الاستقواء بالخارج واجب شرعي

[Joe]

استطاعت الحكومات الدكتاتورية تخويف و تضليل مواطنين و معارضين بفكرة مغلوطة مفادها: إن الاستقواء بالخارج هو نوع من الخيانة و العمالة، متجاهلين أن أحداً لا يستقوي على الوطن و المواطن و الشعب، بل على أعداء الوطن و المواطن و الشعب من الحكام المستبدين و أزلامهم. و قلب الحقيقة بهذا الشكل ما هو سوى فخ للإيقاع بالمعارضة، و تجريدها من الفرصة التاريخية المتاحة لها، و التي تعتبر السلاح الحاسم لكنس الدكتاتوريات التي لا تزال تسبب الأذى لشعوبها و للعالم أجمع، و أفظع ما تنتجه و تصدره يتجسد بالإرهاب العالمي.
و لتفنيد تلك المغالطة الشائعة أسوق الشواهد التاريخية التالية :
1- استقوى شارل ديغول بالخارج لتحرير فرنسا من الحكومة " الوطنية "؟! المتعاملة مع النازيين إبان الحرب العالمية الثانية.
2- استقوت مصر بالخارج لرد العدوان الثلاثي عنها عام 1956 و تمثل هذا الخارج بالولايات المتحدة و الاتحاد السوفيتي ( سابقا ).
3- استقوت الكويت بالخارج لتحريرها من قبضة صدام حسين عام 1991.
4- استقوى المسلمون الأفغان بالولايات المتحدة و أوروبا ضد الحكم الشيوعي الأفغاني.
5- استقوى الشريف حسين قائد الثورة العربية الكبرى بالخارج ( و هو من سلالة الرسول الهاشمية ) بالإنكليز و حلفائهم ( غير المسلمين ) للتخلص من الحكم ( الإسلامي ) العثماني خلال الحرب العالمية الأولى.
6- استقوى المسلمون في كوسوفو بالأمريكان و الأوروبيين.
7- استقوى الرسول محمد ( ص ) بالأنصار من أهل المدينة المنورة على أبناء جلدته و عشيرته من قريش.
8- لقد كان أبو جهل و أبو سفيان الكافران من أقرباء الرسول ( ص )،فهل كان الرسول ( ص ) يفضلهما على الغريبين الأجنبيين بلال الحبشي و سلمان الفارسي ؟ و هل كان استقواء الرسول (ص ) بأمثالهما على أقربائه و أنسبائه من كفار قريش عملاً لا أخلاقياً و خيانة لأهله من قريش؟؟! . و هذا غيض من فيض.
هل يصبح الخير شراً إذا جاءنا من الأجنبي الغريب؟
هل يرفض الغريق اليد الممدودة له لإنقاذه إذا كانت يداً أجنبية غريبةً ؟
الاستقواء هو قانون الفطرة و سنّة الطبيعة و ضرب من العادات العربية العريقة( الاستجارة )
و هو بالتالي واجب شرعاً و قانوناً و أخلاقاً.
نتائج : إن الاستعانة بالأجنبي أمر واقع على مدار التاريخ في الميادين كافة، و في وضعنا الراهن نعتبر الاستعانة بالمجتمع الدولي حقاً و واجباً لأنه استقواء بالخير على الشر.
إن المجتمع الدولي ليس مجرد شاهد عيان على ما يجري في بلداننا بل هو طرف متضرر مباشرة مما يجري و إلا ما معنى و ما مبرر وجود هيئة أمم متحدة و قانون دولي و ميثاق و حقوق إنسان؟ أهي ديكورات أو للدعاية و الإعلان أو لأخذ العلم فقط ، أم أن لها رسالة و مهام و مسؤوليات في ضبط و إدارة الحياة الدولية. إنني أرى أن على المجتمع الدولي أن يأخذ على عاتقه سلطة الرقابة و المتابعة و المساءلة على البلدان التي تحكمها الدكتاتوريات بلا رادع ولا ناظم و لا ضابط قانوني مدني عصري ، و من مسؤولية المجتمع الدولي تحرير الشعوب من العدوان المستمر الذي تتعرض له من قبل حكامها و تمكينها من نيل حريتها و تقرير مصيرها بنفسها. لن ينعم المجتمع الدولي بالأمن و الاستقرار ما لم يتخلص من الأنظمة الاستبدادية التي تحتضن و تنتج سائر أشكال الإرهاب المادية و المعنوية. ”إن الإرهاب يتعولم و على الديمقراطية أن تتعولم لمواجهته".

