عبقرية القيادة... ادامك الله سيادة الرئيس

[yass]

لكن انا اختلف عنكم في الإسلوب ..
انا لا ارى ان الثورة هي الحل (زمن الثورات فات وولى ...)

أنا لما حكيت هالحكي ما قصدت الثورة كمفهوم مسلح مثلا...أنا برأيي هادا آخر شي لازم نلجأ لألو...أنا قصدي أنو لازم نبلش نشيل قناع الخوف و السكوت عن وجوهنا...ما عم بحكي شي نظري...يعني لازم الواحد فينا يبلش يسأل , هذا حقنا الطبيعي كمواطنين.. لازم ما نسكت عن الخطأ أبدا ولازم نقول للأعور أعور بوجهو, لازم ما نقبل أنو حدا يمس حقوقنا كائنا من يكون.
هالحكي بيجوز ما يصير بين يوم وليلة...المسؤول الفاسد بيجوز هلق يعمل شومابدو لأنو بيعرف أنو ماحدا راح يسألو شي, لما يبلشو الناس يستفسروا و يسألو و يطالبو, راح يعد للمية قبل ما يعمللو شي حركة, و بالأخير راح يسقط....
هاي نصيحتي...وطلبي ورجاءي....أنا ممنوع من دخول سوريا , أو بالأحرى مو رضيانين يجددولي جواز السفر السوري لأنو رفضت اعمل مقابلة مع مسؤول الأمن السياسي بالسفارة..لأني أرفض تماما أنو حقوقي كمواطن تكون مشروطة بتوجهي السياسي...لما واحد تاني وتالت ورابع يعملو متل ما ملت راح يضطرو يرضخو....لاتسكتو لحدا...سوريا ألنا..بلدنا,وطننا, و أمنا وماحدا وصي علينا

[mhmary]

كاتب النص الأصلي : yass

أنا لما حكيت هالحكي ما قصدت الثورة كمفهوم مسلح مثلا...أنا برأيي هادا آخر شي لازم نلجأ لألو...أنا قصدي أنو لازم نبلش نشيل قناع الخوف و السكوت عن وجوهنا...ما عم بحكي شي نظري...يعني لازم الواحد فينا يبلش يسأل , هذا حقنا الطبيعي كمواطنين.. لازم ما نسكت عن الخطأ أبدا ولازم نقول للأعور أعور بوجهو, لازم ما نقبل أنو حدا يمس حقوقنا كائنا من يكون.
هالحكي بيجوز ما يصير بين يوم وليلة...المسؤول الفاسد بيجوز هلق يعمل شومابدو لأنو بيعرف أنو ماحدا راح يسألو شي, لما يبلشو الناس يستفسروا و يسألو و يطالبو, راح يعد للمية قبل ما يعمللو شي حركة, و بالأخير راح يسقط....

حلوووووووووووووو هادا الحكي ألي ما علي غبار هلق بلشنا نفهم على بعض حلو كتير وقت قلت الثورة ما كمفهوم مسلح لأنو هاي بتجي بالأخير وألا بيصير فوضى ومشاكل أكتر ما كان وعفكرة جان جاك رستو وهو فيلسوف فرنسي وأحد مؤسسين الثورة الفرنسية قال أذا كل مواطن أعتنى بحديقة بيته سلم الوطن ومنهون من بلش الموظفين ألي عم بيشوفو رفيقون بالدائرة عم يرتشي لازم يشكو على وهكذا وأنا شايف وكتير من الشعب السوري شايف وهذا ما تمسيح جوخ أنو الرئيس بشار الأسد عم يسعى ليحقق ديمقراطية بس الشيء ألي صار خلال 40 سنة ما رح يتصلح بيوم وليلة(متل ما قال ياس) أنما بدو عشرات السنين واذا بتلاحظو أنو الوضع عم يتحسن والوزارة عم تتحسن والأنتخابات عم تصير عادلة أكتر مما يؤدي أنو مجلس الشعب رح يصير احسن وهكذا

[عاشق من فلسطين]

واحد تاني وتالت ورابع يعملو متل ما ملت راح يضطرو يرضخو....لاتسكتو لحدا...سوريا ألنا..بلدنا,وطننا, و أمنا وماحدا وصي علينا

