حزب البعث يستعد لإعادة مبانٍ حكومية استولى عليها في الماضي

yass · 07/04/2005

الاستعدادات تجري على قدم وساق لإفراغ مبنى القيادة القطرية لحزب البعث في منطقة أبو رمانة بدمشق، وإعادته إلى وزارة التربية، إذ كان قبل ذلك معهداً لإعداد المعلمين، في وقت أعلنت فيه القيادة عن تحديد موعد مؤتمرها القطري في أواخر شهر أيار/ مايو 2005، على أن يسبقه مؤتمر قومي "أخير" مطلع الشهر نفسه.

وأكدت مصادر مطلعة أن فروع أجهزة المخابرات السورية المنتشرة بين الأحياء السكنية في العاصمة دمشق سيتم ترحيلها إلى خارج المدينة أو إلى الإدارات تحسباً لأي طارئ.

وقالت المصادر إن إخلاء مبنى القيادة القطرية لحزب البعث سيبدأ في فترة قريبة نظراً لضخامة المكاتب التي يفترض أنها لن تكون بهذا الحجم في الفترة القادمة، إضافة إلى استغلاله لأعمال مفيدة للمجتمع السوري بدل "تعطيله" بهذا الشكل.

ليس مهماً أن تخرج المخابرات من الأحياء السكنية إلى مناطق أخرى، وليس كافياً أن يخلي حزب البعث مبنى من المباني في حين أن المنتفعين والمتنفذين ما زالوا "يملكون" كل شيء في سورية، فالمشكلة أعمق والمطلوب أكبر من ذلك بكثير.

فروع الأمن ومقراته في المدن والمناطق السورية تنتشر مثل الدكاكين، فلا يمر المرء من شارع إلا ويجد مقراً لهذا الفرع الأمني أو ذاك، في حين يشعر المرء بانقباض في صدره ويسأل الله أن يمر من هذه المنطقة بسلام. وإن إبعاد هذه المقرات ونقلها إلى أماكن أخرى، لا يعني سوى "تحديث" الأمن دون أن يعني بالضرورة تغيير أساليبه (تجاه المواطن)، فالإجراءات الأمنية لحماية مقرات فروع الأمن هي الدافع الأساسي لهذه الإجراءات.

وكذلك الأمر بالنسبة لمقر الحزب، فماذا يعني أن يُعاد المبنى للحكومة؟ هل المشكلة في هذا المبنى الذي صادره الحزب، أم المشكلة هي في مصادرة البلد بأكمله لصالح فئة محدودة ومحددة؟! فلو أعاد الحزب كل المباني (وهي مال عام) التي صادرها؛ هل سيعيد الحزبيون، أو بالأصح المنتفعون وأصحاب المصالح الخاصة المنضمون إلى الحزب؛ الذين حولوا البلاد إلى مزرعة خاصة؛ ما نهبوه من المال العام؟ ماذا عن "الشركات الخاصة" التي أسست من "المال العام"؟

في الحقيقة لم يكن السوريون في السنوات الماضية (في زمن الرئيس الراحل حافظ الأسد) يتوقعون أن يتخلى الحزب عن بعض مقراته، لكن دعونا لا ننسى أن من يتخلى عن "بعض" مقراته الآن مرشح، إن لم يتخذ بعض الخطوات المرضية لجهات خارجية؛ أن "يتخلى" مكرهاً عن الحكم أيضاً، فالأمر لا يتعلق بهبة يقدمها عن طيب خاطر، إذ المطلوب من السلطة في سورية (أمريكياً) أن تخرج من جلدها، وأن يضع "البعث" السوري نصب عينيه مصير "شقيقه" العراقي. ولذلك فإن التراجع تحت الضغط يفقد كثيراً من معانيه، ولا يأخذ حجمه الذي يمكن أن يأخذه حين يُقدم عن "طيب خاطر" في وقت الرخاء.

إن كل ما يحصل الآن في سورية هو إجراءات تجميلية لم تطَل الجوهر بعد. المشكلة ليست في هذه "الرتوش" التي يتحدثون عنها (مثل بعض المباني المصادَرة)، المطلوب هو التخلي عن فكرة الحزب الواحد والقائد الأوحد واحتكار السلطة والثروة بيد أناس لم يصلوا إلى السلطة إلا على ظهر الدبابة العسكرية، ولم يستقروا في أماكنهم إلا بواسطة أدوات القمع، أما صندوق الاقتراع الحر النزيه فهو بعيد عنهم كبعد المشرق عن المغرب.

