قضية وطنية: رأيك بإمتلاك سوريا للسلاح النووي

[VivaSyria]

بعد الضربة التي قامت بها إسرائيل لإحد المواقع العسكرية السورية قيد الإنشاء حسب التصريح الرسمي لتعود الحكومة وتعلن أنه منشأة مهجورة ليست مشغولة بشيء.... وهو موقع نووي حسب التصريحات الأمريكية والإسرائيلية...
معلوم ان الوكالة الدولية للطاقة الذرية بدأت تحقيقاتها في سوريا في نيسان بناء على معلومات من الاستخبارات الاميركية مفادها أن الموقع السوري كان مفاعلا شبه مكتمل بنته سوريا بمساعدة كوريا الشمالية وأنه مصمم لانتاج البلوتونيوم الذي يستخدم في القنابل النووية...

هذه الوكالة قد أدرجت الملف السوري مؤخراً على جدول أعمال إجتماع مجلس حكامها الشهر الحالي.. الأمر الذي رأى بعض المحللين فيه وجود مؤشرات قوية تدل على إمتلاكها لأدلة على برنامج نووي من نوع معين.. وقد ذهب البعض منهم إلى مرحلة القول أن المفتشين قد عثروا على بقايا لمواد مشعة في الهواء والتربة تؤشر إلى أن الموقع المقصوف قد كان في أخر مراحله قبل البدء بإنتاج البلوتونيوم وحتى لتخصيب اليورانيوم...

كمواطن سوري...

ما رأيك بإمتلاك سوريا لمفاعل نووي مخصص للأغراض العسكرية أو السلمية؟
ما رأيك بوجود تعاون في المجال النووي بين سوريا وإيران وكوريا؟؟
هل تعتبر أن هكذا تعاون يفيد سوريا بتقوية مكانتها إقليمياً ضمن إطار مايسمى بتوازن الرعب؟؟؟
أم تجده لا ينفع سوريا بل يضعفها ويضعها في موقف محرج أما المجتمع الدولي ويساهم في زيادة الضغط عليها؟؟؟
هل تؤمن أساساً بإمكانية إستعمال السلاح النووي في عالمنا اليوم؟؟ أم تجد الأمر مجرد تقوية لأوراق لعب بعض الدول؟؟؟
هل تصدق ان سوريا بالفعل تمتلك برنامجاً نووياً من أي نوع؟؟ أم أن الأمر لايعدو كونه ضغطاً أمريكياً إسرائيلياً؟؟
هل تعتقد أن كوريا وإيران تستخدم سوريا وأرضيها لمصالحها الخاصة التي تضر بنا ولن ينوبنا شيئ من هذا السلاح؟؟ أم ترى فيهما حليفاً إستراتيجياً وداعماً لسوريا في المعادلة الإقليمية؟؟

بعض المقتطفات الإخبارية المتعلقة بالموضوع:

فاذا استطاع مفتشو الوكالة ان يخرجوا بأي دليل يشير الى انشطة سوريا في اقامة مفاعل نووي في ذلك الموقع، فسيؤدي ذلك الى بداية طريق وسلسلة من التفاعلات ستطال كوريا الشمالية النووية وايران المتهمة بكونها تسعى لذلك، لتنضم اليهما سوريا وتصبح في السلة النووية المستهدفة اميركيا ودوليا.

بي بي سي

وبحسب المصدر عينه, فإن موقع "الكبر" في سوريا الذي دمره الطيران الاسرائيلي بدعم من واشنطن, كان مقررا ان يستخدم لمشروع عسكري مشترك بين سوريا وكوريا الشمالية وايران, وهو عبارة عن مفاعل نووي لغايات عسكرية.

وبحسب مصادر "در شبيغل"، فقد كان مقررا ان تساعد بيونغ يانغ العلماء الايرانيين على التقدم في برنامجهم النووي عن طريق تزويدهم بمعارف اضافية. وكان مقررا ايضا ان يكون "الكبر" موقعا موقتا لايران تطور فيه قنبلتها النووية بانتظار تمكنها من القيام بذلك على اراضيها.



