القمة العربية !!!

[al7alla2]

الجزائر (رويترز) -

انتزع الزعيم الليبي معمر القذافي الاضواء يوم الاربعاء في مؤتمر القمة العربي بالجزائر العاصمة واصفا الاسرائيليين والفلسطينيين بأنهم "أغبياء" لانهم يسعون الى دولتين منفصلتين وقال ان مجلس الامن الدولي "مجلس رعب".

وأعطى الجزائريون الذين يستضيفون القمة التي بدأت يوم الثلاثاء الزعيم الليبي فرصة للنجومية بخطاب ألقاه في اليوم الاخير للقمة وتحدث فيه طويلا عن شكاوى العرب من العلاقات الدولية.

وأعلن القادة العرب في ختام أعمال القمة يوم الاربعاء مبادرة سلام عربية تقوم على اقامة علاقات طبيعية مع اسرائيل مقابل انسحابها الى حدود عام 1967 وقيام دولة فلسطينية.

لكن القذافي سبح ضد التيار طارحا وجهة نظر الاقلية التي ترى أن حل النزاع العربي الاسرائيلي يكمن في أن يعيش الشعبان في دولة واحدة. وقد قابل من عناهم القذافي بالكلام خطابه الذي استمر ساعة باستخفاف وبابتسامات ومنهم الرئيس الفلسطيني محمود عباس ووزير الخارجية العراقي هوشيار زيباري.

لكن الخطاب قوبل بتصفيق طويل لانه طرح أفكارا يعبر عنها كثير من العرب في أحاديثهم الخاصة وان كان قادتهم يتجنبون التحدث بها علنا.

وكان بين الحضور الامين العام للامم المتحدة كوفي عنان الذي كان خطابه أمام القمة دبلوماسيا كالعادة.

وهنأ الرئيس الجزائري عبدالعزيز بوتفليقة مضيف المؤتمر القذافي على صراحته. وقال "أعتقد باخلاص أن ما جاء في أفكاره فيه الكثير من الافكار الحقيقية. الافكار التي تنخر ضمائرنا وقلوبنا. لكن الفرق الذي يفرقني معه هو أنني مسؤول على (عن) دولة وعلى شعب." وأضاف "لو كنت خالي (خارج) السلطة لربما فكرت به ولربما كنت من دعاته. ولكن أنا مسؤول على الشعب الجزائري أخشى الله فيه وأخشى أن أسيء اليه."

وقال القذافي في كلمته ان اسرائيل ليس لها الحق في الوجود لان مواطنيها الفلسطينيين لم يقبلوا بها قط. وأضاف "أنا شخصيا لا يمكن أن أعترف لا بدولة اسرائيلية ولا فلسطينية لان اسرائيل ما هي اسرائيل ولا فلسطين هي فلسطين. وأقول للأخ أبو مازن ما تزعلش... الفلسطينيين أغبياء والاسرائيليين أغبياء."

وأضاف أن اسرائيل على خطأ في محاولة التمسك بالضفة الغربية في مواجهة الهجمات الفلسطينية وان الفلسطينيين على خطأ لانهم لم يقيموا دولة فلسطينية بعد 1948.

وقال "أولا الاسرائيليين تركوا الضفة الغربية وقطاع غزة عشرين سنة ولم يهتموا بها. أعلنوا دولة سموها اسرائيل عام 1948. مادامت غير مهمة فلماذا يقاتلون الان من أجلها؟ هذا غباء."

وتابع "اليهود يموتون بالعشرات بواسطة الفدائيين الفلسطينيين حتى في تل أبيب بسبب وجودهم في الضفة الغربية وقطاع غزة.

"الفلسطينيين أغبياء لان هذه الارض كانت بيدهم عشرين سنة لماذا لم يقيموا فيها دولة؟ اشمعنى الان يموتوا بالعشرات لكي يعملوا دولة في الضفة الغربية وقطاع غزة؟ ما هي كانت في يدكم الضفة الغربية وقطاع غزة."

