نــقــاش ..

[Willi]

اسف عالمقاطعة
بس تعليق صغير على كلام ابو النسيم

إن أي إنسان شريف خائف على مصلحة بلاده وعلى وطنه الغالي سوريا يجب أن يشارك في عملية التغير الديمقراطي دون اللجوء إلى الخارج أو الاستقواء بالخارج لفرض الحل على الداخل.

طبعا ضد وضد وضد اللجوء للخارج
وضد اللي صار بالعراق

بس برأيك الشعب السوري قادر يتخلص من النظام الحالي؟؟
كان ممكن ببدايت النظام بس هلق ما بتوقع
لان الواحد ما بلحق يرفع راسو بيقطعولو ياه
شلون اذا قال بدو يغير النظام؟

[أبو النسيم]

طيب أنا ما لح أرجع وأفتح الدفاتر القديمة بس لازم تعرف يا صياد أنو الدفاتر القديمة والقمع والذل يلي عانا الشعب منوا هو سبب الضعف يلي نحنا فيه هلق

تاني شغلة الأزمة والضعف يلي عم نعاني منو هلق هو بسب العقلية المتحجرة للنظام السوري الحالي ولا زم تعرف أنو النظام السوري ليس بشار وبس النظام السوري هو كل المسئولين الكبار متل ماهر وأصف وغازي كنعان قبل ما يموت وفاروق الشرع ووووووو الخ من مسئولين

النظام ما زال يعيش بعقلية متحجرة سياسيا ولا يملك إي نظرة براغماتية لتغيرات التي أصابت العالم النظام يعيش بعقلية السبعينيات و الثمانينيات وهذا الشيء يدل على عدم نضوج سياسي لرئيس هذا النظام بشار

كيف

الرئيس حافظ كان محنك سياسية وكان يعرف كيف تأكل الكتف كان مزبط أموره بره ولعن رب الشعب جوى ومشي النظام على هوى عقليتيه القمعية والشمولية المهم ما بدنا نفتح دفاتر الماضي متل ما قلت بأول الحديث


شو يلي عم يعرقل مسيره التطوير والتحديث مثل ما عم يتناقلوا العالم ومثل ما عم تروج المخابرات و الأجهزة الأمنية يلي عم يعرقل هو بقايا الحرس القديم و والحرس الجديد مثل ما بسمع يعني يا رئيس لو عندك نيه مزبوطة للإصلاح تخلص من هل الناس هلق بهل الدعكة تخلص من أصف شوكت تخلص من ماهر تخلص من رستم غزالة تخلص من كل المفسدين و الفاسدين بحجة أمريكا يا أخي حط أيدك بأيد أمريكا وخلوص من كل هل الزبالة و بعدين شارك المعارضة بسلطة و أنفتح على الشعب وقوي الجبهة الداخلية وبعدين واجه أمريكا

يا شباب أي نظام إذا ما كان الشعب هو الحصن تبعوه و إذا الشعب ما احتضن النظام لح يسقط سدقوني التاريخ وتجارب السابقة للأنظمة الشمولية بتثبت هل الشي


بقى الشغلة أكبر من أنو نحط رئيس ونشيل رئيس الشغلة أنو البلد هلق ماشية للخراب والدمار وهل النظام بل غباء وبل الخيانة للوطن مشينا على الهاوية

يا جماعة الأمريكان ورطونا بشغلة الحريري شئنا أم أبينا نحنى مدانين أمم العالم كلها والنظام الحالي غبي وعام يقدر حجم الخطر مزبوط يا أخي لازم هل النظام أذا كان وطني و أذا كان حريص على مصلحة الوطن لازم يسلم كل الناس يلي تطلبون اللجنة الدولية للتحقيق بدون إي مراوغة يعني الدول العظمى مثل روسيا وصين ما عاد يتحملونا أكتر حطوا كل تقلون بمجلس الأمن لحتى يخففوا صيغة القرار يلي كان بدو يصدر