دير شبيغل الألمانية

قال وزير الخارجية وليد المعلم اليوم الأربعاء إن "التسريبات الإعلامية حول العثور على يورانيوم مخصب في الموقع الذي قصفته إسرائيل قرب دير الزور تهدف للضغط على سورية" في أول رد فعل سوري على التسريبات الإعلامية حول العثور على ذرات يورانيوم في الموقع الذي قصفته إسرائيل.
وأضاف المعلم خلال مؤتمر صحافي مشترك مع وزير الخارجية العراقي هوشيار زيباري إن "هذا التسريب الإعلامي من مصادر غربية، لم يذكر اسمها، وقبل تقديم رئيس الوكالة الدولية للطاقة الذرية محمد البرادعي تقريره بشان ذلك يؤكد أن الهدف منه هو إيجاد ورقة ضغط على سورية".

سيريا نيوز

ودمتم

[yass]

طبعا ضد...

مالو أي جدوى استراتيجية أو حربية (بدنا نضرب تل أبيب فيه؟ ليكا 200 كيلومتر عن الشام اذا مو أقل.. يعني عرفانين ما رح نضربهون), عدا عن كلفتو المادية العالية اللي ممكن تفيد بأمور كتيرة تانية غير المغامرة النووية, و بعتقد ماننا بطرانين و لا مصارينا كتار لحتى نفوت هالفوتة, في مليون شغلة أبدى, حتى على المستوى العسكري

أعدائنا اقليميين و اخطارنا اقليمية, ليكا اسرائيل عندا نووي, بس مش النووي هو اللي مكسبها قوة استراتيجية لأنو ما فيها تستخدمو ضد جيرانها كونها متداخلة معهون جغرافيا..

[sona78]

اوافق
واوافق
واوافق جدا
اساسا انا مع انو كل الدول تحوي اسلحة نووية طالما في دولة واحدة تملكها
وطالما الدول الكبرى اخدتها وسيلة ضغط على الدول الاخرى لازم تسعى كل الدولة انو تحصل عليها بشتى الوسائل بحيث لما تصير حرب تصير ابداة ويروح الصالح والطالح بدل الطبقية الوقحة بالتعاملو ( الحفاظ على التوازن العسكري الموجود في المنطقة اي بقاء القوي قوي والضعيف ضعبف )
كوريا مشت العالم ع كيف كيفها وبتلعب فيهون لعب .. واجمل ما قالو الرئيس الكوري الشمالي انو لو العراق ملك الاسلحة فعلا ما كانت الحرب قامت عليه ..
والضغط الدولي لدولة قوية لا يقارن بالنسبة لدولة ضعيفة ...
لهيك يا ريت كل العالم يمشي بهيك طريق .. الى جهنم وبئس المصير

[VivaSyria]

كاتب النص الأصلي : yass

طبعا ضد...

مالو أي جدوى استراتيجية أو حربية (بدنا نضرب تل أبيب فيه؟ ليكا 200 كيلومتر عن الشام اذا مو أقل.. يعني عرفانين ما رح نضربهون), عدا عن كلفتو المادية العالية اللي ممكن تفيد بأمور كتيرة تانية غير المغامرة النووية, و بعتقد ماننا بطرانين و لا مصارينا كتار لحتى نفوت هالفوتة, في مليون شغلة أبدى, حتى على المستوى العسكري

أعدائنا اقليميين و اخطارنا اقليمية, ليكا اسرائيل عندا نووي, بس مش النووي هو اللي مكسبها قوة استراتيجية لأنو ما فيها تستخدمو ضد جيرانها كونها متداخلة معهون جغرافيا..

ضد امتلاك السلاح فقط أما ضد أي تعاون مع إيران وكوريا بمجال انتاج هيك سلاح.. بمعنى تاني رافض الدخول بالمعادلة من الأساس أما فقط رافض الدخول فيها رغبةً منك بتسخير موارد البلد لشي أهم؟؟

على فرض عمليات إنتاج هالسلاح كانت على حساب هالدول هي ونحنا ما لنا أي دور... بتوافق؟

[VivaSyria]

