رأي حول زيارة بابا الفاتيكان

[yass]

كاتب النص الأصلي : suryoyo

مثل ما قلت يا عزيزي ياس .. الفاتيكان له نفوذ سياسي و ديني .. و لذلك زيارة البابا صارت سياسية بامتياز

و مقالتك ركزت على نقاط كثيرة في الزيارة .. و خصوصا دعم القضية الفلسطينية


نجي على فقرة مهمة ..
يا عزيزي الكلام العمومي ... ما يزعل احد !!

لان كل الاطراف ما تقبل النقد ...

و لذلك انا معه في الكلام العمومي مع توجيه الاهتمام الى اوضاع اللاجئين بدل من استغلال قضية اللاجئين لمصالح سياسية من قبل العرب قبل الفلسطينيين ...


بالنهاية ... هذه الزيارة هي نوعا ما يفيد بعملية التقارب المسيحي .... الاسلامي

بس ما ننسى هذا التقارب ما رح ينحل بزيارة و طقطقة صور مع ابتسامات .... لان بالنهاية الصراع بالماضي كان كبير و اخذ ابعاد سياسية

لذلك الافضل هو التحلص من الاثار السلبية للتاريخ بشكل فعلي ... و اهم شي الخطاب الديني و تمجيد الابطال




وردة الك و لتحليلاتك ...

هلا أبو سارة.. شكراً لألك

بعتقد متفقين بالنظرة

كاتب النص الأصلي : ابو نجبو

يعني مو مسار مكتوب أو مرسوم ..بس هو بيكون بالعادة الزيارة الرسولية بتتضمن زيارة الاماكن اللي تواجد فيها المسيح و أتباعو عليهم السلام...

لأ يا معلمي العفو منك بس مافي مسار حج و لا في عادة, و لما يوحنا بولس اجا ع سوريا زار سوريا فقط ما نزل بعدا على فلسطين, و ما شفنا حدا اعترض, فما بظن في داعي للاستمرار في البحث عن مؤامرة تبرر عدم زيارتو لسوريا

[yass]

شلون شو خص المسلمين باللي قالو؟؟ اصلا هو استشهد بواقعة تاريخية محرفة ليبرهن على وجهة النظر اللي حكاها وهي انو الاسلام دين عنف انتشر بالسيف.

طبعاً شو خص المسلمين.. أكيد جداً, هو كان عم يعطي درس لاهوت بجامعة مسيحية, شو لازم نراقبو هنيك كمان..

بعدين أساس من أساسات الاسلام هو نفي كل أركان المسيحية الكاثوليكية قاطبة, فما بعرف ليش لازم يراعينا اذا بإيماننا نحنا عم نقول عنهون كذابين (ألوهية المسيح و غيرها)

والمشكلة انو واحد بمكانتو برايي ما بصير يتلفظ بهيك اراء ضد دين تاني وخاصة انو كنيستو مدينة لاتباع هدا الدين ولاتباع الطوائف المسيحية الشرقية باعتذار مطول عن الحروب الصليبية وعن التطهير العرقي اللي صار باسم الكنيسة الكاثوليكية باسبانيا.

الحروب الصليبية و محاكم التفتيش اعتذر عنهون الفاتيكان من عقود, و لمرات متكررة جداً.. فما بعرف ليش هالشي نتجاهلو

اما انو ابن باز وغيرو حكوا هيك وهيك عن الدين المسيحي, فبظن ما في مقارنة بين مكانة بابا الفاتيكان وبين مكانة اي شيخ دين بالعالم الاسلامي , يعني على حد علمي انو الانسان الكاثوليكي من شروط ايمانو اعترافو بمكانة البابا الدينية وبالتالي بتصير اراء البابا ملزمة الو كمؤمن كاثوليكي
بالمقابل كم واحد مسلم بياخد باراء ابن باز او غيرو , ولما اي شيخ من الطرف الاسلامي باحث عن الشهرة بتطلع منو هيك اراء اكيد غير لما بتطلع من راس الكنيسة الكاثوليكية

يا معلمي هاد حكي نظري (مش انو انتقاص منو بس فعلاً نظري) لأنو لو جيت للواقع تلاقي أي مسيحي كاثوليكي ممكن يحترم البابا كمكانة بس ما ياخد بآرائو و ما حدا بيقلو شي... لكن للأسف في مشايخ أخدو مرتبة وصلت إلى حد التقديس ربما, و منهم بن باز..