المهم على النظام السوري الحالي أمى الاستقالة وتسليم البلاد بشكل كلي وتسليم البلاد إلى مجلس الشعب ومجلس الشعب وفق الدستور بعين موعد انتخابات حرة وديمقراطية بتشكل عنها قيادة منتخبة من الشعب والشعب حاضنها والشعب مسئول عنها

أو مثل ما قلت سابقا على الرئيس بشار التخلص من كل الناس الفاسدين والمفسدين بتعاون مع أمريكا

والتعاون مع أمريكا لا يعني انتقاص من السيادة الوطنية لأنو أمريكا أذا قلنا نعم او لا هي يلي حاكمة العالم ومسير توا وتجنيب البلاد الدمار يلي لح يلحق بها جراء السياسية الخرقاء وحماية هدول الناس المفسدين أمثال ماهر وأصف

وللحديث بقية

ودمتم للنضال

[صياد الطيور]

أنا ما سمعت ولا مرة بتدخل ماهر الأسد بالقضايا الوطنية والسياسية للبلد
ماهر مكتفي بأقوى فرقة بالجيش العربي السوري
يعني ماعندو نقاط سلبية متل ( آصف ) على فكرة أنا بكرهوا كتير لآصف
بس ماهر ...؟؟؟؟

أما فاروق الشرع ...فرغم حبي ألو وسياستو القوية على أيام حافظ الأسد ... صرت بتمنى يتنحى عن وزارةالخاجية بسبب القضايا الي صارت لسوريا بالفترات الأخيرة الي أجتنا من السياسة الخارجية ..

في عدة رموز بتمنى تتغير ومارح نستفاد ونتطور إلا بتغيرها ..

هلأ الكلام أنو في عدة وزارت رح تتغير بتغر حكومي قادم ... وانشالله الشعب والحكومة وسوريا كلها رح تستفاد وتتطور

أميركا متحكمة بالعالم كلو ...وشو ماعملنا لنوضح سياستهاو انحيازها مارح نستفاد ...لأنو كل دول العالم بتعرف هالموضوع ...بس كل دولة راكضة ورا مصالحها ...ومعظم الدول ما من مصلحتها معارضة السياسة الأمريكية ... لأنو رح يصير فيهم متل ما رح يصير فينا

وأنو نستغني عن بعض الرموز الفاسدة بالحكم تحت اوامر الأمريكان هادا موحل ...لأنو هادا رضوخ وذل ...لا أنا ولا أنت ولا أي سوري بيرضاها على سوريا وعلى حكومتنا ...

الإصلاح والتعديل لازم يكون داخلي بقناعة داخلية مو فرض اوامر خارجية
وعجبني كمال اللبواني ( المعارض السوري ) بكلامو مبارح

صعب انك تقارن بين السياسة بــالتمانينات وهلأ ...كل الأمور والموازين والمصالح اختلفت ..
بس بالنهاية مصلحة البلد هي همنا وهدفنا كلنا

[zen]

كاتب النص الأصلي : Willi

اسف عالمقاطعة
بس تعليق صغير على كلام ابو النسيم



طبعا ضد وضد وضد اللجوء للخارج
وضد اللي صار بالعراق

بس برأيك الشعب السوري قادر يتخلص من النظام الحالي؟؟
كان ممكن ببدايت النظام بس هلق ما بتوقع
لان الواحد ما بلحق يرفع راسو بيقطعولو ياه
شلون اذا قال بدو يغير النظام؟

