المزايدين و لاعقوا أحذية النظام حشرات المنبر متى نتخلص منهم

[krimbow]

طيب

اول شي بأكد للكل انو ما في شي اسمو حملات منظمة ..

على الاقل من جانبي الشخصي

و حكيي كلو عن حالي لأنو ما بمثل غير حالي

اول شي
ما حدا بدو يلون المنبر بلون واحد، على الاقل الادارة ما بدها هالشي
و عندي كتير ادلة و رح اطرحها هون
1-
بفترة الصيف نشطت المعارضة بقوة داخل المنبر .. و وصل المنبر لمرحلة انو يتحول لقلعة المعارضة
فقامت الادارة (مشان تكسر المعادلة) بصنع قسم خاص اسمو قسم (الفساد)
و الهدف منو حشر اكتر المواضيع يللي بيتناولها المعارضين بقلب هالقسم و ابعادهم عن المنبر و اعطاء باقي الالوان فرصة اثبات وجود

2-
بمبادرة شخصية مني لاثبات وجود كل الاطياف بالمنبر، شجعت نوعية كتير خطيرة و حساسة من المواضيع انها تنوجد بالمنبر، ... و هي المواضيع المتعلقة بالاسلاميات، و حطيت حدود لحتى ما تفلت القضية انو ما بتم مناقشة العقائد الدينية، متل الحجاب و نظرة الاسلام للمرآة ... الخ
رعم اعتراض كل الليبراليين ع الموضوع، متل سيزار و مجود يللي انسحبت من المنبر، و ابو النسيم، رغم كل مطالباتهم باخلاء الساحة الهم رفضت هالشي
ابقيت على هالمواضيع و هيي موجودة بالمنبر لليوم خير شاهد على هالحديث
بس مع الاسف تداعيات الصور المسيئة للرسول الغت اي جانب من جوانب الحوار مع هيك نوعية من الافكار، بسبب ازدياد التعصب الديني

3-
لليوم لما تشوفوا المواضيع رح تلاقوا انو في عدد جيد جدا من الموالين للنظام البعثي
متل زين و وايت روز و وايت سنيك و الآغا و غيرهم كتار

4-
حتى هاللحظة، و على الرغم من سهولة اني احذف او حتى اني وقف عضوية اي شخص
و على الرغم من كل المشاحنات يللي صارت بيني و بينك يا فادي و بيني و بين مي تو
(باستثناء شغلة التعدي ع الاهل)
على الرغم من اللغة السوقية المستعملة بالتنبيهات
و على الرغم من عدم توافق افكاري و آرائي معكم
ما تم حذف اي رد او موضوع
صوتكم موجود و ما حدا عم يقمعو

و ازا بتلاحظوا ... انتوا صحاب الشعبية الكبرى بالمنبر مو انا ... مع انو صرلي تقريبا سنة بالاخوية
و هاد اكبر دليل انو كلمتكم عم توصل

بقا لا حدا يتهمني انو عم لون المنبر بلون واحد

المنبر حر و فيو كل الاراء و الافكار
و تعدد الافكار شغلة صحية، بعكس ما عم يتصور البعض
حتى لو كانت شغلة غير صحية
قوانين المنبر بتستمد من الاعلان العالمي لحقوق الانسان
و رح اشتغل دايما و ابدا مشان هالتعددية الفكرية بالمنبر

تاني شغلة
بخصوص المشاحنات يللي تمت بيني و بين مينيمي
بعكس ما بيتصور هوي و غيرو، ما عندي مشكلة ابدا بتغيير خطو التهكمي المعروف، بدءا بابتداع مصطلحات كلنا منستعملها متل موزمبيق، و انتهاءا بتمرير كل مقالة بتنزل ببلوغر الدومري، من هالخط التهكمي لخط الموالاة
ما عندي اي مشكلة ... فالانسان عندو الحرية المطلقة بتغيير قناعاتو و افكارو
اصلا اهم هدف للحوار هوي تغيير قناعات المتحاورين
و متل مو شايفين ما حذفت موضوع واحد مهما تطرف برأيو
من الالحاد، للاصولية الدينية... من الاممية، للتعصب النازي و المطالبة بتجميع الاكراد و الفلسطينيين ضمن كانتونات خاصة
طبعا مع الاحتفاظ بحق ابداء رأيي حول اي فكرة تطرفية او وسطية

