عروبة، اسلام، و تاريخ يعيد نفسه

**krimbow** · 27/02/2006

النعيق
(تحشيشية، فاشلة، تصدر غالبا بعد هزة بدن)

العدد 1

إبان الحرب العالمية الاولى، و بعد صراع طويل بين رواد النهضة العربية مع الحكم الاستبدادي التركي، انسلخ الشريف حسين (احد اقطاب المسلمين) عن عباية الخلافة الاسلامية يللي سطا عليها بنو عثمان بحجة (لا فرق بين عربي و اعجمي) و مدري كيف نسونا شغلة التقوى
وقتها تعاون شريف مكة مع الانكليز (الكفار) ضد ابناء جلدته المؤمنين و تحررت البلدان "العربية" من الحكم العثماني

(نقطة نظام... وقتها انعقد مجلس بلدية بيروت و كان موضوع جلسة الاعمال هوي مين احسنلنا انو يستعمرنا، فرنسا و اللا انكلترا ؟؟ مدري ليش حاسس انو التاريخ عم يعيد نفسو بدقة قل نظيرها)

و استمر النهج العروبي و تتوج بشغلتين
1- تأسيس حزب البعث العربي الاشتراكي بدمشق، بعد 3 تيام من الجدالات و المناقشات حامية الوطيس بمقهى بريمو ... بين ميشيل عفلق (او محمد عفلق كما يحلو للمسيحيين تسميته بعد القاؤو محاضرة تملقية مسح فيها جوخ للمسلمين لشبع) و صلاح بيطار ... و مدري كيف تم دحش اسم زكي الارسوزي بالدق

2- نجاح ثورة الضباط الاحرار بمصر و وصول الرئيس جمال عبد الناصر إلى سدة الحكم كتعبير واضح عن الطموح العربي

و كان من افرازات هالشي قيام وحدة خربت بيت السوريين بشكل رسمي، و ما منو مفر، و كأنو 400 سنة من الاحتلال العثماني (المسلم) ما كان كافي

لكن مع الاسف (مدري لازم قول نحمده و نشكره) تورط هالمشروع بعدة "منعطفات" فاشلة
من نكبة إلى نكسة إلى فكشة مرورا بكم نكشة

طيب و هالـ 200 مليون حمار عربي اصيل يللي ما بيميزهم عن الحمير شي بهالدنيا غير "الحلم العربي" شو بيساووا بحالهم ؟؟؟ بينتحروا ؟؟؟

فشر !!!
في مشروع جاهز

الاسلام يا سادة هوي الحل
بس مو حايلله اسلام
لا

لازم يكون اسلام ما حصلش (شو نسيتوا انو العثمانيين كانوا مسلمين و نحنا تخلينا عنهم؟؟)

لازم يكون اسلام الشيخ اسامة و الشيخ ابو مصعب و الشيخ ابو حفص
من ميزات هالاسلام انو لاغي كلمة فشل من عقول اتباعو ... فهم بإذن الله لا يفشلون
احتلال افغانستان؟
إنه لم يثنينا عن غزوات اخرى في لوس انجليس هذه المرة
احتلال فلسطين؟
ليست مشكلتنا، انها مشكلة العروبيين، و لكن معلش سنحررها بإذن الله انطلاقا من مدريد الاندلسية (خليها تبين معكم يا عروبيين يا بجم)
احتلال العراق؟
الحمقى العلوج، لقد ريحونا و جاؤوا "لينتحروا" على اسوارنا و وفروا علينا عناء الطريق و تكاليف تيكيتات الطيارات
تفجيرات عمان، و الرباط، و الرياض، و .... ؟ اليسوا مسلمين
يا أخي الله اراد لهم الشهادة ... عندك اعتراض ؟؟؟
طيب و تشويه صورة الرسول؟
إنها بشائر النصر بإذن الله (كيف لا تسألوني)

و وينك يا كريمبو حاج تلفقلنا تهم فمهما حاولت نحن منتصرين
لك و الـ 70 مليون امي ؟؟ و لماذا لم تر الـ 130 مليون بيعرفوا يفكوا الخط ؟؟ شفت انك انبطاحي زئبقي و فوق هيك كافر ؟؟

حدا متوقع انو هالمرة التاريخ ما رح يكرر نفسو ؟؟؟

و العقل عند هيك جماعة ... طينة

عقل بالكف: (زاوية مستقلة لا تعبر بالضرورة عن رأي كاتبها)

هل من المعقل انو شعوب شيدت الاهرام و علقت الحدائق، و رفعت اعمدة معبد بعلبك ... لم تعد قادرة سوى على جبل التبولة ؟؟
ليش هون بطل التاريخ يكرر نفسو ؟؟

صرلي زمان ما رحت على ساحة الامويين ... خلص النفق و اللا لسا ؟؟؟

و العقل زينة

Willi · 27/02/2006

طيرتلي عقلي
قال العقل زينة قال

ليش ضل عنا عقل

me2 · 27/02/2006

طيرلتي ما تبقى من عقلي .. هلق أنت عم تكتب بسرعة و عصبيةو لا أنا عم أقرأ بسرعة و عصبية ؟؟ ولا الموضوع سريع و عصبي ؟؟ ولا التلاتة سوا ..

