شرح برنامج اكسل شكل متقدم

[bki]

السلام عليكم ورحمة الله وبركاته..................

كيف الاخوة والاخوات والصبايا والشباب الغوالي والغاليات.
بالبداية بحب قلكن انو انا مو تبع منتديات, فلما بدي حمل شغلة من منتدى, بسجل فيه وحمل اللي بدي اياه وبظل طالع والسلام, يعني شغل مصلحة. لأنو ماتواخذوني بحس هالحكي كلو شغل مصخرة وضحك ع اللحى وتضيع وقت.

بس لما شفت هالمنتدى والله حبيتو من قلبي. وحسيت فيه جدية الشباب السوري الواعي, خفة دمو وقت المرح, و مصداقيتو وقت الجد. فكان لزماً علي أنو اعتذر من كل الموجودين هون بأنو كانت فكرتي غلط, ع الاقل بهاد المنتدى.

عموماً حبيت هون افتتح دورة متخصصة ببرنامج اكسل, والدورة ماراح تكون سطحية, لأ, راح نتعمق فيها وباستخدامات اكسل بشكل احترافي, لأنو انا هلا عم اشتغل بدولة خليجية وعلى برنامج محاسبي عالي ورغم هيك معظم وقتي عم قضيه بين خلايا اكسل, فالموضوع جدً جداً مهم وللجميع.

هلا اللي راح يصير أنو راح انطر كم يوم لحتى شوف التفاعل من الأخوة والاخوات وذلك بهدف تحديد نقطة الانطلاق بالشرح. يعني من وين بنبلش

ناطر ردودن و باسم الله بنبلش
دمتم ودام وطننا الغالي

[bki]

انا شايف انو الجميع ماشاء الله مكتفي من برنامج اكسل ومفول كمان


شي رواق والله

[HashtNasht]

خيو هون بدك تقول صاير في عند الشباب حساسية ...او خلينا نقول انو صار عندن هيك نوع من انعدام الثقة ..الله وكيلك !!

اللي صار يا معلم ...انو قبل حضرتك ما تجي ...و تحط موضوع متل هاد ...اجا كتير ناس ..ماني متذكر الاسماء بالضبط بس بعرفن انا ....اجو هيك و حطو موضوع بدك تقول متل هاد ..بعيد التشابيه يعني ...و فاتو الشباب و تفاعلو ...اللي كان عم يلعب بلي ستايشن تركا من ايدو, اللي كان عم ياكل معكرونة حط الصحن من ايدو , اللي كان عم يبوس صاحبتو ...كمان تركا من ايدو ...المهم كلن هيك حصرو تفكيرن و تركيزن بالتفاعل مع الموضوع ...و تفاعلوا لداخو يعني ....و بالاخر شو صار ...!!!

ما عاد بين الاخ ......الله وكيلك..هاد وش الضيف ...حط الموضوع ...خلا العالم تتفاعل لتبهدلت و راح !!!..و لا عاد سمعنا عنو شي يعني

الواحد بقول ....الغايب عذرو معو ..انا شخصيا هيك بقول .....اول مرة ..و تاني مرة ..و عاشر مرة .....خيو شي الف مرة صارت معنا هالقصة ..و هي المنتدى قدامك...نكوش المواضيع و شوف ..

اي العالم ما عاد عندا ثقة و العياذ بالله ..ما عاد يسترجو يتفاعلو ...بقلك يا اخي بكفي لعبة هالبلاي ستيشن اسلالي...او انو باكل صحن هالمعكرونة انفعلي ...او انو منكفي تبويس بهالصاحبة ...اشرفلي !!!

بقى يا ابو شريك ....انا بعرف تماما و متأكد...انك انت غير عن الشباب هدوليك.....هيك عندي احساس قوي...بس انا مهما حكيت ما رح اقدر خلي الشباب يتركو اللي بايدن هلأ ...صعبة ابو ..ولا صعبة .

بقى بدي منك انت ...تنزل هيك باللي معك...و تفرد هالبضاعة قدامنا .بحيث انو تخلي اللي ما بحياتو تفاعل يتفاعل هلأ ....بايدك الموضوع......الله وكيلك كلو بايدك....
انت بتذكر وقت قلنالك من اوووووووووووول يوم..انو الكرة بملعبك....و هلأ كمان الكرة بملعبك...بقى بدنا همتك...و الناس كلا ناطرة اكشن من عندك ...

بقى شو قلت !!!