دمشق 16/5/2005
بقلم سامي صلاح

[Hus]

الحقيقة شغلني هذا الموضوع مرارا بالأسابيع الأخيرة ...
فالدكتور سعد الدين إبراهيم الي كان مرشح للرئاسة (الهم كان هو من سيرشح نفسه) القائم على مركز ابن خلدون للدراسات الإستراتيجية بالقاهرة معتقل الأن _فترة الإنتخابات_ على اعقاب مسائلات سابقة من سنتين بتهم التميل الخارجي والإستعانة بالخارج.
حركة كفاية المصرية الي تبين لاحقا ان لا علاقة لها بالخارج _نسبيا_ تم اتهامها بشراسة من الصحافة الموالية بالتمويل الخارجي على اعقاب وجود قيادات بها من الأقباط المسيحين الي ليهم اقارب بأمريكا والي بشكل طبيعي بيبعتو لأهلم مصاري _وأثر سلبا هذا كثيرا _
حركة الإخوان المسلمين الي هني يعني إخوااااااااان متهمين اخيرا بالتميل الخارجي في سبيل التقليص والتحجيم لشعبيتهم محليا ..
حتى فريد الغادري القائم على حزب الإصلاح السوري _الحزب والشخصية الي انعدمت او تم اجهاضها قبل رؤيتها للضوء_ متهم (وبغد النظر عن الصحة او لا طبعا) لكن السبب الحقيقي لإجهاض مشروعه الحزبي بدون ما حتى يتاح المجال لسماعهم .. بسبب التميل الخارجي ..
والكثير من الأمثلة الي شاف منها النور والي ما شاف منها النور بسبب التمويل الخارجي ..

الحقيقة الموضوع شائك بأطرافه ..
فموضوع تمويل خارجي (والكل يعلم ان لا شيئ اليوم لاه ب لله) كل بثمنه حساس _شعبيا_ جدا ..
فعلى الصعيد الشعبي مجرد إشاعة عن تمويل ودعم خارجي تكفي لتحجيم شعبية الفكرة او الشخصية او الحزب او التيار او غيره
ومن باب اخر كل ويحتاج تمويل
النقود ماكينة أي عمل مهما كان بسيط ..
يحتاج اي تيار لتمويل وبأحيان كثيرة التمويل المحلي غير موجود لأسباب متعددة ممكن يكون على رأسها المصالح
فتمويل رجال اعمال او شركات معينة لحزب او تيار معارض سيودي بلا شك لضعضة و تقويض مصالحها بالداخل في دولنا العربية ..
يعني بنظر رجال الأعمال فيك اتقول مشروع فاشل!
بهال الواقع هذا قد يضطر تيار ما للجوء للتمويل والدعم الخارجي _حتى ولو كان شخصيات او شركات عربية نسبيا لاه ب لله عم تشتغل لصالح شعوبها لكن مقرها بالخارج مثلا او غيرها_ المهم حيلجؤو لتمويل خارجي .. وهون في شيئ مقابل لا بد منه ..
والمشكلة الأعظم هون ان المصالح الخارجية لا تتفق والمصالح الداخلية .. بالتالي حيكون التمويل لتمرير بيانات او اجرائات مصلحية معينة للموولين والداعمين قد لا توافق الشعوب في الداخل وهيك ..

هون انا عندي نظرة ليها بعد هون
المصالح _سواء جوا او برا او بأي مكان _ للنخبة السياسية هي ثلاث..
مصالح عامة
ومصالح خاصة

المصالح العامة هي المصالح العامة
اما المصالح الخاصة فهي اما تتعارض مع المصالح العامة وإما تتوافق والمصالح الخاصة

صار عنا تلات مصالح رئيسية
مصلحة عامة (لا يختلف سياسيين معارضة او موالات او غيره على وجوبها واهميتا وأوليتها)
مصالح خاصة تتعارض والمصلحة العامة (وهون مرفوضا جدا وهي ما يسمى بالفساد)
مصالح خاصة لا تتعارض والمصالح العامة(وهاي الي عليها خلافات دائما .. فبعض من ينبزها وبعض من لا يبالي تجاهها .. انا اميل جدا لشرعيتها او بمعنى اصح لعدم حصرها في زاوية الفساد .. بمعنى اخر انا ما ضدها ابدا)

