أوباما يمدّد العقوبات على سوريا

[Abu ToNi]

كاتب النص الأصلي : Elephant And Castle

ههههه ...و انا هيك كنت عم قول كمان ..انو مجاملة زيادة عن اللزوم ..

يبدو بالشهرين هدون بأخوية ,,رجعنا تعلمنا تبويس الشوارب ,,,
لا عنجد ..انا كان قصدي طريقة الصياغة ...

بس اخد على خاطري ...انو اعتذرنا من الشباب و الصبايا ...و ماحدا كلف خاطرو انو يقول اعتذرك مقبول ! ..ما كنت بعرف انو اموضوع خطير لهيك درجة ...لك ما يكونو هدون متل رامي مخلوف و محجوز على ارصدتون بأمريكا !! لحتى هيك اخدينها جد زيادة كتيير !!

بس حتى يلي متل مخلوف ما بتأثر عليه حجز الرصيد بأمريكا ..لأنو بكون عندو مئات الأرصدة بدول تانية !

ما قصة ما حدا كلف خاطرو .. بس ما صدف وفتت علموضوع قبل هلحظة

يمكن كنت قاسي بالرد وتهجمت عليك بشكل شخصي فبعتذر عن التهجم المباشر الك .



برجع بقلك
في ظل الوضع الاقتصادي الرأسمالي-الاقطاعي واحتكار البلد من هلكام حوت .. في حال فرض العقوبات علين بصفة شخصية وفردية .. بكل بساطة فين يعملوا حركة بسيطة يسحبوا من الشعب ما يعادل القيم المحجوز عليها .
هي اذا بدنا نعتبر العقوبات مجرد حجز اموال وايقاف حسابات بعيدا عن الحصار وبعيدا عن المقاطعات وبعيدا عن عملية العزل العايشين فيها كسوريين من فترة لهلق .

يعني على مثال رامي مخلوف .. كونه صاحب شركة الموبايل الوحيدة في سوريا ، لو عمل سعر الدقيقة بـ 100 ليرة سورية ليعوض عن خسارته .. حدا بيقدر يقله شو عم تعمل وبصير وما بصير ؟!

[butterfly]

بغض النظر اقتصرت العقوبات ع النظام أو لأ
فيها إهانة وانتقاص من حق سوريا الدولة وتدخل بشؤونها غير مبرر ع الإطلاق

يعني اليوم إدارة دولة المفروض انها مساوية لدولتك بتستخدم العقوبات لتغير موقف دولتك من شيء معين ،
يعني ببساطة تدخل بسياسة بلدنا من فئة خارجية باستخدام الابتزاز الاقتصادي والتكنولوجي

ما شايفة فيها أي شي بيفرح ، لأ شايفة فيها يعني تعدي كبير على حق سوريا كدولة بصياغة سياستها

العقوبات المفروض أنها تنفرض من منظمات فوق دولية ، مو من دولة أخرى ؟ !

[yass]

بس حتى يلي متل مخلوف ما بتأثر عليه حجز الرصيد بأمريكا ..لأنو بكون عندو مئات الأرصدة بدول تانية !

ما هاد حكينا ! بشو ضرتهون؟ ليش هو عندو أرصدة بإسمو؟

كن على ثقة انو متضرر المهاجر الكحيان اللي معقدين سما ربو ليقدر يبعت حوالة ع أهلو بدون ما يمر بالتجاري السوري, أو حتى اللي مش قادر يستخدم خواص غوغل داخل سوريا أكتر من أي واحد فيهون.. و مش بس ما تضررو انما استفادو اعلاميا منها, و تسجّل انتصار لألهون لما هالسياسة الشرسة ما حققت شي و أميركا اجت تدوّر الصحبة و الرضا

بعدين كوننا ضد مبدأ انو الولايات المتحدة تعمل شرطي العالم لما ما يحقلها, و تاخد قضايا سامية و تستخدمها لما بيناسبها و ترميها متل الكلينكس الخربان لما ما بيناسبها, لا يعني انو عم ندافع عن رامي مخلوف متل ما عم تقول و تكرر... يعني كمان هون عم تستخدم ثنائية (معي أو مع النظام) بشكل ما بعتقد انو جيد بحقنا (ما عم عاتبك و اساسا ما بعتقد كان لازم تعتذر, هون شو ما تناقشنا و نتفنا حالنا ما رح نغير شي بنقاشنا, فما بدها حدية و خناق)...


كاختصار لقضية الحرامية.. أنا ما بدي أميركا تعاقب الحرامية, ما بدي أميركا تجي تطالبلي بشي, أنا بدي حقوقي تعطيني ياها بلدي, و مفسدين بلدي يتحاكمو قدام قضاء بلدي, و أملي بانو يجي هاليوم مالو حدود حتى لو مقومات وجود هاليوم غائبة مغيبة... و يجوز هاليوم بعمرو ما يوصل, او أنا ما بشوفو, و مع ذلك بفضل موت حزين على انو كان بيوم من الأيام كان عندي حلم انو بلدي عادل مع أبناؤو, و هالحلم ما تحقق.. بفضل موت بحزن ع انو ما تحقق هالشي ع انو بعيش مقهور لأنو حدا اجا استخدم قضيتي بدون وجه حق و سخّرها لمصالحو الخاصة, وما قدرت أمنعو..

عدو عدوي مش دائماً صديقي, أساساً بعتقد انو أغلب الأحيان بيكون عدوي قد عدوي الأول و أكتر...



مع الشكر و التحية و شوفولنا سيرة تانية

[أم الجود]

كاتب النص الأصلي : Elephant And Castle

بس اخد على خاطري ...انو اعتذرنا من الشباب و الصبايا ...و ماحدا كلف خاطرو انو يقول اعتذرك مقبول ! ..ما كنت بعرف انو اموضوع خطير لهيك درجة ...لك ما يكونو هدون متل رامي مخلوف و محجوز على ارصدتون بأمريكا !! لحتى هيك اخدينها جد زيادة كتيير !!

لا مو هيك القصة .. أكيد اعتذارك مقبول و أنا كمان بعتذر إذا لهجتي كانت حدة و زعجتك .. بس أنت لازم تميز (بهالموضوع و بكل المواضيع) بين اللي عم يعارض أفكارك و يجادلك من باب حرصو عالبلد نتيجة رؤيتو للموضوع المختلفة عن رؤيتك ، و بين اللي بدو يصفق للسلطة و يبيض صفحتا بشكل أعمى ...
تحية ..