حبيب قلبي

[bki]

والله مابعرف شو بدي رد. ياسيدي انا راح اعتبر انو هاد الموضوع متل ماوصت وراح اعتبر كلامك أخي hashtnashat انو كلام فصل.

باذن الله اليوم راح بلش بموضوع مدخل ريثما حضر كم درس تفصيلي لأنو بصراحة كنت ناطر شوف وين بلش بس الخيرة باللي اختارو الله.

وشكراً ع ثقتك أخي الكريم

[bki]

بنبتدي باسم الاله الكريم

بالاول يا شباب, بحب اعطي نصيح مهمة جداً لمستخدمي الكمبيوتر بعملن بشكل كبير. كالمحاسبين والاداريين والمهندسين مثلاً, كون احترافي باستخدام الكمبيوتر.

حلو لهون احترافي بس كيف.
لا تستتخدم الماوس قدر امكانك
طيب ليش؟؟ شوفة حال!!!!! أكيد لأ
أولاً بتعكس مدى احترافيتك بالعمل
ثانياً أسرع بالعمل
ثالثاً أدق بالعمل

والموضوع سهل حتى بالنسبة للي أول مرة بيقعد قدام الكمبيوتر.

الخطوات بسيطة جرب وجرب وجرب يعني اتمرن واتمرن واتمرن وراح تشوف الفرق.
انا راح اعتمد بشرحي قدر الامكان على هالنقطة وطبعاً ماينطبق على استخدام الكيبورد ينطبق وبنفس المواصفات على استخدام الماوس



خلونا هلا نحكي شوي عن استخدام الكيبورد ضمن اكسل


- الاسهم الاربعة بتتحكم بالاتجاه يمين ويسار وفوق وتحت.
- للتنقال السريع نستخد زري page up \ page down للانتقال صفحة كاملة. يعني انت ضمن رتل من البيانات مؤلف من 1000 خانة وعم دور ع رقم يدوياً فالافضل استخدام هدول الزرين لاختصار والوقت.
- هلا جربو هي معي. روح عالخلية A1 ( يعني الخلية من السطر الاول والعمود الاول ) واكتب اي شي. وبعدين ع الخلية F1 واكتب اي شي كمان. وبعدين ع الخلية F20 واكتب اي شي كمان. بعدها ع الخلية A20 واكتب اي شي كمان وهلا اذا كنا بالخلية A1 وحبيت روح عالخلية F1 وطبعاً بلا مانية الماوس بيكفي انو بتضغط الزر الايمن للي الاكسل عندن انكليزي أو الايسر للي الاكسل عندن عربي مع زر Ctrl فبيروح المؤشر ناطط لحالو لهنيك وبالمثل بالنسبة للإنتقال مابين اضلاع المربع اللي رسمناه هلا. هاد التمرين كثير مهم لأنو ضغط Ctrl مع أي زر من ازرار الاتجاه بيخلي اكسل بنط لأول خلية بعد فراغ كيف يعني بعد فراغ؟؟؟؟؟؟ روح ع السطر الاول واكتب باول خليتين بجنب بعض كلمة بكلمة أي شي مو مهم واترك فراغ افقي شغلة خليتين وبعيدن اكتب كلمة بالخلية اللي بعدن واترك كم فراغ وهكذا هلا حاول تستخدم الطريقة اللي حكينا عنها بتلاقي اكسل بيبلش عند اول خلية ضمن مجموعة خلايا متلاصقة النقرة اللي بعدها بيروح على أخر هي المجموعة, النقرة اللي بعهدا بينط فوق الفراغ اللي تركتو وبيوقف عند اول خلية مليانة من المجموعة الممتلئة والمتلاصقة وهكذا. هاد موضوع كثير كهم لانو اكثر شغلنا راح يكون بالاعتماد على متل هي الحركة.

رح وقف الشرح هون.باتمنى من الجميع تصويب طريقة شرحي لانو عم اعتمد على خبرتي. بقصد مافي قدامي منهاج عم انقل منو. وبنفس الوقت حين الخطأ بتمنى من الجميع تصويبي لأنو كل ابن ادم خطاء.

ودمتم.

