رابطة مشجعين فريق الوحدة

[مايسترو]

ما اختلفنا يا خيو كلنا معو

بس انو شلون بالله العظيم بدو يرجع كل شي لمسارو؟فهمني ياها بناء على شو؟

شو في معطيات بين ايديك؟ولا مجرد تفاؤل؟

[I_Love_Syria]

على زمة منتدى وحداوية
وعلى زمة أحد الناقلين من منتدى كوورة ففاز الوحدة عالإتحاد 75\68
ويبدو انو هالشي صحيح لأنو في أهلاوي مسجل بالمنتدى ونازل حكي عالوحدة
أي تطورات بنخبركون أو انتو خبرونا

[I_Love_Syria]

مبروك ياشباب
كالعادة تميُّز الوحدة السلوي محدا بيطلعلوا معو بالمرة

[مايسترو]

يا اخي الوحدة جبارين

رغم انو الفريق ما فيو هاللعيبة الخارقين

ورغم ازمات النادي المستمرة

بيضل متصدر وعم ينافس

هاد هو بطل اسيا يا عمي

[المحارب العتيق]

الف مبروك ياشباب . وهي طقينا الاهلي سلة روحة رجعة

أنو بس حدا يقلو لحسون المعلاق أنو اللعبة يلي بتنلعب بالأيادي ( السلة ) طقيناهم ذهاب وأياب . بقال الله يرضى عليه يروح ي** وينام سنة كاملة . ولبقا يسمعنا صوتو

قال مدرسة قال . طلعو حضانة

[هدوء البحر]

الله يسمعنا الاخبار الطيبة وانشالله الف مبروك شباب

[I_Love_Syria]

الله يبارك فيك بس خيو السلة شغلة مفروغ منها من يوم يومو الوحدة ملك السلة

[مايسترو]

مزبوط كلامك

لا تنسى انو راتب شيخ نجيب مدرب مر

[هدوء البحر]

غدا ً صباحا ً تغادرنا بعثة فريق نادي الوحدة لكرة القدم إلى حمص لملاقاة نادي الكرامة وديا ً

بالتوفيق لفريقنا بهذا اللقاء الودي ليحقق الفائدة المرجوة قبل دخول مرحلة الإياب

[المحارب العتيق]

أنشالله الشباب تتحسن نفسياتهم شوي . وتنحل مشاكلهم

[هدوء البحر]

أسفر الأجتماع الذي جمع الأمس بين كابتن الوحدة ماهر السيد
وصفوان نظام الدين عضو الأدارة السابق
عن دفع صفوان نظام الدين راتب شهر كامل
لجميع الاعبين ودفع دفعة من مقدم عقد
ماهر السيد ورأفت محمد
وتأتي هذه الخطوة من صفوان نظام الدين بعد الخلاف بين ماهر والادارة البرتقالية
على خلاف عقد الاتفاق السعودي ورفض الادارة له

[هدوء البحر]

المبارة طلعت اليوم من شوي خلصت خسرنا واحد صفر بقدم عبد الهادي خلف بشوط التاني

[المحارب العتيق]

حيو نظام الدين

يلا بدنا باقي الشباب يتحركوا

[هدوء البحر]

منقول من المنتدى الرسمي للنادي

تحية برتقالية للجميع

حابب خبركم شوي عن بعض الأمور والاجتماعات يلي صارت
باليومين الماضيين والجهود يلي بذلها الأستاذ صفوان نظام الدين كرمال
النادي وحل بعض مشاكله الكتيرة ..

أول شي الأستاذ صفوان أول ما عرف الفندق يلي نازلين فيه اللاعبين حجز غرفة بنفس الفندق وترك ابو ظبي وشغله وأجى على دبي ونام فيها يومين ليحل اغلب المشاكل المتعلقة بلنادي

طبعا شغله ما بيسمحلوا ينزل على الشام مشان هيك استغل وجود ماهر ليحل مشكلة ماهر مشان العقد و يحل بعض المشاكل متل رواتب اللاعبين وغيره .

الكابتن ماهر جاية على دبي مع المنتخب ومقرر بشكل جدي انه يفسخ عقده
مع النادي بسبب مشاكل كتيرة مع الإدارة ..

ابو عمر عمل كل جهده انه يقنع ماهر بتغيير قراره
وعمل معه اكتر من اجتماع قبل مباراة المنتخب وبعدها والاجتماع الأطول
كان الساعة 3 الفجر بعد ما رجع ماهر من المقابلة ببرنامج صدى الملاعب ..

وضل الاجتماع أكتر من ساعتين وبنهاية الاجتماع اقتنع الكابتن ماهر ووعد انه يقدم مستوى متميز متل ما قدم بالذهاب ووعد انو يساعد الكابتن عساف بكل شي ..

و طبعا الأستاذ صفوان دفع مصاري ماهر ورافت من باقي مقدمات عقودهم
ودفع راتب شهر لكل لاعبين فريقنا البرتقالي ..

واتصل اكتر من اتصال كرمال الكابتن عساف ليساعدو ويقدملوا يلي بيحتاجه ..


بالنسبة لموضوع نزار محروس والعالم يلي عم تحكي انه ليش صفوان ما دفع لهلئ ,, حابب وضح كم شغلة ..!!؟

من بداية استلام الكابتن نزار للفريق ما انقطعت الاتصالات بينهم وخبره الأستاذ صفوان لأبو حامد شو بدك مني فخبره بدي تتكفل بمقدمات ماهر ورافت وطبعا تكفل بعقودهم ودفعها وهنن يعتبروا أعلى مقدم عقدين بالفريق.