ما علينا :

أسمحلي عارضك بكذا نقطة أو بالحقيقة نقطتين : الاولى أسمها حزب الله و التانية أسمها حماس .

برأيي المؤقت : أنو هدول التنين "من بين المسلمين" فقط عم يقرأو الانسانية من وجهة نظر غير متدينة "متطرفة" ..

طبعا حزب الله بدرجة أعلا من حماس ... أنا ألي شخصيا مآخذ على أداء حماس "الحهادي" و بعض هي المآخذ أعتذرت الحركة لاحقا عنها.

بالنهاية يا صديقي الأسلام و المسلمين واقع راهن و يجب التعامل معه ..

بالتالي لابد من أعطاء فرصة للجناح الجهادي المعتدل "ان صح التعبير" و المتمثل بالجوز الأنف الذكر .

ومحاولة تعديل أسلوبهو و فهمهم للأنسانية و الوطن. على الأقل أتباعهم ألهم مرجعية قوية و موحدة .. مو مشرشحة و مو عرفانة ربها وين حاططها .

موضوعك لازم يتعلق بكل ساحات الوطن ولازم يكون الحكي مفهوم لكل السوريين الشرفاء .

me2 · 27/02/2006

ياريت لو بس حدا بيقرا :

لقد كنت قبل اليوم أنكر صاحبي.... إذا لم يكن ديني إلى دينه دان

لقد صـار قلبي قابلاً كلَّ صورة.... فمرعى لغزلان وديـر لرهبان

وبيت لأوثـان وكـعبة طائـف .... وألواح تـوراة ومصحف قرآن

أدين بديـن الحب أنَّى توجَّهتْ .... ركائبُه، فالحب ديـني وإيمـاني

ابن عربي

**krimbow** · 27/02/2006

على راسي الشبيبة

و بعتزر ع وجع الدماغ يللي سببتو
مع انو كان قصدي انو نضرب بورية حشيش مو اكتر

و فعلا هالابيات من اروع ما قرأت مشكور مينيمي ع خيارك الرائع

خيو بخصوص حماس و حزب الله ... مانهم معنيين ابدا بموضوعي

في شي اسمو القاعدة ... هدول متل الفيفا تبع الفوتبول، ما في فريق واضح باسمهم، بس هنن يللي بيحطوا القواعد و الاطر تبع لعبة الارهاب متل ما الفيفا بتحط قواعد و اطر لعبة الفوتبول

و في فرق بتمشي على قواعدهم و بتنضوي تحت رايتهم

بتحشيشتي السابقة عنيت هدول الفرق تحديدا

me2 · 27/02/2006

اقتباس:

كاتب النص الأصلي : krimbow

على راسي الشبيبة

و بعتزر ع وجع الدماغ يللي سببتو
مع انو كان قصدي انو نضرب بورية حشيش مو اكتر

و فعلا هالابيات من اروع ما قرأت مشكور مينيمي ع خيارك الرائع

خيو بخصوص حماس و حزب الله ... مانهم معنيين ابدا بموضوعي

في شي اسمو القاعدة ... هدول متل الفيفا تبع الفوتبول، ما في فريق واضح باسمهم، بس هنن يللي بيحطوا القواعد و الاطر تبع لعبة الارهاب متل ما الفيفا بتحط قواعد و اطر لعبة الفوتبول

و في فرق بتمشي على قواعدهم و بتنضوي تحت رايتهم

بتحشيشتي السابقة عنيت هدول الفرق تحديدا

تسلم حبيب .. صار بدها بورية ....

ديري يحب الشام · 28/02/2006

بس اريد افهم شكون الموضوع

يحرق حريشكن صار مخلص بوريتين ولسه ما دار الحكي براسي

يعني بدها بورية النوب

me2 · 28/02/2006

اقتباس:

كاتب النص الأصلي : ديري يحب الشام

بس اريد افهم شكون الموضوع

يحرق حريشكن صار مخلص بوريتين ولسه ما دار الحكي براسي

يعني بدها بورية النوب

أخي مابدها كتير , شغلتك هينة ,, رح أعطيك الخلاصة و الحل بخطوطين:

أولا : بدك تنسى أنك ديري و تتعامل مع نفسك أنك مواطن عادي و تنسى أنك سلخت الأكراد قتلة السنة الماضية بالملعب .