وقال القذافي الذي وصف نفسه في مستهل الخطاب بأنه عميد القادة العرب "الحل لا يأتي الا من الفلسطينيين والاسرائيليين… الجيل الجديد من الفلسطينيين واليهود هم الذين سيجلسون مع بعض ويعملون دولة واحدة ديمقراطية."

وأنكر القذافي أن يكون الفقر هو السبب في "الارهاب" الذي يرتكبه اسلاميون. وقال "اذن ما هو السبب في هذه الظاهرة؟ السبب واضح جدا يا اخوانا. فيه غبن.

"فيه ظلم. فيه استكبار. فيه تطاول. فيه اهانة. فيه امتهان. فيه استباحة لهذه الامة (العربية) التي ولدت الارهابيين."

وأضاف "اذا كان تقولي انت فاسد تبغي الاصلاح وانت طفل تبغي اني نعلمك ونضربك على صباعك وانت ما عندكش قانون وزواجكم غلط وختانكم غلط وعلاقاتكم الاجتماعية غلط… هذه هي اللي تخلق مليون بن لادن."

ووافقت القمة العربية على مساندة مصر في مسعاها للحصول على عضوية دائمة في مجلس الامن التابع للامم المتحدة.

لكن القذافي قال انه يؤيد نقل سلطات مجلس الامن الى الجمعية العامة للامم المتحدة التي يعتبرها البرلمان الحقيقي للدول.

وقال القذافي مخاطبا أوروبا والولايات المتحدة "يجب أن يسمع صوتنا".وأضاف "ان ... تجاهلتونا هتخسروا في النهاية."

وأكد أن مقاومة الارهاب غير ممكنة بدون احترام العرب. واستنكر سعي الدول لتوسيع مجلس. وقال "مجلس الامن بالنسبة لنا مجلس رعب ما هو مجلس أمن".



لاتعليق

[عاشق من فلسطين]

لك يلعن شرف أشرف واحد كان بالقمة العربية .. كلهون كلاب .. قال لجان مطالبة وما بعرف شو .. والمقررات كالعادة ..ولا أكتر شي زعجني موقف رئيسنا اللي كان قريب على كل شي الا على أنو موقف رجولي .. يعني ما بيعرف ياخد موقف ..لكن الأردن اليهودية بدها تتابعلنا عملية السلام والمفاوضات تبعنا .. أي شو هالمنطق هاد .. ولا حسني مبارك (الله لا يبارك فيه) صار الو مواقف وكلمة ..
أي يا عيب الشوم عليهن .. لك لو واحد فيهن فيه ذرة شرف ما كان بيروح ..
شباب لا تواخذونا مشان الله يمكن أول مرة بتشوفوني معصب هيك .. بس أنا وعم شوف القمة حسيت حالي كسوري ..قد الكمشة بفضل رئيسنا الله يخليلنا اياه ..

[yass]

القذافي شخصية يا زلمة...لا تقولولي لأ
.
.
.
.
.
.
شخصية كوميدية طبعا

[عاشق من فلسطين]

القذافي شخصية يا زلمة...لا تقولولي لأ
.
.
.
.
.
.
شخصية كوميدية طبعا

كل اللي كانو بالقمة شخصيات كوميدية . أو حيوانية .. أو خائنة .. كلهن بلا شرف ..

[yass]

كل اللي كانو بالقمة شخصيات كوميدية . أو حيوانية .. أو خائنة .. كلهن بلا شرف

يعني هلأ لحتى عرفناهون هيك؟؟؟ من زمان معروف هالحكي, عالقليلة هالمرة ما تقاتلو و حردو و فضحونا قدام العالم كلو فوق مو فاضحينا

[عاشق من فلسطين]

يعني هلأ لحتى عرفناهون هيك؟؟؟ من زمان معروف هالحكي, عالقليلة هالمرة ما تقاتلو و حردو و فضحونا قدام العالم كلو فوق مو فاضحينا

ما هي المصيبة .. أنو بعفو حالون مسخرة وضحك على العالم .. ولسا بيروحو .. لك آخخخخخخخخخخخخخخخخخخخ .. والله رح جن ..

