سورية وتركيا قريباً... دولتان بحكومة واحدة!

[ayhamm26]

كشف وزير الخارجية التركي أحمد داود أوغلو عن عزم بلاده إنشاء مجلس حكومي مشترك مع سورية، يشابه نظيره الذي شكل بين تركيا والعراق. وعلى قاعدة أن يكون النموذج «دولتان بحكومة واحدة».

ونقلت صحيفة السفير اللبنانية اليوم عن صحيفة "ملليات" التركية أن هذا الإجراء باعتقاد داود أغلو سيخفض المشكلات بين الدولتين الجارين إلى نقطة الصفر ويرفع التعاون إلى الدرجة القصوى.
ويذكر أن أنقرة قررت بعد زيارة رئيس الوزراء العراقي نوري المالكي، تشكيل مجلس حكومي مشترك يضم رئيسي حكومتي البلدين والوزراء الأساسيين فيهما.وقالت صحيفة السفير، أن أوغلو وصف العلاقات مع سوريا بأنها في أكمل أوجهها. وقال «إننا سنشكل مع سوريا مجلس تعاون استراتيجي مثل الذي شكلناه مع العراق.

وقد عقدنا في وزارة الخارجية مع ثمانية من زملائي اجتماعا لهذا الغرض. وبهذا الشكل نطور العلاقات مع الجيران إلى درجة تخفيض المشكلات إلى نقطة الصفر، ورفع التعاون إلى الدرجة القصوى»، موضحا أن الاستعدادات تجري بين البلدين بهذا الصدد.وأوضح أن الحكومة المشتركة لا تقتصر على سورية والعراق بل يراد لها أن تعمم على كل جيران تركيا من إيران وجورجيا واليونان وبلغاريا.ومثل تلك الحكومات المشتركة تجتمع دوريا وتقرر على مختلف الأصعدة الاقتصادية والثقافية والتجارية والأمنية.وكان وزير الدولة التركى للتجارة الخارجية ظافر ساجلايان أعلن أمس (الجمعة ) ان تركيا وسوريا اعدتا خارطة طريق لتدعيم العلاقات الثنائية، وخاصة فى المجال الاقتصادى ، وفقا لما ذكرت وكالة انباء (الاناضول) التركية . وأضاف " ان الهدف هو تحويل العلاقات الاقتصادية الى شراكة تجارية واقتصادية دائمة. وسيعمل الجانب التركى جاهدا على تنفيذ القضايا التى شملتها مذكرة التفاهم ".

واشار الى ان الدولتين قررتا عقد منتدى اقتصادى تركي - سوري فى الربع الاول من عام 2010 ، واتفقا على عقد اجتماع مجلس اعمال تركى- سورى فى نوفمبر عام 2009.

نشرة كلنا شركاء.

[..Jimy]

طيب داخليا شو بيعني هالحكي؟؟

[i_miss_syria]

شي فهمتو و شي ما فهمته.

ممكن حدا يشرحلي الخبر, لو سمح هذا الحدا.

[ayhamm26]

كاتب النص الأصلي : ..Jimy

طيب داخليا شو بيعني هالحكي؟؟

اذا قصدك داخليا شو رح يكون انعكاس هالشي على حياة المواطن, فبرأيي ولا شي.

في أخبار عم تقول انو تركيا رح تبدأ توزعلنا كهربا قريبا , بالاضافة لقصة الاستثمارات التركية بسوريا اللي مبلشة من زمان. بس نظرا للفساد و طرق الادارة المتخلفة اللي عنا, اي لو بيجي بيل غيتس و بيستثمر ثروتو كلها بسوريا ما رح يتغير شي.

[jano.]

نظريّاً وبشكل عامّ، شغلة حلوة...

بالنسبة لـ «دولتان بحكومة واحدة» أكيد مو المقصود منها التدخل بالأمور الداخليّة البحتة من قبل أي طرف، في كتير شغلات ممكن تتم بين دولتين على شكل اتفاقيات اقتصادية، أمنيّة، بيئيّة الخ... وتكون هالأمور مقيّدة بقوانين موحّدة بين الدولتين.

[suryoyo]

ما دام ما تغير شي ملموس بالعراق بعد هذا المجلس اللي اول مرة اسمع عن اسمو ... غير زيدوا حصتنا بالمي مقابل اخذ نفط اكثر


بالحقيقة .. تركيا ممكن تفيد بالاستثمارات

[المحارب العتيق]

والله أحترنا بدنا نبيع البلد لأيران ولا تركيا

الأقتصاد التركي سيبتلع الأقتصاد السوري بمنتهى السهولة . والأندماج الأاقتصادي الذي يعلن عنه ماهو الا عجز لصالح الأاقتصاد التركي . فبينما نصدر المواد الأولية نستورد كل ماتنتجه المعامل السورية ( طبعا الحكومة التركية بتساعد منتجاتها بقوانين كتيرة والحكومة السورية بتفشل منتجاتها بقوانين كتيرة ) . يعني كمان شوي منسكر معاملنا ومنشتري تركي وبدون مانشتغل

