المعارضة تحيي ذكرى الوحدة في حلب اليوم

[عطر سوريا]

كاتب النص الأصلي : souriana

شكرا حكومة على الاستجابة السريعة
انا ما عندي شي ضد عطر سورية , ولا حكيت ضده , كل واحد عندو حرية رأي وهوي اذا بيكره الرئيس فهي الشغلة بتعود الو مافي داعي يهاجمني

لك اخوي انا ما عم هاجمك ولا شي وانا بحترم رئيك بس انا كان هجومي على وحدة عربية لازم نأسسها من اول وجديد مو اكتر وبالعكس حبيبي انا كمان مافي شي بيني وبينك وانت اخي وحبيبي
واختلاف الاراء لايقضي على الود ضمن قضية حبيب ئلبي انت

[yass]

كاتب النص الأصلي : حلبي

يعني على حسب علمي عندما تذمرى السوريين من الوحدة مع مصر أخذو كل الضباط والأداريين المصريين و وضعوهم بالطائرات و البواخر و أعادوهم الى مصر و أنتهت الوحدة بغض النظر عن الأيجابيات أو السلبيات
لم تسفك الدماء و لم تهدم البيوت على ساكنيها
و ياليتنا نتعلم من الماضي
بحيث نكون عقلانيين لا عاطفيين

أخوكم حلبي

يعني الحكي مو كتير كتير دقيق.. صار في مواجهات و صار في قتلى لكن عبد الناصر (هاي نقطة لصالحو) أوقفها.. يعني هو كان جاهز انقلاب مضاد على انقلاب الانفصال و اذا ماني كتير غلطان صار في محاولة انزال فاشلة بميناء اللاذقية و عبد الحكيم عامر (أبو حجيات و رقاصات) كان مجهز جماعتو لكن عبد الناصر ما شافها مناسبة... مشان خوف الدول العربية من انو عم يفرض الوحدة عسكريا

و ثورة 8 آذار كانت ثورة لاعادة الوحدة نظريا... بعثيين و ناصريين, بس بعدين اشتغلو ببعض الشباب الطيبة و اجت النكسة بعدين مات عبد الناصر و نسو قصة الوحدة....

[عطر سوريا]

كاتب النص الأصلي : yass

هلأ ليش ما عم تطوّل بالك انت خيو؟ ليش عم تقاتل؟ قالولك الدردري عضو بأخوية شي؟

عمي... الناصرية خربت بيتنا كسوريين. اجراءات الناصرية و النسخ الممسوخة عنا (أسوء شي بعبد الناصر- اللي بحترمو كشخص لكن ليس كسياسي- انو طلعلو شي 22 مقلّد... ) بقلك ليش خربت بيتنا؟ لأنو التأميم الغير مدروس هاد اللي كان شبة حق يراد به باطل دمر الطبقة الوسطى بسوريا اللي كانت الطبقة المتعلمة و المثقفة بالبلد... التأميم اللي صار (ما عدا تأميم قناة السويس.. هاد كان سياسي) كان بهدف الافقار و فقط الافقار...

و ما فيك بدون ما تشرحلي تنزل رقع باللي حاكمين هلأ لأنو قوانينهون الاقتصادية كانت بحرفيتها قوانين عبد الناصر, و ما عدلوها غير آخر كم سنة لما رادو يعملو اقتصاد السوق الاجتماعي (كمان شبه كلمة حق يراد بها باطل)

أما حسن عبد العظيم و صحابو.... فالمي تكذّب الغطاس, و التاريخ يضع كل واحد في محلة... و بتمنى الحكي اللي عم ينحكى هلأ بكتير أوساط ما يكون حقيقي.. اللي عم يعملو هلأ بيذكرني بظهور القوميين السوريين بنهاية التسعينات... و بتوقع جدا لو الحكي صحيح يكون حسن عبد العظيم بمجلس الشعب الدورة الجاية, أو حتى بالجبهة... و ليش لأ... وزير بدون حقيبة

اخوي نحن كحزب اتحاد اشتراكي عربي ديمقراطي نحن ما بندخل انتخابات قبل مايكون في قوانين احزاب وحريات عامة
وتاني شي يا غالي حزب الاتحادالاشتراكي ( حسن عبد العظيم ) معروف انو هو من بين اكتر الناس حرصا على البلد ونحن بنفضل اي شخص يحكمنا بس ما يكون بتدخل خارجي بس كمان نحن مع التغيير الديمقراطي
يلي ما بتنزل فيو قطرة دم سورية وبدون تدخل اجنبي على البلاد حبيبي
وشكرا على مروركم منورين

[yass]

كاتب النص الأصلي : عطر سوريا

لك اخوي انا ما عم هاجمك ولا شي وانا بحترم رئيك بس انا كان هجومي على وحدة عربية لازم نأسسها من اول وجديد مو اكتر وبالعكس حبيبي انا كمان مافي شي بيني وبينك وانت اخي وحبيبي
واختلاف الاراء لايقضي على الود ضمن قضية حبيب ئلبي انت

ليش خيو؟؟ (قصدي على الـ ليش عالحكي اللي بالاحمر)

[yass]

كاتب النص الأصلي : عطر سوريا

اخوي نحن كحزب اتحاد اشتراكي عربي ديمقراطي نحن ما بندخل انتخابات قبل مايكون في قوانين احزاب وحريات عامة
وتاني شي يا غالي حزب الاتحادالاشتراكي ( حسن عبد العظيم ) معروف انو هو من بين اكتر الناس حرصا على البلد ونحن بنفضل اي شخص يحكمنا بس ما يكون بتدخل خارجي بس كمان نحن مع التغيير الديمقراطي
يلي ما بتنزل فيو قطرة دم سورية وبدون تدخل اجنبي على البلاد حبيبي
وشكرا على مروركم منورين

هاد الحكي خلينا نأجلو شوي منشان ترتيب الافكار بس... نرجع عليه بعدين أوكي؟

ياهلا

[ayhamm26]

يوم الوحدة مع مصر + انقلاب 8 اذار +انقلاب 16 تشرين التاني هي كلها ايام نكبات على الشعب السوري لازم نقعد نلطم عليها ايام وليالي

[محمد ابراهيم]

مابدي حدى يفهم من حكيي هلاء اني ضد الوحدة .(هذا مبدئيا)

انا ضد الوحدة اللي قامت لانها اضرت اكتر بكتير مما فادت (بس بكرر ثانيا اني ما ضد الوحدة كوحدة ) الوحدة قوة للجميع ، وكلنا اتعلمنا ونحنا ضغار الدرس يللي الاب علمو لاولادو قبل وفاتو ،
جمع الاولاد وجاب مجموعة من الحطب او العصي واعطى واحد منون لاحد اولادو وطلب منو يكسرو ، قام الابن كاسرو بكل سهولة ،ثم اعطى الاب لنفس الولد باقي العصي وطلب منو كسرها ، الابن ما قدر يكسرها ومن هون اتعلم الاولاد انو اتحادون مع بعض فيه قوة وانو اذا تركو بعض وصار كل واحد لحالو رح يسهل مهمة عدوه في القضاء عليه.

بس ليش انا ضد الوحدة على هالشكل (لانو كانت عشوائية وغير مدروسة ) كان لازم يكون في تمهيد وتحضير الا يمتد لسنوات (حتى لا تكون النتيجة الفشل كما حدث)
ومن خلال الفترة التمهيدية كانو عرفو وين الصعوبات والمشاكل وقدرو يحلوها .

