أخوية  

أخوية سوريا: تجمع شبابي سوري (ثقافي، فكري، اجتماعي) بإطار حراك مجتمع مدني - ينشط في دعم الحرية المدنية، التعددية الديمقراطية، والتوعية بما نسميه الحد الأدنى من المسؤولية العامة. نحو عقد اجتماعي صحي سليم، به من الأكسجن ما يكف لجميع المواطنين والقاطنين.
أخذ مكانه في 2003 و توقف قسراً نهاية 2009 - النسخة الحالية هنا هي ارشيفية للتصفح فقط
ردني  لورا   أخوية > منتديات عامة > الصـــــــــــالون

إضافة موضوع جديد  و الله هالموضوع مقفول ترى
 
أدوات الموضوع
قديم 13/06/2008   #1
شب و شيخ الشباب yass
مشرف متقاعد
 
الصورة الرمزية لـ yass
yass is offline
 
نورنا ب:
Jul 2004
المطرح:
الآن... هنا
مشاركات:
9,461

افتراضي ميثاق أخوية من أجل جودة المنتدى (( الرجاء الاطلاع للأهمية))


ميثاق أخوية من أجل جودة المنتدى




أعزائنا أعضاء المنتدى الكرام..



نطرح عليكم في هذا الموضوع وثيقة جودة تشمل النقاط التي تم الاتفاق على أنها تشكّل أبرز مسببات مشاكل المنتدى بشكل عام. و قد تم طرح بعضها من قبل بعض الأعضاء في المواضيع و المراسلات مع الاداريين.


هذه النقاط سيتم العناية بها و مراقبتها باصرار اعتبارا من تاريخ ادراج هذا الموضوع, و لأجل انجاح العمل الاداري من الضروري جدا التعاون بين الأعضاء ككل و الكادر الاداري و الاشرافي بغية السير بوتيرة عمل جيدة تضمن الارتقاء بالمنتدى على جميع الأصعدة.



النقاط الأساسية هي التالية:

1) الحوارات الجانبية و الخروج عن الموضوع:

مانو شي حلو و الله انو بنص الموضوع تلاقي واحد يسلّم عالتاني و التالت بيسأل الرابع ليش ما عم يبيّن عالمسنجر و ما الى هنالك.. يندرج تحت هذا النطاق التشكرات و السلامات و التحيات الطالعة و النازلة.. في وسائل اتصال من مسنجر و سكايبي و خلافو.. و في عندك موضوع لطق الحنك بالسقيفة.. فما في داعي تنقلب المواضيع الى تشات (هالنقطة جدا راح نتشد تجاهها).

كمان يندرج ضمن هالنقطة انو ما ضروري كل ما واحد حط موضوع لازم يتشكر كل اللي شاركو فيه.. بيهمنا كتير التقليل من التشكرات و السلامات و التحيات و الشوباشات.

2) رفع "نكش" المواضيع غير المبرر:

يا عيوني نعرف انو في مواضيع حلوة كتير و عليها القيمة و شو ما بدك كمان... بس انو اذا ما عندك شي مهم كتير لتضيفو, أو شي رد متعوب عليه ممكن تعملو و ما حكيت مع اداري القسم ان كان مشرف أو منسق لا ترفعو يرضالي عليك...اذا الرفع ما الو غاية محددة و واضحة و بالاتفاق مع المشرف أو المنسق لا ترفعو لأنو رسمالها انو الموضوع يرجع مغلق ع محلو و تتنوّه او تتخالف..


3) تنسيق المواضيع و الردود و صياغتها و تقديمها بما يلائم النمط العام و يلائم خصوصيات الأقسام:

المنتدى عنا بينسمح فيه اللهجة العامية, و فيك تحكي بعفوية و برفع كلفة.. بس يعني ما نقلبها مياعة يا جماعة.. مثلا في أقسام جدية الها خصوصيات الواحد لازم يحافظ على حد أدنى من الجدية (ماني قاييلك تصير البجيرمي و انت بتكتب.. بس انو شوية جدية فقط) .. و بالتقديم و تزويق ردك.. يعني مو معقول بقسم السياسة بلاقي رد بين الحرف و الحرف سمايلي عم ينط و سمايلي أبو قلوب .. انو أوكي فيك تكتب بشكل مرفوع الكلفة و حتى ظريف بس تضل محافظ على حدا ما من الجدية مطلوب جدا بأقسام مثل الصالون و أقسام الأدب و المجتمع.. عندك السقيفة تاخد راحتك فيها أكتر بس مو بالأقسام التانية يرضالي عليك.