إذا كان المطلوب أمريكياً أن تخرج السلطة من جلدها - كما يقال - وأن "تحسن" الأجهزة الأمنية وآلات القمع من تعاملها وتعمل على طريقة حلفائها، بحيث لا تتحرك إلا ضد مع تصفهم الولايات المتحدة بالإرهابيين؛ فإن المطلوب سورياً أن تخرج السلطة الفاسدة وأجهزتها القمعية من حياة المواطنين.
--------------------------------------------------------------------------------------
أخبار الشرق -

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

minime1967 · 07/04/2005

شكرا عالمقال ... الهام ..

أنا أظن أنو أمريكا عمبتحاول أنقاذ ما يمكن انقاذه من الحكومة الموالية لها.
يعني مجنون يحكي .. مين ممكن يحل مكان هالحكومة ؟؟؟ بفرض المطلوب حزب تاني مع قاعدة شعبية كبيرة ... ما في حدا ألا :

الأخوان .. وطبعا هدا شي ما بيظبط مع" العلمانية" الأميركية... أو

حزب علماني جديد متل "الغادري" أو ماشابه وهدا كمان مو ظابط مع أمريكا لأنو رح يكرر مأساة العراق مع الجلبي وأمثاله من الخونة ....

الحل : رح يظبطو ويلمعو اللي موجود....وتبديل الجلد عادة أو ظاهرة أشطر حدا بيعملها .. الأفاعي...

yass · 07/04/2005

قلت رأيي بهالموضوع سابقا.... الحكومة السورية الحالية ان لم تكن الأنفع للسياسة الأميريكية فهي على الأقل أقلها ضررا من الخيارات الأخرى المطروحة...
فكرة الهجوم الأمريكي على سوريا بالنسبة ألي مستبعدة تماما , مو لأنو بفكر أنو أميريكا ما فيها تعمل شي...لأ أبدا , أنما القصد أنو مافي معارضة سورية فعالة ( لما بقول معارضة فعالة أقصد معارضة الى حد ما ذات قاعدة شعبية...الغادري و لا حتى احسبو معارض!!!) موالية لأمريكا...المعارضة السورية سبق و رفضت الدعم الخارجي ولو حتى النفسي ( مثلا شبه محاولة فرنسية لاحتضان التجمع الوطني الديمقراطي قوبلت بالرفض التام من قبل قيادة التجمع) حتى أكراد سورية ما استعانو بحدا ولا مفكرين بهالشي....واثق تماما من هالشي....الخطأ الجسيم تبع القيادة السورية أنو ما عم تبدي مرونة ولا تقبل التعاون مع المعارضة الموجودة....يعني فرصة عظيمة للمصالحة الوطنية و فتح صفحة جديدة عم بتضيع شوي شوي ........... و الجهود البعثية الحالية لمكيجة الوضع للأسف ما كتير متفائل فيها...الوضع ما بينحل بمؤتمر قطري للبعث....المطلب الحالي هوي مؤتمر للمصالحة الوطنية, انهاء كثيرمن القضايا المصيرية في سوريا مثل السجن السياسي , قانون الطوارئ , المادة الثامنة من الدستور , عودة المنفيين.... هاي الشغلات اللي لازم ينحكى فيها , مو تغيير اسم الحزب و ما الا ذلك من المكياج الرخيص...

حسون · 07/04/2005

شكرا عالموضوع أبو مارال
الموضوع كتير حلو

minime1967 · 07/04/2005

اقتباس:

كاتب النص الأصلي : yass

قلت رأيي بهالموضوع سابقا.... الحكومة السورية الحالية ان لم تكن الأنفع للسياسة الأميريكية فهي على الأقل أقلها ضررا من الخيارات الأخرى المطروحة...
فكرة الهجوم الأمريكي على سوريا بالنسبة ألي مستبعدة تماما , مو لأنو بفكر أنو أميريكا ما فيها تعمل شي...لأ أبدا , أنما القصد أنو مافي معارضة سورية فعالة ( لما بقول معارضة فعالة أقصد معارضة الى حد ما ذات قاعدة شعبية...الغادري و لا حتى احسبو معارض!!!) موالية لأمريكا...المعارضة السورية سبق و رفضت الدعم الخارجي ولو حتى النفسي ( مثلا شبه محاولة فرنسية لاحتضان التجمع الوطني الديمقراطي قوبلت بالرفض التام من قبل قيادة التجمع) حتى أكراد سورية ما استعانو بحدا ولا مفكرين بهالشي....واثق تماما من هالشي....الخطأ الجسيم تبع القيادة السورية أنو ما عم تبدي مرونة ولا تقبل التعاون مع المعارضة الموجودة....يعني فرصة عظيمة للمصالحة الوطنية و فتح صفحة جديدة عم بتضيع شوي شوي ........... و الجهود البعثية الحالية لمكيجة الوضع للأسف ما كتير متفائل فيها...الوضع ما بينحل بمؤتمر قطري للبعث....المطلب الحالي هوي مؤتمر للمصالحة الوطنية, انهاء كثيرمن القضايا المصيرية في سوريا مثل السجن السياسي , قانون الطوارئ , المادة الثامنة من الدستور , عودة المنفيين.... هاي الشغلات اللي لازم ينحكى فيها , مو تغيير اسم الحزب و ما الا ذلك من المكياج الرخيص...