بالنهاية بدي قول كلمة حق ف شخص مابحبو (عبدالناصر)
قيادات الاحزاب السورية وكبار الضباط بالجيش هننى يللي راحو طلبو والحو على عبد الناصر انو يقبل بالوحدة حالا ) وهو رفض موضوع حالا وطلب فترة 5 سنوات لحتى يكون كلا الطرفين مستعدين وهننى رفضو .

بالنهاية بدي قول لاي شخص بيقول انو عبدالناصر احتل سوريا (انو مين راح لمين يطلب ويلح !!!) وبحب قول انو عبد الناصر سحب الضباط المصريين وخرج سلميا مع انو كان ممكن يستغل تذمر بعض المواطنين السوريين اللي صار بسبب انقلاب الضباط السوريين على الوحدة ويدعمون ضد الانقلابيين ويصير حمام دم جديد في وطنا العربي بيد ابنائه ضد بعض .

بدي ذكر بكم شغلة
* دور ناصر في المساعدة ضد تهديدات حلف بغداد لسوريا قبل الوحدة وبعدها.
*بداية مشروع سد الفرت (ومن المعلوم انو ناصر كان بيشوف مشروع سد الفرات متلو متل السد العالي من ناحية الاهمية)
* الغاء الاحزاب في سوريا كان مماثل لما صار بمصر (الغيت الاحزاب ايضا من مصر )
*الدولة المخابراتية هي ذاتا الموجودة بمصر يعني المواطنين بسوريا ومصر تحت نفس القسوة والدكتاتورية
* التأميم صار بمصر بطريقة اقسى وافطع مما صار عليها بسوريا


- عبد الناصر ما فضّل مصر على سوريا اطلاقا باي وقت من الاوقات (يمكن عبد الحكيم عامر اي ) بس ناصر لاء ابدا.

اخيرا بدي قول لحتى تحكم على احداث التاريخ بعدل وحيادية وتقدر تقيمها ، لازم ترجع للظروف الكاملة اللي ادت اليها ، لانو ما منطقي تحكم على تصرف شخص وانت ما بتعرف ظروف هالشخص .

[yass]

مابدي حدى يفهم من حكيي هلاء اني ضد الوحدة .(هذا مبدئيا)

أي أمرك عمي

انا ضد الوحدة اللي قامت لانها اضرت اكتر بكتير مما فادت (بس بكرر ثانيا اني ما ضد الوحدة كوحدة ) الوحدة قوة للجميع ، وكلنا اتعلمنا ونحنا ضغار الدرس يللي الاب علمو لاولادو قبل وفاتو ،
جمع الاولاد وجاب مجموعة من الحطب او العصي واعطى واحد منون لاحد اولادو وطلب منو يكسرو ، قام الابن كاسرو بكل سهولة ،ثم اعطى الاب لنفس الولد باقي العصي وطلب منو كسرها ، الابن ما قدر يكسرها ومن هون اتعلم الاولاد انو اتحادون مع بعض فيه قوة وانو اذا تركو بعض وصار كل واحد لحالو رح يسهل مهمة عدوه في القضاء عليه.

و الله انا بفضّل الصيغة التانية من هالقصة, بتعرفها مو؟... الوحدة وحدة الحال.... في تعاون في تضامن في حب في غرام بس وحدة لأ

بس ليش انا ضد الوحدة على هالشكل (لانو كانت عشوائية وغير مدروسة ) كان لازم يكون في تمهيد وتحضير الا يمتد لسنوات (حتى لا تكون النتيجة الفشل كما حدث)
ومن خلال الفترة التمهيدية كانو عرفو وين الصعوبات والمشاكل وقدرو يحلوها .

و الله أنا ضد الوحدة جملة و تفصيلا و من أي نوع... مؤمن بسوريا ككيان وطني مستقل, بس ما متل ما حكيتلك عدم الوحدة لا يعني عدم التضامن. يعني بدهون يحولو الجامعة العربية الى اتحاد أوربي جديد مافي مانع

بالنهاية بدي قول كلمة حق ف شخص مابحبو (عبدالناصر)
قيادات الاحزاب السورية وكبار الضباط بالجيش هننى يللي راحو طلبو والحو على عبد الناصر انو يقبل بالوحدة حالا ) وهو رفض موضوع حالا وطلب فترة 5 سنوات لحتى يكون كلا الطرفين مستعدين وهننى رفضو .

هو نص مزبوط... اللي طلب هو شكري القوتلي+الأحزاب القومجية... الأحزاب (التقليدية) أو الرجعية حسب منطق حزب البعث كانت ضد الوحدة لأنو شايفين خراب البيت من بعيد و هو جاي و أولهم فارس بيك الخوري... اللي في كتير "ملهمين" مدينين لذكراه باعتذار. و صح كان في شبح بيقولولو حلف بغداد كانو مخوفين الناس فيه..

بالنهاية بدي قول لاي شخص بيقول انو عبدالناصر احتل سوريا (انو مين راح لمين يطلب ويلح !!!) وبحب قول انو عبد الناصر سحب الضباط المصريين وخرج سلميا مع انو كان ممكن يستغل تذمر بعض المواطنين السوريين اللي صار بسبب انقلاب الضباط السوريين على الوحدة ويدعمون ضد الانقلابيين ويصير حمام دم جديد في وطنا العربي بيد ابنائه ضد بعض .

عبد الناصر اسمحلي ابو حميد.. بحترمو كشخص.. اعتبرو مثال حي للكاريزما السياسية, يعني كان يغطي ضيق افقو السياسي و ضحالة تفكيرو السياسي (هو عسكري... و فات عالسياسة بمنطق العسكري و ظل وفي لمنطقو العسكري, بعكس حافظ الأسد اللي كان سياسي متنكر بزي عسكري) بكاريزما و سهولة كلام و أحلام وردية أثارت اعجاب الملايين.... و يعني كان الظرف مواتي لهالشي دوليا... جيب عبد الناصر بهالأيام و ما راح يفلح بشي

و بخصوص انو ما عمل شي... لأ عمل, ثورة 8 آذار كانت مطبوخة بمطابخو, ما عمل شي مباشرة مزبوط, لأنو شاف انو المعركة خاسرة, و هو شاف انو شعب كان قلبا و قالبا معو من 3 سنين هلأ صار ما يطيق شوفتو, لذلك فكر فيها و ما تسرّع (هاي من النقاط اللي احسبها لصالح عبد الناصر, اعتقد انو رغم كل شيء كان صادق مع نفسو)

بدي ذكر بكم شغلة

* دور ناصر في المساعدة ضد تهديدات حلف بغداد لسوريا قبل الوحدة وبعدها.

حلف بغداد هاد الوحش تبع البوكيمونات مو؟ طيب أنا ضدو, بس كمان ضد سفيتة المنطقة.

*بداية مشروع سد الفرت (ومن المعلوم انو ناصر كان بيشوف مشروع سد الفرات متلو متل السد العالي من ناحية الاهمية)

أي اذا سد الفرات من وراه اسمحلي.... هاي منطقتي.. الله ياخدو على هالسد, خرب بيتنا, مكانة غلط و بناؤو غلط و استصلاح الأراضي اللي صار من وراه غلط, ردو عالحمير السوفييت و راحو حطولنا خراب البيت هاد..

* الغاء الاحزاب في سوريا كان مماثل لما صار بمصر (الغيت الاحزاب ايضا من مصر )

أي مو مبرر....