الشعب يا ويلي قادر
بس مافي تنظيم والشعب ما بيعرف شو بدوا
المعارضة مشتتة
وكل الحزب الواحد بقلب المعارضة مليون واحد
بيطلع منو واحد بيصرح تصريح
بيطلع واحد تاني من نفس الحزب بيقول لاء نحنا غير مسؤلين عن هذا التصريح وين تنظيم المعارضة
شي بيضحك
بعدين الحكومة الحالية ما اخدجت وقتها حتى تلاقوا النتيجة
يعني كلكون عم تتناقشوا
يعني لرواسب 40سنة من حكومة فاسدة
بدكون ياها تتصلح ب 5سنين وتكون جاهزة
وفوق كل هالشي ضغط على حكومة سوريا بشكل غير مسبوق
ولسا كلو واحد بيطلع بيقول من خمس سنين ما شفنا شي
حبيبي مع انو صار شي وتغير شغلات كتير
بس بسيطة وعم تتحسن
بس بالنسبة لوضع الحكومة كتير منيحة يعني قصدى التحسن بالنسبة لوضع الحكومة
الرئيس اشتغل كتير وهو انسان رائع وبظن انو انسان منفتح ل ابعد حد
بس القرارت الي عم تطلبها انو تصير واقعة بدها وقت بدها تحضير
يعني برجع وبقول الفقير بسوريا سو راح يعمل بالحرية والديمقراطية اذا ما عم يلاقي خبر
لازم نتخطى مراحل كتير حتى ننهض بحكومة وبشعب ديمقراطي بيعرف معني الحرية والديمقراطية
يعني لازم نعيش كلنا سوا تحت راية واحدة حتى يقد كل واحد منا مسؤال عن حالوا سياسيا
سوريا ما بيحمها شخص وما بيحكمها حكومة
سوريا محكومة برواسب لحكومة سابقة فاسدة
وبدها وقت لتخلص من هالرواسب وعم نخلص شوي شوي
وعن قريب انشالله منشوف خطوت كتير منيحة وقوية
وديمقراطية
والله يخلي سوريا للكل

[أبو النسيم]

كاتب النص الأصلي : Willi

اسف عالمقاطعة
بس تعليق صغير على كلام ابو النسيم



طبعا ضد وضد وضد اللجوء للخارج
وضد اللي صار بالعراق

بس برأيك الشعب السوري قادر يتخلص من النظام الحالي؟؟
كان ممكن ببدايت النظام بس هلق ما بتوقع
لان الواحد ما بلحق يرفع راسو بيقطعولو ياه
شلون اذا قال بدو يغير النظام؟

ويلي حبيبي أنت

الشعب مهمش الشعب مدعوس على كرامتوا من زمان الشعب همو الوحيد أنو يأمن أكلو اوعيشتو ا ما نوا قادر بهل الظروف أنو يقوم بأي تغير بشكل فردي بعدين لازم يكون في عملية توعية لدور المواطن بلحياة السياسية ودور المواطن بعملية التغير هل التوعية لازم تكون على يدنا نحن الشاب الواعي المدرك للمصلحة الوطن نحنا الشباب أصحاب القضية ونحنا أذا ما وعينا الناس يلي حويلنا على القلية ما رح نوصل لشي


يا شباب النظام اليوم ضعيف سدقوني ما بيقدر يعمل شي مع إي تحرك شعبي ما لح يعتقلو ويقمعوا متل الول سدقوني إي نقطة دم بهل الأيام كفيلة بأسقاط النظام لذالك هدى الوقت الذهبي لتحرك ضدد النظام بس بطريقة سلمية وطريقة واعية


أنا أوكد على الطريقة السلمية العلنية الواعية دون تعصب لأي فكر أو طائفة أو عشيرة نحنا هدفنا سوريا الوطن أرضا وشعبا



ودمتم للنضال

[أبو النسيم]

أنا ما سمعت ولا مرة بتدخل ماهر الأسد بالقضايا الوطنية والسياسية للبلد
ماهر مكتفي بأقوى فرقة بالجيش العربي السوري

مستحيل يا صياد هدول أركان النظام السوري وماهر الأسد متورط بشكل غير مباشر بأغتيال الحريري وهدى الشيئ يلي عم تلعب عليه أمريكا اليوم بدهون هدول الناس و أذا النظام تعامل مع الأمر بشكل غبي و ما سلم هدول الناس لح يجر علينا الويلات

أما فاروق الشرع ...فرغم حبي ألو وسياستو القوية على أيام حافظ الأسد ... صرت بتمنى يتنحى عن وزارةالخاجية بسبب القضايا الي صارت لسوريا بالفترات الأخيرة الي أجتنا من السياسة الخارجية ..

