اغرب موقف حصل معي في حياتي واعتقد ما حيتكرر مع اني بتمنى ...

**Hus** · 29/06/2004

تحية يا شباب
حصل معي اغرب قصة بحياتي من قيمة اربع ايام وكان يومها بدي اكتب القصة هون بس انشغلت ...

الموهم كان يومها عنا امتحان (طب مجتمع) مادة خفيفة هيك امتحان ابو ساعتين و رجعت على البيت وكنت يومها عازم الشباب على الغدى بشرياتون القاهرة

احم احم - مافي مناسبة بس هيك محبة من الله-

الموهم يعني انا رجعت من الامتحان وبدي اتحمم جهز حالي عشان يعدو الشباب وننزل يعني في وقت بالبيت تقريبا ساعة وبدي ارجع اطلع ..
اول ما وصلت غيرت تيابي بالاحرى انا قلعت تيابي عني لاني حقيقة وحدي بالبيت بعد ما سافر رامي (الي ساكن معي بالشقة) ... وانا من محبي الحرية بشكل مفعم .. دوم لما بكون لحالي بالبيت ما بلبس شي لا بالنهار ولا باليل ..
ما علينا يوميها قلعت كل تيابي ما عدى الداخلي .. ما بعرف شو خطرلي قيد نفسي يومها ورحت قعدت على الكمبيورتر شيك اميلات وشيك على الموقع والشباب ...

شوي حكى معي الشحوف (والي هوي كريم شحفة) .. اي وصوتو على قلبي شو بدي قلكون يعني
بقا صار لازم فوت الحمام .. ما بعرف كيف سائبت هوي سكرت حكي معو انحصرت ..

رحنا الحمام وانا كمان من عوايدي خبط الابواب محل بدخل وبطلع بقا بدي ادخل الحمام كان مفتوح الباب بس على الرغم من هال الشي خبطتو بالحيط ..
بهال الحظة حستو ما خبط مظبوط ولمحت رجل عم تنسحب ..

الحقيقة اجمدت بارضي لنص ثانية او اقل .. وفتحت الباب بقوة و وايدي قدامي منشان امسك الشخص الي وراء الباب
اي اول ما شفتو اقصر مني هيك قلبي اطمن متل ما اتقولو يعني فيني دقو قتلي ...
وفعلا مسكت بخوانيق شبيب متسول الشكل عمرو تقريبا 16-17 سنة ... كان لابس جاكيت رياضة مع انو هون شوب
كتير ..

بس الظاهر ما عندو غيرها .. هاي الجاكيت ساعدت كتير باني ضب على خوانيقو فيها ومسكتو ما عارف شو بدي اعمل فيه .. اول شي عملتو شلتو بايد وحدي الي ضابب على خوانيقو فيها .. وحطيتو بالبانيو .. (هوي نحيف كتير)
وقلت رح افتح عليه المي منشان يتلبك وانا بلحظاتهها عم عيط وصرخ فيه .. (ما سبيتو ) بس عياط يعني
وبعدين طلعتو من البانيو و انا هون هديت شوي .. بس ما بعرف حبيت اضربو كف ..
انا الحقيقة كتير بحب اضرب كفوف كنت اسألو اخي .. كان بزمانو اضربو كفوف كتير .. بس هلق صار بياكلني

الموهم وبعدين هوي فتحلي موضوع الشرطة الله يخلك ما تاخدني على الشرطة وانا فقير وابي قلعني من البيت وهال الحكي ..
قمت انا لما شفتو خايف من الشرطة صرت هددو فيها اكتر وكل ما يحكي كلمي قلو بدي اخدك على الشرطة وهيك ..
الموهم بعد ما هدينا دخلتو معي على غرفتي منشان ما يهرب ولبست بنطلون وكنزة قلت يعني ما حلوي لو اخدتو على الشرطة .. مو اكتر ..

بعدين هوي وعم يبكي صار بدو يبوس ايدي وقاعد يترجاني ما تاخدني على الشرطة وانا كنت نايم بالحدقيقة الي ورا وشفت الشباك مفتحو قمت نطيت لاني جوعان وبدي شي اكلو ..