*الدولة المخابراتية هي ذاتا الموجودة بمصر يعني المواطنين بسوريا ومصر تحت نفس القسوة والدكتاتورية

كمان مو مبرر

* التأميم صار بمصر بطريقة اقسى وافطع مما صار عليها بسوريا

لأ مو صحيح ابو حميد... مصر لما اجت الثورة كانت دولة طبقتين: اغنياء و فقراء, و الثورة نوعا ما خلقت طبقة وسطى, بينما بسوريا كان في طبقة وسطى واسعة و مستقرة و ذات عطاء (و متل ما بتعرف الطبقة الوسطى هي عماد تقدم اي دولة... و كل ما كبرت كل ما احسن) و اجا التأميم تبع ناصر دبحها... بلش ينهيها... و كملو عليها بعدين شلة 8 آذار.. مزبوط التأميم بسوريا كان خطوة الى الوراء لأنو ما كان في الو داعي

- عبد الناصر ما فضّل مصر على سوريا اطلاقا باي وقت من الاوقات (يمكن عبد الحكيم عامر اي ) بس ناصر لاء ابدا.

ما كنت براسو و الله.... بس مراكز القرار بالأقليم الشمالي مسكوها المصريين.. الحق عليه و للا على ابو رقاصات ما بعرف... هو رئيس الدولة

اخيرا بدي قول لحتى تحكم على احداث التاريخ بعدل وحيادية وتقدر تقيمها ، لازم ترجع للظروف الكاملة اللي ادت اليها ، لانو ما منطقي تحكم على تصرف شخص وانت ما بتعرف ظروف هالشخص .

الحكم مو على شخص ابو حميد, الحكم على تجربة فاشلة و كانت تجسيد الى انو الوحدة العربية مستحيلة.. أي سوريا و مصر ما تحملو 3 سنين... تخيل سوريا و اليمن

[brave heart2]

خيو مشان الوحدة الميمونة فعبد الناصر استغل المد القومي عند الشعب السوري وتمت الوحدة فعلا برغبة من السوريين

بس الباشا كانت فكرتو احتلال على شكل وحدة .....

بالنسبة للاحتلال الاسدي اي نحنا شايفين سوريا محتلة من عصابة من بيت الاسد وتوابعهم هاد رأينا

سوريا الاسد لكان ... خلص منسميها المللكة الاسدية نسينا الوطن والهنا اللصوص ...

على احد المحطات تم ذكر اسم اسماء الاسد (( الاميرة اسماء الاسد )) ماعاد اتذكر بالزبط وين .....

يعني الشخص الامي هلق بيعرف انو اساسا حكمنا لا يسمى حتى دكتاتوري هوة حكم ما فيوي للنهب والسرقة

يا ريت متل الدكتاتورية الستالينية ... كنا بلعناها

على كل منرجع منقول لابد لليل ان ينجلي ...

[محمد ابراهيم]

كاتب النص الأصلي : yass

و الله انا بفضّل الصيغة التانية من هالقصة, بتعرفها مو؟... الوحدة وحدة الحال.... في تعاون في تضامن في حب في غرام بس وحدة لأ

و الله أنا ضد الوحدة جملة و تفصيلا و من أي نوع... مؤمن بسوريا ككيان وطني مستقل, بس ما متل ما حكيتلك عدم الوحدة لا يعني عدم التضامن. يعني بدهون يحولو الجامعة العربية الى اتحاد أوربي جديد مافي مانع

يا سلام هاد حلم صغير جميل ، بس تصير الجامعة العربية اتحاد على نسق الاتحاد الاوربي (هاد بحد ذاتو انجاز ضخم لصالح كل الدول العربية)

هو نص مزبوط... اللي طلب هو شكري القوتلي+الأحزاب القومجية... الأحزاب (التقليدية) أو الرجعية حسب منطق حزب البعث كانت ضد الوحدة لأنو شايفين خراب البيت من بعيد و هو جاي و أولهم فارس بيك الخوري... اللي في كتير "ملهمين" مدينين لذكراه باعتذار. و صح كان في شبح بيقولولو حلف بغداد كانو مخوفين الناس فيه..

شكري القوتلي ما طلب بالاول (اذا بدك الدقة) وبعدين لا تنسى ضغط ضباط الجيش ،
في مجموعة كبيرة من الضباط ومن الاحزاب .بس هاد كلو ما مهم انا مابطرح فكرة لتفصيل مين راح ومين ماراح ، انما اعرض فكرة انو ناصر قاعد مكانو وما راح ليحتل !!!!!
انما رايح بناء على دعوة والحاح
وخرج على اثر انقلاب عسكري ....

عبد الناصر اسمحلي ابو حميد.. بحترمو كشخص.. اعتبرو مثال حي للكاريزما السياسية, يعني كان يغطي ضيق افقو السياسي و ضحالة تفكيرو السياسي (هو عسكري... و فات عالسياسة بمنطق العسكري و ظل وفي لمنطقو العسكري, بعكس حافظ الأسد اللي كان سياسي متنكر بزي عسكري) بكاريزما و سهولة كلام و أحلام وردية أثارت اعجاب الملايين.... و يعني كان الظرف مواتي لهالشي دوليا... جيب عبد الناصر بهالأيام و ما راح يفلح بشي

انا من اخر العالم يللي ممن تحكي على ناصر (مشاعري رح تأثر كتير على اقوالي) اكتر شخص ما بطيقو في التاريخ ، على كل حال هو سياسي فاشل عن جدارة واستحقاق (وهالحكي بناء على مواقفو وقرارتو )

و بخصوص انو ما عمل شي... لأ عمل, ثورة 8 آذار كانت مطبوخة بمطابخو, ما عمل شي مباشرة مزبوط, لأنو شاف انو المعركة خاسرة, و هو شاف انو شعب كان قلبا و قالبا معو من 3 سنين هلأ صار ما يطيق شوفتو, لذلك فكر فيها و ما تسرّع (هاي من النقاط اللي احسبها لصالح عبد الناصر, اعتقد انو رغم كل شيء كان صادق مع نفسو)

كمان مافهمت علي
شو المشكلة انو يدعم المتذمرين والثوار على انقلاب ضباط الجيش ؟؟
شو رح يخسر !!! اللي رح يموت من الجانبين (سوريين ) فهمت علي ؟
حتى لو الجهة يللي بيدعمها خسرت فهاد مارح يغير من نتيجة الموقف (هو اصلا على اي حال تقبل الامر بانو الوحدة انتهت ) بس بقول انو هو رغم كل مساوئو الا انو كان حريص على عدم اراقة الدم بين الاخوة واحد غيرو حاقد او بيرفع شعارات وهمية كان صعد المشكلة في اتجاه العنف ومنو ممكن يستغل الموقف لو بدو للتدخل العسكري الكامل او عالاقل يستغل الموضوع سياسيا (انو كيف لما خرج الاخوة وقفو ضد بعض وقاتلو بعض)
بيذكر التاريخ قادة عملو الشيء يللي قلتو هلاء .
بدي ذكر بكم شغلة

حلف بغداد هاد الوحش تبع البوكيمونات مو؟ طيب أنا ضدو, بس كمان ضد سفيتة المنطقة.

بدك تروح تسئل عن تهديدات تركيا والعراق لامن سوريا وللحكم بسوريا بيكفي المؤامرات اللي كانت تحاك ضد سوريا بالعراق ،
ومافيك تنسى القوات المصرية يللي نزلت على ميناء اللادقية ولو انها كانت من حيث العدد مش كبير بس مين من الدول العربية أرسل جندي واحد وقتها !!!