دخيل ربك يا أبو مارل ..
وأنا حابب أحكي فكرة على أنو ليش العالم مفكرة الثورة تعني سلاح ودماء .. لا يا أخي الثورة آخر حلولها الدم ( ومو بكل الحالات تلجأ للدم) يا أخي الثورة لازم تكون ثورة داخلية يعني ثورة المواطن على نفسو يعني هي البلد مو بس للرئيس وللحكومة .. والبلد مانها بس الرئيس والحكومة البلد نحنا لأنو الرئيس بيجي وبيروح بس الشعب باقي .. لأنو الرئيس ممكن يخون بس السعب لأ .. لأنو الحكومة ممكن تهرب وقت الجد بس الشعب لا.. يعني لازم واحدنا يحس بمواطنيتو كسوري .. يا أخي اذا شاف الخطأ مالازم يسكت .. ومالازم يسكت ولو كلفو هالشي دماءو مو سجن شهر ولا شهرين بالمزة .. يعني لأيمتة بدنا نطل خايفين ومنتظرين كل شي من الرئيس .. يا أخي أنا رح أجي معكون على أنو الرئيس منيح بس البطانة فاسدة .. معكون حق .. بس الرئيس اذا ما شاف الشعب هايج وعم يحكي وعم يطالب بتغيير البطانة ماراح يغيرها .. يعني نحنا لازم نعمل شي .. ولكل المواين اللي شايفين الرئيس منيح لازم مايسكتو على الخطأ اذا بحبو رئسهون لأنو أنتو بتعرفو انو الرئيس تحت ضغوط من بعض المسؤلين كخدام والأحمر وغيرهون .. واذا الشعب ما طالب فمارح يقدر يعمل شي لأنو بيقلولو يا أخي الشعب ساكت شو بدك أنت من هالحكي ... يعني خلاصة الحكي اللي فعلا" بحب سوريا لاينتظر أنو حدا يقدملو شي لمواطنيتو .. لأنو هوي الوحيد اللي قارد يحس بمواطنيتو وهوي الوحيد اللي فيه يسترجعها ويعيشها ..
ولا تواخذونا ...

[yass]

وهذا ما تمسيح جوخ أنو الرئيس بشار الأسد عم يسعى ليحقق ديمقراطية بس الشيء ألي صار خلال 40 سنة ما رح يتصلح بيوم وليلة(متل ما قال ياس) أنما بدو عشرات السنين

أنا ما حكيت عن عشرات السنين...حكيت أنو مافينا نعمل شي بين يوم وليلة...
بعدين أنا أشك بشكل كبير جدا بالنية لدى القيادة السورية بالتغيير...و النية الاصلاحية لدى بشار الأسد ماني شايفها بنوب...بيجوز يكون عندو وعي حضاري قد الدنيي بس ما عم بيعبر عنها...وراح أكتبلك ليش:
1- لو فعلا عندو نية ديمقراطية كان ما سمح بمهزلة تعديل الدستور بثواني معدودة متل ماصار...صرنا مضحكة بالعالم على هالحركة....و لاتقللي ظروف وما ظروف لأنو أيامها ( سنة 2000) كان الوضع بالشرق الأوسط هادي جدا...لا انتفاضة و لاحرب العراق ولا حتى كانت هجمات أيلول صايرة...
2- بعد خمس سنين لسا ما طلع قانون أحزاب ولا هم يحزنون...السجون السياسية و مساجين الرأي موجودين و باعتراف الحكومة ( لاحظ أنو أيام أبوه ما كانو معترفين بالسجن السياسي)
3- التعديات و الممارسات المافياوية تبعون قرايبو والمقربين لألو صارت عالمكشوف ( أيام أبوه كانت كمان موجودة طبعا بس ما كنا نسمع عالمكشوف بمليونير كنيتو مخلوف أو الأسد أو شاليش...وهلأ النخبة الاقتصادية السورية كلنا بنعرف مين هيي وما في داعي اكتب أسامي...