كاتب النص الأصلي : sona78

وطالما الدول الكبرى اخدتها وسيلة ضغط على الدول الاخرى لازم تسعى كل الدولة انو تحصل عليها بشتى الوسائل بحيث لما تصير حرب تصير ابداة ويروح الصالح والطالح بدل الطبقية الوقحة بالتعاملو ( الحفاظ على التوازن العسكري الموجود في المنطقة اي بقاء القوي قوي والضعيف ضعبف )
كوريا مشت العالم ع كيف كيفها وبتلعب فيهون لعب .. واجمل ما قالو الرئيس الكوري الشمالي انو لو

برجعلك لنقطة انو السلاح النووي لما يستخدم منذ الحرب العالمية... وبتاريخ البشرية ما استخدم غير مرة وحدة بهيروشيما وناغازاكي... فهو عبارة عن ورقة ضغط لاغير وهالشي متفقين فيه...

برأيك هيك ورقة ضغط مستاهله كل هالضغوط يلي بدها تجي من وراها ومزيد من الحصار؟؟

وبرجعلك لنقطة هل انتي موافقة على دخولنا بتعاون مع ايران وكوريا على أراضينا بغية حصولون هنن على على هالسلاح ويمكن ما ينوبنا منو شي؟؟

[رجل من ورق]

يعني هالفلوس يلي رح بفتوها عالمفاعل يحطوها بمطرح تاني يفيد البشر احسنلون اذا كانت القصة للسلاح
بس ليش لا اذا في كان في الية معينة مثلا تمشل عدة دول اقليمية وتعمل مفاعل سلمي كرمال الطاقة وهيك قصص
مثل تركيا وايران ودول اخرى

[yass]

كاتب النص الأصلي : VivaSyria

ضد امتلاك السلاح فقط أما ضد أي تعاون مع إيران وكوريا بمجال انتاج هيك سلاح.. بمعنى تاني رافض الدخول بالمعادلة من الأساس أما فقط رافض الدخول فيها رغبةً منك بتسخير موارد البلد لشي أهم؟؟

على فرض عمليات إنتاج هالسلاح كانت على حساب هالدول هي ونحنا ما لنا أي دور... بتوافق؟

منرجع لنفس القصة.. شو آخدنا نحنا لعند كوريا؟ شو ضاعلنا هنيك؟ علاقات دولية؟

وجود سلاح نووي عنا مالو نفع, أو نفعو أصغرمن ضررو... بخناقة بالشارع ازا واحد شال حجر صغير أو متوسط الناس تروح ركض تحاول تمسكو و تحجزو.. بس ازا شال بلوكة فكلو بيعرف انو ما رح يضرب فيها..

نحنا طلقة مضاد جوي ما ضربنا ع طيارة حلّقت فوق قصر رئاستنا.. و الحجة كانت انو ما رح نرد على استفزاز و ندخل بمعركة ماننا قدها. ما هيك؟ طيب لو امتلكت نووي رح تقلب الموازين؟ النووي اللي عندك راح يكون احسن من النووي تبع اسرائيل أو أميركا؟ رح تخوّفهون فيه؟ أكيد لأ

سلاح ما منقدر نستعملو, و لا رح نستعملو, و رح نفوّت حالنا بسباق ماننا قدو و لا بأي شكل من الأشكال, لا ماديا و لا تكنولوجيا و لا شي, و ما رح نخوّف حدا فيه (ليش لنضحك ع حالنا... ايران سلاح ايران النووي بيخوّف أميركا حقيقة؟ أنا بقلك لأ.. الصاروخ المحمّل برأس نووي بدو نص ساعة أو أكثر بين ما يتركّب على منصة التحميل و ينطلق, و أميركا عندا تكنولوجيا كافية تدمر منصة التحميل و الراس النووي فيها قبل ما ينطلق الصاروخ.. فعشان شو يعني؟)


هاي بما يخص رفضي لألها من الناحية الاستراتيجية..

بخصوص موارد البلد, فاحسب بكلفة برنامج نووي مهما كان بسيط قديه ممكن تتسخّر موارد لأمور أهم بمليون مرة (أهم لأنو السلاح النووي بايدنا يكون... يالله كان مثال مش كتير لائق اذكرو, بس انو متل قلتو)

و على حساب دول تانية و نحنا ما دخلنا... فانو ليش لنضحك على بعض.. مين يعطي شي ببلاش؟ مين رح يصنعلك سلاح نووي اذا مو مقابل شي؟ يجوز مش مادي بس يظل شي أكيد مانو قليل بنوب..