أي اذا سد الفرات من وراه اسمحلي.... هاي منطقتي.. الله ياخدو على هالسد, خرب بيتنا, مكانة غلط و بناؤو غلط و استصلاح الأراضي اللي صار من وراه غلط, ردو عالحمير السوفييت و راحو حطولنا خراب البيت هاد..

هاد مثال على انو ناصر كان بدو يحقق نهضة في سوريا متل نهضة مصر (مشروع بمشروع على نفس الاهمية )
وما انو المشروع التخطيط الو سيئ بيسقط المثال (المثال لتوضيح رؤية ناصر تجاه الاقليم الشمالي عانها نفس الرؤية للاقليم الجنوبي ) ولناصر مئات القرارات الخاطئة اللي كلفت مصر كتير كما يحسب له مئات القرارات المفيدة ، صحيح ان الخطأ خطأ، بس في فرق بين اللي بيغلط وهو بدو يعمل الصالح وبين اللي بيغلط وهو بدو يعمل شيء غير صالح .

أي مو مبرر....
كمان مو مبرر

هاد كلو مانو تبرير بخصوص الغاء الاحزاب او الدولة المخابراتية
بدي اوصل انو ما كان في تخطيط من ناصر لتخريب سوريا لصالح مصر (اللي صار هون هو اللي صار هنيك)
انما انا ضد حل الاحزاب جملة وتفصيلا وضد الدولة البوليسية او المخابراتية بس
بدي خبرك ياعزيزي انو بمصر قبل الثورة كان في تداول للسلطة (حزب الوفد الليبرالي) كان بيروح ويجي على رئاسة الوزراة كتير وبين كل فترة وفترة للوفد كان فيه فترات لاحزاب اخرى وسياسين مخضرمين ،وكان في فصل واضح للسلطات بين الملك ورئيس الوزراء ) كل هاد راح بعد الثورة الى الان !!!
(مافي مبرر للي صار اكيد وقطعا) بس اللي صار ما كان ضد سوريا لحساب مصر

لأ مو صحيح ابو حميد... مصر لما اجت الثورة كانت دولة طبقتين: اغنياء و فقراء, و الثورة نوعا ما خلقت طبقة وسطى, بينما بسوريا كان في طبقة وسطى واسعة و مستقرة و ذات عطاء (و متل ما بتعرف الطبقة الوسطى هي عماد تقدم اي دولة... و كل ما كبرت كل ما احسن) و اجا التأميم تبع ناصر دبحها... بلش ينهيها... و كملو عليها بعدين شلة 8 آذار.. مزبوط التأميم بسوريا كان خطوة الى الوراء لأنو ما كان في الو داعي

انا اولا ضد سياسة التاميم باي شكل كانت .
بس مين خبرك انو مصر ما كان فيها طبقة وسطى !!! كان موجود في مصر كل شيئ قبل الثورة !!! سلبيات فيما عدا مستحدثات الثورة .
التاميم بمصر خضع في بعض الاحيان لعمليات تصفية الحسابات ولان مدى قرارات التاميم كان طويل وما صدر بسنة وحدة او 2 لذلك في كتير من الاوقات التالية دخلت الاعتبارات الشخصية بالموضوع المعارف والاقارب بيغضو النظر عنون واحيانا بتم التاميم لصالح بعض كبار الضبااط بالثورة (وهاد يللي ما صار بسوريا ) لانو المدى الزمني للوحدة ما كان كافي الو ،ولان ضباط الثورة بمصر ما بيعرفو عائلات بسوريا وما الون غير عدد بسيط من الاصدقاء السوريين

ما كنت براسو و الله.... بس مراكز القرار بالأقليم الشمالي مسكوها المصريين.. الحق عليه و للا على ابو رقاصات ما بعرف... هو رئيس الدولة

نفس اللي صار بمصر (تولية اهل الثقة على حساب اهل الكفاءة ) مجلس قيادة الثورة هو الحاكم والضباط الاحرار هننى اللي تولو كل شيء (حكومة عسكر يعني)

الحكم مو على شخص ابو حميد, الحكم على تجربة فاشلة و كانت تجسيد الى انو الوحدة العربية مستحيلة.. أي سوريا و مصر ما تحملو 3 سنين... تخيل سوريا و اليمن

قبل سايكس بيكو (شو هي حدود سوريا ؟؟؟)

- في التاريخ كتير امثلة على توحد هالدول او بعضها بدولة وحدة (قوية ومؤثرة) بس التوقيت والظروف هننى يللي حددو ايمتى بلشت الدولة الوحدوية وايمتى انتهت الدولة الوحدوية

أعتقد ان دولة وحدوية على ارض الشرق بدا شخصية سياسية وعسكرية وعلمية (المعضلة هي شخص بيجمع بين هذه الصفات)

[yass]

يا سلام هاد حلم صغير جميل ، بس تصير الجامعة العربية اتحاد على نسق الاتحاد الاوربي (هاد بحد ذاتو انجاز ضخم لصالح كل الدول العربية)

قصدي بالمثال انو يكون في تعاون و شورى بالقرار و تضامن و تكافل, ممكن تحقق كل هدول بالحفاظ بدون ما تعمل وحدة

شكري القوتلي ما طلب بالاول (اذا بدك الدقة) وبعدين لا تنسى ضغط ضباط الجيش ،
في مجموعة كبيرة من الضباط ومن الاحزاب .بس هاد كلو ما مهم انا مابطرح فكرة لتفصيل مين راح ومين ماراح ، انما اعرض فكرة انو ناصر قاعد مكانو وما راح ليحتل !!!!!
انما رايح بناء على دعوة والحاح
وخرج على اثر انقلاب عسكري ....

شكري القوتلي من وقت انتخابو خلفا لهاشم الاتاسي (يا الله على هالجملة شو مشتاقيلها.. انتخاب فلان خلفا لفلان) كان حاط براسو الفكر الوحدوي, و مزبوط كان الجيش عروبي, ما بننكر هالشي, بس كان في حلم وردي شعبي كمان و هاد كان الاهم

انا من اخر العالم يللي ممن تحكي على ناصر (مشاعري رح تأثر كتير على اقوالي) اكتر شخص ما بطيقو في التاريخ ، على كل حال هو سياسي فاشل عن جدارة واستحقاق (وهالحكي بناء على مواقفو وقرارتو )

متفقين على هالشي, ما عدا على شغلة ما بطيقو... أنا ما بحبو بس احترم صدقو مع نفسو فقط...

كمان مافهمت علي
شو المشكلة انو يدعم المتذمرين والثوار على انقلاب ضباط الجيش ؟؟
شو رح يخسر !!! اللي رح يموت من الجانبين (سوريين ) فهمت علي ؟
حتى لو الجهة يللي بيدعمها خسرت فهاد مارح يغير من نتيجة الموقف (هو اصلا على اي حال تقبل الامر بانو الوحدة انتهت ) بس بقول انو هو رغم كل مساوئو الا انو كان حريص على عدم اراقة الدم بين الاخوة واحد غيرو حاقد او بيرفع شعارات وهمية كان صعد المشكلة في اتجاه العنف ومنو ممكن يستغل الموقف لو بدو للتدخل العسكري الكامل او عالاقل يستغل الموضوع سياسيا (انو كيف لما خرج الاخوة وقفو ضد بعض وقاتلو بعض)
بيذكر التاريخ قادة عملو الشيء يللي قلتو هلاء .
بدي ذكر بكم شغلة

هو ما عملها حبا و كرامة... شاف انو شعبية الوحدة ماتت بسوريا و عرف بتجاوزات ضباطو أبو رقاصات و شلتو, و كانت مغامرة عسكرية فاشلة من بدايتها و ما كان بموقف يقدر يغامر فيه لا سياسيا و لا عسكريا

بدك تروح تسئل عن تهديدات تركيا والعراق لامن سوريا وللحكم بسوريا بيكفي المؤامرات اللي كانت تحاك ضد سوريا بالعراق ،
ومافيك تنسى القوات المصرية يللي نزلت على ميناء اللادقية ولو انها كانت من حيث العدد مش كبير بس مين من الدول العربية أرسل جندي واحد وقتها !!!

