أموال لشراء المعدات .. النفط العربي بحر ..
هل القدم العلمي هو السبب ... لا ينقصنا أمجاد .. التاريخ العربي يطمس تاريخ البشرية بأكملها بالأمجاد ..
الهيمنة السياسية ... يمكن .. في ظل انشغال بعض الدول العربية بإشباع رغبات مواطنيها بالرفاهية ..
واقع الوطن العربي ... والتجزئة .. أكيد ..

العناوين العريضة لأسباب التخلف ..:

- الغرب الاستعماري كان له دوره في محاولة إبقاء العرب في ردهات التخلف إذ ليس من مصلحته أن يكون هناك اي رقي حقيقي على الساحة العربية..

- انحياز بعض الأنظمة العربية للسياسات الأجنبية ... ومحاولتهم إقامة أفضل العلاقات مع الغرب ولو على حساب الدول العربية ..

- قناعة الشباب العربي بعدم امكانية تغيير الواقع ورضوخهم للمشروع الأجنبي الذي حقق نجاحا باهرا .. ونرى قليلا من نتائجه المرحلية بالنظر للواقع الحالي ... وباقي النتائج مستقبلا ..

- انشغال الشباب بأمور تافهة (الإنترنت - الديجيتال - الأفلام - المقاهي - الموبايلات وموضتها ..الخ )
والتي حاولت الدول الغربية زرعها في كافة انحاء العالم لنشر التخلف وجعل الدول النامية تابعة لها سياسيا واقتصاديا واجتماعيا .. ونجحت في ذلك .. للأسف .. كونها أمور تجذب انتباه الشباب وتلهيهم عن الإبداع والخلق ..

- استيراد كافة متطلبات الرفاهية والعيش وتوافرها بالسوق بكثرة .. (عأساس تطور وارتفاع مستوى معيشة )
مما أدى إلى عدم الحاجة للإختراع والتطوير .. (الحاجة أم الإختراع .. )
وهذا الإستيراد يتم بالعملة الصعبة .. وأحيانا تكون كلفة الشراء أكثر ب80 % من كلفة الإنتاج .. (بيقولو ثمن التقنية .. )

- عدم قيام تعاون جدي وصريح بين الدول العربية .. وعدم تطبيق الإتفاقيات التضامنية ..
والإكتفاء بمجرد عقد المؤتمرات والإجتماعات ..
-----------------------
إلى متى ... ولماذا ... هل من أمل ... ؟
---------------
notice "
يرجى الإلتزام بجدية الموضوع .. لأنه يمس وبشكل مباشر ..
جميع جوانب حياتنا .. فردا فردا .. ويؤثر على طريقة عيشنا .. وطريقة تفكيرنا ..
بالمختصر ... التخلف .. هو واقع .. وليس بالواقع الذي نطمح إليه ..


---------------
مبدأ التصويت :
إذا كنت ترى بصيص أمل ... اختر الوسيلة التي تعتقد أنها قد تحل جزئيا مشكلة التخلف ..
أما إذا كنت لا ترى حاليا أملا في الخروج من الواقع .. فاختر لا ..
ولاتبخلو بملاحظاتكم واقتراحاتكم .. من حيث طرح الأسباب والحلول ...



THE PUNISHER "


.
.
.

[yass]

وانشهر عدد كبير من العلماء أمثال : الخوارزمي - ابن الهيثم - ابن سينا .. والكثير الكثير غيرهم ..

من هدول فقط ابن الهيثم عربي... اذا عم نحكي عن العرب لازم ننوّه لهالشي..

السبب هو ذاتي بالشكل الأساسي.. يعني مزبوط الاستعمار لعن سما البلاد و العباد.. لكن هالشغلة بدها وقفة قصيرة: ليش الاستعمار استعمرنا؟ مو لأنو قدر يغلبنا؟ ليش قدر يغلبنا؟ مو لأنو نحنا ضعفاء؟ ليش نحنا ضعفاء؟ لأننا متخلفين.... من هالسطر تلاقي انو الاستعمار هو نتيجة للتخلف و ليس سبب.. ما كنا أقويا و اجو استعمرونا و عملونا ضعفاء.. انما العكس,بسبب ضعفنا اجا الاستعمار و غلبنا (انو الاستعمار يشتغل مشان نظل متخلفين هاد مافي شك فيه, لكن مانو سبب تخلفنا, هو استلمنا متخلفين و جاهزين)..