[HashtNasht]

يا سلام ..... يا سيدي انا مبسوط لانك عم تشرح من خبرتك.....اصلا الشباب هون ما بحبو المناهج ولا الكتب ...لو بحبو المناهج ما كنت شفتن هون أصلاً ...بس معلمنا انو يعني مافي صور !!!
ما بهادا الدرس قصدي...قصدي بالدروس الجاي يعني هيك الصور بتعطي اكشن للموضوع ...و كمان يعني اذا في امثلة..منيحة الامثلة ......اي و هيك يعني

ناطرينك معلم ....مية وردة

[MadMax]

شي حلو ......
مع أنو مو كتير عندي اهتمام بالاكسل ....بس الاطلاع منيح
و متل ما قال حشت نشت ....... يعني لما بتدخل بالغميق ... يا ريت تحطلنا شوية صور توضيحية






و ثانكس الك

[bki]

كلامكن صح, لازم صور بس انا ماحطيتها لسببين الاول انو ماكنت محضر شي لسا باعتبار كنت ناطر لأعرف وين بدي بلش. وثاني سبب انو مافي شي محرز لحطلو صور باعتباري كنت عم اشرح كيف بتتحرك ضمن الصفحة, فمو محرزة حط صورة لصفحة اكسل فاضية بس مشان يكون بالموضوع صور. بس بكل الاحوال وباذن الله رح تكون الصور موجودة بالدروس اللي تتطلب صور.


وأنا جاهز عند الضرورة لأي استفسار انا وكل الشباب اللي بيعرفو ممكن افضل مني بالبرنامج فتوكلوا ع الله

[bki]

هههههههههههههههه
حزرو شو يا شباب؟؟؟؟ كنت عم جرب كيف ضيف صورة لشرحي فطلعت مابعرف, هههههههههههههههه

سبحان الذي يعلم كل شئ. عموماً هل أنا مضطر لارفع الصور ع اي موقع واضافة الرابط ضمن الموضوع ولا في طريقة ثانية


ارجو الرد ضروري جداً


ولا تواخذونا

[MadMax]

كاتب النص الأصلي : hussienbki

هههههههههههههههه
حزرو شو يا شباب؟؟؟؟ كنت عم جرب كيف ضيف صورة لشرحي فطلعت مابعرف, هههههههههههههههه

سبحان الذي يعلم كل شئ. عموماً هل أنا مضطر لارفع الصور ع اي موقع واضافة الرابط ضمن الموضوع ولا في طريقة ثانية


ارجو الرد ضروري جداً


ولا تواخذونا

حالياً في مشكلة بالمرفقات ....
يعني ارفعهون على شي موقع صور ... و حط الروابط هون

[bki]

Thanks madmax

[bki]

خلونا نكمل شوي بموضوع التحرك ضمن صفحة الاكسل لأنو غالبية الوقت بيروح بهيك موضوع.

كيف فينا نعلم ع خلية: الموضوع بسيط انقر بالفارة عليها أو حرك بالاسهم لتوصل لعندها وكيف فينا نعلم سطر كامل أو عمود كامل: كمان بسيطة, لتعلم سطر كامل وقف ع اي خلية ضمن السطر المطلوب وانقر (المسطرة) shift + space أما لتحديد عمود كامل فوقف فوق اي خلية من العمود المطلوب وانقر ctrl + space.

أو باستخدام الفارة طبعاً.
طيب كيف انحدد مجموعة خلايا متصلة: الامر بسيط استخدم shift مع الازرار طبعاً مع الضغط المتواصل يعني:

shift مع الزر اللي لتحت خمس مرات بيحدد خمس خلايا متجاورة باتجاه الاصفل

- - - مع الزر اللي ع اليسار بيحدد خمس خلايا متجاورة بس لليسار

طيب اذا بدنا نحدد مجموعة خلايا بس ع شكل مربع أو مستطيل يعني اكثر من سطر واكثر من عمود: بشرط انو تكون متواصلة أو بعبارة أخرة ماتجاورة. مثلاً بدنا نحدد خلايا ع شكل مستطيل بالشكل التالي

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

اذا بتعدو معي في عشر اعمدة و 15 سطر. تحديدن بسيط. حدد اول سطر كأنو سطر منفصل. وبعدين ظل ضاغط ع shift وانزل لتحت 15 سطر. أو بالعكس..

الموضوع بكرر بسيط بس بيطلب منك تدريب مو أكثر.