و بعدين حتى لو مرتبة و مو مرتبة... لاقيلي شيخ واحد مستعد يعتذر للمسيحية عن وصف الصليب بالنجاسة.. شيخ بنفس مكانة بن باز يكون, و ساعتها نشوف اذا فيها الشغلة تبادل اعتذارات أو لأ

[yass]

كاتب النص الأصلي : nour333

انا برأيي زيارة البابا هدفها الاساسي انها تدعو لتسامح بين ابناء الديانات المختلفة والطوائف ورحلة الحج المسيحي بتجسد دعوة السيد المسيح لتسامح
خلال تواجد البابا بالاردن ولسا ما راح لأسرائيل قال
زيارتي للمنطقة تجسد عمق العلاقة بين الكنيسة الكاثوليكية واليهود
ليه البابا غير مجبر انو يجامل الارثذوكس والمسلمين في حين بركز على علاقة طيبه مع اليهود وهو بجوز تعاطف مع اهلي غزة واللاجئين بس ما جاب سيرة الهمجية الاسرائيلية وكأنو الجاني مجهول !
ع العموم الكل بيجمع انو البابا السابق يوحنا بولص الثاني كان على علاقة طيبة اكتر مع العرب والمسلمين وبنتمنى المسافات اللي حاول تقريبها بين الديانات والطوائف ما يبني خلفو جدار فاصل بينها

للعلم.. البابا زار مسجدين مسلمين و ما زال ولا كنيس يهودي, فما بعرف من وين جاية نظرية المؤامرة انو جامل اليهود أكتر...

بخصوص الأرثوذكس.. يعني بصراحة أنا بشوفها نكش مالو طعمة بقصد النقد و فقط النقد, يعني أول شي بيناتهون مشاكل خاصة بالمسيحية و عقيدتها, و ثانياً لو هو قابل شخصيات أرثوذكسية و زار كنائس مشتركة لجميع الطوائف المسيحية, بس مزبوط ما راح ع كنيسة أرثوذكسية لسبب بسيط لأنو في 15 طائفة مسيحية ضمن الأرض المقدسة, اذا بدو يزور وحدة لازم يزور الكل, و شو بدو يلحق ليلحق

بالنسبة للبابا السابق و هاد, لو نبحث عن معنى سياسي نجد انو هاد عمل للمسلمين اللي ما استرجى حدا يعملو قبلو و هو زيارة الأقصى برفقة مفتي القدس.. و هاد شي أكبر من اللي عملو اللي قبلو للمسلمين, و لكن في سلبية كبيرة تجاه هاد, فبعتقد مهما فعل فما راح يمشي الحا

[yass]

كاتب النص الأصلي : باشق مجروح

مشكور ع المقالة المهمة .
انا بشوف دخول السطلة الدينية بالسياسة هو بحد ذاته يسئ للدين نفسه وللسياسة
بس بما انو الو تأثير سياسي فلا بد من الحديث عنه .
يعني أكثر المتفائلين من زيارة البابا ما كان يتوقع حدوث اي شئ جديد من هالزيارة .
المحرقة الحقيقية تحدث امام كاميرات التلفاز في غزة وليس في اعماق التاريخ القديم الملئ بالتزوير ( رغم عدم تشكيكي المطلق بالهولوكوست ) ولكن لا يتوجب على البابا مجاملة اسرائيل كنوع من الشعور بالذنب اتجاهها .
على كل لسنا منتظرين من البابا ما لم يفعله احد منا لكن بالمقابل لا تعتبر زيارته هذه مهمة دون زيارة غزة وافضل ما يمكن وصفها . زيارة دينية تحمل رسالة سلام في مكان لا يسمع الا لغة الحرب .

هلا باشق و شكراً على رأيك و ردك

[sandra]

بس توضيح صغير
زيارة البابا يوحنا بولس التاني لسوريا كانت متل حج للطريق يلي مشي فيه بولس الرسول لأن بولس اعتنق المسيحية بدمشق ومنها انطلق للعالم
ومافي شي اسمو مسار حج كاتوليكي ملزم البابا يمشي عليه
وما بعرف إذا خانتني الذاكرة بس بذكر بزيارة البابا لسوريا ما شمل باقي دول المنطقة كلها .. بالتالي مافي داعي لحبك نظريات المؤامرة إذا هالبابا ما زار سوريا

[yass]