[المحارب العتيق]

بس تساؤلات بما أنو بدنا نصير دولتين بحكومة وحدة

رح يرجعولنا لواء اسكندرون ؟

[mhsen77]

رح يرجعولنا لواء اسكندرون ؟

ما بظن لانو الشباب باعوه من زمان وصرفو حقو


بس نحنا كشعب شو ممكن نستفيد ؟
و الاقتصاد السوري بميزان الربح و الخسارة شو وضعو

[المحارب العتيق]

كاتب النص الأصلي : mhsen77

ما بظن لانو الشباب باعوه من زمان وصرفو حقو


بس نحنا كشعب شو ممكن نستفيد ؟
و الاقتصاد السوري بميزان الربح و الخسارة شو وضعو

أقتصادنا بيصير سلامتك من الأه

[Elephant And Castle]

المحارب العتيق

والله أحترنا بدنا نبيع البلد لأيران ولا تركيا

هاد ما اسمو بيع ,,اسمو اجار ,,يعني عادي لما بيأجرو البلد للأيراني و التركي ..كام سنة و يلي بيقبض حقها بكون مشي حالو ...

هلئ حلو يكون في تعاون اقليمي مع الدول المجاورة ة..بس لما بيتعلق الموضوع بدولتين متل ايران او تركيا ,,الواحد ما بكون مرتاح ...التنين اطماعون واضحة متل عين الشمس ,,,و تاريخون و حاضرون معنا شي سيء كتير ,,,,,,يعني ,,,بالفعل شو مشان اللواء !!

mhsen77

ما بظن لانو الشباب باعوه من زمان وصرفو حقو

يا رجل باعوا الجولان و اللواء و كتير شغلات تانية و صرفوا حقها ...ما مزعوج ليش انباعت ..مزعوج ليش صرفو حقها ,,,معقول ينصرف المبلغ الكنير هاد بالسهولة هي ...!! ..ما عم اتمسخر ..عنجد ,,لأنو يلي بيبعزق حق الجولان و اللواء بالسرعة هي ,,,,ما عندو مشكلة انو يبيع لسا مشان يغطي مصاريفو ( عم احكي بكل تجرد بمعزل عن التلميح لأي فئة او شخص ..لأنو لهلئ ما نعرف مين يلي عم يبيع ,,,الشعب ,,او النظام ,,او جهة تانية )

[mhsen77]

كاتب النص الأصلي : المحارب العتيق

أقتصادنا بيصير سلامتك من الأه

[mhsen77]

كاتب النص الأصلي : المحارب العتيق

أقتصادنا بيصير سلامتك من الأه

[المحارب العتيق]

كاتب النص الأصلي : mhsen77

على فكرة كتير ناس من العوام ومحدودي النظر ( مو أهانة ) بكتير من المواقع الأالكترونية بيهاجموني لما بدافع عن حماية اقتصادنا وبطالب بمساعدتو ودفعو للمنافسة .

عم تسألني عن أقتصادنا
ياعزيزي أنا مثلا بطلع كتير على تركيا وعندي أطلاع لا بأس فيه عن أقتصادهم . ورح نحكي مثال عن الصناعات الغذائية يلي هية من أعمدة الأقتصاد السوري ويلي هو وللأسف بيعتمد بشكل كتير كبير على الصناعات الخفيفة . فيك تشوف بأي سوبر ماركت المنتجات التركية . رح تلاقيها بنفس سعر المنتجات السورية أو يمكن أرخص مع منافسة كبيرة من حيث النوعية . رغم أنو نفس الأاصناف بتنباع بالسوبرماركت التركي بحوالي ال3 أضعاف . طبعا الحكومة التركية عندها قوانين تشجيع التصدير كتير قوية

مثال تاني

صناعة المنسوجات السورية هية كمان من أعمدة الأقتصاد السوري

لو أنلغى الجمرك وانفتحت الحدود . الصناعة السورية ستعلن أفلاسها ( بأستثناء معامل التصدير ) . لعدة اسباب متل ماذكرنا أنو بتركيا في أعفائات ضريبية وخاصة على التصدير . في تسهيلات بنكية كتير قوية . في سوق مفتوح على أوروبا وروسيا تحديدا . الشي يلي بيخلي عندهم كم هائل من الأنتاج وهو بطريقو بيساعد على تكلفة أرخص


منعمل مقاربة بين البلدين منلاقي انو القاونين التركية بتفرض ضرائب على البضائع الصينية لأنها أرخص بينما لحنا هون مامنكون عم نحمي صناعتنا

