كتب زياد الرحباني:بس لنعرف قديش راح تضل معنا

[zen]

مش انو الناس بالناس ونحنا بسعد،بس يعني كيف بدنا نقنع الجرايد اللبنانية انو توقف تبخير لحمامة السلام سعد الحريري ؟
ويعني كيف بدنا نقنعوا لسعد انو هو كان في يرجع ع لبنان من زمان وانو هوي شب تمام بس مش زابطة معو بالسياسة لا بالطول ولا بالعرض وخصوصي انو الانتصار يللي جرب يبيعناياه مبارح لما رجع بالهلوكوبتر الفرنساوية طلع مش انتصار وانو رجعتو بطيارة فرنساوية ما بتشبه ابدا رجعة الخميني بشي
يعني مثلا ليش ما رجع مع السنيورة من روما او ليش ما رجع مع الامير تركي بن طلال يلي هو سعودي كمان واجا ع بيروت 5مرات معو مساعدات او انو ليش مارجع مع الخطوط الجوية العربية على شي طيارة امارتية او اردنية او مصرية ؟ليش ما جاب معو شوية دوا احمر لأهل صيدا
بسيطة منيح يللي رجعت حمامة السلام بس كمان عنا سؤال :انو ليش القذيفة الإسرائيلية على منارة بيروت القديمة رسالة لسعد الحريري ومش لفؤاد السنيورة ؟بيت السنيورة اقرب للمنارة مش هيك ؟قريطم وينك ويين رغم انو مفتوحة للاخوة السعوديين متل ما قال الشيخ باول ايام العدوان ورجع تذكر بعدين انو كمان بلبنان في لبنانيي وقال كمان قريطيم بخدمتن بس يضلوا بعيد!!!
انو كيف طلع مع خمس جرايد لبنانية انو القذيفة رسالة لقريطم ومع تلاتة عنوا (قصف قريطم)؟؟؟ يا خيي وين قصفوا قريطيم ؟؟؟يعني السنيورة بيطلعلوا رسالة بكل هالعدوان استكت عليه سعد القذيفة وبدو ياخدها لألو طيب معليش قبلانين معك انك مقامة من الاليزيه وانك عذبت حالك وجيت من الرياض على الاليزيه وقطعت مساج مرتين لتعمل اجتماعات بس المصيبة يا شيخ مش اذا نحنا صدقنا لكن اذا صدق الاسرائيلي صدق وقام بعتللك رسالة عنجد!!هونيك البلوي الكبيرة

بعدين ياشخ سؤال :ليش النازحين المهجرين المخروبة بيوتهون نايمين ع الطرقات والجنينات (صنايعوغيروا)وملاعب الفتوبول من بروت لطرابلس وفي بهالوقت اكتر من الف شقة بالسوليدير ؟فكرك مطولة القصة هيك ؟
يعني انو معقولة تشتي لدني ب أب او اذا طلع ايلول اول مبلول ،فكرك السوليدير بتضل عاصمة موناكو
ولا المهجرين بيعملوا موناكو اختها ؟
يا شيخ يا حمامة السلام وسلام الحمامة افتح قللبك وبيتك وروقها شوي بلا نفخ وبعدك ما وصلت عالبلد وبلا هيدا اللف والدواران كلما سالوك عن المقاومة عفكرة بدك تحاسبون مش هيك ؟بدك تحاسب المقاومة ؟؟ مش هيك قلت بعكاظ وعلى ال سي ان ان ؟
شوبدك بهالقصة بلاها احسن انو ديوان المحاسبة مفتوح ببير العبد والمربع بالحارة وبكل ضيعة شو بدك تحاسب بالمحاسبة (يا ما الها ستي عند سيدي )
وما احسن ما تبطل الطيارة الهليكوبتر يللي جابتك قارة ترجع تنزل وتاخدك
الحمدالله على السلامة يا شيخ بدك تطول بالك على هلكم نازح ومهجر وتطول بالك اذا سمعت هيك يعني شوية حكي بالحمرا بغير لهجة وغيرها (هيدا جنوبي على بعلبكي على لهجة اهل برج البراجنة )وحياتك ما بدهن يقعدوا ولا دقيقة بس صحابك قالوا انو خليهن يتحملوا مسؤلية مغامرتهن
راح ناخد بنصيحتك وبدعوتك ونتضامن كلنا سوا مع انو في ناس فادرة تحمم وناس انجأ قادرة تتيمم معليش كلنا سوا وكتر خيرك على كل شي بس عنا سؤال زغير بالنسبة للتضامن والوقفة سوا انو يعني لنعرف ثديس راح تضل واقف معنا :قديش فيك تقعد بلا مساج

معلم طول عمرك يا زياد

[blade]

يازين رسالة حلوة و كل كلمة من كلماتها له معنى وانا حطيت هادا الموضوع من شئ اسبوع بس للاسف ماحدا تفاعل معه لانه اخوية ماعادت اخوية ايام زمان وفهمك كفاية

[سرسورة]

معلم,,,اي والله معلم,,,,,
وشكرا زين

[ري مي]

هي المرة التالتة اللي بقرا فيها هالموضوع بأخوية
وانا بعشق زياد مشكورين زين+blade+(فلاش باك) يمكن مو متاكدة كمان نزلو من فترة

[chefadi]

شكرا زين ع المقال بس انا بحبشت ع النيت و لقيت هالرد ع مقالة زياد المزعومة

قدم اعتذارنا من الفنان زياد الرحباني ومن جمهور محبيه
توضيح من موقع الجبهة حول "رسالة زياد الرحباني الى سعد الحريري" الأربعاء 20/9/2006

اطلت علينا صباح اليوم الناقدة الفنية ضحى شمس من خلال مقالة في صحيفة "السفير" اللبنانية، وذلك بعد التوضيح الذي نشره الفنان الكبير زياد الرحباني في نفس الصحيفة يوم أمس الأول، نافيا أن يكون قد كتب "الرسالة" الى سعد الحريري، والتي كنا قد نشرناها في موقع الجبهة بتاريخ 26/8/2006.

شمس وجهت نحونا سهام اتهاماتها اللاذعة، حيث وصل بها الأمر إلى حد التلميح الى ان موقع الجبهة هو من كتب هذه الرسالة، وبتوقيت "مشكوك بأمره" !!!

كنا نتوقع من كاتبة مرموقة بمستوى ضحى شمس أن توجه لنا رسالة استفسار عبر البريد الالكتروني، وعندها تكون مقالتها أكثر دقة ومسؤولية. (وبهذه الفرصة تتعرف على هويتنا "المجهولة" لها ...)

وللتأكيد:
نحن لم نكتب هذه الرسالة، ولم نكن أول الناشرين لها، فقد وصلتنا من مصدر مقرب كان من المفترض أن يكون أمينا. وحتى مساء الأمس (الاثنين 19/9/2006) لم نكتشف الخطأ الذي وقعنا به بشكل غير مقصود.

وفي النهاية، لا يسعنا الا أن نقدم اعتذارنا من الفنان زياد الرحباني ومن جمهور محبيه.



موقع الجبهة

[abosleman]