بالنسبة للأنظمة الحاكمة, هي أنظمة ليست عميلة بل شريكة ( وفي فرق بين انك تكون تشتغل عند حدا و انك تكون شريكو بالشغل) .. اعتبارها عميلة هو استخفاف بمقدرتها على الأذى.. بل هي شريكة و شريكة أساسية..

السبب الأساسي لتخلّف الشعوب العربية هو انو نستخدم التاريخ (بشكل مزوّر أغلب الأحيان) مشان نمجد لانتصارات يجوز كانت و يجوز ما كانت.. و اهمية التاريخ تكمن بانك تدرسو مشان ما تعيد أخطائو.. نحنا عن نقص بهالشي.. نكرر و نكرر و نكرر ...

في سبب أساسي آخر انو مجتمعاتنا مختلة الموازين.. و مجتمع موازينو مختلة صعب يتطوّر.. القصد انو تركيبة المجتمع فيها خلل يؤدي الى انو النجاح الشخصي غالبا يتعارض مع النتاج الجماعي, فلذلك مافي تركيبة وحدة اجتماعية و ثقافة اجتماعية.. هاد أمر ما فيك تلوم فرد عليه انما لازم تبحث عن سبب الخلل.. و يجوز لحتى تلاقيه لازم ترجع مية و ميتين و تلاتمية سنة لورا.. و هو بتفوت بحلقة مفرغة من السبب تبع سوء استخدام التاريخ..

[sandra]

بغض النظر عن مفهوم الحضارة العربية على مين بيطبق
بس بدي اعتبر أنو الكلام موجه عن شعوب المنطقة
جيت لطلع عالحلول يلي اقترحتا ما عرفت أي واحد اختار وعلى شوي رح قول فخار يكسر بعضو بس ما بدي كون متشائمة كتير ... حلو يكون في بصيص أمل بالحياة لنعمل عليه ... اخترت الرابع وهو نشر الوعي
يعني الوحدة العربية ما بظن رح تعمل شي وما رح تصير أصلاً
وباقي الحلول هي رح تكون نتيجة لخطوات سابقة الها بتتمثل بتوعية هالشعب من السبات يلي هو فيه
وبزيد عليه أنو لازم نبدا هالتوعية مع الولاد الصغار وبطريقة مدروسة عن طريق المناهج المدرسية
بدنا شغل كتير

[VivaSyria]

باية في نقطه هامة وهي أحد مشاكل تعاطينا مع اي مسألةبتخص "العرب" وهالمشكل من وجهة نظري بعدم تحديد واضح لمعنى العروبة والعرب... تعريف العروبة والوطن العربي وأبعاد مسألة العروبة ضروري كتير.. يعني اذا نسينا خريطة حزب البعث ونسينا شعارات عبد الناصر مين هنن العرب؟؟ هل هنن مجموع أشخاص الدول الناطقة باللغة العربية!!! بحال كانو هدول هنن فشو الرابط بيناتن؟؟ هل فينا نربط أي دولتين ببعض بحكم اللغة المشتركة أو الدين؟؟ بهيك حالة فينا نقول إنكلترا وأميركا عبارة عن قومية واحدة.. من وجهة نظري مفهوم الوطن العربي الكبير كذبة كبرى...

بالرجعه للموضوع أسباب التخلف بالدول "العربية" بتعود تاريخياً لعدة عوامل ومن أبرز هالعوامل هي طبيعة الأنظمة الحاكمة الاستبدادية يلي ساهمت ولدرجة كبيرة بتحديد مسار تفكير الشعوب... قمع حريات قمع فكر = انعدام الإبداع وانعدام التطور..
وعلى فكرة الوقوف بوجه التطور هو هدف أساسي للأنظمة "العربية" بحكم انو أي تطور فكري أو علمي أو حضاري أو أي نوع أخر بيمس وبشكل مباشر باستمرارية هالأنظمة...