وانا بنفسي رحت على مكتب التحويل وحولت الشيكات لانه الأستاذ صفوان كان مسافر وانا بعتن لحسام السيد وبحضور بشار كاشي ...

طبعا الاتصالات ضلت قائمة بين أبو عمر وأبو حامد وخبره لأبو عمر
انه في مشكلة مشان موضوع العسكرية بالنسبة لمعتصم علايا وقصي حبيب
ولازم تنحل قصتن باسرع وقت وفعلا الكابتن صفوان اجرى اكتر من اتصال وتم تأجيل العسكرية للتنين ولو لمدة بسيطة ..


غير انه أول مكافاة بيحصل عليها النادي كانت من الأستاذ صفوان وقت ربحنا على النواعير وانا بإيدي كمان حولت المصاري ..


طبعا غير كتير قصص و مشاكل حلها للاعبين يلي كانوا يتصلوا فيه
بشكل مباشر ويطلبوا مصاري مثلا وحل مشاكل وما قصر مع اي لاعب ابداً .

وكان الأستاذ صفوان يئله دائما للكابتن نزار انه وقت بدك شي حاكيني
بس أبو حامد ما قدر يصبر ويتحمل أكتر من هيك الوعود الكاذبة من الإدارة والشركة الراعية خاصة انه نفسية اللاعبين تعبت كتير
مشان هيك قرر الانسحاب ..


بفترة استقالة الكابتن نزار كان الأستاذ صفوان بانكلترا وكان مشغول كتير ووقته ما كان ملكه وحتى انه تقريبا كان مقطوع عن أخبار بيته وأهله ..

طبعا ما بدنا ننسى انه أبو عمر لحاله ما بيقدر يشيل نادي الوحدة لانه النادي بيكلف مبالغ كبيرة كتير و هو عم يساهم باكتر شي بيقدر عليه وزيادة .

وما بدنا ننسى انه مسؤولية الدفع المفروض تكون على الشركة الراعية يلي عم تكسب كتير برعايتها للنادي سواء من دعاية أو غيره ورغم هيك مالها ملتزمة بالدفع وصرلها تقريبا 4 شهور ما دفعت شيئ يذكر للنادي ..!!!



كمان بدي خبركم انه مبارح صار اجتماعات بين الأستاذ صفوان مع عماد الشومان ومع وليد المهيدي لحل بعض المشاكل بلتنفيذية وبلنادي ..

وبعدها اجتمع أبو عمر مع باسل الشعار ورضوان الأزهر وكمان بوجودي والتنين وعدوا انو يشتغلوا ويلعبوا لمصلحة البرتقالي لانو وقت وقعوا بلنادي وقعوا للبرتقالي ..

رضوان وباسل بتهمن الامور الفنية بالدرجة الأولى يعني بيهمن يكون وضع الفريق منيح وعم يعمل نتائج جيدة
والامور المادية هنن عرفانين طول ما ابو عمر موجود ما بيروح عليهن مصاري بالإضافة انه عطاهن أبو عمر مبارح مصاري ...


بالمختصر المفيد الأستاذ صفوان نظام الدين قدم ومازال يقدم الكثير والكثير
للنادي مع انه طبعا هو غير مجبور أو ملزم انه يدفع شي بس كلشي عم يعمله
أبو عمر هو فقط نابع من حبه وعشقه لنادينا ..

وطلب الأستاذ أبو عمر منا كجمهور انه نوقف مع النادي ومع الكابتن عساف خاصة بهل فترة الحرجة هي ونكون كلنا عون للكابتن عساف متل ما كنا كلنا
كجمهور واقفين خلف أبو حامد

ونحنا بالنهاية يلي بيهمنا هو مصلحة النادي وبس بغض النظر عن الأسماء ..

شكراً لك يا أستاذ أبو عمر على كل شي عم تقدمه للنادي
والله يعوض عليك يا رب ويوفقك دائما وأبدا

شكرا يا كبير ...

[هدوء البحر]

انتهت مباراة فريقنا مع فريق أمية بنتيجة 0/0 بإدلب

النتيجة جيدة جدا تعتبر قياساً لظروف فريقنا ويلي مرت عليه
بالفترة الأخيرة

وكمان ما بدنا ننسى انه أمية فريق قوي ومجتهد وترتيبه رابع
وربح علينا بمباراة الذهاب بالشام (( لو كنا الطرف الأفضل )) ..


بكل الأحوال الحمد لله ع النتيجة وعلى كل حال وإن شاء الله
القادم أفضل وثقتنا بالكابتن عساف ورجاله كبيرة كتير


وهلئ عنا لعبتين ورى بعض بالشام الأولى مع النواعير والتانية مع حطين

[I_Love_Syria]

الله يعطيهن العافية الشباب ماعم يقصروا
سيدي الله يقويهن

[مايسترو]

رح ضل قول يا حرقة قلبي عليك يا وحدة

قال شو يابي كنا متفائئلين

باي ياي مع السلامة يا وحدة

[المحارب العتيق]

كاتب النص الأصلي : مايسترو

رح ضل قول يا حرقة قلبي عليك يا وحدة

قال شو يابي كنا متفائئلين

باي ياي مع السلامة يا وحدة

روء ولو . يلي عم يصير عادي . وبيصير بأي وقت وبكل الأندية

هلأ الشباب عندهم بوكرة مباراة مهمة بدوري السلة مع الجيش

الله يوفقهم