اسبارطة, حياة يومية عجيبة

[Willi]

اسبارطة


الموضوع مقسم على تلت ردود


عالاغلب قسم لا بأس فيه مننا سمعان بمدينة اسبارطة, واللي ما بيعرفها هية وحدة من مدن اليونان. كانت مشهورة بقوة مقاتلينا, يعني كان جيشها يعمل رعب لباقي الجيوش على قد مو قوي.

هلق انا شخصيا ما بحب الطريقة العربية لقول اسم المدينة, هيك يعني اسبارطة والله تقيلة هالادن. هيك الكلمة الانكليزي بحسها هيك اسلس Sparta (أسم المدينة) و Spartans اسم الناس اللي ساكنين بالمدينة. هلق بالموضوع انا رح اكتب باغلب الاوقات سبارتا, وسبارتانز. (فهيك حبيت نوه مشان تعرفو عن شو عم احكي)

بس مو هاد المهم خلينا بحياتون, هالعالم هدول حياتون بتحط العقل بالكف, يعني في عندهون شغلات عجيبة غربية. وطبعا كلياتها كانت مدروسة. مشان هيك كانو كتير قوايا.



رجال اسبارطة:

السبارتانز (الاسبرطيين), كانت حياتون معتمدة على المقاتلة, فكانو يعتبرو انو حياتون مو الون, حياتون لدولتون. فكان موتون بارض المعركة يسموه, الموت الجميل او The Beautiful death. ما كان عندون مشكلة يموتو. وكانو يحلمو فيه لهلموت

وقت كان يجي الولد, اذا كان بنت بتبقى مع امها, اذا كان صبي, فكانو ياخدوه يعملو عليه فحص. في حال كان هالولد نظامي كانو يرجعوه لاهلو لحتى يصير عمرو7 سنين, بعدين بياخدوه على مخيم ليتدرب فيه. اما في حال الولد ما كان نظامي, يعني فيه شي مو صحيح. فكانو ياخدوه على تلة ويزتوه منها. ويموت (هالشي عرفوه لانو لقو عدة هياكل عظمية لولاد باسفل تلة بسبارتا). هلق بالمخيم كان اللواط منتشر. حيث انو كانو يعتبرو انو اذا كان معك حدا بتحبو بالمعركة وفي علاقة بينك وبينو. رح تقاتل بكل ما بتقدر مشان تحميه.
شي تاني المقاتلين بهالمخيم ما كانو ينعطو اكل بما فيه الكفاي, فكان عليهون انو يسرقو الاكل. (طبعا اذا انلقطو اكلوها بكونو) بس كان المفروض عليهون يسرقو لياخدو الاكل. لانو برأيهون انو اذا الواحد قدر يسرق بدون ما ينلقط فرح يكون عندو مهارة بارض المعركة.
كانو يتعلمو بهالمخيم القتال, ويعلموهون يتبعو المثل (خير الكلام ما قل ودل) يعني كانو يعلموهون انو يحكو اللي بدهون ياه بكلمات قليلة, غنية بالمعاني.


لما يصير وقت تخرج الشب من المخيم. (وطبعا لما بقول انو يتخرج هاد مو معناه انو يتركو للمخيم وخلص, لاء بس يتخرج كان يضل بالمخيم, بس يصير بحقلو يعمل كام شغلة مو مسمحتلو) في متل فحص لازم يعملوه, كانو يجيبو كل الرجال اللي متخرجين. ويحطوهون بمكان حوالي تلة صغيرة. ولازم الشباب اللي بدهون يتخرجو يشتغلو كفريق واحد مشان يمرقو من بين المتخرجين. ويوصلو للتلة. طبعا كانو الرجال اللي محاوطين بالتلة عليهون انو يمنعوهون. (بعض الاحيان كان عالم تموت). المهم بعد ما يتخرجو. عالم بيتبنوهون (يعني مو تبني تبني) بس بياخدوهون يعيشو معون. واذا كان الرجال تعيس الحظ, وما حدا اخدو, كان يتقلع برات سبارتا. ليشوف حياتو بعيد عنها (بعد كل هالعزاب يتقلع شوفو الظلم).


سبارطة هية المدينة الوحيدة اللي كان فيها السكان يستعبدو يونانيين تانين. كانو العبيد يسموهون Helot (ما بعرف التسمية بالعربي). هدول كانو عليون خدمة والشغل باراضي السبارتانز.
كان بين كل فترة وفترة الاسبرطيين, يبعتو شباب (بين عمر 14 و 18 ) يروحو يقتلو عدد من هالعبيد, هيك بس مشان يتعودو على هالشي بالمعركة.


تتمة بالرد التاني

[Willi]

نساء اسبارطة:


هلق اذا كنتي بنت بسبارطة. فعيشتك كانت احلا عيشة. حيث انو كانو البنات ياخدو اكبر عناي, كانو يتعلمو منيح. وكانو ينتسبو برياضات, لتقوية جسمهون. لانو كان الاعتقاد سائد انو اذا المرا كانت قوية وصحتها منيحة, فكانت رح تجيب صبي قوي وصحتو منيحة.
كانت المرا هية اللي تدير المزارع تبعها, لانو الزلمة كان بمخيم التدريب دايما (ما كان يجي غير للزيارة بس).
كمان كان مسموح الها انو يكون عندها اراضي, وكانت تركب الخيل, وكان الك الحق انك تختاري مين بدك تتزوجي.
كمان كانت تجيب العشيق تبعا عالبيت, طبعا بعد مناقشة الموضوع مع زوجا. (هالشي مو طبيعي بهداك الوقت, يمكن لهلق لساتو مو طبيعي)

لما الرجال يصير عمرو 30 سنة كان يعتبر انو صار رجال عن حق, وصار يحقلو يتزوج, ويصوت ويملك اراضي, بس مع الاسف ما كان يتهنى. حيث انو بعد العرس, كانو يحلقو شعر المرا عالصفر, ويحطوها بغرفة معتمة. بيدخل الرجال عليها, بيعمل شغلو. وبيرجع على المخيم.