كلشي قلتو على راسي وصح ,, مع أضافة بسيطة ....

لخطأ الجسيم تبع القيادة السورية أنها موجودة على سطح الأرض....لا تقبل التعاون مع المعارضة الموجودة ... مع احترامي للمعارضة ...ما ني شايف أية معارضة على الصعيد الأساسي واللي هو الشعبي ... يعني شو بتتوقع عدد الناس اللي ممكن مثلا يتجمعو بشي ساحة أذا دعت كل أحزاب المعارضة للتظاهر ؟ بفرض أنو كانت كل المخابرات المزمبيقية صارت بالمزبلة ؟؟؟

yass · 07/04/2005

اقتباس:

يعني شو بتتوقع عدد الناس اللي ممكن مثلا يتجمعو بشي ساحة أذا دعت كل أحزاب المعارضة للتظاهر ؟ بفرض أنو كانت كل المخابرات المزمبيقية صارت بالمزبلة ؟؟؟

صح....قدرة المعارضة السورية على التجميع الشعبي ضعيفة جدا....هاد أمر لازم نقر و نعترف بيه....بس لازم تاخد بعين الاعتبار عدة عوامل مثل :
1- استحالة العمل العلني لهالمعارضة.... يعني كيف ممكن تعمل مظاهرة بدون ما يكون عندك امكانية الاعلان عنها.
2- عامل الخوف.... يعني مين بيستجري يطلع مظاهرة ضد البعث بدمشق مثلا...اللي مو فارقة معو متلي و متل العاشق بيطلعو, بس كيف تقدر تطلب من زلمة وراه مرة وولاد يطلع مظاهرة لما يكون احتمال اعتقاله كبير جدا
3- و الأهم : العامل الاجتماعي/الاقتصادي للمجتمع السوري حاليا....يعني الشريحة العظمى للشعب السوري بتلاقيه موظف الصبح , و شوفير تكسي بعد الظهر....و أحيانا حارس ليلي المسا....يا دوب ملحق ورا خبزات ولادو, كيف بدك أياه يحكي بالسياسة؟؟؟ أكيد حيقللك أنو هاد الموجود... مافيك تطالبو بشي لهالزلمة....
متل ما قلت بزماناتي...روح على أي جامعة سورية ( يفترض هدول هنن المثقفين) وقف مية واحد و اسألهم شو اسم رئيس الوزراء السوري أو مين وزير الداخلية....رد هالمية شخص بظن راح يأكد كلامي.... الشعب السوري قنعان أنو اذا الجهل معناتو أمان فمية أهلا و سهلا بالجهل

minime1967 · 07/04/2005

اقتباس:

كاتب النص الأصلي : yass

اقتباس:

يعني شو بتتوقع عدد الناس اللي ممكن مثلا يتجمعو بشي ساحة أذا دعت كل أحزاب المعارضة للتظاهر ؟ بفرض أنو كانت كل المخابرات المزمبيقية صارت بالمزبلة ؟؟؟

صح....قدرة المعارضة السورية على التجميع الشعبي ضعيفة جدا....هاد أمر لازم نقر و نعترف بيه....بس لازم تاخد بعين الاعتبار عدة عوامل مثل :
1- استحالة العمل العلني لهالمعارضة.... يعني كيف ممكن تعمل مظاهرة بدون ما يكون عندك امكانية الاعلان عنها.

هل ياترى المعارضة أو أشخاص المعارضة محققين الشرط الأول واللازم ليحكو باسمنا ؟ واللي هوو هل هنين وطنين بالمعنى الحقيقي ؟ والله أنا خايف من بعضون ... يعني الغبي أو الغير مؤهل بيساوي الخائن .. من وجهة نظر الخطورة والتأثير السلبي على ربنا ..

2- عامل الخوف.... يعني مين بيستجري يطلع مظاهرة ضد البعث بدمشق مثلا...اللي مو فارقة معو متلي و متل العاشق بيطلعو, بس كيف تقدر تطلب من زلمة وراه مرة وولاد يطلع مظاهرة لما يكون احتمال اعتقاله كبير جدا

ما اتفقنا أنو هدول النور اللي بيعتقلو , مصيرون المزبلة الأبدية ...

3- و الأهم : العامل الاجتماعي/الاقتصادي للمجتمع السوري حاليا....يعني الشريحة العظمى للشعب السوري بتلاقيه موظف الصبح , و شوفير تكسي بعد الظهر....و أحيانا حارس ليلي المسا....يا دوب ملحق ورا خبزات ولادو, كيف بدك أياه يحكي بالسياسة؟؟؟ أكيد حيقللك أنو هاد الموجود... مافيك تطالبو بشي لهالزلمة....