كمان مثال تاني سوريا وتركيا من أكتر البلدان من حيث أنتاج القطن الحكومة التركية قامت بعدة اجرائات لتساعد الصناعات القطنية . من تسهيلات بنكية وغيرها وغيرها . حتى تستثمر القطن بداخل تركيا . وهيك بتكون استفادت من عدة أمور منها انها لما حتبيع القطن بشكلو النهائي بتكون استفادت من قيمة مضافة عليه بدل بيعو خام بسعر رخيص . ومنها فرض اسمها كمنتج قطني قوي بالعالم . ومنها تشغيل يد عاملة بأنتاجو الشي يلي بيساعد على أيجاد فرص عمل . لبالوقت يلي لحنا بسوريا صرنا عم نصدر لتركيا قطن خام وندخلو بميزان التبادل التجاري يلي عم نتفاخر أنو وصل ل2 مليار ( وهو خاسر للجانب التركي )

[mhsen77]

بالنسبة للقوانين عنا حتى الجيدة و الممتازة منها بتجي التعليمات التنفيذية و بتشفيها من كل شي جيد و مفيد

هيدا واقع للاسف


لهيك حاسس انو اذا صارت هالحكومة رح يكون المستفيد الوحيد هنن التجار الكبار و بعض المسؤولين و بس و عمرو الوطن و المواطن ما يستفيد

[المحارب العتيق]

لك يلي بيزعج بالموضوع . أنو الدولة عم تخسر بأغلب مكونات القطاع العام . وحتى الرابح منها فيه الاف الوظائف الغير ضرورية والموظفين الذين لايعملون . لكن الدولة بتحمي هاد القطاع وبتمولو تحت تسمية الاقتصاد الأاجتماعي وأنو لازم الدولة تشغل مواطنيها . بنفس الوقت الطبقة الوسطى ومشاريعها مهمشة ومسحوقة بالكامل . وحتى مابقي منها فهو ضعيف وكل مالها الامور ضدو ( وهاد بيشمل الاف المشاريع الصغير والورشات وغيرها )ويلي فيها مئات الاف اليد العاملة . بيبقا التجار الأاقوياء والشركات الكبيرة يلي بضل عندها هامش منافسة بحكم دعمها وتسهيلاتها (الغيير قانونية ) وحجمها المالي والسوقي . ( عدا عن الشركات الأحتكارية ) . يعني يا غني يافقير

كاتب النص الأصلي : mhsen77

لهيك حاسس انو اذا صارت هالحكومة رح يكون المستفيد الوحيد هنن التجار الكبار و بعض المسؤولين و بس و عمرو الوطن و المواطن ما يستفيد

بما أنو عندي قناعة أنو التجار الحاليين الكبار ببلدنا هنن سماسرة مو تجار . بيكون كلامك واقعي . خاصة أنو سمعت من فترة من مسؤول أقتصادي ( نسيت مين هو ) أنو أنفتاح الأقتصاد السوري على الاقتصاد التركي . بموازة تفعيل السوق العربية المشتركة . رح يجعل سوريا قاعدة تصدير المنتجات التركية للدول العربية ( يعني بيكون الزلمة أعترف ضمنيا أنو رح ننقض اتفاقيات السوق العربية المشتركة بتزوير شهادات المنشأ ) . وهيك متل ما أنت قلت بيستفيدو شوية تجار بصفقات استيراد وتصدير والصناعة السورية برجع بقلك سلامتك من الاه

[MadMax]

أنا مع تحسين العلاقات السورية مع كل دول الجوار ....خاصة الدول الغير عربية
لازم يكون عنا بديل اقتصادي .... للجوار العربي



بالنسبة لحماية الصناعة السورية ..
أكيد ما بتصير عن طريق فرض الرسوم و الضرايب على البضائع الاجنبية ( لأنو بهالحالة .. المواطن هو يللي بيدفع التمن )



حماية الصناعة الوطنية بتصير عن طريق إعطاء تسهيلات معينة للصناعيين السوريين

[المحارب العتيق]

كاتب النص الأصلي : MadMax

أنا مع تحسين العلاقات السورية مع كل دول الجوار ....خاصة الدول الغير عربية
لازم يكون عنا بديل اقتصادي .... للجوار العربي



بالنسبة لحماية الصناعة السورية ..
أكيد ما بتصير عن طريق فرض الرسوم و الضرايب على البضائع الاجنبية ( لأنو بهالحالة .. المواطن هو يللي بيدفع التمن )



حماية الصناعة الوطنية بتصير عن طريق إعطاء تسهيلات معينة للصناعيين السوريين

أنا معك . واكيد قبل مانفكر نحمي صناعتنا لازم نفكر نساعدها على التطور مشان تقدر تنافس لأنها بحمايتها فقط بتتخلف وبتبطل تنافسية . بس كمان بكل دول العالم فرض الضرائب على ما يماثل الصناعات الوطنية الأاساسية موجود . يعني مثلا تركيا بتفرض ضرائب على صناعة الالبسة الصينية لأنها تضر المنتجات التركية . وصناعة الأالبسة مهمة للأقتصاد التركي . نفس الشي بعتقد بتعملو فرنسا على استيراد السيارات لأنو صناعة السيارات مهمة للناتج القومي الفرنسي . مثلا سوريا مابتنج سيارات ومع ذلك بتحط جمارك عالية على استيرادها . أو مامنصنع تكنولوجيا وهيك بيكون تحرير موادها من الضرائب أمر طبيعي