الموهم عاد انا الحقيقة صدقتو .. وخلص كنت رايق وقتحا حطيتو بغرفة القعدة وجبتلو اكل ..
ورجعت قعدت على الكمبيوتر الي هوي باخر غرفة القعدة .. صاير يعني هوي قدامي عم ياك وانا على الكمبيوتر
خمس دقايق رحت شيك عليه لقيتو ما عم ياكل غير خبز حاف .. مع اني الله الوكيل طلعتلو كلشي عندي حطيتلو جبني وفتحتلو علبة طون وجبتلو كولا لك حتى ريكفورد حطيتلو .. وعسلات جاييني من سوريا طلب مخصوص ..
الموهم بس طلع ما بيحب الاجبان مدري ما بياكل جبنة .. ما بعرف شو قصتو ..
اخيرو ما اكل كتير يعني شي انو سد جوعتو برغيف حاف و شرب الكولايات ..

عاد ما عارف انا شو اعمل فيه .. اول شي قلت ما رح اخدو على الشرطة اكيد يعني خطي وهيك .. بس رح جيب الشباب يتفرجو عليه ومنو منتصور معو وهيك .. هههههههههههههههه موقع تاريخي الحقيقة وانا نادم جدا كيف ما اتصورت معو ..
الموهم بعد التقصي بالتحقيق معو طلع داخل على البيت قبل ما ادخل انا بتلات دقايق .. وملاقي حوالي جنيهين تلاتي بالارض وحوالي 10 ليرات سوري ..
الموهم ولما سمع صوت المفتاح بالباب هرب .. واتخبى تحت التخت بس مو بغرفتي بغرفة رامي .. لانو تختي انا كتير واطي ..
وبعدين لما انا قعدت على الكمبيوتر هوي شافني بقا مفتكر انو الغرفة الي هوي متخبي فيها هيي غرفتي قام هرب على الحمام يتخبى .. وبهال الحظات انا كنت داخل على الحمام ومسكتو..
وكان المصاري الي ملاقيهون بالبيت مخبيون تحت التخت منشان ياخدون معو لما يطلع ..
عاد هني كلون ما بيطلعو جنيهين تلاتي .. عطيتو ياهون قلتلو انتا حرامي وهدول عرق جبينك اتفضل ههههههههههه وعطيتو كنزة (ما لقيت غيرها من مقاسو) ..
وصرفتو ....
بس يعني شو بدي قلكون نص ساعة من السوسبينس ولاثارة ما بتتكرر بحياتي

وندمان ومتمني انو يرجع يدخل لانو في شغلات كتير كان لازم اعملها وما عملتها .. اولها انو اتصور معو .. والشباب اقترحو عليي كان اني خليه يجلي الجليات بالمطبخ ..(انا بيتي قايم قاعد ) .. كمان هاي ما خطرتلي ..
كتير شغلات كان فيني اعملها لك والله كان فيني سكنو عندي (على حكيو انو ما عندو بيت وبينام بالجنينة المجاورة)
كنت بسكنو عندي مقابل انو ينضف ويجلي و يرتب البيت ويجبلي غراض وهيك .. انا كتير لازمني حدى تحت ايدي هيك روح وتعى وجيب وخود ..
وخاصة بعد ما اكتشفت انو اللفاية -الشغالة ام محمد - كانت لما تجي اتنضف تسرق شغلات من البيت ورحلي كتير غراض انا ورامي ومصار كمان

الموهم يومها كنت كتير مبسوط وفعلا كنت محظوط جدا جدا جدا .. لانو ببساطة لو هوي ضل تحت التخت انا كنت خلال ربع ساعة رح اطلع من البيت وكان يومها ساحب مبلغ كبير من البنك منشان صرفون وارجع دخلون على البنك لانو سعر السوق اعلى يعني اخينا بالله هذا كان كيييييييييييييف ....

ما بعرف طولت عليكون اكيد بس صدقا يا شباب بتمنى تحصل معكون هال الموضوع هيك وتلقطو الحرامي لانو شغلة ما في احلى من هيك . .. قمة التسالييييييييييييي

باييييييي

Joe · 29/06/2004

wow
شو هل سوسبنس مان
أحلى شي مقطع لما قلت شفت رجل...

عن جد قصة رهيبة... بس خوفي انك هيك كمان شجعتو على السرقة... يعني قد ما كان... بيضل اسمو ولد حسب ما فهمت منك.. و باول عمرو...
بس منيحة شغلة الجلي و الله فكرة.. انا عندي كتير جلي هون... يا ريت شي حرامي.... بس ما يطلع أسود و قد الحيط

mhmary · 30/06/2004

والله حلوة هالقصة بس أنتبه مرة تاني ما يفوت عالبيت شي واحد صعيدي يدقك أتلي مرتبة

وبالنسبة ألي أنا ما تفرق معي أذا شي واحد فات لعندي علابيت ما رح يلقي شي يسرقو

بس أخ حسام يعني أنا فهمت القصة كلها بس ليش يعني كنت عم تشرحلنا أنو بتعد بالبيت من دون تياب حاسس أنو ما دخلا بالقصة