[قرصان الأدرياتيك]

كاتب النص الأصلي : yass

طبعا ضد...
مالو أي جدوى استراتيجية أو حربية (بدنا نضرب تل أبيب فيه؟ ليكا 200 كيلومتر عن الشام اذا مو أقل.. يعني عرفانين ما رح نضربهون), عدا عن كلفتو المادية العالية اللي ممكن تفيد بأمور كتيرة تانية غير المغامرة النووية, و بعتقد ماننا بطرانين و لا مصارينا كتار لحتى نفوت هالفوتة, في مليون شغلة أبدى, حتى على المستوى العسكري
أعدائنا اقليميين و اخطارنا اقليمية, ليكا اسرائيل عندا نووي, بس مش النووي هو اللي مكسبها قوة استراتيجية لأنو ما فيها تستخدمو ضد جيرانها كونها متداخلة معهون جغرافيا..

ما دام صوتت ضدّ فيا ريت تصوّت كرمال توزيع الأصوات!
بس في كمان اقتراح المفاعل النووي لأغراض سلميّة، شو رأيك فيه؟
بعد شوي الدور جاي عليّ.

[sona78]

كاتب النص الأصلي : VivaSyria

برجعلك لنقطة انو السلاح النووي لما يستخدم منذ الحرب العالمية... وبتاريخ البشرية ما استخدم غير مرة وحدة بهيروشيما وناغازاكي... فهو عبارة عن ورقة ضغط لاغير وهالشي متفقين فيه...

برأيك هيك ورقة ضغط مستاهله كل هالضغوط يلي بدها تجي من وراها ومزيد من الحصار؟؟

وبرجعلك لنقطة هل انتي موافقة على دخولنا بتعاون مع ايران وكوريا على أراضينا بغية حصولون هنن على على هالسلاح ويمكن ما ينوبنا منو شي؟؟

شو الضغط يلي ناطرينو يا فادي ؟؟ اسوا من الضغط الحالي مثلا يعني ؟؟
اي انا بلاقي انها مستاهلة لانو بعالم وقح كعالمنا ما قادر تعمل ايا شي سيء او جيد اذا ما ملكت قوة لهالعمل وقوة الضغط هيدي هي الاساس حاليا باللعبة السياسية بهالعالم .. وذوريا شوي شوي عم تحقق مطالبها
والتعاون بين الدول معو تماما بس اكيد مامع الانتقائية ( كل الدول ) يعني نحنا وسورية وكوريا من اجل الدول التلاتة مع بعض ...

اكيد السلاح النووي سلاح مرفوض تماما بس برجع باكد مرفوض لكل الدول معا .. بس تلغي كل الدول هالشي بيصير حديث اخر

[sona78]

سلاح ما منقدر نستعملو, و لا رح نستعملو, و رح نفوّت حالنا بسباق ماننا قدو و لا بأي شكل من الأشكال, لا ماديا و لا تكنولوجيا و لا شي, و ما رح نخوّف حدا فيه (ليش لنضحك ع حالنا... ايران سلاح ايران النووي بيخوّف أميركا حقيقة؟ أنا بقلك لأ.. الصاروخ المحمّل برأس نووي بدو نص ساعة أو أكثر بين ما يتركّب على منصة التحميل و ينطلق, و أميركا عندا تكنولوجيا كافية تدمر منصة التحميل و الراس النووي فيها قبل ما ينطلق الصاروخ.. فعشان شو يعني؟)

اذا كان هيك .. ليش عم تحقق امريكا شوي شوي مطالب كوريا ؟؟؟؟ لو كوريا عمليا ما ملكت هيك قوة بتوقع ما كانمت رح تنشال عن القائمة لو بحت من الحكي ومدت حالها زفت لسياراتون ..

[yass]

كاتب النص الأصلي : قرصان الأدرياتيك

ما دام صوتت ضدّ فيا ريت تصوّت كرمال توزيع الأصوات!
بس في كمان اقتراح المفاعل النووي لأغراض سلميّة، شو رأيك فيه؟
بعد شوي الدور جاي عليّ.

