الانترنت بالعربية = المنتديات

[biomen]

لاحظت شيئا غريبا على الإنترنت، كلما بحثت بواسطة قوقل عن كلمة بالعربية، إلا وتكون النتائج عبارة عن صفحات لمنتديات، وفي حالات قليلة، وإذا كانت كلمة البحث دينية، قد اتحصل على بعض المواقع الدينية، بينما إذا بحثت بلغة أخرى كالإنجليزية مثلا فمعظم النتائج عبارة عن مواقع "عادية".
هل معنى هذا أن الإنترنت العربي عبارة فقط عن منتديات؟!!!!
هل المشكل مشكل مادي؟ أي أن الناس لا يملكون المال الكافي لإنجاز مواقع مستقلة ؟
أم أنه نقص المعرفة التقنية بأمور الإنترنت؟
أم أنها قضية سلوك؟ أي أننا تفضل النقاش على الإنتاج المعرفي المنظم؟

[jano.]

كاتب النص الأصلي : biomen

لاحظت شيئا غريبا على الإنترنت، كلما بحثت بواسطة قوقل عن كلمة بالعربية، إلا وتكون النتائج عبارة عن صفحات لمنتديات، .
.
هل معنى هذا أن الإنترنت العربي عبارة فقط عن منتديات؟!!!!

المشكلة ليست في كون نتائج البحث تؤدّي فقط -أو في أغلب الاحيان- إلى المنتديات.
مثلاً عندما أبحث عن معلومة بلغة غير عربيّة، كثيراً ما أحتار في صحّتها حتّى لو كانت من موقع مختصّ أو موسوعة. ولكن عندما أضع بجانبها كلمة Forum فيقودني محرّك البحث إلى المنتديات، وهناك أستطيع أن أكوّن قناعتي -بما قرأته مسبقاً- من خلال قراءة المناقشات والآراء المختلفة.
المشكلة تكمن في مضمون المنتديات العربيّة، فالتشابه المقيت بينها وتكرار الموضوع نفسه في 100 موقع يصلان إلى حد التفاهة.

وفي حالات قليلة، وإذا كانت كلمة البحث دينية، قد اتحصل على بعض المواقع الدينية، بينما إذا بحثت بلغة أخرى كالإنجليزية مثلا فمعظم النتائج عبارة عن مواقع "عادية".

أيّ حالات وأيّ قليلة!!!!
لا ادري فربما تبحثين في شبكة عنكبوتيّة غير عالميّة! أو أن حظّي في البحث لا يقودني إلا إلى المواضيع الدينيّة!
وياليتها تكون دينيّة بمعنى الدينيّة، فمعظمها يكون فضائح وتهديدات ونفاق وأمور بعيدة عن الواقع، لا العقل يتقبلها ولا العاطفة تتحمّلها!
بحثتُ مرّة عن كلمة في الكيمياء فظهرت لي مئات من المقالات الدينيّة تحذّر من مسحوق للتجميل من شركة معادية!
وبحثت مرّة عن صورة للمثل سامر المصري فوجدتُ ألف تعويذة بالله من الشيطان الرجيم لأن سامر تجرّأ وجلس بقرب فتاة لا يتماشى لبسها وتفكيرهم!!!!
والقائمة تطول وتطول
لا يحقّ لأحد أن يتذمّر من المواضيع الدينيّة -إن كان عددها ومضمونها بحدّ المعقول- فشبكة المعلومات يجب أن تشمعل كلّ المجالات، ولكن عين الواقع تقول أن النت العربي هو ديني بمعظمه وبامتياز! وبمضمون أغلبه غير صحّي.

هل المشكل مشكل مادي؟ أي أن الناس لا يملكون المال الكافي لإنجاز مواقع مستقلة ؟
أم أنه نقص المعرفة التقنية بأمور الإنترنت؟
أم أنها قضية سلوك؟ أي أننا تفضل النقاش على الإنتاج المعرفي المنظم؟

المشكلة يا عزيزتي ليست لا في الاموال ولا في الخبرة التقنيّة.
فمثلاً لو وظّف أهل الخيج الأموال التي ينفقونها على النت، وخبرتهم في اختراق وتخريب المواقع "المعادية"، بطريقة أخرى غير الإغراق بالفضائح والسطحيات والعِراك، لكان حال النت العربي مثلاً كحال النت الانكليزي في الجودة.