بنسبة لفاروق الشرع هو سبب أنهيار السياسية الخارجية لنظام السوري بسوء التقدير والرؤية السياسية الضيقة ورط النظام بكتير شغلات
الشرع لا يتمتع ببعد نظر وهذا الشيئ الدي حصر النظام في هذه الزاوية الضيقة

وأنو نستغني عن بعض الرموز الفاسدة بالحكم تحت اوامر الأمريكان هادا موحل ...لأنو هادا رضوخ وذل ...لا أنا ولا أنت ولا أي سوري بيرضاها على سوريا وعلى حكومتنا

حبيبي مو ذل هدى أسمو وعي نحنا مانا قد أمريكا لازم نرضخ لتغيرات أذا كانت ما بتمس مصالح الشعب العليا يعني لما أمريكا بدهى تشيل أصف شوكت من النظام هل تستطيع أن تقول أنو هدى ذل لا

بس لأنو النظام وسخ بدو يفهم الشعب أنو هل المسؤلين أذا نشالو بننذل وهدى غلط


ولي عودة

[sezar]

بس عندي كلمة

ماهر الأسد مو متدخل باسياسة بس داخل بأوسخ تجارات بالعالم (انتو بتعرفوها)

و لشو ليتدخل بالسياسة ازا كان همو المصاري و بس لا سلطة و لا بطيخ

[صياد الطيور]

سيزار أنا قريب كتير عن الجو ...
ومتابع كتير لآل الأسد ..ولي أصحاب منهم
ولا مرة سمعت بالكلام الي عم تقولوا ..

بجد مو دفاع عن ماهر ..بس ولا مرة سمعت عن اي افعال عنو ..

[sezar]

ازا هيك ما بعرف

انا ما بعرف حدا شخصي

[صياد الطيور]

يبدو ان لامجيب لدعواتي ..

[Tarek007]

تفضل :

خليني افتح نقاش معك

أسأل


بس بدك تعطيني وقت !! لاني مشغول شوي

رح حاول رد عليك أذا سمحلي الوقت :


رح اطلع ع الموضوع لاني ما قريت منو كلمة

[صياد الطيور]

ما خلصت قراية الموضوع طارق ؟ صرلك أسبوع ..
والأسئلة والموضوع واضحين بأول كم رد بالموضوع

[Danito]

مرحبا يا شباب!
اليوم بس شفت الموضوع.. فعلا موضوع مهم ، و الحوار في بعقلانية و بهدوء أفضل من تبادل الاتهامات و الشتائم، المهم:

