محــــــــــــاولات ...

[yass]

المعرض السادس: مطر.. بحارتنا


امبارح و أنا راجع بالليل من الدوام كانت معي الكاميرا, فـ بالطريق بين الكراج وين ببيّت السيارة و البيت, عملت كم صورة لأنو كان المطر موقّفلو شوي...

الصور مجعلكين شوي بسبب الاستعجال, و انو كاميرا بأيد و شنطة الصدرية و تياب المناوبات و السماعة بايد.. و الشمسية عم تطوف لحالا بالهوا .. فانو لا تآخدونا كتير يعني

لوركا قال انو المطر بسانتياغو تحفة فنية, و تعلّم الغاليثية (لغة أهل غاليثيا, تختلف عن الاسباني) بس ليكتب قصيدة بمطر سانتياغو (عندي القصيدة مغنّاة.. قولو لشوش تذكرني حطها هون المسا ) لكن هالمعرض مانو عن المطر بسانتياغو, هداك بدو واحد شغل رواق.. هدول هيك شوية صور هبل بالحارة, يعني لا تحسبوها علينا معرض عن المطر




هاي الصورة مبارح فجرا, أول ما فقت من النوم فتحت الشباك (هاي من شبّاك غرفتي ) و شفت السما هيك, حاولت صوّرها بشكل أفضل بس انو احسبو حساب اني كنت فايق من شوي
_______________________





سقفية السيارة.. هون حاولت اعمل شغلة ما زبطت

__________________________________________





شارع سان ميغيل... هاد بالقسم العلوي لبداية المنطقة القديمة (المنطقة القديمة بسانتياغو تعتبر من التراث العالمي.. شغلة كبيرة, من أجمل بقاع الدنيا.. و طبعا شهادتي مجروحة)

القارمة اللي شايفينا عاليسار هاي لأوتيل قديم كتير... و كان أول مطرح يسكن فيه والدي وقت وصل ع سانتياغو ليدرس.. خريف سنة الـ 69
___________________________________





شارع كاساس رياليس (البيوت الملكية)... هاد كمان شارع حلو كتير فيو كم بناء مرتبين, بس نعمل معارض سانتياغو (لأنو ما رح يكفيها معرض واحد) بنحط عنو.
________________________________________-





حجر مبلول

سانتياغو بمنطقة معدل المطر فيها 290 يوم بالسنة, فلذلك مجهّزة منذ القدم لهالأمر, عدا عن انو صايرة بمرتفع, طبيعة حجار الشوارع و ترتيبهون و ميلانون ما بيسمح للمي تتجمع, لذلك بتشوف انو يجوز تقعد اسبوع تمطر, متل هلأ.. و من وقفت, خلال ساعة زمان, بتشوف الشوارع تقريبا ناشفة (متل هلأ).

_________________________________________





ساحة سرفانتيس (التمثال اللي أعلى العمود للكاتب آنف الذكر), كمان ساحة مشهورة بسانتياغو منحكي عنها وقت نعمل الجولة السياحية

_____________________





بالصدر, واحد من أبواب دير سان بيلاجو, و خلفو برج الساعة تبع الكاتدرائية (أول عوجة عاليمين في بار مرتب كتير )

____________________________




شارع بريغونتويرو (وصلنا عالبيت الا شوي.. ما ظل خمسين متر )

_______________________________





بوابة تانية لدير سان بيلاجو اللي شفناه قبل, هاي ساحة اسما ساحة فيخوو, الزاوية اللي مقابيل الباب هاد محل مجوهرات خالي (عم نعمللو دعاية ببلاش), و عاليسار شايفين قارمة مكتوب عليها "مودوس فيفندي" .. هاد واحد من أشهر بارات اسبانيا لأنو مكتوب عنو برواية قديمة كتير و مشهورة (طبعا البار عمرو فوق المية سنة)

_______________________________________




آخر شارع البريغونتويرو.. هالساحة الصغيرة اسما الشوارع الخمسة.. ازا عوجنا عاليمين بننزل بشارع الكونغا اللي ياخدنا عالكاتدرائية و ع عمادة الجامعة و كلية الطب, و عاليسار منروح ع آلتاميرا.. و الشارعين اللي بالصدر, اللي عاليمين اسم الكالديريريّا.. نحنا رح نروح من تبعون الصدر, اللي عاليسار, اللي اسمو شارع الكاسترو (شارع بيتنا هاد)

_____________________________________





شارع الكونغا اللي حكينا عنو قبل.. ورا الزلمة في متل سياج صغير, هاد محاوط نبعة مي طبيعية عاملين عليها نافورة.
_____________________________________





شارع الكاسترو.. شارع بيتنا يعني

____________________________





حاااااااااااارتنا...