أمرك...


بصراحة ماني معو, كلفتو عالية, و أخطارو كبيرة جدا جدا... تخيّل مفاعل نووي بادارة القطاع العام تبعنا و بظل حسن الادارة؟

ناقصنا تشرنوبيل عنا؟ يكفينا مشاكلنا, و عنا موارد انتاج طاقة بشكل ما نحتاج النووي متل ما تحتاجو دول أخرى ما عندا هالموارد.. و احسن ما يبنو مفاعل نووي يعملولون كم مصفاية نفط أحسن ما عم نخسر ملايين الدولارات شهريا لأنو ما عنا طاقة نكرر البترول اللي عم ننتجو, و عم نبيعو خام و نرجع نستوردو مشتقات..

[VivaSyria]

كاتب النص الأصلي : yass

منرجع لنفس القصة.. شو آخدنا نحنا لعند كوريا؟ شو ضاعلنا هنيك؟ علاقات دولية؟

وجود سلاح نووي عنا مالو نفع, أو نفعو أصغرمن ضررو... بخناقة بالشارع ازا واحد شال حجر صغير أو متوسط الناس تروح ركض تحاول تمسكو و تحجزو.. بس ازا شال بلوكة فكلو بيعرف انو ما رح يضرب فيها..

نحنا طلقة مضاد جوي ما ضربنا ع طيارة حلّقت فوق قصر رئاستنا.. و الحجة كانت انو ما رح نرد على استفزاز و ندخل بمعركة ماننا قدها. ما هيك؟ طيب لو امتلكت نووي رح تقلب الموازين؟ النووي اللي عندك راح يكون احسن من النووي تبع اسرائيل أو أميركا؟ رح تخوّفهون فيه؟ أكيد لأ

سلاح ما منقدر نستعملو, و لا رح نستعملو, و رح نفوّت حالنا بسباق ماننا قدو و لا بأي شكل من الأشكال, لا ماديا و لا تكنولوجيا و لا شي, و ما رح نخوّف حدا فيه (ليش لنضحك ع حالنا... ايران سلاح ايران النووي بيخوّف أميركا حقيقة؟ أنا بقلك لأ.. الصاروخ المحمّل برأس نووي بدو نص ساعة أو أكثر بين ما يتركّب على منصة التحميل و ينطلق, و أميركا عندا تكنولوجيا كافية تدمر منصة التحميل و الراس النووي فيها قبل ما ينطلق الصاروخ.. فعشان شو يعني؟)


هاي بما يخص رفضي لألها من الناحية الاستراتيجية..

بخصوص موارد البلد, فاحسب بكلفة برنامج نووي مهما كان بسيط قديه ممكن تتسخّر موارد لأمور أهم بمليون مرة (أهم لأنو السلاح النووي بايدنا يكون... يالله كان مثال مش كتير لائق اذكرو, بس انو متل قلتو)

و على حساب دول تانية و نحنا ما دخلنا... فانو ليش لنضحك على بعض.. مين يعطي شي ببلاش؟ مين رح يصنعلك سلاح نووي اذا مو مقابل شي؟ يجوز مش مادي بس يظل شي أكيد مانو قليل بنوب..

يبدو اني ماوضحتلك حالي منيح.. أنا عم اسألك ضد الدخول بالمعادلة حتى لو من غير كلفة؟؟
يعني على سبيل المثال ممكن يكون التعاون فقط انو يا أخي عملولنا مفاعل لانتاج البلوتونيوم وعطونا هالبلوتونيوم مقابل نعطيكون شي .. أو مقابل نعزز التعاون العسكري ونعطيكون سلاح.. أو مقابل يصير في تعاون عسكري أكتر...

بهالحالة بتبقى صد؟؟

[yass]

كاتب النص الأصلي : sona78

اذا كان هيك .. ليش عم تحقق امريكا شوي شوي مطالب كوريا ؟؟؟؟ لو كوريا عمليا ما ملكت هيك قوة بتوقع ما كانمت رح تنشال عن القائمة لو بحت من الحكي ومدت حالها زفت لسياراتون ..