4) الاحترام المتبادل ما بين الأعضاء و بين الأعضاء و الاداريين:

بأخوية ما ندقق شو فكرك بقد ما ندقق على طريقة طرحك لهذا الفكر أولا.. و احترامك لزملائك ثانيا.. و ضمن زملائك يندرجون الاداريين اللي هنن بالنهاية أعضاء متلك.. لما الاداري يعمل شي تجاه شي انت كاتبو لا عم يسبك بأبوك و لا قاتللك حدا و لا عم يشفط بسيارتو بحارتك... هاي شغلتو.. و صدقني أريحلو لو ما مضطر يعملها... يوفر ع حالو.. لذلك يا ريت نحافظ على الاحترام بين بعضنا.. ما حدا جابر الناس تحب و تعشق بعضها.. لكن الاحترام مطلوب جدا

نحنا منحاول و منسعد لما ننجح انو يكون الك بأخوية مكان تحكي فيه و تعبّر فيه عن نفسك, لكن على اعتبار ذات هالمحاولة منحاولها مع كل الأعضاء فلذلك أرجو انو ما تفكر انو فينا, أو حتى بدنا, نعمللك أخوية على مراقك أو بما يلائمك

5) تعديل الردود و المواضيع بعد إدراجها:

يستطيع العضو تعديل ردّه أو موضوعه لمدّة عشر دقائق بعد نشره و لمرّات عديدة, بعدها لا يملك العضو صلاحية التعديل و لن يتم تعديل المشاركة إشرافياً إلا لحالات طارئة جداً يراها المشرف, الذي يتم التواصل معه عبر إرسال تقرير مشاركة عاطلة ( رمز المشاركة العاطلة). و في هذه الحالة ليس المشرف مجبراً على شرح سبب تصرّفه من عدمه, لسبب وقتي بحت, فلو قرر عدد كبير من الأعضاء بنفس الوقت تعديل مشاركاتهم القديمة لما استطاع الاشراف التصدّي لهذه المعضلة.

لهذا السبب, و لتجنّب إشكالات و خلافات مستقبلية, يرجى من الاخوة الأعضاء التأكد من مضمون مشاركاتهم و ملائمتها لما يرغبون به قبل إرسالها.

هامش: بخصوص تقرير المشاركة العاطلة: تقرير المشاركة العاطلة هو وسيلة التواصل الأسرع و الأمثل بين العضو و المشرف, و لا داع لإعادة إرسالها بعد المرّة الأولى, فلو لم يتم اتخاذ إجراء فذلك يعود إلى تقدير المشرف المسؤول بعدم الحاجة للتدخّل الإشرافي, مع تفهّم مسبق لإمكانية عدم الإتفاق مع أي عضو بخصوص الإجراء أو عدمه, لكننا كما أسلفنا لا نستطيع أن نتكيّف مع رأي جميع الأعضاء.




هاي النقاط تشكل دعامة أساسية لما نريد تطبيقه, و هذا التطبيق مستحيل دون تعاون الأعضاء اذ أن يدا واحدة لا تصفق (أحيانا تصفّر بس مو دايما) لذلك نطلب من جميع الأعضاء التعاون من أجل تطبيق هالنقاط و المساعدة لخير المنتدى