التمثال هو تمثال الملك ألفونسو الثالث (ألفونسو الكاسترو, يعني العسكري بالقشتالية القديمة.. و التمثال جاري لأنو شباك غرفتي بيطل على راسو)

البناء الكبير اللي بالصدر هاد كلية التاريخ حاليا, و هو أقدم بناء لجامعة سانتياغو اللي هي خامس أقدم جامعة أوربية..

باب البيت ورا الميتور بـ 3 أمتار..

هون اكتشفت انو ماني شايل مفاتيح البيت

___________________________________________





بيتنا... الشبابيك البيض

_________________________________________-





صورة لزاوية كلية التاريخ من قدام باب البيت (كنت عم انطر لبين ما اختي ترميلي المفاتيح )

______________________________





منظر آخر, لبيتنا و جاري التمثال


__________________________________-


لاتحسبوه علينا معرض.. بنعمل جولة مزبوطة ع سانتياغو قريبا

[مايا *]

احسبو حساب اني كنت فايق من شوي

هون حسبت هلـ الحساب أنا ..
لهيك ما راح قلك أنو لو ئاطش من السواد الي تحت و مكبر مساحة السما ..

ياخ هدول :




نيالـــــهون ..


ياسـ بيجننو ..

[yass]

هون حسبت هلـ الحساب أنا ..
لهيك ما راح قلك أنو لو ئاطش من السواد الي تحت و مكبر مساحة السما ..

أي حتى و أنا نعسان حسبت هالحساب

ما تفرق كتير لأنو لو رافع الكاميرا كمان.. بتلاقي سواد فوق لأنو الغيمة اللي شايفة بدايتا كانت سودا متلا متل البيوت

ياخ هدول :




نيالـــــهون ..

شلت الفلاش مشان ما يحسو عليي

ياسـ بيجننو ..

آنسة مايا دائما نفخر بزيارتك

[قرصان الأدرياتيك]

أوّلاً شكراً كتير عالصور الحلوة...
بعدين أنا كان ناقصني بصراحة هيك تقرير... لأن ألي نية طب على سانتياغو بحكم مزارها المشهور جداً ما بعرف إذا بعيد عن البلدة!
رح كون أنا ومجموعة شباب فلا تتفاجأ إذا واحد غريب دق عباب البيت عند المسا .

[yass]

كاتب النص الأصلي : قرصان الأدرياتيك

أوّلاً شكراً كتير عالصور الحلوة...
بعدين أنا كان ناقصني بصراحة هيك تقرير... لأن ألي نية طب على سانتياغو بحكم مزارها المشهور جداً ما بعرف إذا بعيد عن البلدة!
رح كون أنا ومجموعة شباب فلا تتفاجأ إذا واحد غريب دق عباب البيت عند المسا .

أهلا و سهلا .. بس جيبو أكلكون معكون


الكاتدرائية بوسط المدينة القديمة, يعني تبعد عن بيتي شي 300 متر مش أكتر...

جايين صور عن محيط الكاتدرائية قريبا

[قرصان الأدرياتيك]

كاتب النص الأصلي : yass

أهلا و سهلا .. بس جيبو أكلكون معكون
الكاتدرائية بوسط المدينة القديمة, يعني تبعد عن بيتي شي 300 متر مش أكتر...
جايين صور عن محيط الكاتدرائية قريبا

واللهِ يا ابن العم لا تعتل همّ بشان الأكل... هيك هيك أنا متعوّد آكل وجبة وحدة بالنهار وبالكتير تنين!
وبعدين أهل الرقّة معروفين بكرمن الطائيّ ، وحاسبين هالحساب!
إذا الكاتدرائيّة قريبة منيح جداً هاي أول شغلة صارت...
.

