التدخين والنسوان

[rama1985]

كاتب النص الأصلي : sandra

هلا على عيني التدخين مضر وكل شي وفي ناس ما بتحبو وما بتتحمل ريحتو ...
بس نحن هون عم نحكي عن البنت يلي بتدخن وكيف نظرة المجتع الها
فانا بشوف يعني غريب جداً نقبل تصرف لشب ونحرمو عالبنت ونحن بهالعصر هاد
يعني أظن مضار التدخين وحدة للشباب وللبنات فليش يعني حلال عالشب وحرام عالبنت





أي بس يعني اسباب تدخين البنات بعتقد ما بتفرق كتير عن الشباب

مرحبا ساندرا كيفك ؟؟

انا على طول خلافات انا ورفقاتي بمواضيع المساواة بين الرجل والمرأة

بتفق معك انو المساواة ضرورية بشغلات معينة

بس مو بكل شي في شغلات الها خصوصية للرجل او للمرأة

يعني مو مقبول الرجل يعمل شغلة خاصة بالمرة

يعني مامنقبل الرجل يحط ميك اب ويقلد البنات ونقول مساواة

بالمقابل البنت كمان مو ضروري تقلد الشب بكل شي لحتى تكون قوية ومتحضرة

يعني باختصار اكتر .... انا بشوف قوة المرأة بضعفها وانوثتها

بعرف رح تقولي عني متخلفة ودقة قديمة بس شو اعمل هيك الله خلقني

تحياتي واحترامي

[هشام ابو شرار]

ايه ستي راما وشو يعني دقة قديمة...الدهب كل ما كانت دقته قديمة بيكون اغلى واحلى.....وانا ستي الله يرحمها كانت تدخن يعني هيدا شي ما اله علاقة بالتقدم اله علاقة بالزوق والريحة الطيبة

[MadMax]

هلأ التدخين بالمطلق .. يمكن عادة موكتير ظريفة
بس يللي مو ظريف أكتر ...هو فكرة هالموضوع
و هي فكرة كتير متخلفة للأسف موجودة بكتير مجتمعات عنا
اذا القصد السؤال عن التدخين عند الاناث ..مع أنو صاحب الموضوع معتبر أصلاً التدخين للذكور طبيعي
فالتدخين للإناث أكتر من طبيعي


و أنا مع التدخين جداً جزيلاً

[سوا ربينا]

هلأ هو يعني مش قصة بمانع او ما بمانع بس انو منظر البنت وهي بتدخن مش حلو ... وخاصة ازا بتكون انوثتها غير شكل بس تشوف معها سيجارة بتحس انو هالانوثة بتضيع ...

[SelavI]

يا صديق للانوثة اشكال عديدة

الانوثة ليست واحدة

الانوثة متعددة يجمعها انثى تحدد شكل انوثتها

[homam85]

كاتب النص الأصلي : MadMax

هلأ التدخين بالمطلق .. يمكن عادة موكتير ظريفة
بس يللي مو ظريف أكتر ...هو فكرة هالموضوع
و هي فكرة كتير متخلفة للأسف موجودة بكتير مجتمعات عنا
اذا القصد السؤال عن التدخين عند الاناث ..مع أنو صاحب الموضوع معتبر أصلاً التدخين للذكور طبيعي
فالتدخين للإناث أكتر من طبيعي


و أنا مع التدخين جداً جزيلاً

hالموضوع مطروح للمناقشة يا حبيبي
ولا تنسى انك بمجتمع شرقي لا بكيفي ولا بكيفك
وما بجوز تسخّف الموضوع بهالطريقة
وأنا أصلا ما اعتبرت التدخين للذكور طبيعي والدليل بردودي بعدين
والموضوع ما بعبر عن رأي شخصي ولا فكرة شخصية وانما خاضع للمناقشة
واذا بدّك رأيي التدخين حرية شخصية للبنت وللشب وللختيار والختيارة اذا بدك ما حدا الو علاقة
بس لازم نشوف بقية الردود
ولّا شو؟؟؟

[MadMax]

كاتب النص الأصلي : homam85

hالموضوع مطروح للمناقشة يا حبيبي
ولا تنسى انك بمجتمع شرقي لا بكيفي ولا بكيفك

شو خص المجتمع الشرقي بالتدخين ..... منيح ما بتجبلي كم حيث و فتوى من الشيخ أبو كعكة عن تحريمو ...و عن رجم المرأة المدخنة
لك انتو عم تحكو عن سيجارة ..مو عن شي تاني ..

[homam85]

كاتب النص الأصلي : MadMax

شو خص المجتمع الشرقي بالتدخين ..... منيح ما بتجبلي كم حيث و فتوى من الشيخ أبو كعكة عن تحريمو ...و عن رجم المرأة المدخنة
لك انتو عم تحكو عن سيجارة ..مو عن شي تاني ..