لقمة مغموسة بدم الجيران والأهل ,, لقمة الاشتراكية الموزمبيقية ..

متل ما قلت بزماناتي...روح على أي جامعة سورية ( يفترض هدول هنن المثقفين) وقف مية واحد و اسألهم شو اسم رئيس الوزراء السوري أو مين وزير الداخلية....رد هالمية شخص بظن راح يأكد كلامي.... الشعب السوري قنعان أنو اذا الجهل معناتو أمان فمية أهلا و سهلا بالجهل

والله ياحبيب الله يجيب الأيام اللي مننسا فيها أسماء كل هل الكلاب , يعني والله نحنا عمنحاول ننساهون , بس هنن ما عم ينسون ولا يتركونا بحالنا ..

**zen** · 07/04/2005

اقتباس:

الشعب السوري قنعان أنو اذا الجهل معناتو أمان فمية أهلا و سهلا بالجهل

انت ما بتعرف الشعب السوري منيح
وشكراااااااااااااااااااا

yass · 07/04/2005

اقتباس:

هل ياترى المعارضة أو أشخاص المعارضة محققين الشرط الأول واللازم ليحكو باسمنا ؟ واللي هوو هل هنين وطنين بالمعنى الحقيقي ؟ والله أنا خايف من بعضون ... يعني الغبي أو الغير مؤهل بيساوي الخائن .. من وجهة نظر الخطورة والتأثير السلبي على ربنا ..

هون صعب نحدد....الوطنية مثل الصح و مثل الحقيقة....كلمات مطاطة جدا, يعني مثلا ما فيك تحكم على عارف دليلة مثلا أنو غير مؤهل...و الأستاذ ممكن يشرحلك هالشي أحسن مني كونه يعرفو شخصيا على ما أعتقد...
بس هون بهالنقطة لازم نرجع لضمير و تفكير و قناعة كل واحد..كون شخص ما معارض للبعث لا يعني أنو لازم أدعمو و كذا.......أنا شخصيا ماني منتسب حاليا لأي حزب سوري...لكن في انسان عظيم بالنسبة لألي و جدا بحترمو و أقدرو اسمو رياض الترك....بالمقابل نزار نيوف أبدا ما بحبو ولا أحب أساليبو, غيري يفكر عكسي تماما و أنا مجبور احترم رأيو...هون لازم نوصل, أنو يكون لكل واحد حرية اختيار افكارو و الاعتقاد بها...ضمن احترام حرية الآخرين.

اقتباس:

ما اتفقنا أنو هدول النور اللي بيعتقلو , مصيرون المزبلة الأبدية ...

للأسف حاليا مو هاد الوضع, لذلك ما فينا نفترض هالشي....الضغط "الأمني" عامل مهم جدا و ما فينا نحطو ع طرف.

اقتباس:

لقمة مغموسة بدم الجيران والأهل ,, لقمة الاشتراكية الموزمبيقية ..

مقارنة البعث السوري بالاشتراكية خاطئة جدا برأيي....

اقتباس:

والله ياحبيب الله يجيب الأيام اللي مننسا فيها أسماء كل هل الكلاب , يعني والله نحنا عمنحاول ننساهون , بس هنن ما عم ينسون ولا يتركونا بحالنا

يمكن ما فهمت علي منيح....ما بيهم الأسامي...القصد أنو أمر مقلق أنو طالب جامعي ما بيعرف مين رئيس وزراء بلدو مثلا

تحياتي

yass · 07/04/2005

اقتباس:

انت ما بتعرف الشعب السوري منيح
وشكراااااااااااااااااااا

متل ما بدك...ما بعرفو خلص

minime1967 · 07/04/2005

اقتباس:

كاتب النص الأصلي : yass

اقتباس:

هل ياترى المعارضة أو أشخاص المعارضة محققين الشرط الأول واللازم ليحكو باسمنا ؟ واللي هوو هل هنين وطنين بالمعنى الحقيقي ؟ والله أنا خايف من بعضون ... يعني الغبي أو الغير مؤهل بيساوي الخائن .. من وجهة نظر الخطورة والتأثير السلبي على ربنا ..