[yass]

كاتب النص الأصلي : قرصان الأدرياتيك

واللهِ يا ابن العم لا تعتل همّ بشان الأكل... هيك هيك أنا متعوّد آكل وجبة وحدة بالنهار وبالكتير تنين!
وبعدين أهل الرقّة معروفين بكرمن الطائيّ ، وحاسبين هالحساب!
إذا الكاتدرائيّة قريبة منيح جداً هاي أول شغلة صارت...
.

أي معناتو لابعت خبر للرقة يبعتولي كم خروف عالدي أتش أل


بس اوصل عالبيت بحطلك هون صورة لأبراج الكاتدرائية من غرفتي لتشوف قديه قريبة

[مجنون يحكي وعاقل يسمع]

كاتب النص الأصلي : whiterose

احيانا بشتهي الغربة لما بشوف هيك صور

أما أنا فأشتهي الوطن , كلما رأيت جمالا اصطاده صياد ماهر كالأخ ياس , جميلة هذه الصور , وجميلة هذه الإختيارت وهذه الزوايا
حتى الحذاء يذكرني بالوطن , فكيف البحر والجمال

[yass]

وعد الحر دين عليه

هاي صورة تازة من دقائق معدودة لأبراج كاتدرال سانتياغو دي كومبوستيلا من نافذة غرفتي, اهداء خاص للقرصان العزيز

في داعي قول انو الجو مغيّم؟

[marioma alghzayala]

لك وانا حبيت هدول اللي ماشيين تحت المطر .. كتير طالعين حلوين ...

هوي كل الصور نايس .. الاضاءة مساعدتك جدا جزيلا بجمال الصور ....

روح صرت بروفشنال ...تروك الطب وافتحلك شي استديو ...

ناطرين كمان شغلات

[butterfly]

رائعين ..

هواياتي صغيرة
واهتماماتي صغيرة
وطموحي أن امشي
ساعات معك
تحت المطر

[ooopss]

ياس هالمرة مع تعليقاتك حسيتك أخدتنا مشوار رسمي
عنجد رائعين الصور ..
بانتظار الباقي

[marioma alghzayala]

(عندي القصيدة مغنّاة.. قولو لشوش تذكرني حطها هون المسا )

شوش شوش شوش .. ماتنسي

[*Marwa*]

بحـب الشوارع المبلطة لما بيبللهـا المطـر (زكرتني بـ عكــا D: )

بيجننـوا الصور..بتجنـن سنتياغو

[مايا *]

أهلا و سهلا .. بس جيبو أكلكون معكون

نو هيـــك إختلف المخطط تماماً ..

بدي إسألك هلا في كاتدرائية بظن إسمها القديس يعقوب أو هيك شي عندكون صح ؟ .. زارتها رفيقتي و حكتلي كتير عنها .. فــ بما أنو الجمهور عمـ يطلب سمحت لنفسي إطلب صور إذا بتقدر ..

[The morning]

ما معقول يا رجل هالصورتين .. شـــغله !
بدّي اشتريهم منّك ..

[jano.]

حلوين كتير هالمحاولات يا ابن العم... بل رائعين رائعين
حارتكن حلوة كتير كتير.... ويا محلا التنقل أيام السبت من بار لبار بهيك حارات

كاتب النص الأصلي : yass

هالنوع من البيوت بينطبق عليه المتل (مع بعض التحريف)
من قدّام هالله هالله ومن ورا بيعلم الله
واجهاتن حلوة والشبابيك كلها ورود، بس من ورا بتلاقيها معترة لانو تصليحا غالي كتير كتير بسبب الشروط القاسية الي بتحطا البلديات (كونا مباني تعتبر أثرية)...

كاتب النص الأصلي : *Marwa*

بحـب الشوارع المبلطة لما بيبللهـا المطـر (زكرتني بـ عكــا D: )

شوارع رومنسية عالآخر... حلوة وبتجنن
بس للي عندو بسكليتة بتعتبر كابوس
ماعم احكي عبلاطات حارتك ياس هدول مريحين ...

[وشم الجمال]

ازا بدي اقتبس رح تصير مية مشكلة بالوضع هون
ولذلك قررت حضرتنا هيك تصفن كتير وتقول بجننو بجننوا بجننوا وانا هلق نفسي كون بوحدة من هالصور والا للصدق يعني فيهن كلهن,,,,

رائع ياسبس وردة مرسيل مو هاي