أول شي حلو سؤالك يا صياد الطيور : أنو مين البديل عن بشار ، و مين البديل عن البعث..
قبل ما جاوبك اسمحلي ناقش شوية افكار:
- الحياة السياسية في سوريا ليس بخير بسبب سيطرة الحزب الواحد و إلغاء الآخر
- حزب البعث أصبح رمز لمجموعة مسيطرة على السلطة و ليس ناظم لمجموعة سياسية
يعني أنا بدي أسئل أسئلة معاكسة :
- لماذا د. بشار الأسد؟ و لماذا حزب البعث؟
د. بشار هو طبيب بالأساس و لم يدخل خضم الحياة السياسية (كممارس) حتى بداية التسعينات
و لايمكن القول أنه حوالي تسع سنوات من الخوض في الحياة السياسية هي التي صنعت منه رئيسا.. و لذلك لا يمكن القول بأنه الفرد الفذ الذي لا بديل عنه
حتى الحياة السياسية في سوريا هي حياة مشوهة هي أقرب إلى سياسة إمارة أو جزيرة نائية تدار بإرادة فردية بحتة و ليس بأسلوب مؤسساتي و لا تتناسب مع حجم و وضع سوريا اقتصاديا و جغرافيا و إقليميا..
يعني لما منحكي عن تحديث و تطوير بشكل جدي يعني لا شيء من ذاك يحدث في سوريا إلى عبارة عن المناورات و المتاجرة بآمال الناس و آلامها
عندما تريد الحديث عن معارضة و حكم فهذا الشي غير موجود في سوريا أصلا ليس هناك معارضة
الحياة السياسية تعني وجود أحزاب حقيقة يسمح لها بممارسة دورها و التواصل مع القاعدة الشعبية و الترويج لمبادئها و أهدافها و برامجها السياسية الاجتماعية والاقتصادية أما في سوريا فالبعث ليس أداة لتنفيذ سياسة و قيادة الدولة و المجتمع و إنما لقب يطلقه الأشخاص على نفسهم دون الالتزام بأي أهداف أو برامج معينة و لكن بترديد شعارات و خطابات ممجوجة و فيها الكثير من التملق و المزاودة و ذلك بهدف الوصول إلى مناصب و مكاسب أو المحافظة عليها..
مفهوم المعارضة هو مفهوم الأقلية السياسية التي لم تنجح في تحقيق أغلبية في الانتخابات (برلمانية، إدارة محلية..) لذلك فهي لا تغيب و لا تمحى و لا تسجن و لكن تبقى معارضة للبرنامج الآخر و يكون دورها رقابي و نقدي و في الواقع هي تشجع على تحقيق برامج الأغلبية السياسية بكفاءة أعلى لأن الأغلبية ستكون تحت مجهر المعارضة و انتقاداتها طوال الوقت .. يعني هذا ما يسمى بتداول السلطة ، أما احتكار السلطة فهو عبارة عن إلغاء الآخر و هو سرطان يلتهم جسد الوطن، الوطن ليس بعثي و ليس إسلامي و لا يقزم بإيدلوجيا معينة الوطن أكبر من الأشخاص و الأحزاب و العقائدة و المقدسات
و من هنا فالبديل عن حزب البعث هو الحرية ، أي نعم الحرية ،
الحرية
يعني هذا التشويه الحاصل على مدى عقود لنفسية المواطنين هو أكبر جريمة بحق الوطن و تم باسم الوطنية، لقد اصبح المواطن دكتاتور على نفسه و على عائلته و على الآخرين و فقدنا القدرة على الحوار و قبول الآخر جزئيا أو كليا،
قد يبدو من كلامي أني حاقد لكني لست كذلك و لكن المشكلة هي أنه لا يمكن وصف الأشياء إلى بمسمياتها و إذا كنت تريد أن تحابي أو تبرر لمن تحب أو ترتبط به مصالحك الشخصية أو تخاف منه فهذا لا يعني أنك على حق أو أنه يحق لك الدفاع عنه
عندما ترى كيف يجري العالم و كيف يعمل البشر لبناء أوطانهم و تقدمها بشكل جوهري تدرك أن ما يجري في سوريا ليس إلا مساومة على الوقت و مراوغة و تكريس لسجن الوطن في قفص ، بكلام آخر التلاعب بمصير وطن و شعب بطريقة صبيانية و أنانية غير مسؤولة

يمكنني أن أكتب مجلدات (و أعنى ما أقول) في نقد ما يجري في الوطن سياسيا و اجتماعيا و ثقافيا و اقتصاديا.. (يعني نقد مع تحدث عن البديل)
أما البديل عن بشار الأسد فعندما يسمح بتداول السلطة و الحرية السياسية ستنظهر أحزاب و تيارات تستطيع ممارسة العمل السياسي و التقدم في إدارة الدولة عن طريق مؤسسات الإدارة الحكومية على اختلافها و سياسهم الجميع ليس فقط الأحزاب و لكن النقابات و المنظمات الأهلية و الأفراد و المؤسسات و التجمعات المهنية .....