من نزلو كلمة مؤامرة و تهديد و عربية بجملة واحدة بصير بضحك... ما بعرف, على كل حلف بغداد بيّن شو هو متل ما بينو مئات الاشباح اللي عملوها

هاد مثال على انو ناصر كان بدو يحقق نهضة في سوريا متل نهضة مصر (مشروع بمشروع على نفس الاهمية )
وما انو المشروع التخطيط الو سيئ بيسقط المثال (المثال لتوضيح رؤية ناصر تجاه الاقليم الشمالي عانها نفس الرؤية للاقليم الجنوبي ) ولناصر مئات القرارات الخاطئة اللي كلفت مصر كتير كما يحسب له مئات القرارات المفيدة ، صحيح ان الخطأ خطأ، بس في فرق بين اللي بيغلط وهو بدو يعمل الصالح وبين اللي بيغلط وهو بدو يعمل شيء غير صالح .

هلأ بدك نحكم نيات و للا نتائج؟؟ ما عم شكك أو ما بدي شكك بنية عبد الناصر... بس النتيجة لسوريا كانت مدمرة, هاد اللي بعرفو, كانت تجربة فاشلة بامتياز و ما بدي ياها تتكرر مهما كان السبب

هاد كلو مانو تبرير بخصوص الغاء الاحزاب او الدولة المخابراتية
بدي اوصل انو ما كان في تخطيط من ناصر لتخريب سوريا لصالح مصر (اللي صار هون هو اللي صار هنيك)
انما انا ضد حل الاحزاب جملة وتفصيلا وضد الدولة البوليسية او المخابراتية بس
بدي خبرك ياعزيزي انو بمصر قبل الثورة كان في تداول للسلطة (حزب الوفد الليبرالي) كان بيروح ويجي على رئاسة الوزراة كتير وبين كل فترة وفترة للوفد كان فيه فترات لاحزاب اخرى وسياسين مخضرمين ،وكان في فصل واضح للسلطات بين الملك ورئيس الوزراء ) كل هاد راح بعد الثورة الى الان !!!
(مافي مبرر للي صار اكيد وقطعا) بس اللي صار ما كان ضد سوريا لحساب مصر

طيب ما اختلفنا عن هالشي... الوحدة دمرت (المشكلة انو بارادة شعبية) أفضل تجربة ديمقراطية عربية على الاطلاق, و اجت ثورة آذار اطلقت رصاصة الرحمة

انا اولا ضد سياسة التاميم باي شكل كانت .
بس مين خبرك انو مصر ما كان فيها طبقة وسطى !!! كان موجود في مصر كل شيئ قبل الثورة !!! سلبيات فيما عدا مستحدثات الثورة .
التاميم بمصر خضع في بعض الاحيان لعمليات تصفية الحسابات ولان مدى قرارات التاميم كان طويل وما صدر بسنة وحدة او 2 لذلك في كتير من الاوقات التالية دخلت الاعتبارات الشخصية بالموضوع المعارف والاقارب بيغضو النظر عنون واحيانا بتم التاميم لصالح بعض كبار الضبااط بالثورة (وهاد يللي ما صار بسوريا ) لانو المدى الزمني للوحدة ما كان كافي الو ،ولان ضباط الثورة بمصر ما بيعرفو عائلات بسوريا وما الون غير عدد بسيط من الاصدقاء السوريين

و الله ما كتير أنا بموقف اجادلك حول الوضع الطبقي بمصر, فيني احكيك عن سوريا... التاميم المجرم هاد خرب بيت العالم, دمر الطبقة الوسطى, و اعتقد انو لولا تجربة الوحدة و لو رادّين على فارس الخوري كان هلأ سوريا متل تركيا أو حتى متل اليونان.... ليش لأ

نفس اللي صار بمصر (تولية اهل الثقة على حساب اهل الكفاءة ) مجلس قيادة الثورة هو الحاكم والضباط الاحرار هننى اللي تولو كل شيء (حكومة عسكر يعني)

أي هنن دخّلو هالثقافة لعنّا و نحنا طورناها... يعني اختراع مصري و تحديث و تطوير سوري

قبل سايكس بيكو (شو هي حدود سوريا ؟؟؟)

و قبل سايكس بيكو شو حدود الدولة العربية؟

- في التاريخ كتير امثلة على توحد هالدول او بعضها بدولة وحدة (قوية ومؤثرة) بس التوقيت والظروف هننى يللي حددو ايمتى بلشت الدولة الوحدوية وايمتى انتهت الدولة الوحدوية

أي و دايما النهاية مأساوية متل امبراطوية النمسا- المجر.... الوحدة نمط سياسي طوباوي فاشل

أعتقد ان دولة وحدوية على ارض الشرق بدا شخصية سياسية وعسكرية وعلمية (المعضلة هي شخص بيجمع بين هذه الصفات)

اي اللي بيعرف شي عن وجود الشخصية هاي خبرونا مشان نبعت حد يغتالو.... اللي اخترعو الوحدة العربية هلأ متبرّين منها... خليها ميتة يابا استر عالمستر

[محمد ابراهيم]

قصدي بالمثال انو يكون في تعاون و شورى بالقرار و تضامن و تكافل, ممكن تحقق كل هدول بالحفاظ بدون ما تعمل وحدة
-ممكن فعلا ليش لاء (ياسلام حطيتا مش تعجب وانما اعجاب بالحكي) كما اتضح من حكيي وراها


شكري القوتلي من وقت انتخابو خلفا لهاشم الاتاسي (يا الله على هالجملة شو مشتاقيلها.. انتخاب فلان خلفا لفلان) كان حاط براسو الفكر الوحدوي, و مزبوط كان الجيش عروبي, ما بننكر هالشي, بس كان في حلم وردي شعبي كمان و هاد كان الاهم

-موقفك يثير الشفقة يمكن بحياتك مارح تسمعا


متفقين على هالشي, ما عدا على شغلة ما بطيقو... أنا ما بحبو بس احترم صدقو مع نفسو فقط...