[حسون]

كاتب النص الأصلي : عاشق من فلسطين

لك يلعن شرف أشرف واحد كان بالقمة العربية .. كلهون كلاب :

[ليل]

كاتب النص الأصلي : عاشق من فلسطين

شباب لا تواخذونا مشان الله يمكن أول مرة بتشوفوني معصب هيك .. بس أنا وعم شوف القمة حسيت حالي كسوري ..قد الكمشة بفضل رئيسنا الله يخليلنا اياه ..

ممكن أفهم ليش حسيت حالك قد الكمشة ...وبعرفك أنك أكبر بشوي

[عاشق من فلسطين]

ممكن أفهم ليش حسيت حالك قد الكمشة ...وبعرفك أنك أكبر بشوي

أول شي أخ ليل .. بتمنى أنك تحكي بتهذيب أكبر .. وتاني شي .. لما أنا بشوف بشار الأسد اللي هوي مثل سوريا بالقمة .. عم يشحد حقو بأنو يكون بلجنة المطالبة بالحقوق السورية اللبنانية الفلسطينية .. حسيت حالي قد الكمشة .. ولما بشوف ممثلي عم يتضحك على نكت بايخة من معمر القذافي .. بجو هوي وبلدو بخطر .. بحس حالي قد الكمشة .. ولما بشوف رئيسي مو قدران يرفض دخول الأردن العميلة والصهيونية باللجنة .. بحس حالي قد الكمشة .. ولما بشوف واحد سوري متلك مو عرفان الله وين حاطو وما بيعرف غير بالروح بالدم نفديك يا بشار .. بحس حالي قد الكمشة .. وبقلك آخر شي الله ينورها عليك يا ليل ..

[حسون]

كاتب النص الأصلي : عاشق من فلسطين

أول شي أخ ليل .. بتمنى أنك تحكي بتهذيب أكبر .. وتاني شي .. لما أنا بشوف بشار الأسد اللي هوي مثل سوريا بالقمة .. عم يشحد حقو بأنو يكون بلجنة المطالبة بالحقوق السورية اللبنانية الفلسطينية .. حسيت حالي قد الكمشة .. ولما بشوف ممثلي عم يتضحك على نكت بايخة من معمر القذافي .. بجو هوي وبلدو بخطر .. بحس حالي قد الكمشة .. ولما بشوف رئيسي مو قدران يرفض دخول الأردن العميلة والصهيونية باللجنة .. بحس حالي قد الكمشة .. ولما بشوف واحد سوري متلك مو عرفان الله وين حاطو وما بيعرف غير بالروح بالدم نفديك يا بشار .. بحس حالي قد الكمشة .. وبقلك آخر شي الله ينورها عليك يا ليل ..

[Hus]

كل اللي كانو بالقمة شخصيات كوميدية . أو حيوانية .. أو خائنة .. كلهن بلا شرف ..

+

يعني هلأ لحتى عرفناهون هيك؟؟؟ من زمان معروف هالحكي, عالقليلة هالمرة ما تقاتلو و حردو و فضحونا قدام العالم كلو فوق مو فاضحينا

الحكم على 20 رئيس عربي بالبلاهة والغباء او بالخيانة والتخازل حكم غبي ..
انا بقدر افهم انو في واحد لسبب او لأخر خان شعبو وخان وطنو
بقدر افهم في اتنين .. في تلاتي .. بس ما بقدر افهم في 20 رئيس خائن ومخازل وحيوان و و و و ..

لانو ما عندي مبرر لانو يكون هيك ..
يعني شو الدوافع الي بتدفع رئيس اي كان انو يخون بلدو ؟؟؟؟؟؟
عم ياخد رشوة مثلا من اميركا؟؟ (((ليش ما كل بنوك الدولة تحت امرو .. اكيد مانو بحاجة الرشوة))))
عم ياخد رشوة من نوع تاني .. يعني شو عم بيوردولو روسيات!!((( ليش ما كل .... تحت امرو ))) من صغيرهم لكبريرهم

الفكرة انو احنا ما منبقل الإختلاف
اي شخص بيختلف عني فهو غلط
مع انو كلمة مختلف ليست مرادف او مضاد لكمة غلط ؟؟
بس مع الأيام احنا ضفناها للقاموس وعملناها بالقوة مرادف مختلف هو غلط !!!