مين نحنا؟؟؟؟
أنا بعبر عن نفسي مو عن حدا تاني
وماني من جماعة الفتاوى والدقن الطويلة....
بدّك تطوّل بالك...

[روعة1]

هلأ هو يعني مش قصة بمانع او ما بمانع بس انو منظر البنت وهي بتدخن مش حلو

ليش منظرها مو حلو.. بالعكس منظرها جدا جزيلا حلو..
هلأ يعني الوحدة ازا مسكت السيجارة بايدها ضاعت انوثتها خلص؟؟

غريب.. شو السيجارة صارت حكر للرجل و تعبر عن الرجولة حتى ازا البنت مسكت السيجارة بايدها بضيع انوثتها..؟؟

[هشام ابو شرار]

ايه بتضيع انوثتها وبتصير متل الكانون تبع الفحم

[روعة1]

ايه بتضيع انوثتها وبتصير متل الكانون تبع الفحم

اي معناها و كمان الرجل بصير متل الكانون تبع الفحم و بضيع رجولتو..

[stormsmaker]

تحية
أولا أنا مو مدخن
تانيا ما بحب التدخين
تالتا رأيي هو : التدخين حرية شخصية و لكن السؤال الأول الذي أطرحه على نفسي عندما أرى امرأة مدخنة هو (أين تعلمت هذه المرأة التدخين)
طبعا السؤال ناتج عن طبيعة المجتمع يلي عايشين فيه
و بغض النظر عن الجواب رح تكون الفكر ة الاوليي او الانطباع الاولي سيء

[MadMax]

كاتب النص الأصلي : stormsmaker

و لكن السؤال الأول الذي أطرحه على نفسي عندما أرى امرأة مدخنة هو (أين تعلمت هذه المرأة التدخين)

بالفعل ..
سؤال كتير مهم ..... برهن الإجابة

[Sun Shine Art]

الموضوع كله حريه شخصيه ...ومافيك انت تجي من عندك تجي تحكم انه بصير ولا مبصير البنت الدخن ...
او فيها انوثه ولا لأ...هي حريه شخصيه ...حريه شخصيه ...انشاء الله بتحشش ..شو دخلنا نحنا بكل شخص ..وموضوع الدخان مافيك تحددو للرجل بس ولا للمراه لأ ..
حاجه بقى مشان الله ...

[سوا ربينا]

كاتب النص الأصلي : روعة1

ليش منظرها مو حلو.. بالعكس منظرها جدا جزيلا حلو..
هلأ يعني الوحدة ازا مسكت السيجارة بايدها ضاعت انوثتها خلص؟؟

غريب.. شو السيجارة صارت حكر للرجل و تعبر عن الرجولة حتى ازا البنت مسكت السيجارة بايدها بضيع انوثتها..؟؟

جدا جزيلا حلو ....

لك لا يا ستي شكلها لحالو بيصير يقرف ... ولا قال كمان يصير لون اسنانها اصفر وسود وهيك .. شي رهيب ...

كاتب النص الأصلي : هشام ابو شرار

ايه بتضيع انوثتها وبتصير متل الكانون تبع الفحم

يا زلمة انتي عراسي انتي اللي قاهمني .... بس انو شو هي الكانون تبع الفحم ....

[هشام ابو شرار]

يا سيدي الكانون هوي المنقل ولما الوحدة بتدخن بتصير متل دفاية البواري ..........

[فسحة أمل]

يعني أنز انا قريت الموضوع أكتر من مرة . وأسا لهلا ما فهمت وين المشكلة , لا تفهمو اني عم أستهزء بحدا بس انو الموضوع ما مستحمل الي بدها تدخن تدخن والي ما بدها تدخن لاتدخن تسطفل. الموضوع هالقد يعني ما في داعي نحط فلسفة للموضوع , اما بالنسبة لألي ما بتتغير نظرتي للبنت اذا كانت بتدخن لأنو انا عم اتعامل معها تبعاً لشخصيتها مو تبعاً لعاداتها

[*Marwa*]

بعرفش أحيانا بستحليها الشغلة..مع انو اكيد ما رح ادخن بالمستقبل لأنو صحتي غالية عليي ..
بس انو عادي الشغلة بالنهاية حرية شخصية..ومحاسبة التدخين المفروض تنطبق ع شاب وبنت بزات المقدار وزات المعايير .. مش انو للشاب اوكيه وللبنت نو!

يعني متـلا ازا جيت لتاريخ الأسرة .. ستي الله يرحمها كانت تدخن (وهي أكيد مش من بنات عصرنا يعني عم بحكي عن شغلة عملتها قبل شي خمسين سنة! وكانت غريبة اكيد!)
بس انو هالشي ما خلى انو العالم يعني يقللوا احترامهن الها !!.. بالنهاية كلو بتعلق بتصرفات البنآدم.. وانتي اللي بتفرض احترامك عالبشر مش السيغارة او عدمها!!