تانيا : بدك تسلخ بورية بعد القراءة مو قبل .

لا تاخد الموضوع شخصي .. هي متل تغيير جو ... الديرية أكدع ناس و عندي أصدقاء ديريين .. كل واحد منو بيسوى مية صديق عادي {عادي يعني مو ديري }

مية وردة

ديري يحب الشام · 28/02/2006

ياسيدي جربنا كل الوصفات قبل القراءة وبعد القراءة وقبل الطعام وبعد الطعام على فكرة الطعام وجبة واحدة شيش آخر الليل وباقي اليوم دخان وقهوة وشاي ومتة وقهوة وشاي ومتة وشاي و..مامشي الحال
بعدين ليش خيو تريد أنسى إنو أنا ديري ....؟؟؟!!!ماعندي استعداد أنسى انو أنا ديري من حمص لو تطبق الدنيا

والشغلة المهمة أمور المشجعين خلوها بعيد عن حساباتكم السياسية طول عمرها يازبيبة ....

يعني جمهور الوثبة يخانق جمهور الكرامة وجمهور الفتوة يخانق جمهور الجهاد وهكذا دواليك شو دخل السياسة بالنص ؟؟؟

ولمعلوماتك ياخيي الحبيب عندنا في الدير لحتى توصل للشام مافي يوم من الأيام حكى واحدعنو هذا كردي وهذا عربي هالأمور لانعرفها والأكراد من ضمن عشايرنا وعائلاتنا ومصاهريننا ومصاهرينن وما سمعنا بهالحكي إلا بعد سقوط بغداد

yass · 01/03/2006

اقتباس:

ولمعلوماتك ياخيي الحبيب عندنا في الدير لحتى توصل للشام مافي يوم من الأيام حكى واحدعنو هذا كردي وهذا عربي هالأمور لانعرفها والأكراد من ضمن عشايرنا وعائلاتنا ومصاهريننا ومصاهرينن وما سمعنا بهالحكي إلا بعد سقوط بغداد

تعيش عمر النسر يا معلم ...و أحلى دير الزور و الله .و أطيب ثرود بامية لعيونك

Spaik · 03/03/2006

ادلب ادلب ادلب ادلب ادلب ادلب ادلب

rawad · 21/03/2006

بكره الشكر والمواقف الكلاسيكية
بس ما فيني مر على هيك سطور من دون ما هني الوطن بشباب بفكروا بهيك طريقة بزمن الموحدات الصغرى التافهة كالدينية والطائفية والتعصب.

**abosleman** · 22/04/2007

شكلي رح ارجع عالدخان

هاد مو تعليق .....

برجع بكتب شي مناسب

بس خلص سهرتي مع الموضوع والماضي

oliver68 · 24/04/2007

اقتباس:

كاتب النص الأصلي : krimbow

تفجيرات عمان، و الرباط، و الرياض، و .... ؟ اليسوا مسلمين
يا أخي الله اراد لهم الشهادة ... عندك اعتراض ؟؟؟

يا حبيبي شو متفائل. لك يا ريت بيعتبروهن شهداء، هدول بيعتبروهن مرتدين و دمهم مستباح و قتلهم فيه ثواب!!!!!!!!!!!!!!!!!!!!!

فلسطينية الشتات · 09/05/2007

يعني يا كريمبو بس بدي افهم شو هي الفكرة الي بدك اياها في الموضوع، انت طرحت اكثر من فكرة، بدءاً بالبعث وميشيل عفلق "على فكرة ميشيل عفلق اسلم فعلا مش انه كان يمسح جوخ للمسلمين" ومستعدة اجيبلك دليل على اسلامه. وهاي ما هي مشكلتنا

بعدين بالنسبة للشريف حسين والثورة العربية الكبرى، انا معك انه الدولة العثمانية كانوا مسلمين لكن بالإسم فقط لا غير، ومشروع الثورة العربية الكبرى وإن كانت نتائجه أدت إلى دخول احتلال اجنبي جديد بدل الدولة العثمانية، فإنها كمشروع نهضوي كانت في مكانها وفي وقتها، ولكن قيادتها هي التي كانت فاشلة ومن كان خلفها هو الذي وأد الفكرة الاصلية من قيام الثورة، ليأتي باحتلال غربي.

أما عن أن التاريخ يعيد نفسه، فنعم هو يعيد نفسه ونحن كعرب لا نريد أن نتعلم من ماضينا، وأنا هنا أخرج العرب من نطاق المذاهب والأديان والطوائف لينخرطوا في بوتقة العروبة وحدها دون أي شيء آخر.