هون صعب نحدد....الوطنية مثل الصح و مثل الحقيقة....كلمات مطاطة جدا, يعني مثلا ما فيك تحكم على عارف دليلة مثلا أنو غير مؤهل...و الأستاذ ممكن يشرحلك هالشي أحسن مني كونه يعرفو شخصيا على ما أعتقد...
بس هون بهالنقطة لازم نرجع لضمير و تفكير و قناعة كل واحد..كون شخص ما معارض للبعث لا يعني أنو لازم أدعمو و كذا.......أنا شخصيا ماني منتسب حاليا لأي حزب سوري...لكن في انسان عظيم بالنسبة لألي و جدا بحترمو و أقدرو اسمو رياض الترك....بالمقابل نزار نيوف أبدا ما بحبو ولا أحب أساليبو, غيري يفكر عكسي تماما و أنا مجبور احترم رأيو...هون لازم نوصل, أنو يكون لكل واحد حرية اختيار افكارو و الاعتقاد بها...ضمن احترام حرية الآخرين. وأنا بعرف الدكتور دليلة بشكل شخصي والزلمة مو تبع ثورة وخلافه

اقتباس:

ما اتفقنا أنو هدول النور اللي بيعتقلو , مصيرون المزبلة الأبدية ...

للأسف حاليا مو هاد الوضع, لذلك ما فينا نفترض هالشي....الضغط "الأمني" عامل مهم جدا و ما فينا نحطو ع طرف. أنا قلت مصيرون ... يعني لو ماني بعرف أنو أنو الضغط الأمني موجود , كنت شفتني مسمي حالي غير أسمي اللي بعتز فيي؟

اقتباس:

لقمة مغموسة بدم الجيران والأهل ,, لقمة الاشتراكية الموزمبيقية ..

مقارنة البعث السوري بالاشتراكية خاطئة جدا برأيي....يا أخي مين قارن ؟ أنا قلت الأشتراكية المفصلة موزمبيقيا .. يعني متل ما أنت قلت كل حدا ألو وجهة نظر بالأمور .. وأنا عمبحكي عل الأشتراكية من وجهة النظر الموزمبيقية .. مع أنو معك حق بأنها ما بتتسمى اشتراكية ...

اقتباس:

والله ياحبيب الله يجيب الأيام اللي مننسا فيها أسماء كل هل الكلاب , يعني والله نحنا عمنحاول ننساهون , بس هنن ما عم ينسون ولا يتركونا بحالنا

يمكن ما فهمت علي منيح....ما بيهم الأسامي...القصد أنو أمر مقلق أنو طالب جامعي ما بيعرف مين رئيس وزراء بلدو مثلا............. والله فهمت ياحبيبي .. أنا بحفظ أسماء هالكلاب وبضن اذا برجع عالجامعة هلا بنساهون ...ما بيشرف أي طالب جامعة بهالأيام أنو يحفظ هيك أسماء .. يعني مو نو الطالب غبي أو جاهل .. يعني السبب أنو الأسماء مقرفة .. مو قصدي الأسماء بحد ذاتها ... طبعا ...

تحياتي

yass · 07/04/2005

اقتباس:

وأنا بعرف الدكتور دليلة بشكل شخصي والزلمة مو تبع ثورة وخلافه

لسا ما حكينا عن ثورة

اقتباس:

أنا قلت مصيرون ... يعني لو ماني بعرف أنو أنو الضغط الأمني موجود , كنت شفتني مسمي حالي غير أسمي اللي بعتز فيي؟

ياريت كون هاد مصيرون...بس الطريق طويل

اقتباس:

يا أخي مين قارن ؟ أنا قلت الأشتراكية المفصلة موزمبيقيا .. يعني متل ما أنت قلت كل حدا ألو وجهة نظر بالأمور .. وأنا عمبحكي عل الأشتراكية من وجهة النظر الموزمبيقية .. مع أنو معك حق بأنها ما بتتسمى اشتراكية ...

هون متفقين

اقتباس:

والله فهمت ياحبيبي .. أنا بحفظ أسماء هالكلاب وبضن اذا برجع عالجامعة هلا بنساهون ...ما بيشرف أي طالب جامعة بهالأيام أنو يحفظ هيك أسماء .. يعني مو نو الطالب غبي أو جاهل .. يعني السبب أنو الأسماء مقرفة .. مو قصدي الأسماء بحد ذاتها ... طبعا

القصد أنو الطالب هاد اللي ما بيعرف الله وين حاطو ( ذكري للأسماء كان فقط كمثال, كرمز...يعني اسألو أي شي تاني عن السياسة السورية و ما راح يعرف يجاوبك ) هوي نفسو اللي بيطلع مسيرات و بيحمل صور و لافتات............فهمت قصدي هلأ؟؟؟ و شي أكيد أنو مو ذنبو يكون هيك....هالشخص ما شاف غير هالحكومة بحياتو, و يكون محاوك بالبروباغندا البعثية من الصغر و طلائع و شبيبة و كذا....شي طبيعي يكون هيك

minime1967 · 07/04/2005

اقتباس:

كاتب النص الأصلي : yass

اقتباس:

وأنا بعرف الدكتور دليلة بشكل شخصي والزلمة مو تبع ثورة وخلافه

لسا ما حكينا عن ثورة

اقتباس:

أنا قلت مصيرون ... يعني لو ماني بعرف أنو أنو الضغط الأمني موجود , كنت شفتني مسمي حالي غير أسمي اللي بعتز فيي؟

ياريت كون هاد مصيرون...بس الطريق طويل

اقتباس:

يا أخي مين قارن ؟ أنا قلت الأشتراكية المفصلة موزمبيقيا .. يعني متل ما أنت قلت كل حدا ألو وجهة نظر بالأمور .. وأنا عمبحكي عل الأشتراكية من وجهة النظر الموزمبيقية .. مع أنو معك حق بأنها ما بتتسمى اشتراكية ...