اي بدي قولو ودائما بضل بقولو انو ما بينفع يكون في حاكم غبي او حيوان او غلط او او ..
بس كل ماهناك انو احنا عم انشوف من منظار وهوي عم بيشوف من منظار
احنا منشوف ومنقيس على حالنا .. دام احنا مرتاحين = البلد بخير والحكومة رهيبة
دام احنا ما مبسوطين وما مرتاحين = الحكومة فاسدة غاشمة !
فقط هذا المنظار الي عم انشوف منه والي منقدر انشوف منه ..

الحكومة (اي حكومة) ليها منظور و معطياة تانية غير الي امامنا ..
ما فينا نحكم علي تصرفها بدون ما نعرف المعطياة التانية
وما فينا نعرف المعطياة التانية لانها من اختصاص الحكومة

بيفضل بإيدنا حل واحد ... سحب السقة عند الحد الأحمر ...
يعني قصدي ما بينفع نحكم على الحكومة بس بينفع نحكم على نتائج الحكومة ..
ولما نتائج الحكومة (اي حكومة) بتتعدى حد خط احمر منسحب السقة منها (شعبيا)
وبس هيك .. بس انو الحكومات العربية قاطبة والحكام العرب كلهم فاسدين غاشمين بلهاء فهذا كلام ما بيدخل بعقل .. لاء ما بيدخل بعقل اي عاقل

[yass]

طريقة وصولهم للحكم ( جميعا) و أساليبهم الديمقراطية الحضارية ( جميعا) و أرصدتهم ببنوك سويسرا ( جميعا) بتحكي منيح عنهم....هاد رأيي.
بس أنا حاليا مقتنع بأنو الشعب العربي بيحب يندعس....ماسوكستي اذا بدك..
لما واحد مهرج متل القذافي يحكي ساعة زمان ويخطب ويسمي حالو عميد الزعماء ومدري شو!!! مسخرة يا شيخ, بس بتعرف شو المشكلة؟؟ أنو الظاهر الليبيين فرحانين عليه...هاد الظاهر.
وصلت لقناعة أنو الحكام العرب ما ألهون ذنب ( حثالات بشرية بيظللو حسب رأيي المتواضع) بس ما الون ذنب.. لما عم بيهرجو,بيشوفو حالون, بيغتنو,و يعملو شو مابدون وما بيشوفو حواليهون غير التطبيل و التزمير و التصفيق و الهتاف....معناتو الشعب فرحان ( احتمال رقم واحد/مستبعد برأيي) أو الاحتمال الثاني هوي اللي قلتو قبل..شعبنا ماسوكستي , بيصفق و يفرح لمعذبينو...
بزماناتو أيام ما كنت بالبلد طلع واحد قرايبي من السجن بعد 15 سنة لأنو كان بعثي يميني, رحنا نسلم عليه, ولاقيناه فاتح أبواب بيتو ومشغل كل الأضوية متل كأنو عرس..وقاعد بصدر الدار متل العريس و أحلى شي أنو مزين كل البيت بصور حافظ الأسدو بشار وما بعرف شو...أنا انخيلت, تزكرتو لهالزلمة لأنو وصلني خبر وفاتو امبارح بعيد عنكون...والبقية بحياتكون
المهم...حاصله و بعد كل هالعلاك الفاضي...راح قلكون شو هوي الشعار اللي بدي أناضل من أجلو

يحق لأي مواطن عربي معرفة من صاحب اليد التي تمسك بالسوط الذي يجلده...لكي يستطيع أن يصفق و يهتف له

[ليل]