كل هاد ما بيسبب المشاكل بيني و بين مينيمي

يللي بيسبب المشاكل بيني و بينو ... شغلتين
الاولى:
هيي استعمالو اسلوب الارهاب الفكري
في شباب اعتقلوا بسبب نشاطهم الناتج عن قناعاتهم
فقرر مينيمي انو ما يسمح لغيرهم انو يعتقلوا، و لهون نحنا متفقين بالهدف
بس مختلفين بالاسلوب
هوي قرر انو يحارب لحتى يلغي القناعات المسببة لهالنشاطات
و انا شايف انو لازم نحارب لحتى نلغي هيك نوع من الاجراءات التعسفية

و باعتبار انو انا و هوي ما عنا سلاح غير الكلمة
فهوي اختار اسوء اساليب القمع الفكري
التخوين
تتفيه الآراء و الافكار و القناعات و تسفيهها و تصويرها على انها فلسفات متفزلكة

كجزء من رسالتي ... اخترت اني وقفو عند حدودو و تأكيد عدم جدوى هيك اساليب مدمرة اكتر مما هيي مفيدة
فطلعت معو دكتاتور، و انتهازي، و عميل، و خاين، و تافه
و لما حاولت حاورو و انهي هالموضوع ... طلع حواري تافه و نوع من الفلسفة يللي سبقوني عليها اسخف السياسيين و احقرهم
و بالتزامن هالشي مع شغلة الاتهامات، و محاولة حشد جمهور ضدي
هاد غير محاولاتو القمعية بالتهديد و الوعيد من قبيل "انا ساكت بس ازا قررت اني ما اسكت ... كل شي بوقتو احلى"

و مع ذلك احترمت كل فكرة خرج انها تحترم بردو و ناقشتو فيها

اصلا نقاشي لكل فكرة بيطرحها هوي دليل كافي على احترامي لرأيو (و لو اني اختلفت معو... بالنهاية الاحترام لا يعني تطابق الافكار و الآراء)

بعترف انو غلطت كتير بحقو ... و بعترف انو مقصر كتير بالمنبر ... بس هالشي مو بايدي، بالنهاية المنبر من اخطر اقسام الاخوية و انا لحالي فيه، مع انو قانون الاخوية بيفرض لجنة مراقبين ع المنبر
يللي بيعزيني شغلتين
الاولى انو لما كنت اغلط بحقو كان مجرد رد فعل (بدائي) لغلطو بحقي ... و انا بعتزر منو لمينيمي ع هالشي
و التاني انو لما بغلط بعرف حالي اني عم اشتغل
فبغض النظر عن كل شي ... المنبر بعدو واقف على رجليه

و بأكد للكل انو مشاكلي مع مينيمي بتنتهي بانتهاء اسلوب الارهاب الفكري يللي عم يتبعو