هون متفقين

اقتباس:

والله فهمت ياحبيبي .. أنا بحفظ أسماء هالكلاب وبضن اذا برجع عالجامعة هلا بنساهون ...ما بيشرف أي طالب جامعة بهالأيام أنو يحفظ هيك أسماء .. يعني مو نو الطالب غبي أو جاهل .. يعني السبب أنو الأسماء مقرفة .. مو قصدي الأسماء بحد ذاتها ... طبعا

القصد أنو الطالب هاد اللي ما بيعرف الله وين حاطو ( ذكري للأسماء كان فقط كمثال, كرمز...يعني اسألو أي شي تاني عن السياسة السورية و ما راح يعرف يجاوبك ) هوي نفسو اللي بيطلع مسيرات و بيحمل صور و لافتات............فهمت قصدي هلأ؟؟؟

والله فهمان قصدك ....كل العالم اللي هون كرهو السياسة والأخبار .. لأنو مافيها ألا أكل الخ...يعني من سيء لأسوء .....

عاشق من فلسطين · 07/04/2005

يا شباب الموضوع مو موضوع معرفة الشعب السوري أو عدم معرفتو .. ومانو موضوع ترحيل المخابرات أو عدمه .. المضوضوع الشعب ما راح يرتاح .. لحتى يحس فعلا" أنو خلص من حالة الرقابة اللي بيحس فيها حتى وهوي ببيتو .. يعني كل هالاجراءات الشكلية ما الها طعمة .. لحتى يظهر شي ملموس .. يعني لحتى اذا واحد كان ماشي وضربة شي سيارة لابن مسؤول يقدر يرفع دعوى وياخد حقو .. ولحتى يكون ماشي بالشارع بالليل وماحدا يقلو وين هويتك وين دفتر خدمتك ووين شهادة ميلادك وشرف معنا .. الشعب السوري شعب محتقن حاليا" بس خايف .. أو أنا خايف كتير من هالحالة الغريبة .. لأنو خايف اذا ما تم بالمؤتور القطري الجديد .. تحقيق معظم مطالب الشعب (واللي مو ضروري يصرحوا عنا) لأنو بظن انو واضحة للأعمى .. أنا خايف من انفجار يؤدي لتفكك الشعب .. يعني ممكن انا عم أشطح زيادة بس أنا أول مرة بشوف الشعب بهالحالة .. يعني مو باين عليه اذا مبسوط أو اذا زعلان .. يعني بالعادة بيحكي ولو على الخفيف .. هلا الكل ساكت .. بقى برأي أنو الحكومة لازم توعى على حالها بقى لأنو مصير سوريا على المحك .. وأنا في حال عدم حصول أي شيء ملموس بعد المؤتمر القطري .. رح أعمل مظاهرة ولو لحالي .. حاجي بقى ضحك على بعض .. يا شباب أن رح جن .. لك اليوم 7 نيسان .. العمى اللافتات المحطوطة بالشوراع شي مقرف .. يعني مثلا" أنو حزب البعث العربي الاشتراكي هوي تلبية لمطالب جماهير الأمة العربية ونابع من رغبتها .. أو انو حصن الأمة العربية المنيه والوطيد .. يعني بالله عليكون والله الولد الصغير صار يعرف أنو هالحكي صار مسخرة .. يعني شو عم يستجحشوا الشعب عينك عينك .. يعني انا كنت متوقع أنو ما فيهون كرامة بس مو لهلدرجة يعني اللي استحو ماتو ..
شباب أنا من هلا عم قلكون .. اذا بهالفترة ما بينت بالمنتدى تأكدو أنو بكون بشي فندق من فنادق الدولة .. يعني المسألة صار بدها تحريك ولو لحالي .. يعني انا طقيت من الانتظار ..

