معزومين على أكلة جوقات (بس لا تقربو عالمخاخ)

[ارسلان]

على حد علمي دجاج

فخر التربية المنزلية

*

كان في نفسي أفطر على دم القتلة

[jano.]

شايف الاكلة عجبتكن وفتحت جروحاتكن وطلعت الأكلة داخلة بقصص غرامية

كاتب النص الأصلي : sandra

بس هي مو نفسا عند أهل حلب واسمها سندوانات بس غير حشوة بعتقد

كاتب النص الأصلي : yass

موجودة عنا كمان و يقولولها "كلال"

كاتب النص الأصلي : ..AHMAD

وعنا بيقولولها سجقات

مشكورين عالاسامي المختلفة للأكلة وياريت كل واحد يعرفنا عن اسم الاكلة متل ما بيعرفو...
اي هيي الاكلة تراثية ومعروفة بكل المناطق، لهيك الصور ممكن تشوفوها غريبة، انا كمان ما شفت بالنت نفس الحشوة الي بتعملها امي ... اصلا مافي غير صورتين تلاتة لهالالكة العظيمة هي لازم تتدرس بالمدارس أصلاً... لازم تنحط بكتب التاريخ.. هاي جزء لا يتجزأ من التراث السوري...

قرصان الادرياتيك: طيب انا باخد اللسان والمخ بنقسمو بالنص أو بنقسمو ل 3 أجزاء الي والك ولاحمد (اذا ناوي يتجوز )

وفي سلطة ومقبلات للي عامل دايت

[butterfly]

انو بحلب اسمها السندوانات وبيحشوها رز وحمص حب ولحمة

انا عني بحبن مقليات

[hanny dagher]

اييييييييييييييييه ايييييييييييييييييييييه على ايام "المصارين" (هيك بيسموها عنا بالضيعة )

يا سيدي من اطيب الاكلات بهالدنيا

انتو لو تشوفو كيف بيغسلوها بيحطو المصران تحت المي اخواتي
واللي عم ينضف بيحط تمو عالمصران وبينفخ في مشان يفتحو ويخلي المي تنزل لتحت فانو تسالي كتير


بس شو بدنا اللي ما بيحب هالاكلة بيكون ما بيعرف طعمة تمو

[HashtNasht]

هه يا جماعة هاي الاكلة ما اسمها جقات ...عم تغلطو كتير بحق الاكلة ...

الاكلة اسما سختورة ..اي نعم

و السختورة ممكن تتألف من كل او بعض ما يلي :

1- الجقات ..و هي امعاء الخاوف, مصارينو يعني ...الرفيعة و الغليظة على السواء ..طبعا بدها شطارة بالتنضيف ..لانو غير هيك بتكون العالم عم تاكل خ...... هه

2- الكرشة ..و هي الكتلة البيضا الكبيرة المبينة بالصورة التالتة ....و هي معدة الخاروف ...و بتكون مخملية الملمس بعكس الجقات اللي بتكون ملساء الملمس ..و هي طبعاً اقسى و اسمك من الجقات و بتعلك بالتم ..و انا شخصيا ما بحبا منوب

3- النخاعات ..و هي ما يوجد داخل عظام الخاروف ..و تشمل المخ ...يعني كلو نخاعات هاد الحكي ..اطيب شي فيها هو مخ ( دماغ ) الخاروف ...و يتم تحضيره بطرق مختلفة اشهرها السلق و الشوي و قد ما فيك حطلو بهارات يعني ..مشان الزنخة قال ...و هو هيك طري .يعني بتحسو متل اللبنة ...اي و الله

4 - اللسانات ...و هي لسان الخاروف .....ببساطة يعني ...و هو من افخم الاكلات ..يعني هاد اللي بكون قاعدبالعزيمة و بيعطو اللسان ..بكزن شيخ نظامي ..و شغلتو كبيرة ..لانو ما مين ما كان بياكل اللسان