حالة كوريا غير حالتنا تماما, و بعدين بالعملية السياسية الكورية تدخل عوامل كتيرة ليس النووي البطل الوحيد فيها.. يعني هو عبارة نقطة قوة سياسية أكثر مما هو تلويح بحل عسكري.

[yass]

كاتب النص الأصلي : VivaSyria

يبدو اني ماوضحتلك حالي منيح.. أنا عم اسألك ضد الدخول بالمعادلة حتى لو من غير كلفة؟؟
يعني على سبيل المثال ممكن يكون التعاون فقط انو يا أخي عملولنا مفاعل لانتاج البلوتونيوم وعطونا هالبلوتونيوم مقابل نعطيكون شي .. أو مقابل نعزز التعاون العسكري ونعطيكون سلاح.. أو مقابل يصير في تعاون عسكري أكتر...

بهالحالة بتبقى صد؟؟

كيف رح ندخل بهيك لعبة بدون كلفة؟ ازا الكلفة مو مادية بتكون سياسية, بتكون استراتيجية.. بتكون شو ما كان..

يعني أدناها أدناها.. انك تربط مصيرك بمصير قضية مانا قضيتك مهما كانت الدولة اللي بدها "تحن عليك" صديقتك, و مافي دولة تعمللك هيك شي اذا ما عندا ضمانات انو معا للموت في حال احتاجتك..

و نحنا خلقة ميتين بقضايانا.. ضروري نموت كمان بقضايا غيرنا؟ مشان شو, مشان نمتلك سلاح نووي ما مستفيدين منو شي؟ ما بتوفّي

[sona78]

ما تغير الموقف الامريكي من الكوريين لبعد مشكلة النووي ...
كان هون النقطة الحاسمة بهالموضوع
وحاليا الفزع يلي صياير من باكستان ...اي انقلاب الحكي الموالي للامريكيين لصالح الاسلاميين التشددين ما كان بهالشكل هاد لولا امتلاك باكستان لسلاح نووي ....
الحالات اكيد فيها اختلاف
بس اتحيانا بتتطور ليصير في تعامل موحد معها .. وهوي القوة .. القوة .. او لنسميها البطش .. رغم وحشية هيك تعامل بيضل هوي التعامل الوحيد المتوفر حاليا بعالم متوحش تماما

[VivaSyria]

كاتب النص الأصلي : sona78

شو الضغط يلي ناطرينو يا فادي ؟؟ اسوا من الضغط الحالي مثلا يعني ؟؟
اي انا بلاقي انها مستاهلة لانو بعالم وقح كعالمنا ما قادر تعمل ايا شي سيء او جيد اذا ما ملكت قوة لهالعمل وقوة الضغط هيدي هي الاساس حاليا باللعبة السياسية بهالعالم .. وذوريا شوي شوي عم تحقق مطالبها
والتعاون بين الدول معو تماما بس اكيد مامع الانتقائية ( كل الدول ) يعني نحنا وسورية وكوريا من اجل الدول التلاتة مع بعض ...
اكيد السلاح النووي سلاح مرفوض تماما بس برجع باكد مرفوض لكل الدول معا .. بس تلغي كل الدول هالشي بيصير حديث اخر

الضغط يلي ممكن يصيير ما بيتقارن بالضغط الحالي... الضغط الحالي كان أمريكي فرنسي فقط.. أماا بهيك حالة رح يصير دولي عن جد...

بعدين من الأساس انتي نسيانة نقطة انو يجوز الموضوع مانو أكتر من استغلال.. يعني بس عم يستغلونا بشكل معين مشان هنن يصنعو هالسلاح,,, بهالحالة نحنا شو إجانا؟؟ بعدين مشان مانكزب على بعض مين قلك انو ايران ماشية بخطوات تصنيع قنبلة نووية؟؟ لاء عمي لا ايران بدا تصنعها ولا أميركا ممكن تسمحللها بهالشي.. الموضوع مابيعدو كونه شد حبال بين التنين.. يعني مفاوضات بصورة مواجهات...

يعني نحنا وسورية وكوريا من اجل الدول التلاتة مع بعض ...

مين انتو يا بنت؟؟ طلعتي ايرانية ومالي خبر

بعرف انو بالغلط بس حبيت اتحركشك.