أحلى شباب وأحلى عالم .. وتبقى لا تنسونا ..

minime1967 · 07/04/2005

اقتباس:

كاتب النص الأصلي : عاشق من فلسطين

يا شباب الموضوع مو موضوع معرفة الشعب السوري أو عدم معرفتو .. ومانو موضوع ترحيل المخابرات أو عدمه .. المضوضوع الشعب ما راح يرتاح .. لحتى يحس فعلا" أنو خلص من حالة الرقابة اللي بيحس فيها حتى وهوي ببيتو .. يعني كل هالاجراءات الشكلية ما الها طعمة .. لحتى يظهر شي ملموس .. يعني لحتى اذا واحد كان ماشي وضربة شي سيارة لابن مسؤول يقدر يرفع دعوى وياخد حقو .. ولحتى يكون ماشي بالشارع بالليل وماحدا يقلو وين هويتك وين دفتر خدمتك ووين شهادة ميلادك وشرف معنا .. الشعب السوري شعب محتقن حاليا" بس خايف .. أو أنا خايف كتير من هالحالة الغريبة .. لأنو خايف اذا ما تم بالمؤتور القطري الجديد .. تحقيق معظم مطالب الشعب (واللي مو ضروري يصرحوا عنا) لأنو بظن انو واضحة للأعمى .. أنا خايف من انفجار يؤدي لتفكك الشعب .. يعني ممكن انا عم أشطح زيادة بس أنا أول مرة بشوف الشعب بهالحالة .. يعني مو باين عليه اذا مبسوط أو اذا زعلان .. يعني بالعادة بيحكي ولو على الخفيف .. هلا الكل ساكت .. بقى برأي أنو الحكومة لازم توعى على حالها بقى لأنو مصير سوريا على المحك .. وأنا في حال عدم حصول أي شيء ملموس بعد المؤتمر القطري .. رح أعمل مظاهرة ولو لحالي .. حاجي بقى ضحك على بعض .. يا شباب أن رح جن .. لك اليوم 7 نيسان .. العمى اللافتات المحطوطة بالشوراع شي مقرف .. يعني مثلا" أنو حزب البعث العربي الاشتراكي هوي تلبية لمطالب جماهير الأمة العربية ونابع من رغبتها .. أو انو حصن الأمة العربية المنيه والوطيد .. يعني بالله عليكون والله الولد الصغير صار يعرف أنو هالحكي صار مسخرة .. يعني شو عم يستجحشوا الشعب عينك عينك .. يعني انا كنت متوقع أنو ما فيهون كرامة بس مو لهلدرجة يعني اللي استحو ماتو ..

الشعب سالخ أبرة مورفين مخلوطة بدم الجيران والأهل ..... مو لقمة أكل..

المراهنة على المؤتمر القطري ولا القومي ولا الأممي ولا المجري ولا الكوني ,,, لحس طي....عفواا

دود الخل منو وفي....

تفكك الشعب : أنو شعب ؟؟؟ الشعب شغال بجزر أمنية يحدها من الشمال الأسطول السادس الأمريكي ومن الجنوب فرع المنطقة ومن اشرق والغرب الله شخصيا ...

شباب أنا من هلا عم قلكون .. اذا بهالفترة ما بينت بالمنتدى تأكدو أنو بكون بشي فندق من فنادق الدولة .. يعني المسألة صار بدها تحريك ولو لحالي .. يعني انا طقيت من الانتظار ..

أحلى شباب وأحلى عالم .. وتبقى لا تنسونا ..

يا زلمة بلعن الله اللي خلقك اذا بتغط .. مبارح غطيتلك شي ساعة اتعقد لاهوتي من الخوف عليك ...

بقلك متل ما بيقولو بضيعتنا لما بيخافو ع شي حدا متأخر ؟؟؟؟

ما في أي شي بالدنيا بيستاهل أنك تشم ريحة شي كلب من هالكلاب ..بدل ريحة الهية لشي صبية حلوة.

ما في أي شي بالدنيا بيستاهل أنك تنام وأنت اخر شي شايفو وجه شي حيوان منهون.بدل وجه أبوك أم أخوك..

ما في أي شي بالدنيا بيستاهل أنك تاكل من أكلون النجس. بدل ما تاكل أكلة برغل بحمص متل العالم والناس.

ما في أي شي بالدنيا بيستاهل أنك تشغل أذنيك نعيقون وشهيقون ونباحون. بدل شي قصيدة لأبو عفش.

ما في أي شي بالدنيا بيستاهل أنك يجي عابالك تحكي معنا ونحكي معك وما نقدر ...

ما بقى ملك لحالك يا عاشق .. صار عليك مؤولية تضل معنا ....

عاشق من فلسطين · 07/04/2005

اقتباس:

زلمة بلعن الله اللي خلقك اذا بتغط .. مبارح غطيتلك شي ساعة اتعقد لاهوتي من الخوف عليك ...

بقلك متل ما بيقولو بضيعتنا لما بيخافو ع شي حدا متأخر ؟؟؟؟

ما في أي شي بالدنيا بيستاهل أنك تشم ريحة شي كلب من هالكلاب ..بدل ريحة الهية لشي صبية حلوة.

ما في أي شي بالدنيا بيستاهل أنك تنام وأنت اخر شي شايفو وجه شي حيوان منهون.بدل وجه أبوك أم أخوك..