كاتب النص الأصلي : wile

يا جماعة يعني المسلمين لما يحكو عن المسيحية بيصفوهم بكلمات هي جزء من العقيدة الإسلامية
يعني مثلا كلمة كافر تعني أنه لا يؤمن بأن لا إله إلا الله فمو إذا قلت على واحد كافر يعني هادا واحد شرير لازم يقتل (عم الرسول كان كافر ومع ذلك ساعد الرسول وحماه ولذلك المسلمين بحبوه مع إنه كافر )
يعني كلمة كافر تعني أنه غير مسلم ومع ذلك أمر الإسلام باحترام الكفار-يعني الغير مسلمين- ومعاملتهم بالحسنى وأمرنا أن نحفظ عهودنا ومواثيقنا معهم وأمرنا أن لا نقاتل منهم إلا المحارب
ولكن الإعلام جعل كلمة كافر تعني إنسان حقير يستحق القتل وبما أن الغير مسلم كافر فظن العالم أن المسلمين يعتقدون بوجوب قتل كل الكفار

على حد علمي بالاسلام اسمهون أهل الكتاب أو أهل ذمة.. و ليس كفار, ما بعرف اذا تغير هالشي بهالزمان, و بالتالي نعتهم بالكفار خطأ يتم الاصرار عليه...

و ما واقفة على كفار.. خود على أحفاد القردة و الخنازير, خود على أمور من هالناحية...




الصراحة حاسس بعدم الراحة من حيث انو عم أبدو كمدافع عن البابا, لكني أعتقد انو في تجني كبير عليه و سلبية تجاهو لما كان من الممكن الاستفادة منو بشكل كبير للوصول إلى الرأي العام العالمي

[ayhamm26]

كاتب النص الأصلي : suryoyo

عزيزي انت ... الموضوع صار من زمان ... و المحاضرة كانت بكلية لاهوتية


روح شوف الكتب الاسلامية .. و لا قلك لا تشوف الكتب ... اسمع الخطب و اليوم جمعة ... .

مو دفاعا عن البابا ابدا... .. بس شوف ماذا يدرس بكليات الشريعة ...


و اكرر انا مو بصدد دفاع او انتقام ... بس بصدد عرض وقائع

أخي اذا المسلمين متخلفين و الجهل عامي على قلبن عمي, ضروري يعني يكون الطرف التاني كمان متلن؟

مو على اساس هني هون اصحاب الحضارة

بعدين يعني تدريس اللاهوت ما بيظبط الا بمهاجمة اديان اخرى, ياترى كان بيسترجي يحكي بنفس اللهجة ضد الديانة اليهودية مثلا؟؟

[ayhamm26]

كاتب النص الأصلي : yass

طبعاً شو خص المسلمين.. أكيد جداً, هو كان عم يعطي درس لاهوت بجامعة مسيحية, شو لازم نراقبو هنيك كمان..

بعدين أساس من أساسات الاسلام هو نفي كل أركان المسيحية الكاثوليكية قاطبة, فما بعرف ليش لازم يراعينا اذا بإيماننا نحنا عم نقول عنهون كذابين (ألوهية المسيح و غيرها)

أخي قضية نفي الاديان لبعضها هي شغلة مو مقتصرة على المسلمين كلو بيلغي بعضو وكلو بقلك اتباع الديانة التانية رايحين على النار

الحروب الصليبية و محاكم التفتيش اعتذر عنهون الفاتيكان من عقود, و لمرات متكررة جداً.. فما بعرف ليش هالشي نتجاهلو

بتقدر تذكرلي مرة هيك اعتذر فيها اي شخص شغل منصب بابا الفاتيكان بنفس الصراحة و الندم اللي بيعتذر فيها عن الهولوكوست؟ مع العلم انو مسؤولية الكنيسة عن الهولوكوست تقتصر على السكوت عن اللي صار بوقتها وما امتدت للمشاركة و القيادة متل ما صار بالحروب الصليبية وغيرها



و بعدين حتى لو مرتبة و مو مرتبة... لاقيلي شيخ واحد مستعد يعتذر للمسيحية عن وصف الصليب بالنجاسة.. شيخ بنفس مكانة بن باز يكون, و ساعتها نشوف اذا فيها الشغلة تبادل اعتذارات أو لأ

برجع وبقلك ما في ولا شخصية اسلامية وخاصة بهالزمن عندها نفس المركز الديني اللي ممكن تقارنوا ب بابا الفاتيكان, وبالتالي اي شيخ حتى لو اتباعو عبدو بضل اصغر بكتير من انو تقارنو بمنصب ديني متل البابا

[suryoyo]

كاتب النص الأصلي : ayhamm26

أخي اذا المسلمين متخلفين و الجهل عامي على قلبن عمي, ضروري يعني يكون الطرف التاني كمان متلن؟

مو على اساس هني هون اصحاب الحضارة

بعدين يعني تدريس اللاهوت ما بيظبط الا بمهاجمة اديان اخرى,

اخي ... مو قصة تخلف ...