**Hus** · 30/06/2004

ههههههههههههههههه لاء اب عضل دخلها كتير ...
لانو بعد ما كنت داقق بخوانيقو وانا لما مسكتو بالحمام اكتشفت اني انا بدون تياب !!! يعني هوي اكيد من منظري لحالو كان عم يرجف ههههههههههههههه .. غير هيك كان ما فيني مثلا نادي الجيران او لو هرب الحقو بقا ضليت ماسكو ودخلتو معي على الفرفة بين ما لبست و بعدين حتى عفيت عنو ههههههههههههههههههه

mhmary · 30/06/2004

أههههههههههههه هلأ فهمت أذا هيك معك حق

architecturer · 01/07/2004

يعني حكيم كل القصة فهمتا

بس في شغلة حسرة بقلبي وبدي اعرفا

شو هادا الركفورد يلي حطيتلو يا

**Hus** · 01/07/2004

اقتباس:

شو هادا الركفورد يلي حطيتلو يا

نوع جبنة.. جبنة معفني مان (شي من شبه الشنكليش ) منستعيض عنها بسبب انحسار واضمحلال مصارد الشنكليش هون
بس هوي لما شاف العفن عليها ومعشعش هيك وهاي الخيطان تبع العفن طالعة بقا خاف هههههههههههه فكرني بدي سممو مثلا :P
هذا فوق ما عم دللو ..
هوي عاد لو قعدلو شي نص ساعة تانية كنت اكيد بصبلو شي كاس وسكي ههههههههههههههه انا ما بسدق لاقي واحد يسامرني

:P

NEDAL-S · 01/07/2004

ولا حلوة هلقصة بس ماكان في داعي تمسكو من خوانيقو
لانو يعطيك العافية من ضربة الباب بيكون صار بغير دنيا

julia · 02/07/2004

حلوة هالقصة والله.......وفعلاً كان حظك حلو
بس أنا من رأي جو يعني ممكن انت تكون شجعتو عالسرقة

RAMI007 · 02/07/2004

يا حكيم إزا بدك لفاية بدل أم محمد ترى أنا جاهز
ومنتفق على السعر بعدين

بس عن جد لازم تدير بالك لأنو مابتعرف مين بيقدر كمان يفوت لعندك متل ما قالوا الشباب
ومتل ما بيقول المتل لا تنام بين القبور ولا تشوف منامات وحشة
مش هيك
سلامتك على كل حال وتعيش وتاكل غيرا يا بطل

•• LEO •• · 30/06/2007

اممي · 30/06/2007

شي بيزعل انك بتحتاج لفاية لتنظف بيتك وهوه ابن البلد تبع ماعند ياكل وانت بدك تاخد صورة لسا معو....
صحيح هو حرامي بس هاد عم يسرق لان جوعان وماعندو مصاري بيطعمي عيلت في كتير ناس عنا وعندن بايكل الاخضر واليابس وماحدى ساءل عنن ...لاوكمان العالم بدا تتصور معن

ليندا · 30/06/2007

موقف حلو كتير وجد مابيتكرر بس ..........................
يلي لفت نظري بالموضوع انو في ردود كانت بتاريخ متل هاليوم 30 يونيو

abu-wdea3 · 30/06/2007

ههههههههههه....... حلو حلو لو انا مكانك كنت جننتو ..........

يمان Rooooonaldo · 30/06/2007

يا محمد عالنكش شو عم يصير هون

hanny dagher · 30/06/2007

اقتباس:

كاتب النص الأصلي : ليندا

موقف حلو كتير وجد مابيتكرر بس ..........................
يلي لفت نظري بالموضوع انو في ردود كانت بتاريخ متل هاليوم 30 يونيو

اي مزبوط تلاتين يونيو سنة ال 2004
يعني تلت سنين
لك تلت سنين شو فيقكن عالموضوع بدي اعرف

The morning · 30/06/2007

اقتباس:

كاتب النص الأصلي : hanny dagher

اي مزبوط تلاتين يونيو سنة ال 2004
يعني تلت سنين
لك تلت سنين شو فيقكن عالموضوع بدي اعرف

..
لــك انـت لاحــظت مــتل مــا انــا لاحــظت
انــو فــي مــين عــم يــنكوش مــواضــيع الــحكــيم

Spector · 30/06/2007

شكرا عالكولا والطون حسام
بس ما حبيت الجبنات
واسف عال 2 جنيه