نقطه أخيرة : موضوع اعتمادنا على التاريخ زايد عن حدو كتير.. ياعمي كان عنا تاريخياً كم واحد فهيم.. اي وشو يعني؟؟ اتشرفنا.. كل الشعوب مر عليها عبر التاريخ عظماء.. بس ماحدا عاش على أطلال هالعظماء متل ما نحنا عملنا...وهالشي سببو الأساسي مواستنا للنفس بحكم نحنا اليوم ولا شي.. نحنا ورقة بإيدين البشر...

شكراً على الطرح

[Abu ToNi]

صوتت للخيار الرابع لأن :

تفعيل الإتفاقيات الإقتصادية والسياسية ... وإقامة الوحدة

براي الفكرة بحد ذاتها (( اقامة الوحدة )) مش فكرة بالأصل ... عبارة عن شعار شبعنا منه كتير وغلط يطلع خارج نطاق الشعار ... " هاد بالمختصر المفيد يعني "

محاربة العولمة والهجمة الغربية على الدول العربية

غلط اننا نستعمل اسلوب " المحاربة " للتطور خصوصا لدول متقدمة .. لدول متطورة
بتقول لي محاربة الجهل ... محاربة الأميّة ... محاربة التخلف
بس تقول لي " محاربة العولمة والهجمة الغربية " انا بشوف غير بالعولمة (( المستوردة )) من الغرب ما فينا نتطور لان بالبداية بدنا اساسات حتى نقدر نوقف عليها بعتقد تجارب الغرب وافكارهم لازم نستفيد منها .. مش نحاربها .

السعي للإبتكار والتطوير الذاتي .. وتقليل الإعتماد على الغرب

نحن حاليا بوضع ما بيسمح لنا ناخد الوقت مطولا للابتكار والتطوير الذاتي مبدائيا لازم ناخد نماذج جاهزة نماذج اثبتت جدارتها مسبقا والتطوير بيجي بتحسين النماذج الغربية واسقاطها على واقعنا .. مش بابتكار نماذج تتوافق مع واقعنا لأن الوضع يمكن تلخيصه على قولة الجزيرة (( لأن الوقت لا ينتظر ))

أقامة مؤتمرات محلية .. ونشر الوعي على التلفاز والإنترنت

منطقيا يعتبر المستوى المتدني اللي وصلنا له من الوعي الجماهيري هوي سبب تخلفنا فبعتقد الحل الانسب هوي رفع مستويات الوعي بشتى الاساليب حتى نقدر نوصل لنتائج مع الأيام بيفتخر ولادنا واولاد ولادنا وقت بدهم يرددوا (( نفوس اباة وماض مجيد ))

[Marooshe]

وضع العرب ما رح يتغير لا بوعي ولا بغير وعي... لانو عربنا صارو حالة ميئوس منها... علاجها ما حدا بيعرفو ومافي قدامنا حلول كتيرة يعني... بما انو اسباب هتخلف هاد متعددة ومتشعبة وصعب كتير انو نتفق عليها ونحصرها... وبما انو التوعية مو نافعة بشي لانو عم تطلع بالاخير حكي بحكي والحكي بعمرو لاقدم ولامن يحزنون ازا بدو يعمل شي بس بيأخر... لهلأسباب هي انا بشوف انو الحل الانسب بيكون انو نبتدي نعمل شي... ولو متأخرين... بس دائما الحل الوحيد قدام اي حدا للتخلص من عبودية او من فرض معين وقع علية هو بانو يكون كيان مستقل ومنفصل عن الاخرين... ازا ابتكرنا وعملنا بذاتنا... بيقل اعتمادنا ع الغرب... وازا قل اعتمادنا عليهن بيصير عنا تطور حضاري خاص فينا... بيصير عنا كشعب كيان مستقل خاص فينا وبالتالي قوة... ومن هلقوة سيطرة خارجية والسيطرة الخاجية ممكن تأدي معها للتقليل من السيطرة الداخلية بداخل المجتمع... يعني بتقل السيطرة ع الافراد... يعني بيقل التخلف وبتزيد الحريات...