و هنا أريد أن أتحدث تحديدا عن الإدارة المحلية إن مجالس الإدارة المحلية هي من أهم عوامل إدارة المجتمع حيث يتم انتخابهم من سكان المنطقة و للعمل على تطوير منطقتهم و صرف المخصصات الحكومية بما ينمي المنطقة و يعود بالفائدة على سكانها... يعني مو بناء مدخل لبلدية (القحطانية في الحسكة مثلاً) بأكلاف مضاعفة و تصرف ثلاث أرباعها على تماثيل و صور تكرس عبادة الفرد بدل و على بعض مئات الأمتار تجد عائلة من 11 فرد غير مسموح لها ببناء غرفتين إلا بتصريح مكلف ( ربما 10.000 ل.س ) لا يمكنهم جمعه بسنوات حيث أن مرسوم تنظيم البناء صصمم و وضع لمعالجة الوضع السكني في دمشق و ريفها ربما حلب أيضا لكنه صدر ليشمل الجميع و فقراء الحسكة ليس لهم صوت ..
عندما يتم إنتاج 70 إلى 90 % من صادراتنا (نفط ، قطن، قمح) في ثلاث محافظات تسمى بالنائية في العام 2005 أعرف أن البعث ليس حزب ثوري و ليس اشتراكي و ليس قائد و ليس حتى حزب إنه شعارات جوفاء لا أكثر (جعجعة بلا طحن)
عندما تدافع عن الحزب و انت لست قادر على قراءة الواقع أعلم أنك تدافع عن قضية رابحة بقوة الكلاشينكوف و إرهاب الأجهزة الأمنية لا بقوة الشعب و لا المنطق و لا زخم الدفاع عن الجولان أو فلسطين
يعني الحديث يطول ، و أنا هون عم حاول أحكي بالنظرية بس إذا بدك أحكي بالعملي يعني الواقع هو مآسي و بيبكي الحجر
ملاحظة: أنا لست من الحسكة و لا دير الزور و لا الرقة
ملاحظة 2: المشاركة غير منظمة و فيها الكثير من الأفكار، لكن اعتقد قدمت إجابة على سؤال البديل، المشكلة أن الموضوع عريض و واسع و يمكن الكتابة عنه من جوانب كثيرة ، و انا أردت المشاركة على السريع فجاء هذا الرد الطويل (ربما الممل)

[مدق]

يا جماعة لو انو المشكلة بالنظام كنا مشينا معكن حسب رأيكن ومعتقداتكن

بس الموضوع الي عم تناقشوه في كتير من التدجيل والوساخة بالعمق

لأنو الي عم يطالب بالحرية ( فعلياً وضمنياً عم يطالب بالطائفية )
وكل الحقد على النظام ما نو جايي من اسباب اجتماعية وإدارية وإنما من غريزة حكم الأمم عند بعض الطوائف

يعني عندي شوية تساؤلات للرأي الآخر:

1- معقول إني حاول غيير النظام الحالي الي عايش فيه بكل أمان وراحة بال لنظام مجهول مو معروف راسو من أساسو ومدري شو ممكن يجيب معو خراب للبلد !!!
2- معقول انو كمواطن (((((((((((((( عربي سوري ))))))))))))) اتحالف مع طرف بيرفض انو يكون عربي سوري وهدفه تهميش قوميتنا العربية وانتمائنا السوري ؟؟؟؟؟ أكيد عرفتو عن مين عم احكي ( الأكراد يعني بالمشمرحي ) وللتوضيح أكتر مطالبهن بسوريا بتغيير اسم الجمهورية العربية السورية لـ الجمهورية السورية (((((( يعني تقول انو القومية العربية شوكة بحلقهن !!!! ))))) واعتماد اللغة الكردية كلغة رسمية بسوريا لجانب اللغة العربية !!!!!!!!!!!!!!!!!!!!!!!!!!