-لما تدرس قرارتو الاقتصادية او اثر قرارتو العسكرية والسياسية على الاقتصاد رح تعرف ليش انا ما بطيقو




هو ما عملها حبا و كرامة... شاف انو شعبية الوحدة ماتت بسوريا و عرف بتجاوزات ضباطو أبو رقاصات و شلتو, و كانت مغامرة عسكرية فاشلة من بدايتها و ما كان بموقف يقدر يغامر فيه لا سياسيا و لا عسكريا

مافي مغامرة لانو مارح يخسر بالاخص لو دعم ّسياسيا



من نزلو كلمة مؤامرة و تهديد و عربية بجملة واحدة بصير بضحك... ما بعرف, على كل حلف بغداد بيّن شو هو متل ما بينو مئات الاشباح اللي عملوها

انا ماكتبت مؤامرة (بعتقد ينتقص قدر الضحك عندك ) حلف بغداد هاد خليه لحالو لانو قضية كبيرة وتاكد انو حلف بغداد كان قوي بحيث انو يرعب اي بلد بالمنطقة
تحالف (بيضم العراق وايران وتركيا وباكستان وبريطانيا) وبتدعمه اميركا دعم كامل .
فيما يخص حلف بغداد
ايزنهاور شخصيا كان مهتم جدا بحلف بغداد و له 3 محاولات هامة لضم (الاردن - مصر - سوريا ) للحلف باءت جميعها بالفشل .
خلينا بتهديدات الحلف
أولا (الحلف اصلا نشأ بدااية اعتمادا على اتفاق عسكري بين تركيا والعراق)
سنة 57 اتعرضت سوريا لهجوم من تركيا

* ثانيا الحكومة السورية بذات نفسها اهلنت عن اكتشاف مؤامرة هدفها اسقاط السلطة والمدبر كان حكومة نوري السعيد (العراقية) وتمت المؤامرة بتنسيق مع السفترة الاميركية بالعاصمة السورية

هاي المرة الاولى يللي اكتب فيها مؤامرة (بما انو هالكلمة بتضحكك ) بس اللي اكتشف هالمؤامرة واعلن عنها هي الحكومة السورية قبل الوحدة (الحكومة المنتخبة)

هلأ بدك نحكم نيات و للا نتائج؟؟ ما عم شكك أو ما بدي شكك بنية عبد الناصر... بس النتيجة لسوريا كانت مدمرة, هاد اللي بعرفو, كانت تجربة فاشلة بامتياز و ما بدي ياها تتكرر مهما كان السبب

دع مال قيصر لقيصر ومال روما لروما
س- التجربة فشلت ؟
اي
س- الوحدة هي السبب ؟
لاء
س- المسئول مين ؟
(الطرفين)



طيب ما اختلفنا عن هالشي... الوحدة دمرت (المشكلة انو بارادة شعبية) أفضل تجربة ديمقراطية عربية على الاطلاق, و اجت ثورة آذار اطلقت رصاصة الرحمة

مال قيصر لقيصر
الوحدة مالا ذنب
القائمين عليها هننى السبب




و الله ما كتير أنا بموقف اجادلك حول الوضع الطبقي بمصر, فيني احكيك عن سوريا... التاميم المجرم هاد خرب بيت العالم, دمر الطبقة الوسطى, و اعتقد انو لولا تجربة الوحدة و لو رادّين على فارس الخوري كان هلأ سوريا متل تركيا أو حتى متل اليونان.... ليش لأ

التاميم بيخرب بيت اي عالم باي مكان (تخيل عندك قطعة ارض او مصنع ) وبيجي العالم يصادروها منك !!!
اجرام مابعدو اجرام






أي هنن دخّلو هالثقافة لعنّا و نحنا طورناها... يعني اختراع مصري و تحديث و تطوير سوري

هههههههههههههههههه



و قبل سايكس بيكو شو حدود الدولة العربية؟

ياعمي مالطيفة ترد على سؤال بسؤال

قبل سايكس بيكو الحدود كانت قبائلية او عشائرية تحت حكم الدولة الاسلامية او الدول الاسلامية
من عثمانية لعباسية لاموية ل..... (سمعت كتير عن دول - الفاطميين الحمدانيين بنو مارين بنو الاحمر (لعيونك بنو الاحمر بالاندلس) في المماليك الايوبيين (صلاح الدين الايوبي) )) كتير بصراحة الواحد ما براسو حد هلاء

أي و دايما النهاية مأساوية متل امبراطوية النمسا- المجر.... الوحدة نمط سياسي طوباوي فاشل

اعترض بشدة الوحدة في كتير مواقف بتكون هي طوق النجاة




اي اللي بيعرف شي عن وجود الشخصية هاي خبرونا مشان نبعت حد يغتالو.... اللي اخترعو الوحدة العربية هلأ متبرّين منها... خليها ميتة يابا استر عالمستر

مين يللي رح يغتالو !!!
اللي بيعرف؟؟
او الشخصية ؟؟؟
او التنين

[sandra]

لا عمي لا
ما بدنا وحدة عربية وشعارات مهترية

[yass]

كاتب النص الأصلي : sandra 82

لا عمي لا
ما بدنا وحدة عربية وشعارات مهترية

كان بدي رد على محمد ابراهيم بس قررت اقتبس رد ساندرا بيكفي و بيوفي

بمزح... هلأ برجعلك

[yass]

-ممكن فعلا ليش لاء (ياسلام حطيتا مش تعجب وانما اعجاب بالحكي) كما اتضح من حكيي وراها

أي اتضح خيو اتضح الله يوضح عليك

-موقفك يثير الشفقة يمكن بحياتك مارح تسمعا

-لما تدرس قرارتو الاقتصادية او اثر قرارتو العسكرية والسياسية على الاقتصاد رح تعرف ليش انا ما بطيقو

يا سيدي الله يخليلكون ياه هو و ذكراه

مافي مغامرة لانو مارح يخسر بالاخص لو دعم ّسياسيا

ارجاع لكونتكست هديك الايام... عبد الناصر اله عند نص العرب و بعبع عن النص التاني (بعبع لأسباب مختلفة), و كان الارغومنت الأكبر ضدو و خصوصا من قبل الملك فيصل انو عبد الناصر كان بدو يفرض الوحدة العربية بالقوة و على طريقتو (لأنو العرب من النفاق -الحكام قصدي- بحيث ما كانو يسترجو يقولو انهون ضد الوحدة).... بينما قوة عبد الناصر كامنة بانو كان مقنع العالم انو الشعب عشقانو و مانو محتاج يعمل شي عسكري الا ضد اسرائيل, و عملية عسكرية بسوريا, عدا انو عسكريا ميتة, هي صفعة لشعبيتو

انا ماكتبت مؤامرة (بعتقد ينتقص قدر الضحك عندك ) حلف بغداد هاد خليه لحالو لانو قضية كبيرة وتاكد انو حلف بغداد كان قوي بحيث انو يرعب اي بلد بالمنطقة
تحالف (بيضم العراق وايران وتركيا وباكستان وبريطانيا) وبتدعمه اميركا دعم كامل .
فيما يخص حلف بغداد
ايزنهاور شخصيا كان مهتم جدا بحلف بغداد و له 3 محاولات هامة لضم (الاردن - مصر - سوريا ) للحلف باءت جميعها بالفشل .
خلينا بتهديدات الحلف
أولا (الحلف اصلا نشأ بدااية اعتمادا على اتفاق عسكري بين تركيا والعراق)
سنة 57 اتعرضت سوريا لهجوم من تركيا

* ثانيا الحكومة السورية بذات نفسها اهلنت عن اكتشاف مؤامرة هدفها اسقاط السلطة والمدبر كان حكومة نوري السعيد (العراقية) وتمت المؤامرة بتنسيق مع السفترة الاميركية بالعاصمة السورية

هاي المرة الاولى يللي اكتب فيها مؤامرة (بما انو هالكلمة بتضحكك ) بس اللي اكتشف هالمؤامرة واعلن عنها هي الحكومة السورية قبل الوحدة (الحكومة المنتخبة)

لك ما اختلفنا مؤامرة مؤامرة.... شو دخل يعني ما فينا نواجه المؤامرة اذا ما توحدنا؟ يعني ناصر ما كان يقدر يدافع عنا بحلف استراتيجي من منطلق الاخوة؟؟

دع مال قيصر لقيصر ومال روما لروما
س- التجربة فشلت ؟
اي
س- الوحدة هي السبب ؟
لاء
س- المسئول مين ؟
(الطرفين)

تعا احكيلك قصة أبو حميد.... الوحدة السبب و المسؤول هو الطرفين. ليش؟ خيو نحنا و بيت عمي ساكنين جنب بعض و بنحب بعض كتير كتير و اجا ابوي و عمي قررو انو يفتحو البيتين ع بعض مشان يكون في بيت كبير هيك كبير... و كلنا فرحانين و مكيفين ع ولاد عمي خيو و بدنا نعمل كل شي سوا و عين الله علينا

بديت المشاكل...

