أذكياء أخوية.. تفضلوا

[noooneh]

صباح الخير شبيبة:

هيدي مجموعة من الألعاب والفزورات الحلوة، بعضها ألفته وبعضها الآخر جمعته من مطارح مختلفة، وقررت إني أتحدى فيهن بعض "الأدمغة" الحلوة هون.... ونزلها وحدة ورا واحدة تباعاً.... وممكن إنو نعمللها سكورات كمان....

رح تكون هالأسئلة سهلة وبسيطة وما رح تحتاج معلومات معقدة أو صعبة، لكن بنفس الوقت بدها تركيز وانتباه وفهم كتير دقيق للأسئلة....

بتمنى تحبوها... وتستفيدوا منها

نائل

[was616im]

اي وين المسابقة

[noooneh]

أولاً: 8 حطبات

في واحد من مخيمات الكشافة، فرض على كل فرد من الأفراد إنو يروح يدبر حطب من الغابة حتى يسخن أكله عليه. وقررت مرسيل وشيري إنو يفترقوا ويدبروا حطب للعشا اليوم.... وبعد نص ساعة رجعت مرسيل معها 5 حطبات وشيري معها 3 حطبات... وشعلوا النار سوا

للأسف كان نائل عم يدور وما عم يلاقي حطب.... وكان جوعان كتير.... لذلك طلب من مرسيل وشيري إنو يخلوه يسخن أكلو معهن، وما يخبروا حدا.. مقابل إنو يشاركهن بالنار تبعهن، وقلهن: "بس أنا ما معي حطب.... رح أدفعلكن كاش.... معي 800 ليرة خدوهن وتقاسموهن بيناتكن"....

بيقول المتل: ما كشفوهن هني وعم يسرقوا كشفوهن وهني عم يتقاسموا.. وهاد الي صار فعلاً.... لأنو مرسيل وشيري في اليوم التالي علقت بيناتهن خناقة عن الطريقة العادلة لتقاسم مبلغ (800 ليرة) اللي دفعه نائل....

منتظرين مساعدة الشباب

نائل

[MadMax]

كاتب النص الأصلي : noooneh

أولاً: 8 حطبات

في واحد من مخيمات الكشافة، فرض على كل فرد من الأفراد إنو يروح يدبر حطب من الغابة حتى يسخن أكله عليه. وقررت مرسيل وشيري إنو يفترقوا ويدبروا حطب للعشا اليوم.... وبعد نص ساعة رجعت مرسيل معها 5 حطبات وشيري معها 3 حطبات... وشعلوا النار سوا

للأسف كان نائل عم يدور وما عم يلاقي حطب.... وكان جوعان كتير.... لذلك طلب من مرسيل وشيري إنو يخلوه يسخن أكلو معهن، وما يخبروا حدا.. مقابل إنو يشاركهن بالنار تبعهن، وقلهن: "بس أنا ما معي حطب.... رح أدفعلكن كاش.... معي 800 ليرة خدوهن وتقاسموهن بيناتكن"....

بيقول المتل: ما كشفوهن هني وعم يسرقوا كشفوهن وهني عم يتقاسموا.. وهاد الي صار فعلاً.... لأنو مرسيل وشيري في اليوم التالي علقت بيناتهن خناقة عن الطريقة العادلة لتقاسم مبلغ (800 ليرة) اللي دفعه نائل....

منتظرين مساعدة الشباب

نائل

مرسيل بتاخد 700
شيري بتاخد 100

[was616im]

هلق في طريقتين
اولا انو مارسيل تاخد 500 لانو جابت 5 حطبات و شيري تاخد 300
تانيا انو يقسموهن بالنص لانو رح يسكتو عاللي صار
بس في طريقة تالتة اللي هيي انو منشيل مبلغ معين و ليكن 160 ليرة (المهم يكون من مضاعفات ال ع جنب
بعدين منقسم المبلغ الباقي بالنص يعني كل وحدة تاخد 320 ليرة و بعدين منرجع منقسم ال 160 ع كل حطبة 20 ليرة
يعني مارسيل بتاخد 420 و شيري بتاخد 380
و هيك بتنحل المشكلة

[noooneh]

كاتب النص الأصلي : was616im

هلق في طريقتين
اولا انو مارسيل تاخد 500 لانو جابت 5 حطبات و شيري تاخد 300
تانيا انو يقسموهن بالنص لانو رح يسكتو عاللي صار
بس في طريقة تالتة اللي هيي انو منشيل مبلغ معين و ليكن 160 ليرة (المهم يكون من مضاعفات ال ع جنب
بعدين منقسم المبلغ الباقي بالنص يعني كل وحدة تاخد 320 ليرة و بعدين منرجع منقسم ال 160 ع كل حطبة 20 ليرة
يعني مارسيل بتاخد 420 و شيري بتاخد 380
و هيك بتنحل المشكلة

هلأ حلك الأول للوهلة الأولى أكثر منطقية... إنو يعني شي بيتعلق بعدد الخشبات
حلك التاني تبع المناصصة أكثر ديبلوماسية.... بس إنو ما بيمشي حالو عم نحكي هون رياضيات يعني

أما الحل الثالث هون بدو يفوت فيي أنا وياك بالحيط شوي.... إنو قسم على أساس الحطبات وقسم مناصصة.... من مصلحة مرسيل إنو قسم الحطبات يكون كبير، ومن مصلحة شيري يكون قسم الحطبات صغير.... طيب إنت هيك خليتها عايمة.. إنو المهم يكون أول قسم من مضاعفات التمانين....