يعني بشرف امكن إزا كنتو فعلاً سوريين وطنيين بتوقفوا بجنب هيك طرف لاسقاط النظام الي إذا مالقيتو شي تشكروه عليه ( حسب نظرتكم ) بيبقى شي واحد على الأقل ما ممكن تنكروه .... انو القومية العربية والإنتماء السوري خط أحمر ....... انتو اللي لازم تدافعوا عنه بدل ما تصيرو تحكو كردي ويصير واحد كردي مثلاً رئيس لشعب من تاريخ وجوده عربي سوري


والخلود لرسالتنا

[Danito]

كاتب النص الأصلي : مدق

يا جماعة لو انو المشكلة بالنظام كنا مشينا معكن حسب رأيكن ومعتقداتكن

بس الموضوع الي عم تناقشوه في كتير من التدجيل والوساخة بالعمق

لأنو الي عم يطالب بالحرية ( فعلياً وضمنياً عم يطالب بالطائفية )

أنو شلون ظبطت معك ما بعرف و فعليا و ضمنيا.... الحرية شي و الطائفية شي تاني

- معقول إني حاول غيير النظام الحالي الي عايش فيه بكل أمان وراحة بال لنظام مجهول مو معروف راسو من أساسو ومدري شو ممكن يجيب معو خراب للبلد !!!

أنو يعني أنت عايش بأمان و راحة يعني حضرتك مو الوحيد بهالوطن و شو منشان عشرات الآلاف بل الملايين المهمشين؟ يعني هالـ 500 إلى 900 ألف عاطل عن العمل مثلا هدول مو من حقهن يطالبو بإصلاح و ليس بعمل قلاقل في الدولة و الحكم...

2

- معقول انو كمواطن (((((((((((((( عربي سوري ))))))))))))) اتحالف مع طرف بيرفض انو يكون عربي سوري وهدفه تهميش قوميتنا العربية وانتمائنا السوري ؟؟؟؟؟ أكيد عرفتو عن مين عم احكي ( الأكراد يعني بالمشمرحي ) وللتوضيح أكتر مطالبهن بسوريا بتغيير اسم الجمهورية العربية السورية لـ الجمهورية السورية (((((( يعني تقول انو القومية العربية شوكة بحلقهن !!!! ))))) واعتماد اللغة الكردية كلغة رسمية بسوريا لجانب اللغة العربية !!!!!!!!!!!!!!!!!!!!!!!!!!

يعني على مهلك هون شوي أنت مواطن عربي سوري .. ماشي الحال أحكي عن حالك أنا مواطن سوري و سوري بس (أيوا يعني ناطق بالعربية ) بس ما ني عربي (وملاحظة ماني كردي على سلامتون الأكراد) يعني في عرب بسوريا بس مو الكل عربي هيك غصبا عنهم..

يعني بشرف امكن إزا كنتو فعلاً سوريين وطنيين بتوقفوا بجنب هيك طرف لاسقاط النظام الي إذا مالقيتو شي تشكروه عليه ( حسب نظرتكم ) بيبقى شي واحد على الأقل ما ممكن تنكروه .... انو القومية العربية والإنتماء السوري خط أحمر ....... انتو اللي لازم تدافعوا عنه بدل ما تصيرو تحكو كردي ويصير واحد كردي مثلاً رئيس لشعب من تاريخ وجوده عربي سوري

بما أنك عم تحلف بشرف الأمهات ، يعني بالله بلاها هادا توزيع شهادات حسن السلوك على الناس و هادا وطني و هداك عميل

الصياد لما فتح الحوار فتحو من شان النقاش و تبادل الآراء مو منشان المزاودات و التطاول على الآخرين يعني الكردي السوري سوري و ما فيك تحكي عنو كما لو أنه مواطن درجة ثانية لأنه هذا بيكون عنصرية و تخلف يعني و إذا انت شايف غير هيك ما حدا يبمنعك بس هي عنصرية و ما آلها تسمية ثانية..
أنت لما بدافع عن النظام لأنه بيمثلك أو بتمثلو لازم يكون دفاعك منطقي شوي يعني و توضح و تجاوب على النقاط المطروحة مو ترسم خطوط حمر و تبت في النقاش بشكل نهائي، يعني خود و عطي يا أما هذا ما اسمه حوار
وهون اسمحلي حاورك بنقطة محددة: مين قال أنو البديل عن الوضع الحالي هو الفوضى ؟ بالحقيقة هذا ما يروج له النظام
أما الأميركان فليسوا مهتمين لا بحرية و لا بديمقراطية لأنه يعرفون أن الصفقات في هذا الجزء من العالم (الشرق الأوسط) يتم حسمها مع الحكام المستبدين (الطغمة الحاكمة) و ليس مع الشعوب أما بالنسبة للشعوب المغلوب على أمرها و المغيب رأيها (مثلي أنا و أنت..) فأميركا و النظام تقريبا بخانة واحدة يعني و هي المزاودات اللي بيطلعولنا فيها ما هي إلا ضحك على اللحى و خود على سبيل المثال ، مكاتب المقاومة الفلسطينية تسكرت الحدود مع العراق مسكرة يعني ما في دعم للمقاومة إلا بالخطابات الرنانة
بكلمات آخرى الواقع مختلف عما يروج له

