:::المنتوف و المعلوف ::::

ملك الهكرز · 25/04/2006

بمسرحية غربة للماغوط كان في سؤال فظيع,

لما الاغنياء بيزيدوا واحد مو لا زم الفقراء ينقصوا واحد ؟؟

سؤال بيحير

هلأ في شغلات يلي مو شايفها بعينو ما رح تخطر ببالو و صحيح انو نحنا عمنتناقش و نتحاور عالنت و الانترنت محصورة بالطبقة الوسط و ما فوق (ولا فخر)يعني في ناس رح نحكي عنهن و ما رح يقروا الموضوع و الناس يلي عميقروا الموضوع ما بيخصهن.

بس في شي غلط بالمعادلة

المشهد الاول : المكان : مكتب استيراد و تصدير
تاجر و عندو مكتب ,, قرر يشتري بنطلونات رجالية لشخصه ,,, اتصل بتاجر ملبوسات و قاللو ::"ابعتلي شي كام بنطلون (بنطرون اذا بدكن) لحتى نقّي منهن شي يعجبني !

بعد نص ساعة وصل الصبي تبع تاجر الملبوسات ناتع شي 20 بنطرون

صاحب المكتب اعد ينقّي ,,,همممم هات هاد ,,,ممممم وهاد كمان ,,,,, و هاد مبو شي ,,,

بعد نص ساعة اتصل صاحب المكتب بمعلمو للصبي ,, ايه ابو صائب ,, خيو أخدنا ستة ,, مجموع التسعيرات المكتوبة عالبنطلونات ,,همممممم ,, اذا قلنا 6 ضرب 2100 يعني 12600 ليرة قديش ابعتلك ؟؟

لااااااااء ,, لاااااااااء ماحزرت ,,, بالله شو ,, ياسيدي تكرم عينك ,, طيّب ,,

سكّر السماعة و عطا للولد 8000 ليرة مشان معلمو و خمسين للصبي

المشهد الاول A : بنفس الوقت يلي سكر معلمو للصبي السماعة كان في عندو زبون وسط عميقيس!

شووو منيح؟؟؟ عجبك ؟؟؟

الزبون: شو رح تحسبلناياه ؟

التاجر : (من برات منافسو) متل مو مكتوب !!

الزبون (بخجل) الله وكيلك ماخرج ادفع 825 ليرة حءو ,,, راعينا شوي

التاجر : (عصّب)خيو ,, ما في مجال بنوب يا دوب موفية معنا

الزبون : بمعيتك ,, رح اعطيك 700

التاجر : الـ 25 قبل الـ 800 عجبك عجبك ما عجبك الله معك شو مفكرنا رح نربح اكتر من الـ 25 ؟؟؟؟!!!

المشهد الثاني : المكان مؤسسة الكهرباء / كوة دفع الفواتير

موظف الصندوق: (حاطط العقدة) 1635 ليرة ,, ليش متأخر بالدفع لهلأ ؟؟

المواطن : (حالتو بالويل و دقنو طويلة) الله يجبر بخاطرك ياسيدنا ,, في مجال تقسطولناياها على دفعتين ؟؟

الموظف : بالله شوووو ,, شو شايفنا جمعية خيرية ؟؟؟ اذا ما معكون ليش عمتصرفوا كهرباااا ؟؟؟؟

المواطن : طيب بس قول لجماعتك يرجعوا يوصلوا الساعة و بأول الشهر بجي بدفع ..

الموظف : روح عنّا يااااا ,, شو انا ما عندي شغل غيرك ؟؟

المشهد الثاني A : المكان فيللا فلان الفلاني بالمزّة فيلات أمام كولبة الحرس

موظف الكهرباء : مرحبا حبيب !!! المعلم جوّه ؟؟

الحارس : ليييييش

الموظف بخجل) و الله طلعت فاتورة الكهربا و جايين نحصّلها ..

الحارس : قدّييييش

الموظف : 12850 ليرة سوري

الحارس : (يرفع السماعة) دقيقة لنشوف المعلّم _ احترامي معلّم , في عندي تبعوت الكهربا منشان الفاتورة ,, همممممم .. همممممم .. حاضر سيدي

الحارس : بيقلك المعلّم .. تعا .. الاسبوع الجاي هلّق هوي مو فاضي.

الموظف : سلّملي عالمعلم.

و راح

المشهد الثالث : المكان كازية الازبكية في سيارة سكودا بيك آب عالدور

ينزل سائق السكودا و يمسك فرد البنزين و يفتح الدبو و ينادي الموظف لتشغيل الطرنبة ,, الموظف عميشرب شاي قدّام طرنبة رفيقو ............ يصيح بالسائق : و لك شباك ,,,, ما تشغلها انت !!!

بنفس الوقت بتفوت سيارة Bmw و بتوقّف عالطرنبة نفسها من الجنب التاني !