هلأ بشار الأسد صارلو خمس سنين تقريبا كرئيس للجمهورية العربية السورية...يعني ظللو سنتين لحتى تنتهي ولايتو...طيب , راح قول رأيي بشو لازم يعمل لحتى يكون فعلا رجل ديمقراطي...
1-بمؤتمر البعث اللي راح ينعقد خلال هالسنة لازم تطلع قيادة قطرية جديدة تماما...و يفضل كمان يكونو شباب ومن القاعدة الحزبية ( ما بدنا اسامي لامعة لأولاد البابا متل جمال خدام وفراس طلاس ومن هالحكي...ملينا ) ويفضل أنو ما بيطلع هوي أمين عام ...
2- يعدل الدستور بحيث يفصل حزب البعث عن الدولة تماما ...و يلغي كل امتيازات حزب البعث المادية و المعنوية.و يصدر قانون أحزاب شامل وحر...عندو وقت بكفاية...الدستور تعدل لأجلو بثواني...و لسا عندو سنتين لحتى يعمل هالحكي
3- يلغي كام جهاز أمني أو يقيد صلاحياتها و خصوصا الأجهزة الأمنية التابعة للجيش ( المخابرات الجوية مثلا ) و الباقي يدمجو كلو بجهاز واحد تابع لوزارة الداخلية فعليا...
4- أطلاق سراح جميع السجناء السياسيين و اعلان ميثاق وحدة وطنية سورية تشمل جميع الأحزاب الدستورية ( بعد قانون الأحزاب يعني) و الأقليات جميعها....يعني فرصة حلوة لحل المشكلة الكردية مثلا..
5- بعد هالسنتين وكل هالأجراءات بيعمل انتخابات...بتكون برلمانية ورئاسية....الحكومة ( قصدي رئيس الوزراء و الوزراء ) بيطلعو من البرلمان من الحزب اللي يكون عندو أغلبية أو تحالفات عدة أحزاب لتحقيق هالأغلبية....و الرئاسية على طرف...ويكون في عدة مرشحين لرئاسة الجمهورية...من الأحزاب أو حتى شخصيات مستقلة....

اذا عمل هالحكي....ورشح حالو للانتخابات, أنا متأكد من فوزو.
..وساعتها راح يكون رئيس بلدي عن حق و حقيق, لأنو شعبي اختارو....

آسف يعني كترت عليكون الحكي....بس حبيت أكتب رأيي بكيف ممكن يكون عنا تحول ديمقراطي هادئ و حضاري...

تحياتي

[عاشق من فلسطين]

كلام سليم أبو مارل بس بس الفكرة أنو مابظن رح يصير هيك شي لأنو ماحدا سآل وماحدا عم يطالب بهالشي الا القلائل (ومعظمهون بالسجن ) يعني بدون مظاهرات شعبية تتطالب بالأمور اللي أنت حكيتها ماحدا رح يعمل شي لا الرئيس ولا غيرو .. لأنو متل ماحكيت أنت عندو فكر حضاري .. بس الفكر شي وأنك تطبقوا شي .. والهيئة الزلمة مو ناوي يطبقوا على كلن مشان مانظلموا انا ناطر لبعد المؤتمر القطري .. وبعدها بدوب التلج وببان المرج .. مع أنو المرج باين .. بس يعني الواحد بيقول لحالو بلكي ..
وبالنسبة لشغلة المحسوبيات والمليونيرية ( مخلوف وطلاس وغيرهون ) ففعلا" كانو موجودين على زمن أبوه بس ماكنا نسمع فيهون بس حاليا" كشرو عن أنيابون بكل وقاحة يعني على مبدأ أعلى مابيخليك يا شعب اركبوا .. وبالنسبة للمساجين السياسيين .. فكمان نفس الشي يعني بيطلعوا المسؤولين وبكل وقاحة وبيصرحو بوجود سجن سياسي وبأنو مخصص لخونة البلد ..
يعني الموضوع متل ماحكيت ما بيمشي حالو بين يوم وليلة بس لما يصير في نية حقيقية من قبل الحكومة والرئيس .. وارادة حقيقية وواضحة وواعية وصريحة من قبل الشعب ( يمكن كتار هدول بس بيصيرو كلون لما ينكسر الخوف اللي عند الشعب من قبل الشعب نفسو) فالموضوع بيمشي حالو بظرف سنتين زمان مو أكتر ..

ولا تواخذونا ..