[yass]

كاتب النص الأصلي : sona78

ما تغير الموقف الامريكي من الكوريين لبعد مشكلة النووي ...
كان هون النقطة الحاسمة بهالموضوع
وحاليا الفزع يلي صياير من باكستان ...اي انقلاب الحكي الموالي للامريكيين لصالح الاسلاميين التشددين ما كان بهالشكل هاد لولا امتلاك باكستان لسلاح نووي ....
الحالات اكيد فيها اختلاف
بس اتحيانا بتتطور ليصير في تعامل موحد معها .. وهوي القوة .. القوة .. او لنسميها البطش .. رغم وحشية هيك تعامل بيضل هوي التعامل الوحيد المتوفر حاليا بعالم متوحش تماما

طيب بس لازم تلاحظي انو عم تحكي عن دول حجمها بحجم الشرق الأوسط كلو ع بعضو .. هاي أولا


تاني شي, أنا ما شفت تغيّر بموقف أميركا مع كوريا.. كوريا عرضت تتعاون, يعني تنفتح عالمنظومة الدولية المفروضة من أميركا, تدخل بلعبة... متل القذافي.. خلال سنين كان شيطان العالم الرجيم, هلأ حبيب أميركا,

هاد اللي بيسمّوه المحافظين الجدد "تغيير السلوك".. يعني الحوافز لكوريا كانت مقابل تفتح مجال لاختراقها من جميع النواحي, حتى الاقتصادي (يعني وقت يقلولو شيل النووي و بساعد بتنميتك .. المساعدة بالتنمية مانا خسارة لأميركا, انما عم تفتح سوق حجمو 50 مليون نسمة لشركات أميركية رح تشتغل بمرحلة ما لرفع المستوى المعيشي لحتى يصير سوق لألها)..

النووي بيظل رمز.. و لا بأي لحظة حدا كان عندو شكل انو كوريا ممكن تؤذي أميركا, حتى الكوريين نفسهون

[قرصان الأدرياتيك]

أنا صوّتت ضدّ امتلاك سورية في وضعها الحالي لأي سلاح أو مفاعل نووي، لعدّة أسباب:

- نظام مو قادر يطعمي شعبو ومو قادر يحقق أقل وسط ممكن من الحرية خطر جداً أنو يكون قائم على هيك سلاح، لأن متل ما تعوّدنا، بعض القضايا الخارجيّة أو غالبيتها هيّ مكرّسة لترسيخ حكم قائم لا أكثر!

- بركّز على كلمة (حالياً) لأن بظنّ الإنسان قبل ما يفكّر بالرّفاه لازم يكون لابس وشبعان ومتعلّم وبعدين يفكّر بشي اسمو "نووي". وبظن وضع سورية حالياً ما بيسمحلها تقوم بهيك شغلة. لك إذا مؤسسات وطنية عم تسكر بسبب الفساد والخسارات المتلاحقة فحتى احتمال التفكير بهيك أمر مو وارد عندي (كرأي)!

- أنا ضدّ أيّ سلاح وأيّ حرب عامّةً، ما بوقف ضد الدفاع عن بلدي، بس ما بعتقد أنو أي نوع من الأسلحة النوويّة هو دفاع، لأن مجرد استعمالها عن قريب أو بعيد بيعني مآسي رح تتغلغل بتاريخ الإنسان على مدى عقود كتيرة. فكيف بدي وافق عهيك أمر ما في منو إلا الدمار وبس.

- حتى كورقة ضاغطة أو رابحة، أو حلف مع إيران وكوريا الشماليّة، ماني مقتنع فيه، لأن بوكرا أميركا بتضحك على كوريا بكام كلمة وتمرقلا كام شغلة وتسحبا من أي حلف وتلعن أخضرنا ويابسنا! فقصة وجودو كمواجهة مو عملي بنوب.

- وآخر شي بالنسبة لإنشاء مفاعل نووي لأغراض سلميّة ممكن يقبل في مرحلة لاحقة يكون فيها السوري شبعان... إلخ. ما بدي عيد الحكي أعلاه.

لهالأسباب وأسباب أخرى أنا صوتت ضدّ.

مع التحيّة لأبو الفيد ولكل محاور على أرض هالصفحة .