تشوف موظف الطرنبة ترك كاسة الشاي و ركض و طبعاً دبو السيارة بيفتح من عند السائق و ما حدا شافو للسائق لأنو السيارة فيميه و صاحبنا تنازل و فتح شباكو 4 سم. و قال : عبّي بألف ليرة.

السكودا عبّا 480 ليرة ,, عطا الموظف 500,,, الموظف لطش الـ20 , , صاحب السكودا شغّل و مشي.

البي ام خلّص تعباية ,, عطا الموظف 1000 ل س و سكّر شباكو و مشي .. الموظف عميقلّو : الله معك استاذ ,, خلّينا نشوفك ,,أمانة........

طيب مو في شي غلط ؟؟؟

ليش؟؟

التاجر ابن التاجر بيخصموله 40% من قيمة البنطرونات ,,, و المنتوف ,,, ولا فرنك .... ليش؟؟

الطفران قطعولو الكهرباء و ما بيستنوا عليه و لا يوم . و صاحبنا بيرجعوا هنن لعندو بعد اسبوع ,,!!

يلي سيارتو سكودا لطشو منو باقي الـ 500 و طلع تقليع من الكازية ,, و صاحب البي ام ,,دفع عالبنس ,, مع تحية ..

احكيلكون المشهد الرابع و الخامس و الساباطعش ؟؟؟؟؟

bmi · 25/04/2006

دنيا...؟؟؟

Geeny · 25/04/2006

اقتباس:

احكيلكون المشهد الرابع و الخامس و الساباطعش ؟؟؟؟؟

ما في داعي كونو عايشين هالمشاهد كلها يوميا
بس دخلك أنو ما بتعرفو وين الغلط ليه ما كل انسان ببلش من نفسو ومحيطو والناس القراب منو؟

ملك الهكرز · 25/04/2006

اقتباس:

في داعي كونو عايشين هالمشاهد كلها يوميا
بس دخلك أنو ما بتعرفو وين الغلط ليه ما كل انسان ببلش من نفسو ومحيطو والناس القراب منو؟

ما الكل بيقول هيك انا لها بأخير بيطلع مو لها هي لهو

------------------------------------------------------------
متل الشعار الصباحي ........

me2 · 26/04/2006

اقتباس:

كاتب النص الأصلي : ملك الهكرز

ما الكل بيقول هيك انا لها بأخير بيطلع مو لها هي لهو

------------------------------------------------------------
متل الشعار الصباحي ........

يسلمو هلأنامل يا ملك . لك الله يعين اللي بيحس و بيشوف و بيشم .. مو بيشم أنو بيشم عنجد ..؟؟ لا يروح كخك لبعيد .. لأنو خلفك حبايبنا .

**krimbow** · 26/04/2006

بخصوص سؤال الراحل الماغوط

فكرت فيه كتير كتير و من زمان

بعدين اكتشفت انو الجواب ما ممكن يكون ببساطة: "اي مبلا، لما يزيدوا الاغنيا لازم ينقصوا الفقرا"
ما اساسا الاغنيا لما يزيدوا واحد عم يكون هالشي على حساب عشرين تلاتين فقير قدما و جداد

رائعة يا ملك

me2 · 26/04/2006

اقتباس:

كاتب النص الأصلي : krimbow

بخصوص سؤال الراحل الماغوط

فكرت فيه كتير كتير و من زمان

بعدين اكتشفت انو الجواب ما ممكن يكون ببساطة: "اي مبلا، لما يزيدوا الاغنيا لازم ينقصوا الفقرا"
ما اساسا الاغنيا لما يزيدوا واحد عم يكون هالشي على حساب عشرين تلاتين فقير قدما و جداد

رائعة يا ملك

مو هيك كريم ... ... و لفرض كل يوم عنا غني جديد .. أوكي ؟؟ أوكي .

أي كيف بيصير غني ؟؟ بيشلح عشرين زلمة كانو مابون شي .. يعني طبقة وسطى ..بيشلحهون مصاريهون ..

حضرتو بينتقل للأغنياء .. و حضرتهون بينتقلو للفقراء ..

هلق اذا هوو أصلا فقير أو طبقى وسطى , بينقصو الفقراء واحد . المحصلة أنو كل ما زادو الأغنياء واحد ... بيزيدو الفقراء تسطعش .

امرأة من ورق · 26/04/2006

الموضوع حلو وبيوجع
شكرا ملك الهكرجية

وبخصوص سؤال الماغوط بوافق كلام كريمبو انو اللي عم يغنى عم يغنى على حساب الفقراء اللي عم يزيد فقرون وعلى حساب اللي كانو طبقة وسطى يعني كان ماشي حالون وصارو بالويل
وصدق او لا تصدق عندي رعب من هي النقلة الله يستر منها

وبصراحة موضوع معاملة الغني شكل و المنتوف شكل تاني يعني مابعرف شو بدي قول