هلق مدى تداخل هذا وموضوعنا هو النقطة الأخيرة
اي في حال كان مصالح الجهة الممولة الخاصة لا تتعارض والمصالح العامة فما في مانع من طلب الدعم منها او قبول التمويل منها ..
لكن لا بد من ان نتفق ان للجهات الخارجية _الممولة عامة_ مصالح خاصة هي بصدد تمريرها من خلال من تموله وتدعمه ومن داخل مصلحتها بيتم التحديد

(مثل لما كوريا الشمالية تبيعنا صواريخ .. طبعا ليها مصالحها في ان نحن على خط التماس وامريكا _احدى أعدائها_ بالتالي فبتعطينا صواريخ هون مصلحة خاصة لا تتعارض ومصلحتنا العامة)

[حسون]

الصراحة أنا مقتنع بأنو المعارضة الوطنيي كما قال طيب تيزيني
هي التي تستقوي بالداخل على الخارج

[krimbow]

مرحبا شباب
مشكور جو ع الموضوع الرائع و الهام

استطاعت الحكومات الدكتاتورية تخويف و تضليل مواطنين و معارضين بفكرة مغلوطة مفادها: إن الاستقواء بالخارج هو نوع من الخيانة و العمالة، متجاهلين أن أحداً لا يستقوي على الوطن و المواطن و الشعب، بل على أعداء الوطن و المواطن و الشعب من الحكام المستبدين و أزلامهم. و قلب الحقيقة بهذا الشكل ما هو سوى فخ للإيقاع بالمعارضة، و تجريدها من الفرصة التاريخية المتاحة لها، و التي تعتبر السلاح الحاسم لكنس الدكتاتوريات التي لا تزال تسبب الأذى لشعوبها و للعالم أجمع، و أفظع ما تنتجه و تصدره يتجسد بالإرهاب العالمي.

معك 100%
و الكلام كتير صح
و انا جاهز اذا تحركت الامم المتحدة اني كون اول المرحبين
لك حدا بيكره انو يتحرر من وضع متل الوضع السوري؟؟؟؟؟

بس نحنا ما بدنا نهرب من تحت الدلف لتحت المزراب
هي هيي كل القصة
يعني شفنا الوضع العراقي شلون صاير و ما بدنا يصير فينا متلن
خلينا نفترض انو اميركا نيتها سليمة و بس بدها تحررنا من الاحتلال الاسدي، بس الفكرة انو شو بيضمنلنا انو العلوية او الاخوان او جماعة القاعدة ما تعمل نفس يلي عم يعملوه بالعراق عنا؟؟؟؟

اذا اميركا ما عم تقدر تضبط الوضع بالعراق ليش رح تقدر تضبطو عنا؟؟؟؟؟

لأ خيو اذا الشغلة بدها توصلنا لمتل العراق ما بدنا بنوب بنوب
هاد اذا فرضنا انو نية اميركا سليمة و كل همها سلام بالشرق الاوسط

- استقوى شارل ديغول بالخارج لتحرير فرنسا من الحكومة " الوطنية "؟! المتعاملة مع النازيين إبان الحرب العالمية الثانية.

4- استقوى المسلمون الأفغان بالولايات المتحدة و أوروبا ضد الحكم الشيوعي الأفغاني

- استقوى الشريف حسين قائد الثورة العربية الكبرى بالخارج ( و هو من سلالة الرسول الهاشمية ) بالإنكليز و حلفائهم ( غير المسلمين ) للتخلص من الحكم ( الإسلامي ) العثماني خلال الحرب العالمية الأولى.

- لقد كان أبو جهل و أبو سفيان الكافران من أقرباء الرسول ( ص )،فهل كان الرسول ( ص ) يفضلهما على الغريبين الأجنبيين بلال الحبشي و سلمان الفارسي ؟ و هل كان استقواء الرسول (ص ) بأمثالهما على أقربائه و أنسبائه من كفار قريش عملاً لا أخلاقياً و خيانة لأهله من قريش؟؟!

كل هالحالات كانت حالات حياة او موت
بالاضافة انو الطرف التاني كان عدو حقيقي للاعداء يلي تم الاستقواء عليهم
لكن ما منقدر نقول انو اميركا عدو للديكتاتوريات
و إلا شو بتفسر سكوتها عن يلي عم يصير بمصر او السعودية؟؟؟؟
يعني مصر ما فيها ديكتاتورية؟؟؟ و الحكم السعودي حكم صالح؟؟؟؟
ما اميركا يلي طلبتو من الحكام السعوديين هوي انو يشددوا القبضة ضد يلي بتعتبرهم اميركا اعداءها