- بيت عمي ما بيتغدو للاربعة و نحنا متعودين نتغدى عالتنتين و نص
-بيت عمي عالغدا بيطفو التلفزيون وقت الغدا و نحنا ما بنتغدى الا و نحنا نتفرج عالتلفزيون
- بيت عمي بياكلو كتير فاصوليا و نحنا ما بنحب الفاصوليا....الخ الخ
- عمي بيربح قد أبوي مرتين و بذلك بيت عمي متعودين ع نمط حياة اعلى منا و عندهون عادات ع هالأساس

يعني لو ضالين حبايب و كل واحد ببيتو مو أحسن؟؟

مال قيصر لقيصر
الوحدة مالا ذنب
القائمين عليها هننى السبب

رديت فوق

التاميم بيخرب بيت اي عالم باي مكان (تخيل عندك قطعة ارض او مصنع ) وبيجي العالم يصادروها منك !!!
اجرام مابعدو اجرام

التأميم الدائم ممنوع, في حالات خاصة للتأميم أو وضع اليد بشكل مؤقت و يكون الأمر عادل

ياعمي مالطيفة ترد على سؤال بسؤال

لا يا شيخ هاي عادة اهل شمال اسبانيا وكتير كتير احبها (بعرفها تغيظ).. ع فكرة سؤالي جواب و انت بتعرف لأنو لما عم تقول

قبل سايكس بيكو الحدود كانت قبائلية او عشائرية تحت حكم الدولة الاسلامية او الدول الاسلامية
من عثمانية لعباسية لاموية ل..... (سمعت كتير عن دول - الفاطميين الحمدانيين بنو مارين بنو الاحمر (لعيونك بنو الاحمر بالاندلس) في المماليك الايوبيين (صلاح الدين الايوبي) )) كتير بصراحة الواحد ما براسو حد هلاء

عم تأكدلي انو ما كان في دولة عربية و لا حتى كان في مصطلح العروبة كقومية... يعني نقض كيان سوريا كبلد عن طريق عدم وجود تاريخ لهذا الكيان غير نافع للدفاع عن وجود كيان لم و لن يوجد الا في أذهان الحالمين... لحسن الحظ

اعترض بشدة الوحدة في كتير مواقف بتكون هي طوق النجاة

أيمت؟

مين يللي رح يغتالو !!!
اللي بيعرف؟؟
او الشخصية ؟؟؟
او التنين

ع أساس ما بعرف

[محمد ابراهيم]

كاتب النص الأصلي : yass

ارجاع لكونتكست هديك الايام... عبد الناصر اله عند نص العرب و بعبع عن النص التاني (بعبع لأسباب مختلفة), و كان الارغومنت الأكبر ضدو و خصوصا من قبل الملك فيصل انو عبد الناصر كان بدو يفرض الوحدة العربية بالقوة و على طريقتو (لأنو العرب من النفاق -الحكام قصدي- بحيث ما كانو يسترجو يقولو انهون ضد الوحدة).... بينما قوة عبد الناصر كامنة بانو كان مقنع العالم انو الشعب عشقانو و مانو محتاج يعمل شي عسكري الا ضد اسرائيل, و عملية عسكرية بسوريا, عدا انو عسكريا ميتة, هي صفعة لشعبيتو

ما لاحظت انا شو كاتب باول رد على هالنئطة
انا قلت انو في سوريين كانو متذمرين من الانقلاب على الوحدة ونزلو بالفعل يحتجو وما عاجبون اللي صار (هو كان قادر على استخدامهم عسكريا او عالاقل سياسيا من دون ما يظهر بالصورة ) بس هاد ماصار لانو يحسب الو انو ما كان بوجهين وبيلعب اكروبات يعني سياسي فاشل .
-(اذا بدك خطاب الانفصال اللي قالو ،هو عندي عالجهاز بنزلو بهالموضوع وهو فرصة عظيمة لانو عن الوحدة ومرتبط فيها )

لك ما اختلفنا مؤامرة مؤامرة.... شو دخل يعني ما فينا نواجه المؤامرة اذا ما توحدنا؟ يعني ناصر ما كان يقدر يدافع عنا بحلف استراتيجي من منطلق الاخوة؟؟

من منطلق الاخوة بعت قوة عسكرية ونزلت على ميناء اللادقية وهاد قبل الوحدة (ما قصرّ الزلمة بهالنئطة)
ويعاب عليه من قبل خصومه السياسيين (اللي ظهرو بعد وفاته ) فجأة انو ارسل القوات العسكرية المصرية يمين ويسار جنوب وشمال موضوع القوات اللي نزلت بميناء اللادقية هاي لاتذكر من حيث العدد امام القوات يللي راحت اليمن (تقدر في المصادر الحكومية 40 الف جندي) وبمصادر اخرى غير حكومية 100 الف جندي
وطبعا ارسل قوات محدودة ايضا الى الجزائر واسهم في تحرير ومساعدة مايزيد عن 25 دولة افريقية دعم مادي ومالي وهكذا وما عرض وحدة على اي دولة (حتى بخصوص الوحدة هون بهالموضوع ) ماعرض الوحدة ولا كان ساعي اليها (انما الوفود جات الو لحد عندو بالقاهرة)

تعا احكيلك قصة أبو حميد.... الوحدة السبب و المسؤول هو الطرفين. ليش؟ خيو نحنا و بيت عمي ساكنين جنب بعض و بنحب بعض كتير كتير و اجا ابوي و عمي قررو انو يفتحو البيتين ع بعض مشان يكون في بيت كبير هيك كبير... و كلنا فرحانين و مكيفين ع ولاد عمي خيو و بدنا نعمل كل شي سوا و عين الله علينا

بديت المشاكل...

- بيت عمي ما بيتغدو للاربعة و نحنا متعودين نتغدى عالتنتين و نص
-بيت عمي عالغدا بيطفو التلفزيون وقت الغدا و نحنا ما بنتغدى الا و نحنا نتفرج عالتلفزيون
- بيت عمي بياكلو كتير فاصوليا و نحنا ما بنحب الفاصوليا....الخ الخ
- عمي بيربح قد أبوي مرتين و بذلك بيت عمي متعودين ع نمط حياة اعلى منا و عندهون عادات ع هالأساس

يعني لو ضالين حبايب و كل واحد ببيتو مو أحسن؟؟

شو ذنب الوحدة ؟؟؟
هاد متل اللي بيعيب عالزمن
او متل اللي بيعيب عالبحر لانو سفيتنو غرقت فيه !!! العيب ممكن يكون باي شيء الا البحر
بس من مثالك اقدر احكم على الوضع
بانو الاخين اخطئو في تقدير الموقف (هاد يللي قلتو باول رد ) انو الموضوع تم من دون دراسة
كان لازم يتم دراسة الموضوع لحتى يعرفو شو العقبات والمشاكل ولحتى يقدرو يحلوها قبل التطبيق على ارض الواقع
يعني لو كان الاخين درسو الموضوع من البداية كانو عرفو انو في 4 مشاكل رح تظهر بعد فتح البيتين على بعض
لذلك لازم يشوفو حل لهالاربع مشاكل قبل الوحدة .
نروح لموضوع الوحدة (بعد الوحدة رح يظهر بعض المشاكل هاد طبيعي) بيشوفو حل لهالمشاكل واذا مافي حل لكل هالمشاكل او عالاقل بعضها (يبقى نقيم الوضع قبل الوحدة مع بعد الوحدة على اثر السلبيات والايجابيات الحالية بالاضافة الى الناتجة عن الدراسة في حال تمت الوحدة وبنطلع لقرار مدروس علميا
اذا الوحدة في صالح الطرفين او ليست في صالحون وعلى اثرو بيكون القرار السليم .