طيب في طريقة ثاني وحلوة. خلونا انبلش فيها.
اذا بتضغط ctrl + G بتطلعلك نافة اسمها الذهاب الى. بيكفي انو نحط الخلية أو المجال اللي بدنا اياه ثم موافق ليحددو اكسل
وهون بعض الامثلة للي ممكن تكتبو فيها. جربوهن وشوفوا الفرق بيناتن:

c13
k2:k23
b4:g17
m:m
5:5


لهون راح اكتفي اليوم لأنو الكم مو مهم قدام التمكن من القليل. بس بدي احكي بصراحة. انا لهلا مو مطمن أنو تعبي ماراح يروح سدى. بتمنى كون مخطئ وشوف انو الاهتمام بالموضوع عم يزيد. سلام للكل

[sandra]

حلو كتير .... أنا يشتغل عالاكسل وبيفوتني مدري بكم حيط أوقات
عندي كم استفسار بس رح أجلهم لحتى تخلص شرح البرنامج وشوف إذا الهم ضرورة
ناطرينك

[bki]

بالاول مرحبا وبالتاني سلامتك من الحيطان وبالتالت انا بفضل الاسئلة هلا لأنها اتوجهني بالشرح. لأنو متل مانك شايفة المداخلات معدومة وبالتالي رح يكون كثير صعب انو بلش بالشرح بشكل متقدم وتكون الاسئلة بأمور اساسية أو ما شابه. يعني ماراح يكون في ترابط.

[bki]

رغم انو ماشاء الله الاهتمام بهالموضوع واصل أشدوا رح نكفي الشرح ع بركة الله.

حكينا بالدرسين السابقين ع بعض أساليب التنقل ضمن خلايا برنامج اكسل.وشرحنا أهمية هاد الموضوع لتوصل للاحترافية باستخدام هالبرنامج المهم للجميع.

خلونا نحكي اليوم على شرح بعض الدوال البسيطة ضمن اكسل.
شو يعني دالة؟؟؟ يعني معادلة. ببساطة من خلالها بتحصل على نتيجة عملية حسابية على مجموعة أرقام.
ابسط شكل من أشكال الدوال هو انو تطلب من اكسل انو يجمعلك مجموعة اعداد مثلاً أو حاصل طرح بعض الارقام من رقم ما أو القسمة ...... وهي الدالة البسيطة انت بتكتبها متل المثال التالي

خلونا نكتب بالخلية A1 الرقم 25 وبالخلية B1 الرقم 15 وبالخلية C1 الرقم 3 كمثال.
بنروح ع الخلية F2 بأي طريقة بتحب. يعني بالقر المباشر على هالخلية أو باستخدام الفارة.... حسب مامر معنا بالدرسين الماضيين.
هلا فينا نكتب مجموعة غير محدودة من المعادلات وطبعاً هالشي بيتحدد حسب شو بدنا
خلونا نشوف بعض الامثلة.

=A1+C1

خلونا نلاحظ كم شغلة مهمين كثير.
1- دوماً بنبلش المعادلات باشارة المساواة = يعني اكسل بس شاف ببداية الخلية = بيعرف إنو هي معادلة. أما اذا كتبت كلشي ونسيت هالاشارة فبيظهر اللي كتبتو مثل ماكتبت يعني المعادلة السابقة رح تظهر A1+C1 اما لما بتبلشها بـ = فانو النتيجة رح تظهر وهي 28.
2- مافي فراغات مابين اي شي عم نكتبوا بالمعادلة.
يعني غلط نكتب =A1 + C1
3- فينا نكتب المعادلة السابقة باكثر من طريقة أبسطها نكتب = وبعدها ننقر ع الخلية الاولى أو ع الرقم الاول اللي بدك تستخدمو بعملية الجمع. بعدها بنكتب + وبعدها ننقر بافارة من جديد ع الرقم الثاني وهكذا....وبالتالي اكسل رح يظهرها بالطريقة اللي كتبتها الك (بالخلية اللي كتبت المعادلة فيها رح يعرضلك اكسل النتيجة بس اذا بطلع لأول سطر فوق الخلايا في متل المستطيل الفارغ الطويل ببدايتو في FX واسمو شريط الصيغة والهدف منو لما بتوقف فوق خلية فيها معادلة فيك تشوف المعادلة مكتوبة بشكل مباشر متل ما انا كاتب فوق
يعني بشريط الصيغة بتشوف صيغة المعادلة أما في الخلية فبتشوف نتيجة الخلية. أما شريط الخلية فاذا مو ظاهر عندك أو مانك متأكد انك بتعرفو فروح ع قائمة عرض واختار شريط الصيغة, كرر هالحركة كم مرة وحاول تميز شو عم تيفقد من الشاشة لما بتشيل اشارة الصح من هالخيار.

للدرس تتمة, بشوفكن بخير.

[YaSeR]

شرح حلو ..

يعطيك العافية ,, بانتظار البقية