بعدين ليش ما سمعنا صوتها بيلي صار بتركمانستان مؤخرا
ولا هون صار في حسابات تانية؟؟؟؟
لو فرنسا هيي يلي بدها تدعم المعارضة السورية و لو المعارضة عم تستقوي بالفرنسييين كان الموضوع مختلف تماما
لأنو الشعب الفرنسي شعب واعي و فعلا يريد الحرية لباقي الشعوب
بعكس الشعب الاميركي يلي ما بيهمو السياسة الخارجية على الاطلاق و شو ما قلن الرئيس بيسدؤوا

جو
لحتى تصير الصورة واضحة عندك لو يلي عم يتحرك هوي الامم المتحدة كان موقفنا مختلف تماما
يعني الشغلة بالنسبة لألي ما نها شغلة جدعنة و لا شي
ليش صحللنا انو حدا يقاتل عنا و قلنا لأ؟؟؟؟؟

بس شفنا يلي ماتوا(العراق)

اصلا انا شاكك انو اميركا تكون فعلا بدها تحررنا من الحكم البعثي
و انا بتصوري انو البعث السوري هوي اكبر قاعدة استخباراتية اميركية خارج اميركا
و كل الحكام الجداد يلي بفلسطين و العراق تم وضعهم بمباركة اميركية و تم تدريبهم بسوريا
و آخر رصاصة تم اطلاقها من الجبهة الجولانية على اسرائيل كانت عام 1974
و ع فكرة حزب الله كمان عميل اميركي
ليش في فلسطيني او سوري قومي او شيوعي استرجا من وأت ما انعمل حزب الله لليوم انو يعمل عملية وحدة بالجنوب اللبناني

و الانسحاب الاسرائيلي يلي صار سنة ال2000 كان واضح تماما انو ما عاد في داعي لجيش لحد ليحمي الحدود الاسرائيلية لأنو حزب الله صار مكفي و موفي
و هي شغلة طيارة بلا طيار و اللا كاتيوشا بينضرب ع شي جرد هي كلها تمثيليات لحتى يضل للحزب شوية مصدائية يعني شغلة حفظ ماء وجه مو اكتر

و دمتم

[Hus]

اصلا انا شاكك انو اميركا تكون فعلا بدها تحررنا من الحكم البعثي
و انا بتصوري انو البعث السوري هوي اكبر قاعدة استخباراتية اميركية خارج اميركا
و كل الحكام الجداد يلي بفلسطين و العراق تم وضعهم بمباركة اميركية و تم تدريبهم بسوريا
و آخر رصاصة تم اطلاقها من الجبهة الجولانية على اسرائيل كانت عام 1974
و ع فكرة حزب الله كمان عميل اميركي
ليش في فلسطيني او سوري قومي او شيوعي استرجا من وأت ما انعمل حزب الله لليوم انو يعمل عملية وحدة بالجنوب اللبناني

يا شيـــــــــــــــــــــــ ـــــــخ

هلق بجد عم تطرح هال الفرضيات او هي بسياق المداعبة

[krimbow]

هلق بجد عم تطرح هال الفرضيات او هي بسياق المداعبة

وين الخطأ بالشك؟

انا حطيت الاسباب يلي بتخليني شك
لو اني قلت اني متأكد كان الك حق تعتبرني عم امزح

بعدين من كم يوم بس اعلنت سوريا عن وقف التعاون العسكري و الاستخباري مع اميركا
شو معنات هالحكي؟؟؟

[yass]

حكي حلو كريمبو .....

أنا مازلت مصرا على أن النظام السوري الحالي غير مزعج لأمريكا اطلاقا !!!

[Tarek007]

نكوشة لاهمية الموضوع الطروح

[توتي]

موضوع سخيف يجب مسحه

[sezar]

موضوع سخيف يجب مسحه

شكلك حميان مع الحكومة و ازا بدك تضل هيك رح يوجعك راسك بالمنبر :P

[توتي]

يوجعني راسي هلأ احسن ما يوجعني قلبي منالخونة والمتعاملين مع الأستعمار

[sezar]

يوجعني راسي هلأ احسن ما يوجعني قلبي منالخونة والمتعاملين مع الأستعمار

حبيبي انت قريت الردود ماحدا بدو يتعامل مع يلي سميتو استعمار أو جهات خارجية

ازا قريت رد حسون بتعرف انو المعارضة هي التي تستعين بالداخل على الخارج و العكس غير صحيح و بالتالي لاوجود لخائن هنا

[Joe]