هاليومين يللي مرقوا خفف شوي، انشالله نخلص من هالشي نهائيا

تالت شي
بخصوص اتهامي (من جهتي على الاقل) باني السبب باعتقال الشباب

1- الجهة الوحيدة يللي بتتحمل تبعات هالشي هيي اجهزة الامن القمعية
2- الشباب ما هنن ولاد زغار تم الضحك على عقولهم، الشباب واعيين و اختاروا خط المعارضة من بدايات دخولهم ع الاخوية، و يمكن سبب دخولهم ع الاخوية هوي وجود صوت للمعارضة فيها وقت اللي كانت باقي المنتديات كلها منتديات مسخرة و تعاليم دينية و ما بعرف شو (و يمكن هاد هوي سبب دخول مينيمي بذاتو)
3- التجمع يللي عملوه الشباب ما كنت باي صورة من الصور جزء منو و لا باي يوم من الايام، و ما دريت بقصة التجمع غير بعد ما فرط (او بالاحرى قبل ما يفرط بكم يوم و انا شبه مقتنع انو الي تأثير كبير على فرطو ... بامكانكم مراجعة مواضيع المنبر القديمة يللي بتحكي عن مؤتمر المعارضة بباريس، و رأيي فيها)
4- اول شبين تم اعتقالهم (علي و حسام) ما دخلوا ع الاخوية من 8 شهور، اللهم دخولات سريعة و بمشاركات خجولة و كلها خارج المنبر
5- الادارة بشكل عام و انا بشكل خاص على خلاف مع حسام ملحم، و في قطيعة بيناتنا
و لنفس السبب كان الخلاف و القطيعة مع طارق كمان
و طارق بيعرف اني اهم سبب بفرط التجمع
6- التجمع فارط من 6 شهور تقريبا، يعني ازا بالاساس في غلط ع الشباب بانشائهم التجمع ... فهنن صلحوا غلطهم و فرطوه
بس عطوا عقل لاجهزة المخابرات تفهم هالشي

خيي مينيمي
بغض النظر عن كل شي
الشباب اليوم معتقلين
و انا مو مستعد اني قابل اي واحد منهم، بيوم من الايام، و حس اني عرفت انهم اعتقلوا و انا سكتت و عملت حالي مو دريان
ما بقبلها على رجوليتي
و ما بقبلها على سوريتي

بعرف انو كل شي عم نعملو هوي نفخ بقربة مقطوعة
بس هاد كل شي طالع بايدنا نعملو
و ما رح ابخل عليهم باي مجهود ممكن اني ابذلو

بخصوص ابو النسيم
خفف شوي ولو

بعدين لمعلومات الكل
اكتر واحد بحذفلو هوي ابو النسيم
من قبل كنت اقعد دور ع المسبة و عدلها و خلي الرد
بعدين ما عدت عذبت حالي و صرت احذف كل الرد متل ما هوي

[rawad]

اول شي تحياتي لكل الشباب على اسلوب الحوار الراقي وخصوصاً المشرف krimbow وانا من الناس اللي بتقدر الجهد اللي عم تبذلو
تاني شي
انا بشوف انو الاختلاف بالآراء هو نتيجة مساحة الديمقراطية وحرية التعبير اللي موفرتلنا ياها أخوية..
ثالت شي
الديمقراطية شغلي جديدي علينا بعدنا ما بنعرف نمارسها, يعني ما تربينا على ثقافة الرأي والرأي الآخر او الحوار لذلك عم تكون المواقف شخصية وهدا الشي اللي ما بدنا ياه.

[me2]

كاتب النص الأصلي : rawad

اول شي تحياتي لكل الشباب على اسلوب الحوار الراقي وخصوصاً المشرف krimbow وانا من الناس اللي بتقدر الجهد اللي عم تبذلو
تاني شي
انا بشوف انو الاختلاف بالآراء هو نتيجة مساحة الديمقراطية وحرية التعبير اللي موفرتلنا ياها أخوية..
ثالت شي
الديمقراطية شغلي جديدي علينا بعدنا ما بنعرف نمارسها, يعني ما تربينا على ثقافة الرأي والرأي الآخر او الحوار لذلك عم تكون المواقف شخصية وهدا الشي اللي ما بدنا ياه.

هدا الحكي اللي بيتحكى ... و للصدفة أنا و كريم حكينا بنفس الموضوع ..مبارح بالليل أثناء انعقاد اتفاقية فصل القوات .