مين اللي خبرك أني في أقصى اليمين ...واني من جماعة بالروح بالدم ...بس اكيد ما عندي ولاء لأي شعار سواء كان في السلطة او في المعارضة..كل اللي صاير انك ما عم تفهم أنو في عالم ولائها الوحيد للارض ..واللي بيهمها مصلحة الشعب...
فبيتبنوا مواقف وما بيتبنوا أشخاص...بس اللي صاير عندك إنك بتسب شخص وشو مابيعمل هادا الشخص...
وما بتشوف إلا النقاط السلبية...
وحتى لو ما كنت بعرف الله وين حاطتنني ...بس بعرف أحكي عن رأيي بأي حدا بكل تجرد لأنو ما بنتمي لحزب خسر في مرحلة..أو لحزب ربح بهي المرحلة ..
أنا سوري وبس....... وبوعدك صير مهذب أكتر بس تصير متجرد اكتر...

[القيصر 76]

مين اللي خبرك أني في أقصى اليمين ...واني من جماعة بالروح بالدم ...بس اكيد ما عندي ولاء لأي شعار سواء كان في السلطة او في المعارضة..كل اللي صاير انك ما عم تفهم أنو في عالم ولائها الوحيد للارض ..واللي بيهمها مصلحة الشعب...
فبيتبنوا مواقف وما بيتبنوا أشخاص...بس اللي صاير عندك إنك بتسب شخص وشو مابيعمل هادا الشخص...
وما بتشوف إلا النقاط السلبية...
وحتى لو ما كنت بعرف الله وين حاطتنني ...بس بعرف أحكي عن رأيي بأي حدا بكل تجرد لأنو ما بنتمي لحزب خسر في مرحلة..أو لحزب ربح بهي المرحلة ..
أنا سوري وبس....... وبوعدك صير مهذب أكتر بس تصير متجرد اكتر...

[mhmary]

شباب أنا ما بدي أتفهم بأخرت الحوار بس بدي قول شغلة أنو كل الردود المكتوبة هي عبارة عن شتائم ليس لها اي قيمة أو فائدة أو معنى ما عدا رد الدكتور ورد ياس مع أنو نسبيا منتاقضين بس المهم أنو عم يعطو وجه نظر فيا فائدة وأنا من ناحيتي بايد وجهة نظر الدكتور أكتر من الأخ ياس

[عاشق من فلسطين]

الى الدكتور حسام

الحكم على 20 رئيس عربي بالبلاهة والغباء او بالخيانة والتخازل حكم غبي ..
انا بقدر افهم انو في واحد لسبب او لأخر خان شعبو وخان وطنو
بقدر افهم في اتنين .. في تلاتي .. بس ما بقدر افهم في 20 رئيس خائن ومخازل وحيوان و و و و ..

دكتور ما حاد حكم عليهون .. هنن حكموا على أنفسهون .. ويعني شو فيك تسمي أشخاص صرلها تلاتين سنة ما عملت شي لا لعروبتها ولا لبلدها الى عن طريق الذل والتنازلات ..

يعني شو الدوافع الي بتدفع رئيس اي كان انو يخون بلدو ؟؟؟؟؟؟

الكرسي ..

اي بدي قولو ودائما بضل بقولو انو ما بينفع يكون في حاكم غبي او حيوان او غلط او او ..
بس كل ماهناك انو احنا عم انشوف من منظار وهوي عم بيشوف من منظار
احنا منشوف ومنقيس على حالنا .. دام احنا مرتاحين = البلد بخير والحكومة رهيبة
دام احنا ما مبسوطين وما مرتاحين = الحكومة فاسدة غاشمة !
فقط هذا المنظار الي عم انشوف منه والي منقدر انشوف منه ..