كيف يمكنني أن اساعد على تحسين المنتدى و تطويره؟
  • ضوابط الأقسام انوضعت مشان يتم الاطلاع عليها و التقيّد بها... لذلك ضروري الواحد يكون مطّلع على ضوابط الأقسام اللي حابب يشارك يها.
  • اذا صار و حصل و عندي استفسار أو استفهام او شيء ما, بحطو بالبريد أو ابعت تقرير مشاركة عاطلة يحتوي على مضمون الاستفسار. ما احطو بنص الموضوع.. ما حلوة لا للموضوع و لا لحدا انو بنص الموضوع تشوف انو انقطع سياق هالموضوع لأنو فلان خطر ع بالو يسأل شي..
  • اذا شفت موضوع مخالف.. بدل الرد فيه بشكل يخليه طالع بأعلى الصفحة.. أبعت تقرير مشاركة عاطلة, أو عالقليلة لا ترد داخل هالموضوع و هذا أضعف الايمان... لما بترد ع موضوع مخالف حتى لو بردك عم تلوم و تبهدل اللي مخالف (بحسن نية من قبلك يعني) عم تساهم بانو الموضوع يظل مرفوع و بأعلى القسم.. فالأفضل انك تبعت تقرير أو على الأقل ما ترد بهالموضوع
  • في شي بيقول "كونو المثل"... الجديد ما راح يلتزم بجو أخوية اذا الأقدم منو مو ملتزم... فخليك قدوة بتصرفك كعضو و بمحافظتك على سوية المنتدى, و تذكّر انو تميزك كعضو ليس بمهاتراتك و مشاجراتك انما بمشاركاتك القيّمة.
  • المنتدى الجيد ليس المنتدى الذي لا يوجد فيه مواضيع لا تعجبك. و بأخوية لدينا التزام كبير بمحاولة الحفاظ على حرية الرأي و التعبير قدر المستطاع و لذلك يجب أن تعتني كعضو بأنك قد تصادف مواضيع لا تعجبك أو لا تناسب فكرك و معتقداتك... لكن هذا لا يعطيك الحق بأن تفتعل مشكلة في سبيل حذف هذا الموضوع.. و كن على ثقة بأن أهمية و قراءات و شهرة موضوع تتناسب طردا مع مقدار المشكلات و المهاترات التي تحصل فيه.. و انك بافتعال مشكلة في موضوع لا يعجبك تساهم على الأغلب بتكبيره و نشره... لذلك الرجاء ثم الرجاء في حال لم ينل موضوع ما اعجابك لا تقرأه.. و تذكر أنه لديك خاصيات تمكّنك من عدم رؤية مواضيع و ردود شخص معيّن اذا كانت آراؤه لا تعجبك.. سيتم التعامل بحزم أكبر من الآن و صاعدا مع أي نوع من أنواع الارهاب الفكري..
  • بقصد تنشيط الأقسام تقام أنشطة متعددة بين الحين و الحين من مسابقات و استبيانات متعددة... و المشاركة بها تعطي دفعا جيدا للقسم عدا عن الفائدة العامة في هذا المجال.

شكرا للجميع على الاطلاع و معا نرتقي في ربوع منتدى أخوية-سوريا


هذا الموضوع متجدد حسب مقتضيات العمل و سيتم نشر المستجدات ضمنه





أبو مـــــــــ1984ـــــــارال
خبز,, سلم,, حرّية

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 


آخر تعديل yass يوم 18/06/2009 في 23:56.
 
قديم 19/06/2009   #2
شب و شيخ الشباب yass
مشرف متقاعد
 
الصورة الرمزية لـ yass
yass is offline
 
نورنا ب:
Jul 2004
المطرح:
الآن... هنا
مشاركات:
9,461

افتراضي






تم التحديث بتاريخ 18 حزيران (يونيو) 2009




 
إضافة موضوع جديد  و الله هالموضوع مقفول ترى


أدوات الموضوع

ضوابط المشاركة
لافيك تكتب موضوع جديد
لافيك تكتب مشاركات
لافيك تضيف مرفقات
لا فيك تعدل مشاركاتك

وسوم vB : حرك
شيفرة [IMG] : حرك
شيفرة HTML : بليد
طير و علّي


الساعة بإيدك هلق يا سيدي 21:20 (بحسب عمك غرينتش الكبير +3)


Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
Page generated in 0.06623 seconds with 12 queries