ما في أي شي بالدنيا بيستاهل أنك تاكل من أكلون النجس. بدل ما تاكل أكلة برغل بحمص متل العالم والناس.

ما في أي شي بالدنيا بيستاهل أنك تشغل أذنيك نعيقون وشهيقون ونباحون. بدل شي قصيدة لأبو عفش.

ما في أي شي بالدنيا بيستاهل أنك يجي عابالك تحكي معنا ونحكي معك وما نقدر ...

ما بقى ملك لحالك يا عاشق .. صار عليك مؤولية تضل معنا ....

كل شي حكيتو على عيني وراسي بس في شي مستاهل ... هوي سوريا (الوطن)

minime1967 · 07/04/2005

اقتباس:

كاتب النص الأصلي : عاشق من فلسطين

اقتباس:

زلمة بلعن الله اللي خلقك اذا بتغط .. مبارح غطيتلك شي ساعة اتعقد لاهوتي من الخوف عليك ...

بقلك متل ما بيقولو بضيعتنا لما بيخافو ع شي حدا متأخر ؟؟؟؟

ما في أي شي بالدنيا بيستاهل أنك تشم ريحة شي كلب من هالكلاب ..بدل ريحة الهية لشي صبية حلوة.

ما في أي شي بالدنيا بيستاهل أنك تنام وأنت اخر شي شايفو وجه شي حيوان منهون.بدل وجه أبوك أم أخوك..

ما في أي شي بالدنيا بيستاهل أنك تاكل من أكلون النجس. بدل ما تاكل أكلة برغل بحمص متل العالم والناس.

ما في أي شي بالدنيا بيستاهل أنك تشغل أذنيك نعيقون وشهيقون ونباحون. بدل شي قصيدة لأبو عفش.

ما في أي شي بالدنيا بيستاهل أنك يجي عابالك تحكي معنا ونحكي معك وما نقدر ...

ما بقى ملك لحالك يا عاشق .. صار عليك مؤولية تضل معنا ....

كل شي حكيتو على عيني وراسي بس في شي مستاهل ... هوي سوريا (الوطن)

بلا غلاظة سورية بتستاهل أنك تكون برا مو جوا السجن ... لذلك لا تحاول تفوت عالسجن ...

غريب الدار · 07/04/2005

هالق عنا اسماء معروفة وعميسكتو عنها
وناس مو مبينة
يعني مين الحامي صاحب سيريا تيل؟ مبين
ومين الحرامي صاحب 94 مو معروف ناس قالو مغلوب على امرو
بس الضحية نحنا
في حرمية صغار كل يوم منشوفن اسمن الشرطة والمموووظفين
وهذول حتى نحن مندافع عنن مش عارف ليش
في حرامية بالوزارات كلها وتعينت من اشهر يعني ما في حسن نوايا للتغير وتاريخ هذول الناس مبين بس عنا تعودو يساوو شرعية قبل ما يسرقو
تخيلو انو الاحتكار ممنوع بسوريا
بس الخليوي مو احتكار لإنو للدولة بعد 15 سنة من الاستخدام الخاص
وشوفو بس يصير عند الدولة شو هالمصيبة الي رح تصير
نحن صارت اللصوصية عنا علم قائم بذاته شيئ مؤسف ما بعرف كيف ممكن نتجاوزو
طبعاً لا تقولولي انو الحكومة بدا تصلح شي
بزعل منكن
ولا تقولة الأسد
كمان بزعل لأنو أغنى من إنو يفكر يخسر كرستو الي ورثها عن بيو
بعدين قولولي بحيات شرفكن
شو ضمانات الشعب السوري ليحكي ويعبر عن رايو
صحيح القمع متوقف بس رهن إشارة
والي وقع بالجورة بعدن ايدي مجبرين
رح واحد يقول إنو ليك هدول الاكراد ما أثر عليهن السجن
رح قول انو ناس انطردت من جامعاتها وناس انخرب بيتها ومستقبلها
رح يقول حدا هي ضريبة الحرية
رح رد بس نحن نعرف الحرية الي ما فيها حكم وصائي ودولة وصية على شعبها بتحكي عنهن وبتاكل وبتشرب عنن وما بتسألهم وبالنهاية بيقولة بس تخسر الحرب
الله يلعن الخاين
بس نعرف كيف الشباب والمواطن ياخد دورو بيصير في ضريبة
بس هني ما علمونا غير نقول بالروح بالدم ...
ما منعرف نحن كيف ناكل لحالنا ما حدا علمناوالي بدا ايا أمريكا ما بيلايمنا
لازم يكون في وعي ووعي شمولي
منشان الي بيحكي عن وعي هديك الساعة ما حدا يقلو لا مو هيك نحن منحب الرئيس
يالله خليها لألله