كاتب النص الأصلي : krimbow

كل هالحالات كانت حالات حياة او موت
بالاضافة انو الطرف التاني كان عدو حقيقي للاعداء يلي تم الاستقواء عليهم
لكن ما منقدر نقول انو اميركا عدو للديكتاتوريات
و إلا شو بتفسر سكوتها عن يلي عم يصير بمصر او السعودية؟؟؟؟
يعني مصر ما فيها ديكتاتورية؟؟؟ و الحكم السعودي حكم صالح؟؟؟؟
ما اميركا يلي طلبتو من الحكام السعوديين هوي انو يشددوا القبضة ضد يلي بتعتبرهم اميركا اعداءها

بعدين ليش ما سمعنا صوتها بيلي صار بتركمانستان مؤخرا
ولا هون صار في حسابات تانية؟؟؟؟
لو فرنسا هيي يلي بدها تدعم المعارضة السورية و لو المعارضة عم تستقوي بالفرنسييين كان الموضوع مختلف تماما
لأنو الشعب الفرنسي شعب واعي و فعلا يريد الحرية لباقي الشعوب
بعكس الشعب الاميركي يلي ما بيهمو السياسة الخارجية على الاطلاق و شو ما قلن الرئيس بيسدؤوا

جو
لحتى تصير الصورة واضحة عندك لو يلي عم يتحرك هوي الامم المتحدة كان موقفنا مختلف تماما
يعني الشغلة بالنسبة لألي ما نها شغلة جدعنة و لا شي
ليش صحللنا انو حدا يقاتل عنا و قلنا لأ؟؟؟؟؟

بس شفنا يلي ماتوا(العراق)

مرحبا كريمبو

ما رح عالج موضوع العلاقة بين حزب الله و البعث السوري مع أميركا لانو الموضوع صاير موضوع قناعات شخصية ما منقدر نحكي فيها... بس عندي تعقيب على الكلام السابق

طبعا أنا معك بكتير من يلي حكيتو.. أولا أميركا بشكل واضح مانا حامي للديمقراطية و حقوق الإنسان بالعالم بسبب التغاضي الواضح عن بعض الدول يلي بصير فيها انتهاك كبير للديمقراطية و حقوق الانسان متل الصين و كوبا و مصر و السعودية و إلخ ... و لكن نحنا بالنهاية ما دخلنا بكيف علاقة أميركا مع الصين و مع مصر... في فرق كبير لانو مصر عاملة سلام مع إسرائيل و خالصة و الصين دولة عظمى و بينها و بين أميركا كمية هائلة من العلاقات التجارية و المالية... و نحنا ما دخلنا كمان اذا كان الشعب الأميركي مثقف اجتماعيا و فنيا أم غير مثقف... نحنا عندنا بلد تعبانة و بدنا ناس تتدعم حركات تحررنا البسيطة و المتواضعة جدا لحد اليوم و يلي يا دوب الواحد بيسمع صوتها حتى و هوي عم يسعى سعي ليلاقي هيك حركات! (يعني اذا الواحد حب يطنش بيقدر برياحة ما يسمع شي بينما المفروض صوت المعارضة يكون واصل للأطرش!)

اكيد ما بدنا تدخل عسكري أجنبي لأنو هادا الشي رح يسبب فوضى عارمة بسوريا و هادا ما من مصلحة حدا لا أميركا و لا نحنا

كل المطلوب هو دعم إن كان سياسي او مادي... و برأيي ما إلنا علاقة بتصرفات المصدر الداعم مع باقي الدول ... بيهمنا شو حاطط بباله عن البلد طبعا... بس نحنا عم نحكي عن فكرة تلقي الدعم بحد ذاتها... و صدقني في كتير حالات انو مصادر بتقدم دعم لجماعات بدون ما تتدخل بطريقة عمل او جدول هاي الجماعات... يعني مجرد دعم من بعيد لبعيد و يراقبوا شو بصير... و برأيي هاي احسن شي بوضعنا الحالي

[بطل الأخوية]

موضوع سخيف يجب مسحه

بس ملاحظة
أنو هادا إسمو منبر حر
يعني بيتميز بالحريي
و ما بعتقد أنو بس البعثيين بحقلون يكتبوا فيه
يعني متل ما البعثي بحقلو يكتب المعارض كمان بحقلو يكتب

[zen]

بس ملاحظة
أنو هادا إسمو منبر حر
يعني بيتميز بالحريي
و ما بعتقد أنو بس البعثيين بحقلون يكتبوا فيه
يعني متل ما البعثي بحقلو يكتب المعارض كمان بحقلو يكتب

كلام حلو نضيف