وأخيراً تقبلي شكري على الموضوع الجميل يا biomen

[LiOnHeArT.3LA2]

هل معنى هذا أن الإنترنت العربي عبارة فقط عن منتديات؟!!!!
.. تقريبا اي .. منجي للمشاكل وليش..
هل المشكل مشكل مادي؟ أي أن الناس لا يملكون المال الكافي لإنجاز مواقع مستقلة ؟
عالاغلب اي .. بس كمان وقت بتجي للاسعار تبعوت غرف الدردشة .. وبتصفني فيها شوي
بيطلع معك انو العالم معون مصاري

أم أنه نقص المعرفة التقنية بأمور الإنترنت؟
.. من هي الجهة . بتصور مستحيل .. شلون عندون تقنية يعملو منتدى ..
لألأ في معرفة
أم أنها قضية سلوك؟ أي أننا تفضل النقاش على الإنتاج المعرفي المنظم؟
هون .. بدي وقف شوي عند هالنقطة ..
معليش توضحيلي الفرق .. بين النقاش .. وبين الانتاج المعرفي المنظم؟

[biomen]

كاتب النص الأصلي : LiOnHeArT.3LA2

معليش توضحيلي الفرق .. بين النقاش .. وبين الانتاج المعرفي المنظم؟

يعني هلاّ المنتديات قائمة على طرح مواضيع و مناقشتها وبس... بينما الانتاج المعرفي المنظم هو عبارة عن
مواقع بتحط المعلومة الموثوقة و تكون هي المصدر يعني بدنا نشوف مواقع خاصة بالفيزياء مثلا بالكيمياء بالعلوم بصفة عامة بكل شئ يحتاجو الطالب ...يعني اضربلك مثال اذا في واحد عندو موضوع بحث عن الجينات مثلا لازملو معلومات موثوقة من مصدر موثوق مش آراء من منتديات فهمت عليّ

[LiOnHeArT.3LA2]

آها ..

تقريبا فهمت ..

طيب .. خلينا نحكي بمثالك اللي هوي

بدنا نشوف مواقع خاصة بالفيزياء مثلا بالكيمياء بالعلوم بصفة عامة بكل شئ يحتاجو الطالب ...يعني اضربلك مثال اذا في واحد عندو موضوع بحث عن الجينات مثلا

في مواقع فيزيا .. وفي مواقع رياضيات .. وكلو موجود ..

الاغلبية منتديات انا معك ..

بس كمان موجود .. مواقع .. ما بنفس الكترة والكمية .. بس موجودة

بس هون انتي شوي عم تظلمي المنتديات ..

لانو المنتديات عم يقدمو بنفس الوقت شي حلو ..

[biomen]

طبعا ماقلت شئ اصلا المواضيع التي تطرح بالمنتديات اصلها المواقع اللي انت ذكرتها بس المشكل ليش كمية المنتديات اكتر من كمية المواقع اللي حكيت فيها...

[LiOnHeArT.3LA2]

للمشاكل اللي ذكرت اعلاه ..

المورد المالي

وهالمشاكل هي ..

[القلب الدافئ]

لك صدقني لولا المنتديات ما كنت شفت وجود عربي عالانترنت بتاتاً

على كل حال انا بنصح اي واحد بحتاج لمعلومة عن شو ما كان يبحث باللغة الانكليزية
لان رح يلاقي بحر وشي موثق

ولو كان بدو يترجم سنة بس بظل احسن من العربي ...........

[biomen]

و هيدا اللي كان بدّي قولو تسلم ياسين

[yass]

الانترنت بحر واسع شاسع... و مو كل الناس عندا نفس "ثقافة الانترنت".. و طريقة التعامل مع المجتمع الافتراضي هي اسقاط لظروف بالواقع موجودة.. و كثرة المنتديات لدى الجمهور الانترنيتي العربي شي طبيعي.. لأنو هيي الطريقة الأفضل (أو حتى مو الأفضل.. هي الطريقة الموجودة الوحيدة أحيانا) لحتى الواحد يقدر يعبّر عن فكرو أو ينشر فكرو أو يتواصل مع ناس بمثل ميولو.. هالحاجة بغير مجتمعات و ثقافات غير موجودة..

فكرة المنتديات العامة (يعني فيها من كل شي .. متل أخوية يعني) هو اسلوب عربي بامتياز.. بغير ثقافات في منتديات طبعا.. لكن أولا هي غالبا منتديات تخصصية بشيء ما .. و ما تاخد طابع "المجتمع الافتراضي" اللي موجود بالوسط الانترنيتي العربي.

وجود المنتديات بعتقد شي ايجابي جدا.. و ما يتعارض مع ضعف وجود مساحات انترنيتية علمية تخصصية .. لأنو فقدان هالمساحات ليس نتيجة طغيان المنتديات عليها.. انما السبب هو ضعف الامكانيات.. و حتى ممكن نقول انو ضعف اللغة العربية بالمواكبة العلمية كمان الو دور كبير بهالأمر..