شكراً
نائل

(ملاحظة صغيرة... كتعقيب:.... "الحلول هدون اللي ذكرتهون حضرتك.. كلهون غلط )

[was616im]

طيب اذا لا بدك الحل رياضي ولا ديبلوماسي ولا بالنص اي قول من الاول انو الشغلة فيها شوية لعب بالموضوع و خلصنا
مادماكس انو يحرق حريشك كيف زبطت معك القسمة؟؟؟؟شو الشغلة واسطة يعني

[noooneh]

ما بدها كل هاد ولو...

الحل رياضي مية بالمية.... وعكل حال رح نحطو بوكرا بس نعطي فرصة للشباب يجربوا....

[was616im]

انو في حل تالت يعني كمان رياضي شوية
منشيل مية ع جنب و منقسمها بالنص انو هي يعني حق سكوتهن تنيناتن
و المبلغ الباقي منقسمو قسمة عدل يعني حسب عدد الحطبات و هي بدك تحسبها بالنسب المئوية شوية
يعني نسبة الحطب اللي جابيتو شيري 37.5 و بهالحالة بيكون نصيبها من ال 700 هو 262.5
و منضيف الها ال 50 بيصير نصيبها 312.5
و الباقي لمرسيل بنفس العملية الحسابية يعني شيري بتاخد 312.5 و مرسيل بتاخد 487.5
شو رايك بالرياضيات تبعيتي

[MadMax]

كاتب النص الأصلي : was616im

طيب اذا لا بدك الحل رياضي ولا ديبلوماسي ولا بالنص اي قول من الاول انو الشغلة فيها شوية لعب بالموضوع و خلصنا
مادماكس انو يحرق حريشك كيف زبطت معك القسمة؟؟؟؟شو الشغلة واسطة يعني

هلأ منطقياً ..... مو كل وحدة لازم تاخد حق الحطبات يللي جابتون
لازم تاخد حق الحطبات يللي زادو عن جاجتا
يعني ...حق الحطبات ( يللي جابتون مطروح منهون يللي استهلكتون )

و بقدر احسبلك ياها بدقة اذا بدك .... بس هلأ نعسان شوي

[noooneh]

كاتب النص الأصلي : Madmax

هلأ منطقياً ..... مو كل وحدة لازم تاخد حق الحطبات يللي جابتون
لازم تاخد حق الحطبات يللي زادو عن جاجتا
يعني ...حق الحطبات ( يللي جابتون مطروح منهون يللي استهلكتون )

و بقدر احسبلك ياها بدقة اذا بدك .... بس هلأ نعسان شوي

طيب منشوفك بوكرا ومنحكي .. تصبح على خير هلأ....

[wwq]

انا راح جرب معكون
بما انو هنه التلاته صارو شركاء فيعني راح يكون نصيب كل واحد منو ثلث الخشب يعني راح نقسم 3/24
وكل واحد راح ياخد الثلث بكون نصيب كل واحد يعني 8 من 24

يعني اول باشتان 3 حطبات =9
وتاني باشتان5حطبات=15 فبكون المجموع 24

صاحب ال3 حطبات راح يستعمل 8 تبعينو يعني الثمن فبكون بئي عنو 1
صاحب ال5 حطبات كمان راح ستعمل 8 الثمن تبعو .وراح يفضل عنو 7
الفاضل عن شيري و مرسيل بكون 8 هدول من نصيب نائل

المفروض اذا طلعت حساباتي مزبوطه انو نائل يدفع للأول 100 ليره حق 1
والتاني 700 لأن عطاه 7

و انا وجعني راسي من هل الحسبه وان شاء الله كون ما فتت بلحيط

[MadMax]

كاتب النص الأصلي : Madmax

هلأ منطقياً ..... مو كل وحدة لازم تاخد حق الحطبات يللي جابتون
لازم تاخد حق الحطبات يللي زادو عن جاجتا
يعني ...حق الحطبات ( يللي جابتون مطروح منهون يللي استهلكتون )