هوي هادا المقياس ما بيصير ناخدو ببداية حكم سلطة .. بس لما سلطة بيكون الها 35 سنة .. فأكيد هادا هوي المقياس الوحيد ..
لأنو أكيد ماراح يكون المقياس .. أنو اذا الحاكم مبسوط ومرتاح = الشعب مبسوط ومرتاح ..
أو اذا الحاكم مزعوج وقلق = الشعب مزعوج قلق .. لأنو المقياس الحقيقي هوي (شعب مرتاح = حاكم قلق وغير مرتاح " لسعيه الدائم والدؤوب نحو الأفضل")

الحكومة (اي حكومة) ليها منظور و معطياة تانية غير الي امامنا ..
ما فينا نحكم علي تصرفها بدون ما نعرف المعطياة التانية
وما فينا نعرف المعطياة التانية لانها من اختصاص الحكومة

معطيات أي حكومة وطنية وحقيقية هي معطيات نابعة من معطيات الشعب واحتياجاته ومصلحته الوطنية والاجتماعية و و و ..
واذا الشعب ما حكم على تصرفها مين بدو يحكم هيي مثلا" (ماحدا بيقول عن زيتو عكر) وبحب قلك أنو اختصاص الحكومة هوي من اختصاص الشعب يعني ما فيك تقلي أنو الحكومة لما تعمل شي لمصلحة الشعب رح يكون بطريقة أو بمعطيات الشعب ما راح يفهمها ..

ولما نتائج الحكومة (اي حكومة) بتتعدى حد خط احمر منسحب السقة منها (شعبيا)
وبس هيك .. بس انو الحكومات العربية قاطبة والحكام العرب كلهم فاسدين غاشمين بلهاء فهذا كلام ما بيدخل بعقل .. لاء ما بيدخل بعقل اي عاقل

ليك دكتور أي حكومة من حقها تاخد كذا فرصة من الشعب .. والشعب من واجبو ما يحكم عليها بالفساد أو يسحب الثقة عنها من أول نكسة أو خطأ .. بس لو بدها تمطر كانت غيمة .. لك هدول 35 سنة لك دكتور .. يعني 35 سنة من الفساد وتدمير البلد وتحجيم المواطن وزرع شعور الهزيمة بداخلو .. وعلى فكرة أنا حابب قلك أنو كل شخص بيشوف الحكام العرب (دون استثناء) مانهون فاسدين و مانهون غاشمين .. فهادا هوي عين الجنون واللا تعقل ..


أبو مارل حكيت شغلة حلوة كتير

طريقة وصولهم للحكم ( جميعا) و أساليبهم الديمقراطية الحضارية ( جميعا) و أرصدتهم ببنوك سويسرا ( جميعا) بتحكي منيح عنهم....هاد رأيي.
بس أنا حاليا مقتنع بأنو الشعب العربي بيحب يندعس....ماسوكستي اذا بدك..

أنا ماني معك مية بالمية بهالموضوع الشعب العربي ما بيحب يندعس .. أنما تعود يندعس وصار أمر روتيني وعادي .. وأنا متل ما بحمل الحكومة وزر الواقع اللي وصلنالو .. كمان بحمل الشعب مسؤولية لأنو ضل ساكت لأنو كان خيالي .. لأنو كان ميت ..

يحق لأي مواطن عربي معرفة من صاحب اليد التي تمسك بالسوط الذي يجلده...لكي يستطيع أن يصفق و يهتف له

حتى هي الشغلة مو منحقو يعرفها .. بس في عالم للأسف بتعرفها .. ومبسوطة فيها .. وبتحط صورها وبتفتخر فيها ..

ليل الغالي

مين اللي خبرك أني في أقصى اليمين ...واني من جماعة بالروح بالدم ...بس اكيد ما عندي ولاء لأي شعار سواء كان في السلطة او في المعارضة..كل اللي صاير انك ما عم تفهم أنو في عالم ولائها الوحيد للارض ..واللي بيهمها مصلحة الشعب...
فبيتبنوا مواقف وما بيتبنوا أشخاص...بس اللي صاير عندك إنك بتسب شخص وشو مابيعمل هادا الشخص...
وما بتشوف إلا النقاط السلبية...

أنا أسف لأني كنت مفكر من أقصى اليمين .. بس يعني منيح وضحت وجهة نظرك .. لأنو أنت اسمحلي قلك انو انت من العالم اللي بيسموهن الوصوليين .. يعني حسب السوق من سوق .. ومعاهون معاهون عليهن عليهن .. يعني وضع بلد متل سوريا ما فيك تكون غير مع السلطة أو ضد .. أما أنك تنتظر المنتصر لتكون معو فهاد مو منطقي ..