[THE_unforgiven]

شكرا لكل من أبدى رأيو ...
بحب نوه انو غرض الموضوع اجتماعي بحت .. ولا يمت للسياسة بصلة .. بحسب صيغة الطرح .. (هلأ يمكن بمت بصلة ما .. بس ما رح نحكي عنها .. عم نحكي عن الأسباب الأخرى ..)
فيا ريت نلتزم بإطار الموضوع .. وما نخرج عنو ..
بالنسبة للتصويت .. فيكن تصوتو لأكتر من خيار .. بس بحيث ما يتناقض الخيارين ..
يعني إذا أكتر من خيار .. فمعناتا عندك امل .. وهالشي لازم تبينو بالحلول .. دون اختيار ما في أمل ..
وشكرا ..

[achelious]

..مافي شي اسمو الحضارة العربية, الحضارة اللي عم تحكي عنا حضارة إسلامية.. كان العرب جزء منا..
وهي بداية الخلط بالموضوع.. لأنو مالقيت أنا غير السبب الأول سبب..أما الباقي نتائج.. وهدا الخلط الشائع نص المشكلة!
وأخيرا.. مافيك تفصل الموضوع عن السياسة وهو إلو أوثق الصلة فيها.. برأيي مافيك تفصل شي عن السياسة!
تحياتي أبو جورج

[THE_unforgiven]

كاتب النص الأصلي : achelious

..مافي شي اسمو الحضارة العربية, الحضارة اللي عم تحكي عنا حضارة إسلامية.. كان العرب جزء منا..
وهي بداية الخلط بالموضوع.. لأنو مالقيت أنا غير السبب الأول سبب..أما الباقي نتائج.. وهدا الخلط الشائع نص المشكلة!
وأخيرا.. مافيك تفصل الموضوع عن السياسة وهو إلو أوثق الصلة فيها.. برأيي مافيك تفصل شي عن السياسة!
تحياتي أبو جورج

هلأ أول شي ... أنا عم بحكي عن الواقع .. ما كتير بيهمني حضارة مين .. او مين عملا من الطاوئف ..المهم حضارة خاصة بالعرب .. بس المهم .. شو صار فينا .. ووين صرنا ..
هلأ بالنسبة للنتائج اللي حكيت فيا .. هني يمكن نتائج .. بس كمان عم يزيدو الواقع سوء .. فلهيك حطيتن ضمن الأسباب .. لأن أغلبن ما كان موجود بأيام زمان .. ودخل ع حضارتنا وخربا ..
لأنو للأسف .. مناخد الحضارة من منظور واحد .. ومنمحي البقية .. (shift+delet) وما بقا منفكر فين نهائيا ..
منفكر باللي عأساس بيفيدنا .. باللي بيلهينا .. ومننسى انو مو بس لازم ناخد من الحضارات .. انما لازم نزيد عليا ..ونطورها .. وهون المصيبة ..
وبالنسبة لموضوع دخل السياسة بالموضوع .. سبق وقلت .. إلها تأثير .. بس أنا توجهي بالموضوع اجتماعي أكتر مانو سياسي .. وحابب يبقى هيك ..مشان ما ندخل بدوامة النقاشات العقيمة .. متل المواضيع السياسية الباقية ..
شكرا عالمشاركة ..

[yass]

وبالنسبة لموضوع دخل السياسة بالموضوع .. سبق وقلت .. إلها تأثير .. بس أنا توجهي بالموضوع اجتماعي أكتر مانو سياسي .. وحابب يبقى هيك ..مشان ما ندخل بدوامة النقاشات العقيمة .. متل المواضيع السياسية الباقية ..

بس غلطان بهالحكي.. السياسة أولا و أخيرا هي "لوحة تحكم" أي مجتمع.. ازا عملنا تشبيه شوي مجازي..

على مر التاريخ.. جميع التغييرات الاجتماعية كانت نتيجة لتغييرات سياسية لعوامل مختلفة.. و نظرية انو السياسة لحال و المجتمع لحال هاي غلط...و ما فيك تفصلهون.. و لا يمكن ينفصلو بأي شكل من الأشكال..