و بقدر احسبلك ياها بدقة اذا بدك .... بس هلأ نعسان شوي

طيب ببساطة ... اذا فرضنا كل حطبة = 3 اتلات الحطبة
بكون مجموع القطع 3 * 8 = 24

قطعة
و بما انو هني 3 أشخاص استهلكو الحطبات بالتساوي كل شخص 8 قطع ( او اتلات )
مرسيل قدمت5 * 3= 15 قطعة - 8 قطع ( يللي استهلكتون ) بكون الناتج 7
شيري قدمت3 * 3 = 9 قطع - 8 قطع ( يللي استهلكتون ) بكون الناتج 1
و بما انو نائل استهلك 8 قطع و دفع حقون 800 ليرة يعني بكون حق القطعة 100 ليرة
يعني بيطلع لمرسيل 700
و لشيري 100

[was616im]

كاتب النص الأصلي : Madmax

مرسيل قدمت5 * 3= 15 قطعة - 8 قطع ( يللي استهلكتون ) بكون الناتج 7
شيري قدمت3 * 3 = 9 قطع - 8 قطع ( يللي استهلكتون ) بكون الناتج 1
و بما انو نائل استهلك 8 قطع و دفع حقون 800 ليرة يعني بكون حق القطعة 100 ليرة
يعني بيطلع لمرسيل 700
و لشيري 100

ما استوعبت شيالهيئة متقل بالحشيشة اليوم

[noooneh]

شكراً يا شبيبة على الحل....

هلأ هي الفكرة اللي بتخربط بعض الناس إنو بيفكروا 800 ليرة حق 8 حطبات ... هو الحقيقة 800 ليرة هدون حصة نائل من حق الحطبات، يعني التلت... وبالتالي بيكون حق الحطبات 800 × 3 = 2400 ليرة لأنو فرضياً كل واحد من التلاتة رح يحط 800 ليرة

هلأ إذا ردنا نقسم 2400 على 8 حطبات بيطلع للحطبة 300 ليرة.... مرسيل بتقبض 1500 عن خمس حطبات وبتدفع 800 المستحقة عليها.... بيبقالها 700

أيضاً شيري خانم بتقبض 900 عن 3 حطبات وبتدفع 800 المستحقة بيبقالها 100 ليرة...

وعشتم وعاشت أخوية

(ملاحظة: مرسيل بتنكتب بلا ألف )

[was616im]

يعني نوعا ما استوعبتها
انو ماد منين جايب الحل انت؟؟؟
لحظة لحظة في شغلة ما عم افهمها طاول انو هنن لمين بدهن يدفعوا هالمصاري؟؟يعني عم تقولوا انو مرسيل بدها تدفع و شيري بدخا تدفع بس لمين؟؟

[DTS]

اي سهـلة معلـم هي الحـل كمـان ..

هلأ هي الفكرة اللي بتخربط بعض الناس إنو بيفكروا 800 ليرة حق 8 حطبات ... هو الحقيقة 800 ليرة هدون حصة نائل من حق الحطبات، يعني التلت... وبالتالي بيكون حق الحطبات 800 × 3 = 2400 ليرة لأنو فرضياً كل واحد من التلاتة رح يحط 800 ليرة

هلأ إذا ردنا نقسم 2400 على 8 حطبات بيطلع للحطبة 300 ليرة.... مرسيل بتقبض 1500 عن خمس حطبات وبتدفع 800 المستحقة عليها.... بيبقالها 700

أيضاً شيري خانم بتقبض 900 عن 3 حطبات وبتدفع 800 المستحقة بيبقالها 100 ليرة...

شلون صح ولا لأ ؟

[noooneh]

ثانياً: الحداد أبو عبدو

امبارح مريت لعند أبو عبدو الحداد ومعي سلسلة تبع أمي منعلقها عالحيط .. هي عبارة عن زرد (كلمة عامية معناها حلقات حلقات فايتة ببعضها) فأخي الصغير عفّس تعفيسة إنو قطّع السلسلة تقطيع... وحتى يغطي على عملتو السودا راح مسك إش فيه حلقات مفتوحة وسكّرها..... هيك بكل عشوائية...

والنتيجة.... إنو عندي هلأ سلسلة مفككة.... خمس قطع وكل قطعة فيها 3 حلقات مسكرة.... يعني تلاتة وتلاتة وتلاتة وتلاتة وتلاتة

الحداد أبو عبدو قلّي بدّو ياخد على كل حلقة بيفتحها ويرجع يسكرها (ليرة واحدة).... ولما رجعت عالبيت حسبت قديش بدو وتاني يوم رجعت وأخدت السلسلة مركبة من أولها لآخرها.... وأبو عبدو أخد مني مبلغ أقل بكتير مما ممكن تتصوروه.... قلتلو يا أبو عبدو خود حقك وبلا مراعاة قلّي أنا أخدت حقي متل ما قلتلك....

أنا ما اقتنعت.... يعني هلأ هو كام حلقة ممكن يفتح ويسكر على الأقل حتى يرجع السلسلة؟.... معقول يقدر بأقل من أربعة مثلاً؟...

نائل