وبوعدك صير مهذب أكتر بس تصير متجرد اكتر...

رح أجي معك أني ما ني متجرد .. بس عدم تجردي بتهذيب لا يسمح لك التجرد بقلة التهذيب ..
ورأيي مادام عم أطرحو بتهذيب دون توجيه اهانات بدك تحترمو لو كان غير متجرد وترد عليه بتهذيب .. والا لا تشارك بالحديث ..

أنا سوري وبس

وعلى فكرة انا بعرف أنك سوري وما في داعي تحكي هالشي .. وماحدا شكك بوطنيتك .. وحبك لبلدك ..

الأخ معماري

شباب أنا ما بدي أتفهم بأخرت الحوار بس بدي قول شغلة أنو كل الردود المكتوبة هي عبارة عن شتائم ليس لها اي قيمة أو فائدة أو معنى ما عدا رد الدكتور ورد ياس مع أنو نسبيا منتاقضين بس المهم أنو عم يعطو وجه نظر فيا فائدة وأنا من ناحيتي بايد وجهة نظر الدكتور أكتر من الأخ ياس

يعني هي قمة السلبية بالنقاش ..

[to live is to die]

خابب قول للدكتور تعليقا على قولو

الفكرة انو احنا ما منبقل الإختلاف
اي شخص بيختلف عني فهو غلط
مع انو كلمة مختلف ليست مرادف او مضاد لكمة غلط ؟؟
بس مع الأيام احنا ضفناها للقاموس وعملناها بالقوة مرادف مختلف هو غلط !!!

التي بنيت عليها فكرة المنظور المختلف وليس الخاطئ
الفكرة صحيحة مئة بالمئة
ولكن عندما عندما تقود وجهة النظر التي تتبناها السلطة الى أن تفصل نفسها عن الجماهير
ويكون هذا الاختلاف في وجهة النظر يقود الى استمرارية السلطة فقط فاعتقد أننا نتفق أن هذا المنظور ليس مختلف عن منظورنا بل هو مخطئ بحقنا
وأود أن أشير إلى أن المرحلة القادمة هي أصعب مرحلة في تاريخنا كسوريين
فهناك خطة لإسقاط النظام في سوريه
وقوى المعارضة الداخلية غير فاعلة وتكتفي بالكلام
وهي لا تعمل على توسيع قاعدتها الشعبية
ولا تسعى لطرح مشاريع واضحة للمشاركة في السلطة
ولا تسعى للظهور إن ظهرت فهي إما للمطالبة بالإفراج عن المعتقلين أو لوقف العمل بقانون الطوارئ
هذه المعارضة غير منظمة
بل إنها تثير الشفقة
فمطالبها إما فجة وطخمة (تغيير النظام بأكمله)
أو كما ذكرت سابقا (المعتقلين
ألا يوجد معارضين إلا في السجون
ألا يوجد جيل جديد من المعارضة
النضال لأجل الكرامة والحرية لا يحتاج الى توقف
أما معارضتنا في الخارج
وجبهتها الأقوى من الإخوان المسلمين
والتي تعمل الان على اسقاط النظام وتولي السلطة لتسيل الستثمارات السياسية الأمريكية في سورية
فهي تعمل في الظلام في سوريا لتوسيع قواعدها الشعبية
وهي اكثر نجاحا من جميع أشكال المعارضة في الداخل لأنها تتبع أحد أشكال التنظيم
وهي إن وصلت للسلطة ستتبع الفكر الإسلامي
وستمارس سياسة ديكتاتورية الأكثرية في جميع الصعد والمجالات
أنا أوجه نداء إلى جميع الإخوة في المنتدى اللذين ينتمون الى أي تنظيم معارض إلى أن يلفت انتباه التنظيمات التي ينتمي لها العمل على توسيع القواعد الشعبية ليس لأحل اسقاط النظام وانما لمواجهة ما سيحصل في المستقبل الغير بعيد وأنا لاأكره المعارضة في سورية ولكن أتأمل منها أن تتطور وتظهر كشريك في القيادة وثم المطالب والمحاسبة ثم الحرية والديمقراطية