انو القصة محاضرة دينية .. و عجبوا يتطرق لفلسفة الاسلام ...
و حكى ايضا على الفلسفة الاسلامية بالتوحيد ...

بعدين هناك فرق كبير بين النقد و بين التحريض ضد الآخر ...

انا مو معه ابدا ..
بس انا مستغرب من ردة الفعل المفتعلة ... و كانها حرب على الاديان ... خصوصا من الاتجاهات الاسلامية

ياترى كان بيسترجي يحكي بنفس اللهجة ضد الديانة اليهودية مثلا؟؟

ممكن تتبع محاضراتو ..
و نصيحة اخوية ... اقرا عن اللاهوت المعاصر المتبني من الكنيسة الكاثوليكية و بعدين رح تعرف

برجع وبقلك ما في ولا شخصية اسلامية وخاصة بهالزمن عندها نفس المركز الديني اللي ممكن تقارنوا ب بابا الفاتيكان, وبالتالي اي شيخ حتى لو اتباعو عبدو بضل اصغر بكتير من انو تقارنو بمنصب ديني متل البابا

يعني مشكلتك مع مكانة البابا ؟؟!
يعني اذا طلع قسيس او طالب بالاكليريكية و حكى ... ما رح تزعل
بعدين قبل ما تنتقد البابا ... انتقد مسيرة الخطاب الديني الاسلامي داخليا و خارجيا (مع الاديان الاخرى)


ما رح احكي اكثر حتى ما يضيع الموضوع الرئيسي عن زيارة البابا الاخيرة ...

[mhsen77]

خيو يا عيوني ايمتى رح نضل ندور على اخطاء التانيين و ننسى اخطائنا نحنا؟

طيب ما قال محمد عليه الصلاة السلام \ لا فرق بين عربي و عجمي الا بالتقوى \

و ما قال عيسى عليه السلام \ طوبى لصانعي السلام \ و قال كمان :\ لا تدينو لكي لاتدانو لانكم بالدينونة التي بها تدينون تدانون \


ايمتى بس رجال كل دين رح يفهمو هالكلام

[yass]

بتقدر تذكرلي مرة هيك اعتذر فيها اي شخص شغل منصب بابا الفاتيكان بنفس الصراحة و الندم اللي بيعتذر فيها عن الهولوكوست؟ مع العلم انو مسؤولية الكنيسة عن الهولوكوست تقتصر على السكوت عن اللي صار بوقتها وما امتدت للمشاركة و القيادة متل ما صار بالحروب الصليبية وغيرها

الاعتذار عن محاكم التفتيش و عن الحروب الصليبية ما صار بتصريح و لا بمحاضرة, انم مدرج بوثائق مقدسة بالختم الرسولي (ما بعرف كيف اسمها هالوثائق بالعربية), و يعني هاد أعلى تصريح ممكن يطلع من الكرسي الرسولي..

بس يعني.. شو بدي قول؟

برجع وبقلك ما في ولا شخصية اسلامية وخاصة بهالزمن عندها نفس المركز الديني اللي ممكن تقارنوا ب بابا الفاتيكان, وبالتالي اي شيخ حتى لو اتباعو عبدو بضل اصغر بكتير من انو تقارنو بمنصب ديني متل البابا

يا أخي و الله ما عم افهم عليك, العفو منك يعني, بس بابا الفاتيكان مقدس لطائفتو, و لباقي الناس صفر عالشمال, و يعني معليه أخ أيهم بس انو اذا بطائفتك مانك مقدس يعني يحقلك تحكي شو ما بدك بس اذا حكى غيرك و هو مقدس بطائفتو تهاجمو؟ ماني شايف منطقي هالكلام, و عم شوف انك عم تبرر انو و الله غلطو علينا لا يغتفر بس نحنا شو ما حكينا ما نغلط لأنو ما عنا بابا؟