5- المقادم او الكوارع ..و هي ارجل الخاروف ...بصراحة ما بعرف شو بياكلو فيهن لانو ما فيهن شي ....بس بتشوف العالم قاتلة حالا ع المقادم !!!...انا شخصيا ما بيطقن منوب منوب

6 - الراس ...هيك بحطولك راس الخاروف قدامك ...و كول يا حباب ...طبعا منظر راس الخاروف عالطاولة بيعملي ازمة نفسية ... خصوصي هيك اذا سنانو مبينين و شكلو عم يتضحك ..انو ع شو عم يتضحك ابن الحرام ما بعرف ‍! على كل حال بالشام بيعملوه فتة..يعني فتة راس ( ليك على هالاسم !! ) .

يقال انو لحمة الراس من اطيب اللحمة ...بس انا مشتهي اعرف وين في لحمة بالراس !!!


طبعا ما بعرف بالصورة شو عم يحشو الجقات و الكرشة ..بس بمناطقنا بيحشوهن رز ..يعني متل بقية المحاشي .رز و لحمة و بهارات و توم و هيك قصص ..و غالبا السختورة بتجي مع بقية المحاشي ..يعني بكون حدا كوسا محشي و ورق عنب ..مطبوخين مع عضام و لية ..مشان الكوليسترول يوصل للمعرة

اي و هيك يعني ..تسالي ...هلأ بدنا تحطولنا شي موضوع عن المعلاق ...لانو الدرن ..و هيك قصص

تحياتي الكوليسترولية

[MaTyA]

يعني لو كنت عارفة اني رح شوف هيك موضوع كان حسبت حساب صدت النفس وكنت فطرت قبل ما اجي
ما بتخيل حالي باكل هيك اكل..

[*Marwa*]

بـصراحة يــع .. عنا بسموها "تراف" وإيخ ما حدا بالعيلة عنا بحبها..لا ابي ولا امي ولا اي حدا..

الحمدلله يعني

[رجل من ورق]

مدرس شلون بتاكلوها ؟

[روعة1]

اييييييييييييييييه ايييييييييييييييييييييه على ايام "المصارين" (هيك بيسموها عنا بالضيعة )

اي اي و كمان عنا هيك بسموها..
و سويناها نحنا بالعيلة مرتين .. و طريقة التنضيف اظن كمان متل ما قلت .. مو متذكرة منيح..
لاني ما برضى فوت ع المطبخ بنوب بنوب وقت تنضيفها..

و بخصوص الحشوة نحنا منحشيها رز و لحمة..
هو الصراحة الاكلة من المنظر بتشهي.. و انا اللي خليت امي تسويها اول مرة لانو وقتها شفتها ع التلفزيون
بمسلسل ليالي الصالحية (وقت بيعزم المعلم عمر كبارية الحارة و بكون مسوي هي الاكلة).. و انا من وقتها
بلشت زن على راس امي لساوتها..

بس بعدين لقيت طعمتها عادي يعني... انو رز و لحمة و صلى الله و بارك.. منشان هيك ما عدت طلبتها..
بس بليالي الصالحية كانت مبينة طرية .. اما وقت اللي سويناها طلعت شوي قاسية (يمكن من الرز و اللحمة)

والمخ بنقسمو بالنص أو بنقسمو ل 3 أجزاء الي والك ولاحمد (اذا ناوي يتجوز )

شايفتكن متلبكين بالمخ انا.. انا من طبعي بحب المساعدة.. فخلص انا رح ساعدكن و اخدو عنكن ..

[Marooshe]

يع يع يع جد يع
عنا بس امي وابي بيحبوها
بصراحة مابعرف كيف حدا ممكن ياكل مصارين حيوانات
يعني ماخليتو شي غير الشرج... قرف!!!