ياريت نبلش نتعود شو يعني حرية و بعدين نبلش نتعود على الديموقراطية و بحب نبه أنو الشغلتين مو شرط يجو سوا مو شرط أبدا... و الدليل الأخوة اللبنانية عندهم مساحات من الحرية اللي نحنا صرنا عم نشوفها اقرب للفوضى .. ولكن ما الهم علاقة بالديموقراطية ..

يا ريت اذا في حدا عم يدرس سياسة مثلا بشي جامعة محترمة , يعطينا هيك شوية ملخصات عن الحرية .. و نشوف كيف لازم نبلش .

[yass]

كنت قد أعلنت أنني لن أرد أبدا على هذا الموضوع لكنني أجد نفسي مرغما على الرد للأسباب التالية :


أولا : هناك من رأى هنا هجمة منظمة ضد مينيمي أو مي تو , أود أن أنفي ذلك , أنا لم أطالب بالغاء اشتراك مينيمي أو اتخاذ أي اجراء بحقه , فقط قلت أنني لن أتعامل معه لأنني لا أرتاح له (قراري شخصي بحت ولا ألزم أحد بتنفيذه).


ثانيا : حين ذكرت في ردي السابق مشاكلي السابقة مع هذا السيد ذكرتها فقط لأثبت أن له نفس الاساليب مع جميع
المشرفين , اذ أنه يطالب الآن بأن تحذف اساءات أبو النسيم , و أنا أوافق على هذا الشيء كذلك , لكنني ذكرت ما ذكرت كي أبرهن أن أسلوبه السابق كان بمثل هذه الاساءة أو أسوء , و أنه كان يتهمني بالديكتاتورية حينما كنت أحذف أو أنقل بعض المواضيع , و حين طالبته بأن يبرهن اتهاماته هرب , لذلك أعتقد أنه آخر من يستطيع الكلام عن الاحترام (على فكرة , كل الاهانات التي كان يوجهها لي سابقا من قبل : معارض ريموت كونترول , غبي , ولد , ديكتاتور ...الخ) لم يتم حذف أي منها .


ثالثا : لمن استغرب تصرفي , أنا تدخلت في هذا الموضوع كما تدخل غيري , لا أدري أن كنت لا أملك الحق بالتدخل أ ما شابه , و أود أن أذكر أنني لست أكثر من عضو عادي , لا أملك أي سلطة اشرافية في المنبر أو غيره , و أنني فعلت ما فعلت دفاعا عن المشرف الحالي من هجمات شخص ينصب نفسه حامل لواء الاحترام , هذا الشخص نفسه كان عميد اللااحترام سابقا .


رابعا : لم أضع هذا الرد لرمي الحطب على النار , وضعته فقط لأنني أرى أن الموضوع وشيك الانتهاء و لا أريد أن ينتهي على أنني متآمر ضد أحد .

[me2]

كنت قد أعلنت أنني لن أرد أبدا على هذا الموضوع لكنني أجد نفسي مرغما على الرد للأسباب التالية :

ما عاش اللي يرغمك على أي شي ...


أولا : هناك من رأى هنا هجمة منظمة ضد مينيمي أو مي تو , أود أن أنفي ذلك , أنا لم أطالب بالغاء اشتراك مينيمي أو اتخاذ أي اجراء بحقه , فقط قلت أنني لن أتعامل معه لأنني لا أرتاح له (قراري شخصي بحت ولا ألزم أحد بتنفيذه).

طبعا حقك ... و شكرا على التوضيح أنو مافي هجمة ... لأني دبساتي مراق ..


ثانيا : حين ذكرت في ردي السابق مشاكلي السابقة مع هذا السيد ذكرتها فقط لأثبت أن له نفس الاساليب مع جميع
المشرفين , اذ أنه يطالب الآن بأن تحذف اساءات أبو النسيم , و أنا أوافق على هذا الشيء كذلك , لكنني ذكرت ما ذكرت كي أبرهن أن أسلوبه السابق كان بمثل هذه الاساءة أو أسوء , و أنه كان يتهمني بالديكتاتورية حينما كنت أحذف أو أنقل بعض المواضيع , و حين طالبته بأن يبرهن اتهاماته هرب , لذلك أعتقد أنه آخر من يستطيع الكلام عن الاحترام (على فكرة , كل الاهانات التي كان يوجهها لي سابقا من قبل : معارض ريموت كونترول , غبي , ولد , ديكتاتور ...الخ) لم يتم حذف أي منها .