أما عن الإسلاميين، فلا تعتقد أن القاعدة مثلاً تمثل الإسلام والمسلمين في هذا الزمن، فهم يغالون في العقيدة التي يتبعونها ويدعون أنها عقيدة الإسلام الصحيحة، وهي في أغلبها بعيدة كل البعد عن روح الدين الإسلامي الحقيقية.

أما بالنسبة لمن قال عن حزب الله وعن حماس، فهناك الكثير من النقاط والمآخذ نأخذها على الطرفين أيضاً ولا نستطيع الجزم أنهم الأقرب لروح الدين الحقة .

في النهاية إن كنا نسعى لخلق نوع من القطبية الجديدة في المنطقة فإن القومية وحدها هي الحل ولا حل آخر غيرها، القومية العربية فقط.

Ms. J.A · 09/05/2007

اخخخخخخخخخخ شو بيرفعولي ضغطي هدول العالم
أخ شو بيسببولي احباط وقعود عن العمل
دقن الواحد فيهم 3 متر
ومن شكلو مبين انو الي قرن الا شوي مش شايف المي "بيشرب وهو مغمض "...
الاسلام مش هو الحل
ولا هو اللي بدو يجيب للأمة النصر
اللي بيجيب للأمة النصر انو يخي نصير بشر
متعلمين ومثقفين
وبنعرف انو للجريدة وظيفة غير لف ساندويشات الفلافل !
ونعرف انو في اختراع اسمو ديمقراطية وفي اشي بالدنيا اسمو حرية رأي وتعبير
وفي اشي تاني بالدنيا اسمو انو انا مش أحسن منك لأن ديني أحسن من دينك !
شبيحة ابو مصعب والزرقاوي بيمثلو السلفيين المتعصبين العميان الاغبيا اللي ولا واحد فيهم قادر يشوف 3 سم قدامو !
ما جابولنا الا الخراب والدمار والويلات ....
حلو الموضوع
احترامي

الهوى سلطان · 09/05/2007

اقتباس:

كاتب النص الأصلي : الفلسطينية

وبنعرف انو للجريدة وظيفة غير لف ساندويشات الفلافل !

وما تنسي الترمس والبليلا والبوشار هي من وظائف الجريدة
وماتنسي انها حلت مكان المشمع تبع الاكل ولمسح الزجاج وتلميع الصرامي والبلاط

فلسطينية الشتات · 10/05/2007

اقتباس:

كاتب النص الأصلي : الفلسطينية

اخخخخخخخخخخ شو بيرفعولي ضغطي هدول العالم
أخ شو بيسببولي احباط وقعود عن العمل
دقن الواحد فيهم 3 متر
ومن شكلو مبين انو الي قرن الا شوي مش شايف المي "بيشرب وهو مغمض "...
الاسلام مش هو الحل
ولا هو اللي بدو يجيب للأمة النصر
اللي بيجيب للأمة النصر انو يخي نصير بشر
متعلمين ومثقفين
وبنعرف انو للجريدة وظيفة غير لف ساندويشات الفلافل !
ونعرف انو في اختراع اسمو ديمقراطية وفي اشي بالدنيا اسمو حرية رأي وتعبير
وفي اشي تاني بالدنيا اسمو انو انا مش أحسن منك لأن ديني أحسن من دينك !
شبيحة ابو مصعب والزرقاوي بيمثلو السلفيين المتعصبين العميان الاغبيا اللي ولا واحد فيهم قادر يشوف 3 سم قدامو !
ما جابولنا الا الخراب والدمار والويلات ....
حلو الموضوع
احترامي

مين حكى انه الاسلام لحاله هو الحل ؟؟؟؟

بعدين يعني لو سمحتي ابو مصعب الزرقاوي رغم كل شيء هو واحد من قادة المقاومة، وما بصير تحكي عنه الكلام الي حكيتيه ، وما تفهمي من كلامي اني من انصار القاعدة، لأني مش هيك

لكن انك تطعني برجل كان اله اثر كبير بصد الامريكان وعمل فيهم اشياء كثير فهذا ما بصير، اما الحرب والدمار الي بتحكي عنهم، فالحرب في العراق اصلا قائمة من قبل ما يوصلها الزرقاوي بالتالي كلامك مردود عليكي ويا ريت ترجعي تقرأي الاحداث من جديد حتى ما تغلطي هيك غلط مرة ثانية.

واذا كنتي بدك تعممي انه المقاومة الي قادها الزرقاوي أدت للدمار في العراق، فمعنى كلامك بينطبق كمان على حسن نصر الله في لبنان، واذا كان موقفك من المقاومة اللبنانية مختلف فانتي هيك بنفسك بتشككي بكلامك