[..AHMAD]

كاتب النص الأصلي : biomen

لاحظت شيئا غريبا على الإنترنت، كلما بحثت بواسطة قوقل عن كلمة بالعربية، إلا وتكون النتائج عبارة عن صفحات لمنتديات، وفي حالات قليلة، وإذا كانت كلمة البحث دينية، قد اتحصل على بعض المواقع الدينية، بينما إذا بحثت بلغة أخرى كالإنجليزية مثلا فمعظم النتائج عبارة عن مواقع "عادية".
هل معنى هذا أن الإنترنت العربي عبارة فقط عن منتديات؟!!!!
هل المشكل مشكل مادي؟ أي أن الناس لا يملكون المال الكافي لإنجاز مواقع مستقلة ؟
أم أنه نقص المعرفة التقنية بأمور الإنترنت؟
أم أنها قضية سلوك؟ أي أننا تفضل النقاش على الإنتاج المعرفي المنظم؟

هلئ هون ... في كزا نقطة بدي احكيهن

فكرة وجود المنتديات .. بغض النظر ان عربي او اجنبي او عالمي حتى ماهية غلط
وما هية الا عبارة عن تقدم احرزوه بالتكنولوجيا

انا ما بقدر عارض فكرة المنتديات .. لمجرد انو بحثت بالجوجل وطلعلي كل شي صفحات هية عبارة عن منتديات

بينما بأيد فكرة المنتديات لكتير نقط :
1- عمل تخصصية من حيث التصنيف
2- === تنظيم اكبر من الموقع العادي لهالتصنيف هاد:
يعني مثلاً موقع مختص بالفن ... ما رح قول قليل .. في نسبة جيدة .. بس كمان في نسبة كبيرة حاصرة مجالها بشيئ محدد ... يعني كتوضيح اكبر
موقع مختص بالفن
ممكن يحط لمحة عن كل انواع الفن .. ويركز على نوع واحد ( النحت مثلاً )

هالنقطة هي المنتديات غيرتها تغيير جذري .. وصارت شمولية اكتر ... صار في منتدى للفن مثلاً
وفيه قسم للنحت .. وقسم للحفر .. وقسم للتصوير الفوتوجرافي .. وقسم للرسم بكافة مدارسو ( تجريدي انطباعي تعبيري ..الخ الخ )

وهون كل واحد وحسب اهتمامو .. بتلاقيه بالقسم الي بيرتاح التعامل فيه .. وبيشدّو عالقسم اللي باختصاصو .. او باهتمامو

هلئ كمان في النقطة التالتة اللي بدي احكيها

الفرق بين الموقع والمنتدى ...

الموقع هوي عبارة عن حلقة مغلقة ...يعني هالشغلة انكتبت ..و محصورة هالكتابة بشخص او تنين او تلاتة او عشرة كـ حد اقصى

بينما المنتدى .. البادرة بتكون من شخص واحد .. وممكن تتشعب لأكتر من 100 شخص ...

يمكن حدا يطرح فكرة
ويصير نقاش جدّي بين هالاشخاص .. ليوصلو لنتيجة واستنتاج ... بيغني هالقضية هي اكتر من اي موقع

ممكن يضيف شغلات ما كانو منتبهينلها بالموقع

يعني هون اللي بدي احكيه

انو المنتديات ابداً مو غلط ... الها سلبيات كتير ... بس ايجابياتها ... اكبر ( مو بالكمية .. انما بالنوعية )

هلئ في نقطة سلبية بدي اذكرها هون .. ويمكن هي اكبر نقطة سلبية موجودة ...

انو المنتديات غالباً عمتجي مجانية ... او بسعر رخيص جداً

هاد الشي عميخلي عقل الشاب العربي بشكل خاص ... يوقف عن الابتكار
يعني يصير اتّكالي
عمبدأ ( اللي بدي ياه انا جاهز .. ليش لعزب حالي وفوت دورات برمجة مثلاً .. واقعد بالشهر والتنين والتلاتة و و الخ ... بينما هالاجانب موفرينلي اللي بدي ياه وبسعر بسيط .. )

هاد الشي خلى العقول توقف عند هالشي

لزالك نادراً ما تلاقي مذكور اسم شخص عربي ... بمجال برمجيات الويب .. او برمجيات الحاسوب ..!!!

بظن لو ارتفعت اسعار ترخيص المنتديات شوي وزادو عليها مستوى الحماية ضد كسر حمايتها ... لتلاقي كتير منتديات انمحت من الوجود ( هالمنتديات اللي رح تنمحى .. ما هية الا عن منتديات غير تخصصية .. ما انوجدت الا للمال .. او للتسلية ... يعني طابعها تجاري بحت .. وما الها هدف محدد .. وما الها رسالة لتوصلها )

وما رح يبقى غير المنتديات اللي كانت من الاصل محددة اهداف الها وبدها تحققها ....
وهاد الشي ايجابي جداً

كمان بدي وضح لنقطة .. انو المصاري ما الها علاقة بكثرة المنتديات

يعني صحيح المنتديات ببلاش تقريباً

بس في حجز اسم الدومين + مساحة + ترافيك + + + ... الخ الخ الخ ... عمتكلف مبلغ مرتّب .. فلزالك ما منقدر كتير نربط كثرة المنتديات برخصها