أنا أسف اذا هيك كان أدائي ... بس معناتو أني ما تغيرت ألا للأحسن و الأقل حدة ...

ثالثا : لمن استغرب تصرفي , أنا تدخلت في هذا الموضوع كما تدخل غيري , لا أدري أن كنت لا أملك الحق بالتدخل أ ما شابه , و أود أن أذكر أنني لست أكثر من عضو عادي , لا أملك أي سلطة اشرافية في المنبر أو غيره , و أنني فعلت ما فعلت دفاعا عن المشرف الحالي من هجمات شخص ينصب نفسه حامل لواء الاحترام , هذا الشخص نفسه كان عميد اللااحترام سابقا .

يعني المهم أنو اذا في قلة احترام من قبلي فقد توقفت ... ولازم تتوقف من قبل الغير ...

رابعا : لم أضع هذا الرد لرمي الحطب على النار , وضعته فقط لأنني أرى أن الموضوع وشيك الانتهاء و لا أريد أن ينتهي على أنني متآمر ضد أحد .

شو التآمر كتير شغلة بسيطة ؟؟ و شو هالشي الكتير مهم اللي ممكن حدا يتآمر على حدا .. أكيد مانك متآمر ولا فيك ألا أن تكون محترم ...

الموضوع سقط بالتقادم ...

تحية ألك من الشام

[WHITESNAKE]

لليوم لما تشوفوا المواضيع رح تلاقوا انو في عدد جيد جدا من الموالين للنظام البعثي
متل زين و وايت روز و وايت سنيك و الآغا و غيرهم كتار

برجع بمرة جديدة وبكرر اسفي انك ما بتقرء منيح كريم
يعني مابعرف كيف استنتجت اني موالي او معارض
حاليا مارح احكي كتير رح اختصر وبتوسع مرة تانية

انا مع سياسة التغيير والمشكلة انو الغلط مليان بالبلد والناس والشعب والحكومة تعودو عالفساد بكل نواحيه
شغلة صغيرة: هالحكومات من الشعب وهالشعب من الحكومات.
قالو لأليط ليش معكر قلهون..................................وال كمالة بتعرفوها
هادا يلي عندي

بس بيحز بنفسي مع تأييدي لكتير من كلام كريم او مي تو بس بيحز فيي انو كريم ما بيقرا كتير غير يلي بدو ياه
يمكن مشغول وانشالله خير

[me2]

كاتب النص الأصلي : WHITESNAKE

برجع بمرة جديدة وبكرر اسفي انك ما بتقرء منيح كريم
يعني مابعرف كيف استنتجت اني موالي او معارض
حاليا مارح احكي كتير رح اختصر وبتوسع مرة تانية

انا مع سياسة التغيير والمشكلة انو الغلط مليان بالبلد والناس والشعب والحكومة تعودو عالفساد بكل نواحيه
شغلة صغيرة: هالحكومات من الشعب وهالشعب من الحكومات.
قالو لأليط ليش معكر قلهون..................................وال كمالة بتعرفوها
هادا يلي عندي

بس بيحز بنفسي مع تأييدي لكتير من كلام كريم او مي تو بس بيحز فيي انو كريم ما بيقرا كتير غير يلي بدو ياه
يمكن مشغول وانشالله خير

كريم من الناس اللي بتحمل مية بطيخة .. بدك تروق عليه ..

أنا ما بعرف كمالة المثل ...تبع قليط ...أو أليط.

كلنا عم نحكي نفس الشي تقريبا .. ولو أنو أحيانا حدا بيفهم حدا غلط ..

تحياتي ألك ..