وأما بالنسبة للقمة فلا داعي للنقاش بها فهي وكأنها لم تكن
ولا استطيع تحميل ذنب الأمة للرؤساء بل للشعوب النائمة من 600 عام

[yass]

فهناك خطة لإسقاط النظام في سوريه

ماني مقتنع بهالشي....السلطة الموجودة حاليا بسوريا هي الجهة الأكثر ملائمة للمصالح الأمريكية ... اذا عم نحكي أنو المؤامرة امريكية

وقوى المعارضة الداخلية غير فاعلة وتكتفي بالكلام
وهي لا تعمل على توسيع قاعدتها الشعبية
ولا تسعى لطرح مشاريع واضحة للمشاركة في السلطة

فهمان عليك... اذا عم نحكي عن المعارضة كأحزاب...من السهل أنو نحكي هيك وهلأ قاعدين و مبسوطين, بس اتذكر أنو القبضة الأمنية بالثمانينات و التسعينات كانت خانقة جدا....هامش العمل كان جدا ضيق....أي نفس بتنسحب ع تدمر....شو بدك أياهون يشتغلو هيك؟

ولا تسعى للظهور إن ظهرت فهي إما للمطالبة بالإفراج عن المعتقلين أو لوقف العمل بقانون الطوارئ

كتر الله خيرون....ولسا عم بيشتغلو....رياض الترك انسجن آخر مرة ع كلمة "ديكتاتور" حكاها بقناة الجزيرة

هذه المعارضة غير منظمة
بل إنها تثير الشفقة

للاسف حاليا كل شي بسوريا حاليا يثير الشفقة

أما معارضتنا في الخارج
وجبهتها الأقوى من الإخوان المسلمين
والتي تعمل الان على اسقاط النظام وتولي السلطة لتسيل الستثمارات السياسية الأمريكية في سورية
فهي تعمل في الظلام في سوريا لتوسيع قواعدها الشعبية

هون ماني معك, لو الأخوان حيمشو المصالح الأمريكية عن جد كان من زمان حاكمين بسوريا و بمصر كمان...الاخوان ما بحبهون ولا بحب خطابهم السياسي ولا نهجهم ولا خططهم....بس ما فيني أشكك بوطنيتهم, و اتهامهم بالعمالة خاطئ جدا برأيي

ولكن أتأمل منها أن تتطور وتظهر كشريك في القيادة وثم المطالب والمحاسبة ثم الحرية والديمقراطية

ما عم تنعطالها الفرصة... النظام البعثي لساتو حاط عصبة على عيونو....لما المعارضة عم بتمد أيدها و بتعرض الحوار و الوفاق السلطة ما عم بترد
برأيي المعارضة السورية بالداخل عم بتدفع ثمن عدم استعانتها بجهات خارجية ( لا تفهموني غلط ... أنا فخور بهالشي, اخلع القبعة لرياض الترك لما رفض اللجوء لفرنسا) لكن هذا الرفض ثمنه التجاهل من قبل الرأي العام الدولي, ومن قبل النظام البعثي, وهذا خطأ تاريخي فظيع برأيي

وأما بالنسبة للقمة فلا داعي للنقاش بها فهي وكأنها لم تكن
ولا استطيع تحميل ذنب الأمة للرؤساء بل للشعوب النائمة من 600 عام

اذا الشعب يوما أراد الحياة فلا بد أن يستجيب القدر

بس مو ليريد الحياة أولا...أنا أفهم سلبية موقف الشعب السوري, المواطن يادوب ملحق حق خبزات ولادو لحتى نجي نطلب منو يطالب و يرفض و يسأل....شي طبيعي يكون الوضع هيك, بس دايما يظل في أمل بسوريتنا

تحياتي