كانو البنات والشباب عليون بالاحتفالات يطلعو عرات (يعني بدون تياب), وهالشي ما كان عيب لانو هالشي علمهون انو يكونو بسيطين, وخلاهون يحاولو يشتغلو على جمال جسمون.


كمان تتمة بالرد التاني

[Willi]

وقت الحرب:


هلق بيوم الحرب كان المعروف انو الزوجة, او الام, او حايلة مرا تاني. تعطي الدرع للرجال وتقلو. "معو او بدونو" يعني يا اما بتجي مع هالدرع, يا اما بتجي محمول عليه (يعني ميت). لانو ما بصير انك تخسر الدرع بالمعركة.

كمان هيك هدول السبارتانز (الرجال) كانو يطولو شعرون, وبيوم المعركة كانو يحطو شعرون على كتفون ويلعبو فيه, او يمشطوه. هالشي كان يخلي اللي بالمعركة التاني ينجلطو, انو ليك عمو جايين نحاربك ومع هيك عم نمشط شعرنا, (انو يعني ما مدورين عليك).
وكان لبساهون احمر, حيث انو اذا نزل دم منهون هالشي ما يبين على العدو, (مشان ما ينبسط).

هلق كمان بوقت الحرب, كانو الاسبرطيين منظمين بمجموعات. بكون بكل مجموعة بحطو الشباب بالبداي (لانو لساتنون شباب وحركتون سريعة). المبتدئين, بالنص (مشان ما حدا منهون يحاول يهرب). والكبار اللي عندهون خبرا, بالاخير. (مشان ينتبهو انو ما حدا يهرب).


بالنهاي, شغلة حبيت اذكرها. مرة من المرات مرتو ل ليونايدس, (احدا ملوك اسبارطة من قديم, حاكم عظيم انشالله بالمرات التانية بحكي عن اخر معركة عملها). (شي تاني باسبارطة كان في ملكين بدال الملك).

مرة غريبة, قالت لمرتو ل ليونايدس, "انتو نسوان اسبرطة الوحيدين بالعالم, اللي بتحكمو الرجال."
قم ردت عليها وقالتا "صحيح, لانو نحن الوحيدين اللي منخلف رجال"



قوية لا تقلولي

[Willi]

انو انا وعم اكتب, هيك طولت الموضوع.

فقسمتو على تلت ردود مشان ما تنجلطو

[Gazita]

كاتب النص الأصلي : Willi

مرة غريبة, قالت لمرتو ل ليونايدس, "انتو نسوان اسبرطة الوحيدين بالعالم, اللي بتحكمو الرجال."
قم ردت عليها وقالتا "صحيح, لانو نحن الوحيدين اللي منخلف رجال"



قوية لا تقلولي

والله قوية
شو هالاسبارطة ما كنت سمعانة عنهم ميرسي ويلي عالمعلومات

[Gazita]

كاتب النص الأصلي : Willi

اسبارطة


وقت كان يجي الولد, اذا كان بنت بتبقى مع امها, اذا كان صبي, فكانو ياخدوه يعملو عليه فحص. في حال كان هالولد نظامي كانو يرجعوه لاهلو لحتى يصير عمرو7 سنين, بعدين بياخدوه على مخيم ليتدرب فيه. اما في حال الولد ما كان نظامي, يعني فيه شي مو صحيح. فكانو ياخدوه على تلة ويزتوه منها. ويموت (هالشي عرفوه لانو لقو عدة هياكل عظمية لولاد باسفل تلة بسبارتا).

الله يعين اللا نظامي

[Willi]

هلااااااااااااا

[nanoo33]

عجبوني كتير ....خوتان عل اخر بس بجد مهضومين و بيضحكو و عجبتني شغلة انو ما لازم يفرط بالدرع انو مستغنايين عنو بس الدرع لا...... بس بيستاهل انو مرتو هيك تقلو لكن بيقصولا شعرا و بيزتوا بالعتمة
اي الله لا يقيمو انشالله عمرو ما يرجع

[Willi]

اي مو بالضرورة مرتو هيك تقلو.

ممكن امو

[nanoo33]

اي لو كان مو ابو عمل فيا هيك
كمان بغض النظر و الله هيك ولد مصيبة اشو بدا فيه

[ميستي]

بس لو انك مكبر الخط شوي بصير الموضوع احلا


بس بالفعل شيء حلو والله

شكرا على المووضوع

[Willi]

اي لو كان مو ابو عمل فيا هيك
كمان بغض النظر و الله هيك ولد مصيبة اشو بدا فيه

اي كمان بصير.
بكرا قولي هيك لابنك

بس لو انك مكبر الخط شوي بصير الموضوع احلا


بس بالفعل شيء حلو والله

شكرا على المووضوع

انو اكبر من هيك ما بعود حدا بيقراه.
بصير الواحد بينجلط لما بيدخل عالموضوع.
نحن ما بدنا نجلط حدا