في علم اسمو "اتخاذ القرارات" الو نظريات كتير جدا , وكل الدول المتقدمة بتستخدمو (هاد مانو ابتكار شخصي مني)
المهم منشان ما نبعد كتير (بردي الاول شفاء لكل داء)
قلت اني ضد الوحدة على هذا الشكل لانها غير مدروسة وكان لابد من وجود فترة تمهيدية لتجنب المشاكل .

لا يا شيخ هاي عادة اهل شمال اسبانيا وكتير كتير احبها (بعرفها تغيظ).. ع فكرة سؤالي جواب و انت بتعرف لأنو لما عم تقول

عم تأكدلي انو ما كان في دولة عربية و لا حتى كان في مصطلح العروبة كقومية... يعني نقض كيان سوريا كبلد عن طريق عدم وجود تاريخ لهذا الكيان غير نافع للدفاع عن وجود كيان لم و لن يوجد الا في أذهان الحالمين... لحسن الحظ

ع أساس ما بعرف

مابعرف ليش باكتر من دولة اوربية الشمال مختلف عن الجنوب (ايطاليا اكبر مثل واضح )
انتا الك اصدقاء من سرقسطة ؟؟
شوف يا سيدي سؤالك مختلف عن الجواب كتير
لانو قبل سايكس بيكو الوضع غير بعدها
الاول كلو كان تحت امرة دولة وحدة هي الدولة العثمانية وبعدها صارت الدولة الكبيرة دويلات صغيرة
المفروض انو سوريا ولبنان بلد وحدة ومش بس لهون في اراضي تانية في الاردن وفي فلسطين .
سايكس بيكو قسمت وعملت حدود من اللاحدود (الحدود على المستوى التاريخي ) خارجيا سلطة دول كبرى وعظمى (يعني تارة الروم تارة الفرس تارة المسلمين تارة اليونانين وهكذا ) في هذه الاثناء بيكون في حدود داخلية هي لكل قبيلة او عشيرة بتعرف حدودها من وين لوين واهل المدن كمان عارفين مدنهم (بغداد دمشق القاهرة وهكذا (وهاد اللي ما اتغير تاريخيا عبر مئات السنين)
هاي الحدود يللي انا (بفلسفتي وفكري اعترف فيها بلا جدال) واي حدود اخرى هي حدود غير دايمة او مؤقتة والسيادة عليها كانت بتنتقل من دولة بتموت وتسقط الى دولة جديدة بتشرق محلها وهكذا كان التاريخ دوما
الشعوب والمدن باقيين والحكام والانظمة في زوال

[XerostomiA]

لا زال كما كان يا سيدي ..
و كلنا لم نعترض يوما على الوحدة (((( العادلة )))) ..

فيقو فيقو على غلاء الاسعار

بإينى منطق راح يستفيد المواطن لو تنظمت الدولة سياسيا و ضل خاضع غصبن عنو للـتأميم مثلا ..
كمواطن من الطبقة الوسطى ..
[ غلاء الأسعار ] ممكن يكلفني ألفين ليرة زيادة بالشهر ..
بينما التأميم بيخرب بيتي ..
و بيخليني حتى أفكر أترك البلد لأني راح انظلم ..
لو بدك تكون حكيم سياسيا .. لازم تنصف كل الطبقات من غير ما تظلم طبقة ع حساب طبقة تانية ..

كلامك هون خطير ..
انت عم تقول انو التأميم أهون من غلاء الأسعار .. !!!!

هادا أولا ..
و تانيا ..

ماراح يختلفو اتنين انو المواطن المصري كان مستفيد من هالـ ( وحدة ) أكتر بكتير من المواطن السوري ..
و بما انو صار في طرف مستفيد أكتر من التاني ..
فهي إزن ما صار اسمى وحدة متكاملة فعليا ..

وتقول انك ضد شغلة صارت من 50 سنة فيق وئول انك ضد شي عم يصير وبدو يصير

بالزبط !
معناتى انتو عملتو المظاهرة ضد شغلة خصلت من 50 سنة ..
لكن فيقو و ئولو انكون ضد شي عم يصير و بدو يصير ..
بدل ما ترجعونا 50 سنة لورا اقتصاديا و سياسيا ..

اعترضو ع شي مو عاجبكون عنا بس مو تنادو الغريب ليوحدنا .. !!!

و حتما انا مو ضدك كمواطن لأنو بالاخير مصلحتنا كلى وحدة ..
انا ما بعرف السياسة عن كثب و لا مطلعة كتير بس كلنا حافظيين اش اللي كان يصير أيام الوحدة المزعومة ..
و عم بحكي معك عن مصلحة ( مواطن ) اللي بالأخير هي من مصلحة البلد ..

أما اللي عم يقولو انو جمال عبد الناصر صاحب نية سليمة ..
فالله هو عالم بالنوايا ..
نحن كبشر معنين بالنتايج ..

و شو بنستفيد لو بنى حتى سور الصين في سوريا و انظلمنا كمواطنين

حتى في المشافي المواطن المصري كان مبدّى ع السوري من كتر مانى عقجة منون ..

بكل شي كان المواطن السوري مو آخد حقو متل قبل أو متل هلأ ..

شلون انت عم تنادي غرباء ليوحدولك وطنك هي ما عم بفهمى ..

و لا تحكيلي هلأ انو جمال عبدالناصر ما كان شايف شلون شعبو عم يتصرف و مانو عرفان انو هو المستفيد الأكبر من هالوحدة ..

هو صحيح في هداك الوقت ممكن استفدنا بالحماية من حلف بغداد إلخ ..
و انت عم تحكي عن فوائد سياسية ..
انا عم بحكي عن المواطن و وضعو في هيك وحدة ..

عفوا ع الكلمة .. من [ السذاجة ] .. انو نرجع نتمنى انو تتكرر المأساة النا كمواطنين ..
اما ازا عم تحاولو تتزكرو الألم لتحمدو الله انو راح ازن هادا شي ايجابي .. و تشكرو عليه ..

بكرر ..
انا عم بحكي معك كمواطن بعيدا عن السياسة ..
لأن بالاخير انت عم تحكي عن شعب مو بس عن قيادات سياسية ..

و بحكيلك ياها من جديد : المواطن السوري انظلم في هداك الوقت دون شك ...

[ظل جيفارا]

يا سيدي على هالحالة بتقول فصيل من المعارضة يحيي وليست المعارضة كلها من احيى
مو مشان لإنو فصائل معارضة كتير بعرفا اوعى من انو تعمل هيك عملة
وطنية اكتر بكتير من هيك .....
واحلى رجاء الناصر ...
تحياتي الحارة
ظل جيفارا