[sezar]

يا جماعة لو انو المشكلة بالنظام كنا مشينا معكن حسب رأيكن ومعتقداتكن

بس الموضوع الي عم تناقشوه في كتير من التدجيل والوساخة بالعمق

لأنو الي عم يطالب بالحرية ( فعلياً وضمنياً عم يطالب بالطائفية )
وكل الحقد على النظام ما نو جايي من اسباب اجتماعية وإدارية وإنما من غريزة حكم الأمم عند بعض الطوائف

يعني عندي شوية تساؤلات للرأي الآخر:

1- معقول إني حاول غيير النظام الحالي الي عايش فيه بكل أمان وراحة بال لنظام مجهول مو معروف راسو من أساسو ومدري شو ممكن يجيب معو خراب للبلد !!!
2- معقول انو كمواطن (((((((((((((( عربي سوري ))))))))))))) اتحالف مع طرف بيرفض انو يكون عربي سوري وهدفه تهميش قوميتنا العربية وانتمائنا السوري ؟؟؟؟؟ أكيد عرفتو عن مين عم احكي ( الأكراد يعني بالمشمرحي ) وللتوضيح أكتر مطالبهن بسوريا بتغيير اسم الجمهورية العربية السورية لـ الجمهورية السورية (((((( يعني تقول انو القومية العربية شوكة بحلقهن !!!! ))))) واعتماد اللغة الكردية كلغة رسمية بسوريا لجانب اللغة العربية !!!!!!!!!!!!!!!!!!!!!!!!!!

يعني بشرف امكن إزا كنتو فعلاً سوريين وطنيين بتوقفوا بجنب هيك طرف لاسقاط النظام الي إذا مالقيتو شي تشكروه عليه ( حسب نظرتكم ) بيبقى شي واحد على الأقل ما ممكن تنكروه .... انو القومية العربية والإنتماء السوري خط أحمر ....... انتو اللي لازم تدافعوا عنه بدل ما تصيرو تحكو كردي ويصير واحد كردي مثلاً رئيس لشعب من تاريخ وجوده عربي سوري

انا معك بها نقط رغم انك غير مضطر لاستخدام كلمة تدجيل ووساخة



بس كمان في نقطة عند ذكرك لـ

ويصير واحد كردي مثلاً رئيس لشعب من تاريخ وجوده عربي سوري

هاد الحكي اسمو شوفينية و هو نوع من انواع الأفكار العنصرية بس حبيت خبرك

[مدق]

هاد الحكي اسمو شوفينية و هو نوع من انواع الأفكار العنصرية بس حبيت خبرك

يعني طلب الأكراد إلغاء القومية العربية للشعب "العربي" السوري مو عنصرية ؟؟؟

ليش تحديد المقاييس عم يكون مبني على كلامنا وتصريحاتنا وما عم يصير تناول لمواقف البعض الي كلها عنصرية واسائة ؟

[sezar]

يعني ازا هنن متعصبين نحنا كمان لازم نكون هيك
انا ما عم دافع عنون مطالبهن مبالغة فيها

بس هذا لا يعني ردنا عليهن بنفس أسلوبن

صح؟