لو المشكلة مع مكانة البابا لكان ليه صار حرق سفارات و قتل و مشاكل على الكاريكاتيرات؟ اللي رسمهون لا هو البابا و لا هو بمكانتو, و لو ترجع لحكي كتير مشايخ و نصوص كتير كتب اسلامية تلاقي ما هو بنفس فظاعة الكاريكاتيرات و أكثر ضد الديانات الأخرى, هل يا ترى تقبل يجو المسيحيين يحرقو سفارات الدول الاسلامية عليها؟

و بعدين و الله شغلة مقارنة المناصب الدينية ما بتزبط, يعني مانها رتب بالجيش يا عزيزي أيهم, و ما بعتقد فينا نستخدمها مشان نعطي كارت بلانش للمشايخ يفتو ع كيفهون و نقول و الله ما عليهون عتب لأنو منصبهون هيك أو هيك... أنا فكرتي عنك انك شخص تنويري ضمن إطار إسلامي, و ما كنت متخيل انو يكون "التخلف" اللي حكيت عنو مبرر للخطأ و الاستمرار عليه

أي تعا عالعملي.. فتوى من شيخ متوسط بتحليل دم حدا.. أخطر من ساعات طوال من حكي بابا الفاتيكان, لأنو البابا في تفريق بين انو رأس كنيسة كاثوليكية يمثل (تمثيل) طائفتو, و بين انو من يشغل هاد الكرسي هو شخص يصيب و يخطئ, و يمكن إصابته و يمكن تخطئته, بعرف الاسلام بيقول انو الفتوى اجتهاد و تحمل الصواب أو الخطأ, بس بعالمنا اليوم شو صاير؟؟ لليوم في دول اسلامية تدرج الفتاوي بقلب الدروس العلمية, و لازم يعطي الدرس العلمي و يقول انو الشيخ فلان قال كذا و كذا معناتو هالنظرية العلمية صح أو خطأ, حسب ما قال الشيخ فلان... أي ما يحلم بابا الفاتيكان بهيك امتياز بأي دولة مسيحية

[wile]

كاتب النص الأصلي : yass

على حد علمي بالاسلام اسمهون أهل الكتاب أو أهل ذمة.. و ليس كفار, ما بعرف اذا تغير هالشي بهالزمان, و بالتالي نعتهم بالكفار خطأ يتم الاصرار عليه...

و ما واقفة على كفار.. خود على أحفاد القردة و الخنازير, خود على أمور من هالناحية...



الصراحة حاسس بعدم الراحة من حيث انو عم أبدو كمدافع عن البابا, لكني أعتقد انو في تجني كبير عليه و سلبية تجاهو لما كان من الممكن الاستفادة منو بشكل كبير للوصول إلى الرأي العام العالمي

الله يخليك يا معلم كافر باللغة يعني جاحد فكافر بالإسلام تعني جاحد بالإسلام
وأهل الذمة هم الي حصلت بينهم وبين المسلمين عهود من الكفار
وأهل الكتاب يعني يهود ومسيحيين بس
وأحفاد القردة والخنازير هادا مصطلح جديد أطلقه بعض علماء المسلمين على اليهود

يعني الله يخليك بس لا تتضايق من مصطلحات مانها مزعجة أصلا
وهي وردة

[wile]

كاتب النص الأصلي : ayhamm26

أخي اذا المسلمين متخلفين و الجهل عامي على قلبن عمي, الديانة اليهودية

شكرا على الإحترام المتبادل

[yass]

وأهل الكتاب يعني يهود ومسيحيين بس

على حد علمي بابا الفاتيكان مسيحي فليش لينقال عنو كافر؟


هامش: كلمة كافر من عدمها عندي سيان يعني, ذاتاً بشفق كتير على مستخدمي نعوت الكفر و التكفير, و لكن فقط مجرد استفهام

وأحفاد القردة والخنازير هادا مصطلح جديد أطلقه بعض علماء المسلمين على اليهود

يعني مصطلح جيد و ما عليه غبار؟

[jankasanova]

كالعادة بيتم الانتقاد لشغلات بيعتبروها سلبية و بيتم فتح الدفاتر العتيقة بهالزيارات و اذا صرح البابا بنقول ليش صرح و اذا ما صرح البابا ليش ما صرح و احترنا يا اقرع منين رح نمشطك.