[الباحثة عن الحرية]

ممم اول شي ما في شي اسم امة عربية الشعوب الي معتبرينها في هي الامة ك واحد منها امة لحالو اصلا العرب لحد اسا مش معروفين مين هني
انا بختلف معك في اسباب التخلف بعني الغرب مش هني سبب نخلف هي الشعوب هني كانو السبب في استمرارو بس مش اكتر اما الاسباب فهي مختلفة بس حسب رايي السبب الرئيسي هو سياسات القمع اذا كانت سياسة الدولة نفسها او حتى من الناحية الدينية ....

تفعيل الإتفاقيات الإقتصادية والسياسية ... وإقامة الوحدة

يعني هذا مش حل هذا شعار او فكرة مشيت منيح في الستينات والسبعينات وحتى ولو صارت معجزة وعملو هيك وا رح يستفيدو شي يعني الي رح يتغير هو التسمية من دول كتخلفة الى وحدة متخلفة

محاربة العولمة والهجمة الغربية على الدول العربية

هذا كمان شعار استعملوه في زمان وطلع حكي فاضي مش اكتر
حتى ولو هيك عملو شو رح نستفيد يعني ؟ اصلا لولا ما وصلت الافكار والاختراعات الغربية لعنا كنا بعدنا راكبين حمير وماشيين فيهن! لانو عنا ببساطة ما في عنا حدا يفكر ويطور

[quote]السعي للإبتكار والتطوير الذاتي .. وتقليل الإعتماد على الغرب /QUOTE]
هذا الحل كتيييييير مناسب بس مستحيل يتطبق في ظل سياس القمع الي احنا فيها س كمان و تقليل الاعتماد يعني التطوير والابتكار اخر هم للشعب

[quote]أقامة مؤتمرات محلية .. ونشر الوعي على التلفاز والإنترنت /QUOTE]
ليش الشعب فاضي للعلاك ........... في عنا حكومات شاغليتنا باشياء تانية

بس يبقى الامل ...!!!
واسفة اذا طولت عليكو

[achelious]

كاتب النص الأصلي : THE PUNISHER

هلأ أول شي ... أنا عم بحكي عن الواقع .. ما كتير بيهمني حضارة مين .. او مين عملا من الطاوئف ..المهم حضارة خاصة بالعرب .. بس المهم .. شو صار فينا .. ووين صرنا ..
هلأ بالنسبة للنتائج اللي حكيت فيا .. هني يمكن نتائج .. بس كمان عم يزيدو الواقع سوء .. فلهيك حطيتن ضمن الأسباب .. لأن أغلبن ما كان موجود بأيام زمان .. ودخل ع حضارتنا وخربا ..
لأنو للأسف .. مناخد الحضارة من منظور واحد .. ومنمحي البقية .. (shift+delet) وما بقا منفكر فين نهائيا ..
منفكر باللي عأساس بيفيدنا .. باللي بيلهينا .. ومننسى انو مو بس لازم ناخد من الحضارات .. انما لازم نزيد عليا ..ونطورها .. وهون المصيبة ..
وبالنسبة لموضوع دخل السياسة بالموضوع .. سبق وقلت .. إلها تأثير .. بس أنا توجهي بالموضوع اجتماعي أكتر مانو سياسي .. وحابب يبقى هيك ..مشان ما ندخل بدوامة النقاشات العقيمة .. متل المواضيع السياسية الباقية ..
شكرا عالمشاركة ..

حبيبي أبو جورج.. خلينا أول شي نتفق عمفهوم الحضارة.. بأنها نتاج إنساني متنوع..
بس تقول "عرب" أو "عربي" أو عربية" صرت عم تحكي عن قومية أو عرقية.. وهذا خاطئ!
فالحضارة عالمستوى الإنساني "الكل" شركاء فيها..
هلئ مافي عرب بالخارج عم يطورو ويضيفو للحضارة؟!.. منهم علماء وأدباء وشغيلة...
الجواب: أكيد
والمشكلة اللي عم تحكي عنا اجتماعية صحيح بس أسبابا سياسية -والسياسة هون وسيلة والاقتصاد غاية-
لاحظ إنها موجودة "بدول العالم الثالث" -عربية وغير عربية- الفرق بلعبة تكريس التخلف.. متعلق بظروف كل مجتمع
يعني مثلا.. المجتمعات العربية تتميز بأنها أسلامية.. اي.. لهوهن بالطائفية..
هلئ انت عم تقول المهم العرب.. ليكن.. أنا معك.. بس وقت تقول بدنا نعمل حضارة.. بدك تهيئلها ظروفا.. لتنمو هالحضارة.. (مهيك؟!)
اي هيدي الظروف.. مارح فيك تهيئها
بدون ماترجع للسياسة.