[sandra]

كاتب النص الأصلي : butterfly

انو بحلب اسمها السندوانات وبيحشوها رز وحمص حب ولحمة

انا عني بحبن مقليات

أنا أهلي بعتقد بيطبخوها طبخ ومو قلي
وكل ما كان المصران اصغر كلما كان أطيب وبتصير خناقات عليه

[Reemi]

بحياتو ما حد عملها بضيعتنا

[butterfly]

كاتب النص الأصلي : Reemi

بحياتو ما حد عملها بضيعتنا

لك شو وين ضيعتكن
ما بتعملو معروك
ما بتعملو هالأكلة
شو بتاكلو انتو ؟

[yass]

كاتب النص الأصلي : marwa hanna

يع يع يع جد يع
عنا بس امي وابي بيحبوها
بصراحة مابعرف كيف حدا ممكن ياكل مصارين حيوانات
يعني ماخليتو شي غير الشرج... قرف!!!

له له له ....

السجق كمان معمول القشر الخارجي من المصارين.. يعني بعد ما يتنظف و يظل مدري كم ساعة عم يغلي... أي يعني عادي..

[THE_unforgiven]

عذرا من صاحب الموضوع ... بس ما إلي نفس قرب على هيك أكلات .. مع العلم انو نعمة الله ..
بس بفضل ضل شهر بلا أكل ولا دوق هيك أكلات .. يعني العالم ما عم تخلص باللحم العادي .. منين جبتولنا مخاخ وأمعاء ومدري شو .. نحنا هالأكلات بيسموا عنا (كروش - كرشة ) من الكرش .. أي المعدة .. بس الله وكيلكن المحل اللي بيكون فيه هيك أكلات بآخد منو مسافة أمان كذا ميل .. وبالإضافة بلبس مضاد للأشعة النووية مشان الأمان الزايد .. وكامن فوقو طبقة من المادة اللي بيحطوها بلباس رواد الفضاء ..



عالهامش ..:
يعني هيك اجزاء من الجسم كتير تعتبر .. (غير صحية وغير آمنة علميا وعمليا ..) حيث يعتبر الكرش والأمعاء من أماكن تكاثر الدود (الشريطي وغير الشريطي .. ) بالإضافة هيي مكان هضم الطعام وعصره .. ويعني كلنا منتخيل منظر طعام معصور ومهضوم .. وكيف بيكون منظرو .. ف ما بقدر اتخيل حالي عم أكلها

[Reemi]

كاتب النص الأصلي : butterfly

لك شو وين ضيعتكن
ما بتعملو معروك
ما بتعملو هالأكلة
شو بتاكلو انتو ؟

ما الك عليي يمين ..انها بجبله ..بس فعلا فعلا ما بنعملهن ...

[yass]

غير صحية وغير آمنة علميا وعمليا

معلمي مو صحيح هالحكي.. يعني بدك تقول شعور نفسي بالقرف او هيك شي فهاد أمر يرجع لكل واحد.. بس لا تحط العلم بالنص لأنو معلوماتك مو دقيقة...


عم تحكي عن الدودة الشريطية.. طيب بيوض الدودة الشريطية و جزء من دورات تكاثرها موجود بعضلات المواشي.. يعني باللحم اللي بتاكلو, و هاد الخطر مو لما توصل الدودة للمصران .. بعدين المصران يتنظف و ينطبخ بشكل منيح جدا و مستحيل يبقى منو شي بعد هالتحضير.. يعني علميا مانو أوسخ من اللحمة.. بالعكس عم ينطبخ أكتر منها..الكبة النية بتخوّف أكتر من هالأكلة بألف مرة .. ازا حكينا عن أحياء دقيقة و بويضات و هيك امور..

لذلك ازا قرف نفسي فأوكي.. بس رجاءا العلم على طرف..

[حبيبة فلسطين]

شو هالموضوع الحلو الي بفتح النفس
احنا عنا بسموها كرشات او فوارغ (المصارين) بحشوها رز و حمص حب و لحمة و قبل كم يوم كنا طابخينها يا سلام مع اللسان و الرووس بس انا بحب لحمة الراس مو المخ اما اللسان كتير زاكي لو بعرف انكم بتحبوها كان بعتلكم شوية منهم يلا للمرة الجاي ان شاء الله بس مو برمضان