بنشوف ان المنتقدين لم يتتطرقو لتصريحات البابا تجاه الجدار و عودة الفلسطيين و النقاط اللي ادرجها ياس اغلب الرؤساء العرب ما بيتطرقولها, بل تم التركيز على محاضرة اكاديمية و قديمة القاها البابا ضمن جامعة بالمانيا و اقتبس كلام من كتاب موجود, فاذا كان الاعتراض عالكلام ليش ما اعترضوا عالكتاب من قبل, الا لانو البابا اقتبس منه الكلام بلشو يعترضو..بس الشغلة و ما فيها مثل ما بيقولوا بالعامي "بدهم يطلعو بلا منية من زيارة البابا و تصريحاته " وبنفس الوقت ردة الفعل اللي صارت بالوقت اللي القى المحاضرة واللي قال "يجب على البابا ان يقدم اعتذار وهو جاثي على ركبتيه" و الاعتداء على الكنائس وقتل راهبة ايطالية بالصومال, و نعت المسيحيين بالكفار واحفاد القردة والخنازير ولا شخص طالب بالاعتذار عنها يعني ازدواجية عيني عينك.. وبشأن الاعتذار عن الحملات الصليبية بغض النظر اذا تم الاعتذار او لا بس باعتبار البابا رئيس روحي للكنيسة الكاثوليكية ما يتوجب عليه الاعتذار عن الحملات لأن الدين المسيحي بريء منها.

وبالاخر بحب اقتبس اخر جملة كتبها باشق

زيارة دينية تحمل رسالة سلام في مكان لا يسمع الا لغة الحرب

وبحب قول ان بغض النظر عن اعتبار الزيارة مهمة او لأ, بس هذه الرسالة هي الرسالة التي نحن بحاجتها بهذا الزمن و بتلك المنطقة بالتحديد و بحاجة تبنيها لان طالما نؤمن بالسلام اولا مع انفسنا و ثانيا مع الاخرين رح نكون خطونا خطوة كبيرة للامام.


و طوبى لصانعي السلام

[wile]

كاتب النص الأصلي : yass

على حد علمي بابا الفاتيكان مسيحي فليش لينقال عنو كافر؟


هامش: كلمة كافر من عدمها عندي سيان يعني, ذاتاً بشفق كتير على مستخدمي نعوت الكفر و التكفير, و لكن فقط مجرد استفهام




يعني مصطلح جيد و ما عليه غبار؟

يا معلم الله يخليلك أهلك بس ليش ما عم توصلك فكرتي؟؟

كلمة كافر تعني جاحد بأصل اللغة العربية بس الإعلام خلاها شي إهانة أو مسبة وبعدين البابا مو مسلم يعني تنطبق عليه شروط كلمة كافر باللغة العربية وأهل الكتاب كفار لأنهن مو مسلمين(من ناحية لغوية) فالله يخليك ليش ما عاجبتك هالكلمة ما بعرف؟
ويسلمو عالإهتمام

[MadMax]

كاتب النص الأصلي : yass

في كتير من مشايخ كبار و الهون تاريخ لو تقري فتاويهون عن المسيحيين تلاقي شي يقرف جداً, و لليوم في مصطلحات تستخدم داخل الوسط الاسلامي المتشدد ضد المسيحية... هل يا ترى لازم يعتذرو للمسيحية عليها؟ و للا نحنا بس شغلتنا نطالب باعتذارات لألنا و نحنا معليش نغلط؟ كمثال عن ذلك تشبيه بن باز الصليب بالنجاسة... هاد مانو غلطة كبيرة جداً؟؟؟

هلأ إذا المقارنة مشروعة بين البابا ..و جهابذ الفتاوى ...... معناها صار حديث آخر

[butterfly]

كاتب النص الأصلي : yass

ليش الروم الارثوذكس بيستقبلوه؟

لأ وبكامل التشدد لعقيدتي .. انا بشوف وقاحة انو الفاتيكان يزوروا الكنائس الشرقية دون الاعتذار الخطي والواضح عن كتير عنف حصل من الكنيسة الكاثولوكية ضد الكنيسة الشرقية ،
+
أكره جدا ً الدور السياسي لبابا الفاتيكان حتى اليوم ، أراها مناقضة جدا ً لجوهر الكنيسة والإيمان المسيحي . مهما كان هذا الدور وبمصلحة من يصب .

+

بخصوص العلاقة مع البابا والمسيحية عموما ً .. الانتقادات كانت رح تطالو لو كان قال لاسرائيل يطلعو من فلسطين ، في حساسية عالية بالتعاطي مع الدين المسيحي في المنطقة . وكل التعايش وهالحكي تبع التلفزيونات هو مجرد شعارات .

يعني أنا بصراحة ما بحبو للبابا هيك جملة وتفصيلا ً .. " بغض النظر عن حسن او سوء مواقفو "