بالنهاية برأيي المتواضع بقلك كلمتين.. الغرب تعلم الدرس بعد أخر حضارة إسلامية بالأندلس..
اي مارح يسمح بقى بتكرار التجربة.. "لتنشر الإسلام".. انتبهت!.. مو انت !
سلطان هاتيك الحضارة يرجع يحكم أوروبا.. ويدخلها الإسلام
تحياتي

[THE_unforgiven]

كاتب النص الأصلي : achelious

الفرق بلعبة تكريس التخلف.. متعلق بظروف كل مجتمع
يعني مثلا.. المجتمعات العربية تتميز بأنها أسلامية.. اي.. لهوهن بالطائفية..

ما تقلي هيدي من السياسة ... هون منرجع عالتوعية والتثقيف .. نحنا بالأصل .. شعبنا فكرو ديق ومحدود ..
وبدو أخد فردا فردا عالمصحات العقلية .. وعمل غسل دماغ .. مع اضافة المبيض ..
ماعدا بعض العقول المنفتحة اللي بتفهم بالحوار .. وهودي نادرا مانشوفن .. بس أنا متأكد لو انوجد بين كل عشر أفراد واحد من المثقفين .. كانت الدنيا بخير ..

فالحضارة عالمستوى الإنساني "الكل" شركاء فيها..

معك أنا .. الحضارة نتاج انساني بيتفاعل وبيتضامن لتشكيل الحضارة بمجملها ..
بس اللي بيصير وصاير .. انو في حضارات طاغية ح حضارات وعم تهمشا ..متل ما صاير معنا ..
لك حتى يمكن ما بقا عنا مقومات الحضارة ..
حسب ما بذكر .. مقومات الحضارة ..
الأرض - الشعب - النظام السياسي - واختراع الكتابة ..
هلأ الأرض .. مجزأة .. والشعب مجزأ والنظام السياسي .. مفرق ومتعدد الأشكال والألوان ..
اما الكتابة .. عأساس نحنا اختعناها .. ف عم خاف ..انو ما بقا في شي اسمو حضارة عربية .. صارت حضارة اقطار .. وكل وحدة بتختلف عن التانية ..
يمكن السياسة دخلها .. بس بدك ترجع للي عم يأثر بالسياسة .. وهوي العادات .. والأفكار المتوارثة .. والنهج الماشية فيه الدول العربية .. لك حتى الإقتصاد بيأثر .. كل شي بيأثر ..

الغرب تعلم الدرس بعد أخر حضارة إسلامية بالأندلس..
اي مارح يسمح بقى بتكرار التجربة..

هادا حكينا .. انو عرفت الأنظمة الغربية كيف تلعب لعبتها وتبعد بين العرب .. يعني العرب وللأسف .. مصدر ضعفن مو خارجي .. هوي من أصلن .. لك خدا ع مستوى فردي .. إذا اتنين بالشارع تخالفو ع شغلة .. بتقوم حرب أهلية .. ف كيف بين الدول .. شغلة بتوجع الراس .. ..

شكرا عالمداخلة ..

[yass]

هون منرجع عالتوعية والتثقيف

ليش التوعية و التثقيف مو سياسة؟؟

السياسة ليست فقط أحزاب و قادة و اجتماعات و تصريحات و قمم .. السياسة هو اسلوب اداري لأي مجتمع. متل ما قلتلك قبل هي لوحة تحكم هذا المجتمع..

[zen]

انا بشوف التخلف العربي ناتج عن الأرتباط الغريب بيت الشرقيين والدين
مع انو لو بتلاحظو بيجوز من زمان كانوا مرتبطين أكتر
بس بعد ما لعب رجال الدين لعبتهون وسخروا الدين لمصالحون الشخصية صار الدين أدة بإيد هالناس اللي استخدمواها لطمس العقول لانو لما العق\مقل بيصير منفتح هني ما عاد بيبقالون سلطة بالمرة وهاد الشي أكيد ما بدون ياه
وتاني شي السلطة اللي بتخلي المواطن القرفان حياتوا عم يركض لياكل الخبز ومانو عم يلحق (مثال عنا)
او بيكونوا مكتفيين مادياً بس السلطة بتخلي عقول الناس بين رجليها مثل السعودية
هاد غير الممنوع
أبسط مثال انو ما بيصير تعمل شي بحث علمي اذا بيخالف شي شريعة عنا بالعالم العربي
مثلا الاستنساخ كان مستحيل يصير عنا بالشرق
تحت ذريعة الحراااااااااااام
ما بيقولو لا حياء في الدين
و كمان لا حياء في العلم

[achelious]

كاتب النص الأصلي : THE PUNISHER

ما تقلي هيدي من السياسة ... هون منرجع عالتوعية والتثقيف .. نحنا بالأصل .. شعبنا فكرو ديق ومحدود ..
وبدو أخد فردا فردا عالمصحات العقلية .. وعمل غسل دماغ .. مع اضافة المبيض ..
ماعدا بعض العقول المنفتحة اللي بتفهم بالحوار .. وهودي نادرا مانشوفن .. بس أنا متأكد لو انوجد بين كل عشر أفراد واحد من المثقفين .. كانت الدنيا بخير ..

شفتا للشيفت+ديليت

حسب ما بذكر .. مقومات الحضارة ..
الأرض - الشعب - النظام السياسي - واختراع الكتابة ..

هي مقومات الدولة, ماخص اختراع الكتابة.. الحضارة نتاج متل ما اتفقنا..اي "نتيجة".. بينما الكتابة وسيلة للتعبير..
الحضارة هي نتاج عمل الإنسان في شتى المجالات.. موسيقى..رسم.. أدب.. فيزيا..الخ
بالتالي مقوماتها.. هي الانسان الحر. فقط!

هادا حكينا .. انو عرفت الأنظمة الغربية كيف تلعب لعبتها وتبعد بين العرب .. يعني العرب وللأسف .. مصدر ضعفن مو خارجي .. هوي من أصلن .. لك خدا ع مستوى فردي .. إذا اتنين بالشارع تخالفو ع شغلة .. بتقوم حرب أهلية .. ف كيف بين الدول .. شغلة بتوجع الراس .. ..

شكرا عالمداخلة ..

بيبقى دود الخل منو وفيه..

[achelious]

كاتب النص الأصلي : yass

ليش التوعية و التثقيف مو سياسة؟؟

هيدا أقرب إلى مايجب أن يكون مما إلى هو كائن!

السياسة ليست فقط أحزاب و قادة و اجتماعات و تصريحات و قمم .. السياسة هو اسلوب اداري لأي مجتمع. متل ما قلتلك قبل هي لوحة تحكم هذا المجتمع..

السياسة غير الإدارة.. لهيك بتقول.."الإدارة السياسية" أو "السياسة الإدارية"
السياسة أوسع مفهوما,
أما بالحديث عن لوحة التحكم.. فهي باختصار بالغرب.. ومابتزبط هون وعالهامش//هي أحد إشكالات الاستيراد.
بالغرب بتخطط لنقلة بعدين بتنفذا..
بالشرق.. بتصير النقلة بعدين بيتخطط لضبطا!

[THE_unforgiven]

كاتب النص الأصلي : achelious

بالغرب بتخطط لنقلة بعدين بتنفذا..
بالشرق.. بتصير النقلة بعدين بيتخطط لضبطا!

هون النقطة الحرجة ...
هيدي أحد مشكلاتنا الكبيرة بالوطن العربي ...
يعني أي قرار أو اي مشروع .. بينعمل عالسريع وبشكل تعسفي إذا أمكن القول ..
وبعدين بعد كم سنة .. لما بتبلش تظهر النتائج السلبية .. منبلش نخطط لنضبط المشروع ونصححو ..
مشكلتنا .. مامنخطط .. وما مننظر للمستقبل بأفق متعددة ..
------------------